1 Crónicas

27 Ta 24,000 xi̱kuu iin tá iin tiʼvi na̱ israelita na̱ nda̱taʼvína. Na̱yóʼo kúú na̱ xi̱niʼi yichi̱ nu̱ú na̱ veʼena, na̱ xi̱niʼi yichi̱ nu̱ú mil na̱ ta̱a, na̱ xi̱niʼi yichi̱ nu̱ú iin cientona xíʼin ndiʼika na̱ soldado na̱ xi̱kachíñu nu̱ú ta̱ rey na̱ xa̱a̱ nda̱kaxinna ña̱ kachíñuna yo̱o̱ tá yo̱o̱ iníí ku̱i̱ya̱.

2 Ta̱ Jasobeam se̱ʼe ta̱ Zabdiel kúú ta̱ xi̱niʼi yichi̱ nu̱ú na̱ xi̱kachíñu yo̱o̱ nu̱ú, ta 24,000 xi̱kuu ndiʼi na̱ ta̱a yóʼo. 3 Nu̱ú ndiʼika na̱ veʼe ta̱ Pérez, miíra kúú ta̱ xi̱niʼi yichi̱ nu̱ú ndiʼika na̱ xi̱kachíñu yo̱o̱ nu̱ú. 4 Ta̱ xi̱niʼi yichi̱ nu̱ú inka tiʼvi na̱ xi̱kachíñu yo̱o̱ u̱vi̱ xi̱kuu ta̱ Dodái ta̱ ahohíta ta ta̱ Miclot kúú ta̱ xi̱chindeétáʼan xíʼinra, ta 24,000 xi̱kuu ndiʼi na̱ ta̱a yóʼo. 5 Ta̱ xi̱niʼi yichi̱ nu̱ú inka tiʼvi na̱ xi̱kachíñu yo̱o̱ u̱ni̱ xi̱kuu ta̱ Benaya se̱ʼe ta̱ su̱tu̱ káʼnu Jehoiadá, ta 24,000 xi̱kuu ndiʼi na̱ ta̱a yóʼo. 6 Ndakúní ni̱xi̱yo ta̱ Benaya ta xi̱xini̱níra kanitáʼanra ta xi̱kitáʼanra xíʼin inka 30 na̱ ta̱a ta miíra kúú ta̱ xi̱niʼi yichi̱ nu̱úna, ta se̱ʼera ta̱ Amizabad kúú ta̱ xi̱chindeétáʼan xíʼinra ña̱ kuniʼira yichi̱ nu̱ú na̱ ta̱a na̱ xi̱kachíñu yo̱o̱ u̱ni̱. 7 Ta̱ Asahel ñani ta̱ Joab kúú ta̱ xi̱niʼi yichi̱ nu̱ú na̱ xi̱kachíñu yo̱o̱ ku̱mí ta se̱ʼera ta̱ Zebadías kúú ta̱ ke̱ʼé chiñu yóʼo tándi̱ʼi, ta 24,000 xi̱kuu ndiʼi na̱ ta̱a yóʼo. 8 Ta̱ Samhut ta̱ izrahíta kúú ta̱ xi̱niʼi yichi̱ nu̱ú na̱ xi̱kachíñu yo̱o̱ u̱ʼu̱n, ta 24,000 xi̱kuu ndiʼi na̱ ta̱a yóʼo. 9 Ta̱ Irá se̱ʼe ta̱ Iqués ta̱ tecoíta kúú ta̱ xi̱niʼi yichi̱ nu̱ú na̱ xi̱kachíñu yo̱o̱ i̱ñu̱, ta 24,000 xi̱kuu ndiʼi na̱ ta̱a yóʼo. 10 Ta̱ Hélez ta̱ pelonita, ta̱ ki̱xi ti̱xin veʼe na̱ efraimita, kúú ta̱ xi̱niʼi yichi̱ nu̱ú na̱ xi̱kachíñu yo̱o̱ u̱xa̱ ta 24,000 xi̱kuu ndiʼi na̱ ta̱a yóʼo. 11 Ta ta̱ xi̱niʼi yichi̱ nu̱ú na̱ xi̱kachíñu yo̱o̱ u̱na̱ xi̱kuu ta̱ Sibecái ta̱ husatita, ta̱ ki̱xi ti̱xin veʼe na̱ zerahíta, ta 24,000 xi̱kuu ndiʼi na̱ ta̱a yóʼo. 12 Ta ta̱ xi̱niʼi yichi̱ nu̱ú na̱ xi̱kachíñu yo̱o̱ i̱i̱n xi̱kuu ta̱ Abí-Ézer ta̱ anatotita, ta̱ ki̱xi ti̱xin veʼe na̱ benjaminita, ta 24,000 xi̱kuu ndiʼi na̱ ta̱a yóʼo. 13 Ta̱ xi̱niʼi yichi̱ nu̱ú na̱ xi̱kachíñu yo̱o̱ u̱xu̱ xi̱kuu ta̱ Maharái ta̱ netofatita, ta̱ ki̱xi ti̱xin veʼe na̱ zerahíta, ta 24,000 xi̱kuu ndiʼi na̱ ta̱a yóʼo. 14 Ta̱ xi̱niʼi yichi̱ nu̱ú na̱ xi̱kachíñu yo̱o̱ u̱xu̱ iin, xi̱kuu ta̱ Benaya ta̱ piratonita, ta̱ ki̱xi ti̱xin veʼe ta̱ Efraín, ta 24,000 xi̱kuu ndiʼi na̱ ta̱a yóʼo. 15 Ta̱ xi̱niʼi yichi̱ nu̱ú na̱ xi̱kachíñu yo̱o̱ u̱xu̱ u̱vi̱ xi̱kuu ta̱ Heldái ta̱ netofatita, ta̱ ki̱xi ti̱xin na̱ veʼe ta̱ Otniel, ta 24,000 xi̱kuu ndiʼi na̱ ta̱a yóʼo.

16 Na̱yóʼo kúú na̱ xi̱niʼi yichi̱ nu̱ú na̱ tribu na̱ ñuu Israel: ta̱ xi̱niʼi yichi̱ nu̱ú na̱ tribu ta̱ Rubén xi̱kuu ta̱ Eliezer se̱ʼe ta̱ Zicrí; ta̱ xi̱niʼi yichi̱ nu̱ú na̱ tribu ta̱ Simeón xi̱kuu ta̱ Sefatías se̱ʼe ta̱ Maacá; 17 ta̱ xi̱niʼi yichi̱ nu̱ú na̱ tribu ta̱ Leví xi̱kuu ta̱ Hasabías se̱ʼe ta̱ Quemuel; ta̱ xi̱niʼi yichi̱ nu̱ú na̱ veʼe ta̱ Aarón xi̱kuu ta̱ Sadoc; 18 ta̱ xi̱niʼi yichi̱ nu̱ú na̱ tribu ta̱ Judá xi̱kuu ta̱ Elihú, iin ta̱ xi̱kuu ñani ta̱ David; ta̱ xi̱niʼi yichi̱ nu̱ú na̱ tribu ta̱ Isacar xi̱kuu ta̱ Omrí se̱ʼe ta̱ Miguel; 19 ta̱ xi̱niʼi yichi̱ nu̱ú na̱ tribu ta̱ Zabulón xi̱kuu ta̱ Ismayá se̱ʼe ta̱ Abdías; ta̱ xi̱niʼi yichi̱ nu̱ú na̱ tribu ta̱ Neftalí xi̱kuu ta̱ Jerimot se̱ʼe ta̱ Azriel; 20 ta̱ xi̱niʼi yichi̱ nu̱ú na̱ tribu ta̱ Efraín xi̱kuu ta̱ Hosea se̱ʼe ta̱ Azazías; ta̱ xi̱niʼi yichi̱ nu̱ú iin táʼví na̱ tribu ta̱ Manasés xi̱kuu ta̱ Joel se̱ʼe ta̱ Pedaya; 21 ta̱ xi̱niʼi yichi̱ nu̱ú inka táʼví na̱ tribu ta̱ Manasés na̱ xi̱ndoo chí Galaad xi̱kuu ta̱ Idó se̱ʼe ta̱ Zacarías; ta̱ xi̱niʼi yichi̱ nu̱ú na̱ tribu ta̱ Benjamín xi̱kuu ta̱ Jaasiel se̱ʼe ta̱ Abner, 22 ta̱ xi̱niʼi yichi̱ nu̱ú na̱ tribu ta̱ Dan xi̱kuu ta̱ Azarel se̱ʼe ta̱ Jeroham. Na̱yóʼo kúú ndiʼi na̱ xi̱niʼi yichi̱ nu̱ú na̱ tribu na̱ ñuu Israel.

23 Ta̱ David kǒo níndakaʼvira na̱ xi̱kuumií 20 ku̱i̱ya̱ á loʼoka, saáchi Jehová ni̱ka̱ʼa̱nra ña̱ ku̱a̱ʼání koo na̱ ñuu Israel nda̱a̱ táki̱ʼva ku̱a̱ʼání kúú ki̱mi íyo chí ndiví. 24 Ta̱ Joab se̱ʼe ñá Zeruyá ki̱xáʼara ndákaʼvira ndiʼi na̱ ñuu soo kǒo nísandíʼira ndakaʼvirana. Ta xa̱ʼa̱ ña̱ nda̱kaʼvina na̱ ñuu ni̱sa̱a̱ní Ndióxi̱ xíʼin na̱ ñuu Israel ta kǒo níkaʼyina ña̱yóʼo nu̱ú libro ña̱ káʼa̱n xa̱ʼa̱ ta̱ rey David.

25 Ta̱ Azmávet se̱ʼe ta̱ Adiel kúú ta̱ xi̱kiʼin kuenta xíʼin cuarto nu̱ú xi̱ndataánva̱ʼana* ña̱ʼa ña̱ ndáyáʼvi ña̱ xi̱kuu kuenta ta̱ rey. Ta̱ Jonatán se̱ʼe ta̱ Uzías kúú ta̱ xi̱kiʼin kuenta xíʼin nu̱ú xi̱ndataánva̱ʼana ña̱ʼa* ña̱ ni̱xi̱yo chí yuku̱, ñuu náʼnu, ñuu válí ta saátu nu̱ú ni̱xi̱yo veʼe súkun. 26 Ta̱ Ezrí se̱ʼe ta̱ Kelub kúú ta̱ xi̱niʼi yichi̱ nu̱ú na̱ xi̱kachíñu chí yuku̱ ña̱ va̱ʼa chiʼina. 27 Ta̱ Simeí ta̱ ramatita kúú ta̱ xi̱kiʼin kuenta xíʼin ñuʼú nu̱ú xi̱chiʼina tú uva. Ta̱ Zabdí ta̱ sifmita kúú ta̱ xi̱kiʼin kuenta xíʼin veʼe nu̱ú xi̱ndataánva̱ʼana vino tá ku̱vaʼa xíʼin uva. 28 Ta̱ Baal-Hanán ta̱ guederita kúú ta̱ xi̱kiʼin kuenta xíʼin tú olivo ta saátu xíʼin tú sicómoro tú ni̱xi̱yo chí Sefelá. Ta ta̱ Joás kúú ta̱ xi̱kiʼin kuenta xíʼin veʼe nu̱ú xi̱ndataánva̱ʼana aceite. 29 Ta̱ Sitrái ta̱ saronita kúú ta̱ xi̱kiʼin kuenta xíʼin si̱ndi̱ki̱ síʼi tí xi̱kixáʼan* chí Sarón, ta ta̱ Safat se̱ʼe ta̱ Adlái kúú ta̱ xi̱kiʼin kuenta xíʼin si̱ndi̱ki̱ síʼi tí xi̱ndoo chí yoso̱. 30 Ta̱ Obil ta̱ ismaelita kúú ta̱ xi̱kiʼin kuenta xíʼin tí camello. Ta̱ Jehdeyá ta̱ meronotita kúú ta̱ xi̱kiʼin kuenta xíʼin tí burro, 31 ta̱ Jaziz ta̱ hagrita kúú ta̱ xi̱kiʼin kuenta xíʼin ndikachi* ta saátu xíʼin ti̱xúʼú.* Ndiʼi na̱yóʼo kúú na̱ xi̱kiʼin kuenta xíʼin ña̱ʼa ña̱ xi̱kuumií ta̱ rey David.

32 Ta̱ Jonatán xa̱xi̱n ta̱ David xi̱kuura iin ta̱a ta̱ ndíchiní, xi̱taxira consejo ta xi̱kuutura secretario. Ta̱ Jehiel se̱ʼe ta̱ Hacmoní xi̱kuu ta̱ xi̱sanáʼa̱ na̱ se̱ʼe ta̱ rey. 33 Ta̱ Ahitofel kúú ta̱ xi̱taxi consejo ndaʼa̱ ta̱ rey, ta ta̱ Husái ta̱ arkita xi̱kuu migo ta̱ rey. 34 Tá va̱ása níxi̱taxika ta̱ Ahitofel consejo ndaʼa̱ ta̱ rey, ta̱ Benaya xíʼin ta̱ Abiatar kúú na̱ xi̱keʼé chiñu yóʼo ta ta̱ Joab kúú ta̱ xi̱niʼi yichi̱ nu̱ú na̱ soldado ta̱ rey.