Afda lil Ġeħova u lil Ġesù u Temminx lil Satana

1. Satana liema tattika juża biex jipprova jwaqqafna milli naqdu lil Ġeħova?

MINN xħin niddeċiedu li naqdu lil Ġeħova, Satana u d-demonji tiegħu jsiru l-għedewwa tagħna u jipprovaw jagħmlu minn kollox biex iwaqqfuna milli naqdu lil Ġeħova. Imma Satana jaf li ma jistax jirbħilna jekk nibqgħu qrib taʼ Ġeħova u jkollna l-għajnuna tiegħu. Allura, ix-Xitan jipprova jdgħajjef din l-għajnuna billi jkun iridna nagħtu daharna lil Ġeħova. Mod kif jagħmel dan hu billi jipprova jdaħħlilna dubju li Ġeħova u Ibnu mhumiex verament fuq in-naħa tagħna.—2 Kor. 11:14; Ġak. 1:6.

2. Għala hu importanti li nafdaw għalkollox lil Alla Ġeħova u lil Ġesù Kristu?

² Meta jkunu f’battalja, is-suldati għandhom bżonn li jkollhom fiduċja fil-mexxejja tagħhom. Jekk jitilfu din il-fiduċja, huma jaf ma jibqgħux jobdu u dan jaf ikun perikoluż ħafna. Jistaʼ anki jiswielhom ħajjithom. B’mod simili, aħna qegħdin fi gwerra kontra Satana u “d-demonji.” (Efes. 6:12) Satana x-Xitan jaf li jekk aħna ma nibqgħux nafdaw f’Alla Ġeħova u f’Ġesù Kristu, x’aktarx li mhux se nibqgħu nobduhom. Allura hu jagħmel kulma jistaʼ biex idgħajjef din il-fiduċja. F’dan l-artiklu, se naraw kif hu uża din it-tattika fil-passat u kif għadu jużaha llum. Imbagħad se naraw kif nistgħu nevitaw li naqgħu fin-nassa tiegħu. Fl-artiklu li jmiss, se naraw żewġ tattiki oħra li Satana juża kontrina biex jipprova jwaqqafna milli naqdu lil Ġeħova.a

SATANA GIDEB FUQ ĠEĦOVA U ĠESÙ

3. Satana x’qalilha lil Eva biex idgħajjef il-fiduċja tagħha f’Ġeħova?

³ Ftit wara li Ġeħova ħalaq lil Adam u Eva, Satana prova jbegħedhom minn Ġeħova. Satana qarraq b’Eva billi ġegħelha temmen li l-Ħallieq tagħha mhux vera kien jimpurtah minnha. Satana staqsieha: “Veru li Alla qalilkom li ma tistgħux tieklu minn kull siġra tal-ġnien?” (Ġen. 3:​1-5) Satana kkonvinċa lil Eva li Ġeħova kien qed jitlob minnha u mir-raġel tagħha affarijiet mhux raġonevoli. B’dispjaċir, Eva u iktar tard Adam għamlu dak li ried Satana, l-għadu taʼ Ġeħova. Huma taw daharhom lil Ġeħova, il-Wieħed li kien tahom kollox.—Ġen. 3:6.

4. Satana liema gideb ried li Ġob jemmen dwar Ġeħova?

⁴ Minn żmien Adam u Eva, Satana baqaʼ jigdeb fuq Ġeħova. Pereżempju, Satana uża tlett irġiel biex jipprova jġiegħel lil Ġob jaħseb li Ġeħova ma jħobbux u li ma tagħmillux differenza jibqax leali jew le. (Ġob 22:​1-3) Ix-Xitan assuma li Ġob kien se jwaħħal f’Ġeħova għat-tbatija li kien qed ibati u li ma kienx se jibqaʼ jaqdih. Imma għalkemm Ġob kellu pressjoni kbira minħabba l-attakki taʼ Satana, hu baqaʼ leali lejn Ġeħova u baqaʼ japprezza l-ħbiberija li kellu miegħu.—Ġob 27:​1, 5.

5. Satana kif prova jżomm lin-nies milli jsiru dixxipli taʼ Ġesù? (Mattew 11:19)

⁵ Mijiet taʼ snin wara, meta Ġesù ġie fuq l-art, Satana prova jżomm lin-nies milli jsiru dixxipli taʼ Ġesù. Mod wieħed kif għamel dan hu billi uża l-mexxejja reliġjużi u oħrajn biex jigdbu dwar Ġesù għax kienu jobogħduh. U ħafna nies emmnu dawn il-gideb u spiċċaw qatluh bħala kriminal.—Aqra Mattew 11:19; 27:​27-31; Mrk. 14:​55, 56; Ġw. 8:​41-45.

6-7. Satana b’liema mod attakka lid-dixxipli taʼ Ġesù?

⁶ Wara li miet Ġesù, Satana tefaʼ l-attenzjoni tiegħu fuq ix-xogħol li kienu qed jagħmlu d-dixxipli taʼ Ġesù. Għall-ewwel, hu prova jdaħħal id-dubji dwar jekk Ġesù ġiex irxoxtat. Satana uża xi nies biex ixerred storja li d-dixxipli taʼ Ġesù kienu serqu l-ġisem tiegħu. (Mat. 28:​11-15) Imbagħad fil-ġranet taʼ wara, Satana prova jbeżżaʼ lill-kongregazzjoni permezz tal-persekuzzjoni. Satana ried ibeżżagħhom u jġegħelhom jaħsbu li x-xogħol li kien tahom Ġesù kien diffiċli wisq biex jagħmluh.—Atti 7:57–8:1; 12:​1-3; 28:22.

⁷ Għalkemm kien hemm xi wħud li beżgħu u ma baqgħux jippritkaw, il-biċċa l-kbira tad-dixxipli taʼ Ġesù baqgħu leali u baqgħu jgħidu lil oħrajn dwar Ġesù. Huma ndunaw li Satana u d-demonji kienu dawk li qed jipprovaw iwaqqfuhom. (Atti 4:​18-20; 1 Pt. 5:8) Xi ngħidu għal-lum? Satana liema tattiki qed juża biex jipprova jwaqqafna milli naqdu lil Ġeħova?

SATANA GĦADU JIGDEB FUQ ĠEĦOVA U ĠESÙ

8. Satana kif juża r-reliġjon falza biex ixerred il-gideb fuq Ġeħova u Ġesù?

⁸ Illum, waħda mill-iktar tattiki li Satana juża hi li jaħbi l-verità dwar Ġeħova u Ġesù. Bħala “missier il-gidba,” ix-Xitan ixerred il-gideb dwarhom permezz tar-reliġjon falza. (Ġw. 8:44) Pereżempju, hu ma jħallix lin-nies jaraw min huma verament Ġeħova u Ibnu. (2 Kor. 4:​3, 4) Xi mexxejja reliġjużi jgħallmu li Ġesù u Missieru huma persuna waħda. Minħabba f’hekk, ħafna nies iqimu lill-Iben u jinjoraw lill-Missier, li lanqas biss jafu x’jismu. La Ġeħova u lanqas Ġesù ma jaċċettaw din il-qima. (Mat. 4:10; Ġw. 4:23) Meta n-nies jemmnu dawn l-affarijiet, jaf ikun diffiċli biex tirraġuna magħhom u anki jopponu l-ministeru tagħna.

9. Satana kif uża r-reliġjonijiet foloz biex iwaqqaf lin-nies milli jsiru jafu lil Ġeħova? (Ġeremija 23:​26, 27)

⁹ Waħda mill-ewwel affarijiet li nitgħallmu dwar xi ħadd li rridu nsiru ħbieb tiegħu hu ismu. Satana jipprova jżomm lin-nies milli jkollhom ħbiberija mill-qrib maʼ Ġeħova billi ma jħallihomx ikunu jafu ismu. Satana ilu juża r-reliġjon falza biex iġiegħel lin-nies jinsew l-isem t’Alla. (Aqra Ġeremija 23:​26, 27.) Dan l-għadu saħansitra għamel ċert li jneħħi l-isem t’Alla minn ħafna traduzzjonijiet tal-Bibbja, minkejja li l-Bibbja tqabbel dan l-isem maʼ torri b’saħħtu u taʼ protezzjoni. (Prov. 18:10) Ix-Xitan ukoll hu l-wieħed li jġiegħel li n-nies jaħsbu li Ġeħova qed iġib it-tbatija. Minħabba f’hekk, nies sinċieri jsibuha diffiċli biex jaraw lil Ġeħova bħala ħabib li jistgħu jersqu qrib tiegħu. (Ġak. 4:8) Satana jipprova wkoll iwaqqaf lin-nies taʼ Ġeħova biex ma jkomplux jaqduh.

10. Kristjan għala għandu mnejn ikun irrabjat għal Ġeħova?

¹⁰ Meta nkunu għaddejjin minn żminijiet diffiċli, Satana jixtieq li aħna nemmnu li Ġeħova ma jimpurtahx minna. Satana jittama li aħna nirrabjaw għal Ġeħova għax iħallina nbatu. (Prov. 19:3) Dawk li jibdew iħossuhom hekk jaf jibdew jaħsbu: ‘La Ġeħova mhux jgħinni, għala għandi nibqaʼ nobdi l-liġijiet u l-prinċipji tiegħu?’ Dan it-tip taʼ raġunar jistaʼ jwassalna biex nagħmlu dak li jogħġob lil Satana u mhux lil Ġeħova.

11. Satana kif qed idaħħal id-dubji dwar il-livelli taʼ Ġeħova? (Ara wkoll l-istampa.)

¹¹ Satana juża affarijiet bħas-social media biex idaħħal id-dubji dwar il-livelli taʼ Ġeħova. Pereżempju, fuq l-internet, spiss ħafna nies iwaqqgħu għaċ-ċajt dak li tgħid il-Bibbja u jgħidu li n-nies m’għandhomx bżonn lil Alla biex jgħidilhom x’inhu tajjeb jew ħażin. Li nafu żgur hu, li “l-mexxej taʼ din id-dinja” jinqalaʼ ħafna biex jikkonvinċi lin-nies li dak li hu ħażin hu tajjeb.—Ġw. 14:30; Isa. 5:20; 1 Tim. 4:​1, 2.

12. Għala m’għandniex nagħtu kas x’jgħidu n-nies fid-dinja taʼ Satana dwar x’inhu tajjeb u ħażin?

¹² Jekk nagħtu kas x’jgħidu n-nies fid-dinja taʼ Satana dwar x’inhu tajjeb u ħażin, nistgħu nibdew naħsbu li dak li jgħidilna Ġeħova mhux sew. Żagħżugħa li se nsemmuha Shannon tgħid: “Domt naqra biex nirrealizza li l-livelli morali li kienu qed jgħallmuni l-iskola u n-nies li kont inkun magħhom kienu qed ibiddlu xi nqis tajjeb u ħażin. Iktar ma qattajt ħin naqra x’jgħidu n-nies fuq l-internet, iktar ridt inkun bħal dawn in-nies. Bil-mod il-mod bdejt nitbiegħed minn Ġeħova, mill-familja tiegħi u mill-aħwa.” Imma maż-żmien, Shannon għamlet il-bidliet li kien hemm bżonn u reġgħet saħħet il-ħbiberija li kellha maʼ Missierha Ġeħova. B’hekk, hi ma baqgħetx tħalli lil Satana jikkontrolla kif tirraġuna. X’għenha?

13. X’tgħallimt minn dak li għaddiet minnu Shannon?

¹³ Shannon irrealizzat li kellha bżonn tagħmel bidliet kbar biex tibqaʼ ħbieb maʼ Ġeħova u Ġesù. Hi tgħid: “Jien tlabtu jgħinni nsib ħbieb tajbin u anki għamilt riċerka fil-pubblikazzjonijiet tagħna. Il-vidjow Young People Ask—How Can I Make Real Friends? għenni ħafna.b L-oħt fil-vidjow kellha problema simili għal tiegħi. Hi kienet umli u talbet għall-għajnuna tal-ġenituri tagħha. Jien iddeċidejt li nagħmel bħalha. Il-ġenituri tiegħi, l-anzjani, u xi aħwa nisa maturi fil-kongregazzjoni għenuni nobgħod l-affarijiet li jobgħod Ġeħova u nagħżel ħbieb li jħobbuh. Tgħallimt li biex vera naqdi lil Ġeħova, kelli bżonn nagħmel iktar milli sempliċement immur il-laqgħat u nobdi l-ġenituri tiegħi. Kelli bżonn ukoll inżomm ħbiberija mill-qrib maʼ Ġeħova u nifhem għala nemmen dak li jgħidli permezz tal-Bibbja.”

KUN KONVINT LI ĠEĦOVA U ĠESÙ HUMA L-ĦBIEB TIEGĦEK

14. Kif nistgħu ma nħallux lil Satana jdgħajjef il-fidi tagħna? (Ara wkoll l-istampa.)

¹⁴ Biex nibqgħu ħbieb maʼ Ġeħova, hemm bżonn li noqogħdu attenti maʼ min nagħmluha. (Ġak. 4:4) Irridu noqogħdu attenti wkoll li ma nemmnux kulma naqraw jew nisimgħu mingħand in-nies tad-dinja. Pereżempju, jaf naqraw jew nisimgħu xi ħaġa li jew tkun kompletament gidba jew nofs verità. Jekk inkomplu nagħtu kas din it-tip taʼ informazzjoni, jaf nibdew nemmnu dak li ma ġarax. Imma jekk nistudjaw il-Bibbja u l-pubblikazzjonijiet tagħna u b’mod regulari nagħmluha m’aħwa maturi, mhux se nitfixklu malajr. Iktar ma nkunu nafu l-verità b’mod tajjeb, iktar hemm ċans li ma nħallux lil Satana jdgħajfilna l-fidi tagħna f’Ġeħova.—Prov. 13:20; Atti 17:11.

15. Kif nistgħu nkunu ċerti li Ġeħova u Ġesù qegħdin fuq in-naħa tagħna?

¹⁵ Meta nistudjaw il-Bibbja sew, nistgħu nkunu ċerti li Ġeħova u Ġesù qegħdin fuq in-naħa tagħna. (Prov. 22:19) Meta naħsbu fil-fond fuq rakkonti dwar kemm Ġeħova u Ġesù jimpurtahom min-nies, il-fiduċja tagħna fihom se tikber. Fil-Bibbja hemm ħafna versi li jaċċertawna li Ġeħova u Ġesù jħobbuna. Pereżempju, Ġeħova jiddeskrivi l-emozzjonijiet għan-nies tiegħu bħala li huma iktar b’saħħithom minn dawk taʼ omm li jkollha għat-tarbija tagħha. (Isa. 49:15) Hu qal ukoll li n-nies li jħobbu lil ismu tant huma speċjali għalih li huma bħal teżor. (Mal. 3:​16, 17) Fil-Bibbja nistgħu naraw kemm iħobbna Ġesù. Fil-fatt, hu kien lest li jmut għalina.—Ġw. 15:​12, 13.

16. Għala jkun tajjeb li naħsbu fuq dak li għaddejna minnu aħna u ħaddieħor? (Salm 118:​5, 6)

¹⁶ Meta naħsbu dwar l-għajnuna li Ġeħova u Ġesù jagħtuna llum, jistaʼ jgħinna wkoll inkunu ċerti minn kemm iħobbuna. Nistgħu nfakkru lilna nfusna fiż-żminijiet meta ħassejna li Ġeħova kien viċin tagħna, u b’hekk nistgħu nkunu ċerti li Ġeħova se jibqaʼ jieħu ħsiebna. Nistgħu anki nsaqsu lil ħutna kif għenhom Ġeħova. (Prov. 22:17) Meta nagħmlu hekk, nistgħu nkunu ċerti li tkun xi tkun l-isfida tagħna, Ġeħova u Ġesù se jkunu fuq in-naħa tagħna.—Aqra Salm 118:​5, 6.

17. Skont Ġwanni 10:​29, Ġesù kif jaċċerta lil dawk kollha li jibqgħu qrib tiegħu u taʼ Missieru?

¹⁷ Aħna rridu nibqgħu ħbieb mill-qrib m’Alla Ġeħova u Ġesù Kristu. Imma sakemm Satana u d-demonji tiegħu jiġu meqrudin għal dejjem, aħna se jkollna nibqgħu niġġildulhom u ma nħalluhomx idgħajfulna l-fiduċja tagħna f’Ġeħova u Ġesù. (Riv. 20:​1-3, 10) Biex niġġieldu t-tattiki tal-għedewwa tagħna, hemm bżonn li nżommu ħbiberija mill-qrib maʼ Ġeħova u nibqgħu konvinti li hu u Ibnu l-għażiż iħobbuna u japprezzawna. Imbagħad, bħalma qal Ġesù, ħadd ma jkun jistaʼ ‘jaħtfek minn id Missieru.’—Aqra Ġwanni 10:29; Ġak. 4:7.

18. X’se niddiskutu fl-artiklu li jmiss?

¹⁸ Satana juża żewġ modi oħra biex jipprova jeqred il-ħbiberija li għandna maʼ Ġeħova. Dan jagħmlu billi jipprova jkisser il-ħbiberija tajba li għandna maʼ ħutna u jinfluwenza lin-nies biex jippersegwitawna. Kif nistgħu niġġieldu kontra dawn iż-żewġ tattiki? Dan se narawh fl-artiklu li jmiss.