“Min Poġġa l-​Għerf fis-​Saffi tas-​Sħab”?

“META taraw sħaba tielgħa mill-​punent, malajr tgħidu li tkun ġejja x-​xita; u hekk jiġri. U meta jonfoħ ir-​riħ isfel, tgħidu li sħana se tagħmel; u tagħmel tassew.” Dan il-​kliem taʼ Ġesù, miktub mill-​kittieb tal-​Vanġelu, Luqa, huwa eżempju taʼ tbassir tat-​temp kif kien isir fil-​Palestina tal-​qedem. (Luqa 12:54, 55) F’ċerti ċirkustanzi, in-​nies tal-​qedem setgħu jaqraw is-​sinjali u jagħmlu taħbir eżatt għal żmien qasir.

Illum, il-​meteorologi jużaw strumenti sofistikati, bħas-​satelliti li jorbitaw mad-​dinja, ir-​radar Doppler, u kompjuters qawwijin, biex ikejlu kif se jkun it-​temp għal perijodi twal. Imma t-​taħbir tagħhom taʼ spiss ikun żbaljat. Għala?

Hemm ħafna fatturi li jagħmluh diffiċli t-​tbassir eżatt tat-​temp. Per eżempju, bidliet mhux mistennijin fit-​temperatura, fl-​umdità, fil-​pressjoni taʼ l-​arja, u fil-​veloċità u d-​direzzjoni tar-​riħ jistgħu jikkomplikaw l-​affarijiet. Iktar minn hekk, hemm l-​effetti kumplessi tax-​xemx, tas-​sħab, u tal-​baħar, li x-​xjenzati għadhom ma fehmuhomx għalkollox. Għal din ir-​raġuni, it-​tbassir tat-​temp għadu xjenza mhix eżatta.

L-għerf limitat tal-​bniedem dwar it-​temp ifakkarna fil-​mistoqsija li staqsa Ġob: “Min welled lill-​qtar tan-​nida? Miż-​żaqq taʼ min is-​silġ attwalment joħroġ? . . . Tistaʼ int tgħolli leħnek saħansitra sas-​sħaba, sabiex massa mmewġa t’ilma nfisha tistaʼ tgħattik? . . . Min poġġa l-​għerf fis-​saffi tas-​sħab, jew min ta fehma lill-​fenomenu tas-​sema? Min jistaʼ jgħodd eżatt l-​isħab bil-​għerf, jew il-​ġarar taʼ l-​ilma tas-​sema​—min jistaʼ jaqlib[hom]?”—Ġob 38:28-37, NW.

It-tweġiba għal dawn il-​mistoqsijiet kollha hi, Mhux il-​bniedem imma Alla Jehovah. Iva, ikunu kemm ikunu għorrief il-​bnedmin, l-​għerf tal-​Ħallieq tagħna huwa bil-​wisq superjuri. Verament li juri mħabba min-​naħa tiegħu meta jagħmel l-​għerf tiegħu disponibbli għalina fil-​paġni tal-​Bibbja, sabiex jistaʼ jkollna suċċess.—Proverbji 5:1, 2.