Għin Biex il-​Kongregazzjoni Tibqaʼ Magħquda

Meta nkunu ma’ ħutna spiritwali, inħossuna bħas-​Sultan David: ‘Kemm hu tajjeb u sabiħ li l-​aħwa jgħixu flimkien f’unità!’ (Salm 133:1) L-​unità, jew li nkunu magħqudin, ma tiġix mix-​xejn. Kulħadd irid jagħmel sforz biex nibqgħu magħqudin.

1. X’jagħmel lin-​nies t’Alla differenti?

Jekk tmur laqgħa f’pajjiż ieħor, għalkemm ma tifhimx il-​lingwa, xorta se tħossok komdu u l-​aħwa se jilqgħuk u jħobbuk. Għala? Għax kull fejn tmur se ssib li aħna nistudjaw il-​Bibbja bl-​istess pubblikazzjonijiet. U nagħmlu minn kollox biex inħobbu lil xulxin. Ngħixu fejn ngħixu, aħna ‘nsejħu isem Ġeħova, biex naqduh spalla ma’ spalla,’ jiġifieri magħqudin flimkien.​—Sofonija 3:9.

2. X’tistaʼ tagħmel biex l-​aħwa jkunu iżjed magħqudin?

“Ħobbu lil xulxin mill-​qalb bil-​ħeġġa kollha.” (1 Pietru 1:​22) Kif tistaʼ tagħmel hekk? Minflok tħares lejn l-​iżbalji t’oħrajn, ħares lejn it-​tajjeb tagħhom. Tqattax il-​ħin biss m’aħwa li huma bħalek jew li jħobbu l-​istess affarijiet, imma pprova sir af ukoll aħwa li huma differenti minnek. Tajjeb li naħdmu iebes biex inneħħu xi ideat ħżiena li jistaʼ jkollna dwar ħaddieħor.​—Aqra l-​1 Pietru 2:​17.a

3. X’se tagħmel meta Kristjan ieħor iweġġgħek?

Għalkemm magħqudin, kollha niżbaljaw. Kultant niddiżappuntaw jew anki nweġġgħu lil xulxin. Il-​Bibbja tgħidilna “komplu . . . aħfru lil xulxin.” Imbagħad tkompli tgħid: “Bħalma Ġeħova ħafrilkom mill-​qalb, agħmlu hekk intom ukoll.” (Aqra Kolossin 3:​13.) Lil Ġeħova kemm-​il darba weġġajnieh, imma hu xorta ħafrilna. Allura jistenna li naħfru lil ħutna. Jekk tinduna li weġġajt lil xi ħadd, mur irranġa l-​affarijiet miegħu.​—Aqra Mattew 5:​23, 24.b

TGĦALLEM IŻJED

4. Ħobb lil min hu differenti minnek

Aħna rridu nħobbu lill-​aħwa kollha. Imma forsi nsibuha diffiċli biex nagħmluha ma’ xi ħadd li hu differenti minna. X’se jgħinna? Aqra Atti 10:​34, 35, u mbagħad iddiskuti:

• Ġeħova jaċċetta lil kull tip taʼ nies. Kif nistgħu nimitawh meta nkunu ma’ dawk li għandhom background differenti minn tagħna?

• In-​nies fejn toqgħod int, kif jittrattaw ħażin lil min hu differenti minnhom? Għala ma tridx taħseb u tagħmel bħalhom?

Aqra t-​2 Korintin 6:​11-​13, u mbagħad iddiskuti:

• Kif tistaʼ tħobb aktar lil ħutek li għandhom background differenti minn tiegħek?

5. Aħfer mill-​qalb u żomm il-​paċi

Aħna qatt m’għandna bżonn naħfru lil Ġeħova imma hu xorta jaħfrilna. Aqra Salm 86:​5, u mbagħad iddiskuti:

• X’titgħallem dwar Ġeħova?

• Għala tapprezza li jaħfer?

• Liema sitwazzjonijiet jistgħu jagħmluha diffiċli biex inżommu l-​paċi m’oħrajn?

Kif nistgħu nimitaw lil Ġeħova u nibqgħu nħobbu lil ħutna? Aqra Proverbji 19:​11, u mbagħad iddiskuti:

• Jekk xi ħadd iqabbiżhielek jew iweġġgħek, x’tistaʼ tagħmel biex is-​sitwazzjoni tkun aħjar?

Kultant inweġġgħu lil oħrajn. X’għandna nagħmlu meta jiġri hekk? Ara l-​VIDJOW, u mbagħad iddiskuti l-​mistoqsija.

VIDJOW: Li tagħmel paċi jġib barkiet (6:​01)

• Fil-​vidjow, l-​oħt x’għamlet biex tirranġa mal-​oħt l-​oħra?

6. Fittex it-​tajjeb f’ħutek

Meta nsiru nafu lil ħutna, se nsiru nafu t-​tajjeb u l-​ħażin tagħhom. Kif nistgħu niffokaw fuq it-​tajjeb tagħhom? Ara l-​VIDJOW, u mbagħad iddiskuti l-​mistoqsija.

VIDJOW: Siru Isbaħ! (5:​10)

• X’se jgħinek tara t-​tajjeb f’ħutek?

Ġeħova jiffoka fuq it-​tajjeb tagħna. Aqra t-​2 Kronaki 16:9a, u mbagħad iddiskuti:

• Kif tħossok li Ġeħova jiffoka fuq it-​tajjeb tiegħek?

XI DDISKUTEJNA?

Int tistaʼ tgħin biex il-​kongregazzjoni tibqaʼ magħquda billi taħfer u turi li tħobb lill-​aħwa kollha.

X’Tgħallimt

• Kif tistaʼ tħobb lil kulħadd, anki dawk li huma differenti minnek?

• X’se tagħmel jekk int u Kristjan ieħor ma taqblux fuq xi ħaġa?

• Għala għandek timita lil Ġeħova meta taħfer lil oħrajn?

ARA IŻJED

Ara kif wieħed mill-​eżempji taʼ Ġesù jgħinna ma niġġudikawx lil oħrajn.

Neħħi t-​travu (6:​56)

Hemm għalfejn niskużaw ruħna anki meta nħossu li m’għamilna xejn ħażin?

“L-​Apoloġija​—Mod Effettiv biex Tagħmel Paċi” (It-​Torri tal-​Għassa, 1 taʼ Novembru 2002)

Ara kif xi wħud tgħallmu ma jiġġudikawx lil oħrajn.

Tiġġudikax Fuq Dak li Jidher minn Barra (5:06)

Sir af kif tistaʼ ssolvi problema li għandek maʼ xi ħadd qabel ma teffettwa l-​paċi tal-​kongregazzjoni.

“Irranġa kull nuqqas taʼ qbil bi mħabba” (It-​Torri tal-​Għassa, Mejju 2016)

1. X’jagħmel lin-​nies t’Alla differenti?

Jekk tmur laqgħa f’pajjiż ieħor, għalkemm ma tifhimx il-​lingwa, xorta se tħossok komdu u l-​aħwa se jilqgħuk u jħobbuk. Għala? Għax kull fejn tmur se ssib li aħna nistudjaw il-​Bibbja bl-​istess pubblikazzjonijiet. U nagħmlu minn kollox biex inħobbu lil xulxin. Ngħixu fejn ngħixu, aħna ‘nsejħu isem Ġeħova, biex naqduh spalla ma’ spalla,’ jiġifieri magħqudin flimkien.​—Sofonija 3:9.