L-Erbgħa, 18 taʼ Marzu
“Peress li Ġesù kien jaf li dalwaqt kienu se jaqbduh biex jagħmluh re, hu reġaʼ mar lejn il-muntanja waħdu.”—Ġw. 6:15.
Li kieku Ġesù ħalliehom jagħmluh re, kien ikun qed jieħu sehem fil-politika u jżomm mal-Lhud li kienu kontra r-Rumani. Hu “mar lejn il-muntanja waħdu.” Allura avolja kellu pressjoni kbira minn oħrajn, hu ma kellux x’jaqsam mal-politika. Din hi lezzjoni importanti ħafna għalina! Ovvjament, illum ħadd mhu se jsaqsina biex nagħmlu miraklu ħalli nipprovdu l-ikel, infejqu l-morda, jew iġegħluna mmexxu l-pajjiż. Imma jaf jistaqsuna biex nagħtu s-sapport tagħna fil-politika jew nivvotaw għal dawk li jaħsbu li huma mexxejja tajbin. Però, l-eżempju taʼ Ġesù huwa ċar. Hu ma kellux x’jaqsam mal-politika, u iktar tard qal: “Is-Saltna tiegħi mhix parti minn din id-dinja.” (Ġw. 17:14; 18:36) Illum bħala Kristjani rridu naħsbu bħal Ġesù u nimitawh. Aħna nissapportjaw is-Saltna t’Alla, ngħidu lil oħrajn dwarha, u nitolbu biex din is-Saltna tiġi.—Mat. 6:10. w24.12 4 ¶5-6
Il-Ħamis, 19 taʼ Marzu
“Kull min jaċċetta u jobdi dak li nikkmanda, iħobbni. U min iħobb lili, Missieri se jħobbu. Jien ukoll se nħobbu u nurih ċar min jien.”—Ġw. 14:21.
Meta tkun qed tistudja aħseb dwar kif tistaʼ tapplika dak li titgħallem. Pereżempju, imita l-ġustizzja taʼ Ġeħova billi tittratta lil kulħadd l-istess. Imita l-imħabba taʼ Ġesù għal Missieru u għan-nies billi tkun lest li tobdi lil Ġeħova u tgħin lill-aħwa anki jekk ikollok tagħmel xi sagrifiċċji. Barra minn hekk, imita lil Ġesù billi tagħti xhieda lil oħrajn ħalli huma wkoll ikollhom iċ-ċans jitgħallmu x’għamel Ġeħova għalina u juru fidi fil-fidwa. Iktar ma nitgħallmu dwar il-fidwa u napprezzawha, iktar se nsiru nħobbu lil Ġeħova u Ġesù. U minħabba f’hekk huma wkoll se jħobbuna iżjed. (Ġak. 4:8) Mela uża kulma jtina Ġeħova biex tkompli titgħallem dwar il-fidwa. w25.01 25 ¶16-17
Il-Ġimgħa, 20 taʼ Marzu
“Int tfajt id-dnubiet kollha tiegħi wara dahrek.”—Isa. 38:17.
L-iskrittura tal-lum tgħid: “Int tfajt dnubieti kollha wara dahrek.” Dan juri li Ġeħova jarmi d-dnubiet taʼ dawk li jindmu u qatt ma jerġaʼ jħares lejhom. Allura, id-dnubiet ikunu qishom qatt ma ġraw. Il-Bibbja tagħti eżempju sabiħ ieħor f’Mikea 7:18, 19. Hemmhekk tgħid li Ġeħova jixħet id-dnubiet f’qiegħ il-baħar. Fi żmien il-Bibbja, meta xi ħadd kien jarmi xi ħaġa fil-baħar qatt ma kien jerġaʼ jsibha. Bl-eżempji li rajna nistgħu nifhmu li meta Ġeħova jaħfrilna, hu jneħħi d-dnub tagħna għalkollox u ma jkunx hemm għalfejn inħossuna ħażin. Ir-Re David qal: “Ferħanin huma dawk li l-iżbalji tagħhom inħafrulhom u li dnubiethom intesew.” (Rum. 4:7) Din hi maħfra taʼ vera! w25.02 9 ¶7-8