Isaías
16 Chindaʼándó iin ndikachi* che̱e nu̱ú ta̱ xáʼndachíñu ñuu yóʼo,
keerí ñuu Sela, ya̱ʼarí nu̱ú ñuʼú yi̱chí
ta xa̱a̱rí yuku̱ ña̱ íyo chí Sion.
2 Nda̱a̱ táki̱ʼva yíʼvi tí saa tí táxínna, tí ndíkaa̱ chi̱ʼyo̱rí
saá keʼé na̱ ñuu Moab chí nu̱ú yáʼa na̱ yiví chí Arnón.
3 “Taxindó consejo, ndaka̱xinndó ndáaña keʼéndó.
Tá káʼñu* chinúún iin ku̱nda̱ti̱* sa̱tána ta naaní ná kooña nda̱a̱ táki̱ʼva naa ñuú.
Chise̱ʼé na̱ xi̱nu ku̱a̱ʼa̱n ta va̱ása ndataxiúnna ndaʼa̱ na̱ sáa̱-ini xíniñaʼá.
4 Na̱ ñui̱ na̱ xi̱nu ku̱a̱ʼa̱n ná kundoona ñuu Moab.
Chise̱ʼéna nu̱ú na̱ kúni̱ sandíʼi-xa̱ʼa̱ miína.
Tá ná ndiʼi-xa̱ʼa̱ ta̱ íxandi̱va̱ʼa xíʼinna,
saá va̱ása kooka na̱ sandíʼi-xa̱ʼa̱ miína
ta na̱ íxandi̱va̱ʼa xíʼin inkana va̱ása kundookana nu̱ú ñuʼú.
5 Tasaá, iin ta̱ rey ta̱ kee ti̱xin na̱ veʼe ta̱ David koora nu̱ú tayi̱ nu̱ú kaʼndachíñura.
Ta̱yóʼo nda̱kúní koo inira ta tá ná kaʼndachíñura ndixaní kuʼvi̱-inira* kunira na̱ yiví,
va̱ása ndaka̱xinra na̱ ndatiinra ku̱a̱chi xíʼin ta ndi̱ku̱n kama ndatiinra ku̱a̱chi xíʼinna”.
6 Xi̱niso̱ʼondi̱ ña̱ kúta̱aní-ini na̱ ñuu Moab,
ni̱nuní kúnina ta sáa̱nína
soo tu̱ʼun ña̱ káʼa̱nna va̱ása ndáyáʼviña.
7 Tasaá na̱ ñuu Moab kuakuna xa̱ʼa̱ ñuuna;
ndiʼi na̱kán ndeéní kusuchí-inina.
Na̱yóʼo kuakuna xa̱ʼa̱ pasa* tí íyo chí Quir-Haréset.
8 Saáchi ni̱yi̱chi̱ ñuʼú ña̱ Hesbón nu̱ú xi̱chiʼina,
saátu ni̱yi̱chi̱ tú uva na̱ Sibmá;
na̱ xáʼndachíñu nu̱ú na̱ ñuu ni̱xa̱ñi̱na* ndaʼa̱nú ña̱ color kúáʼa;*
nda̱a̱ chí Jazer ni̱xa̱a̱ ndaʼa̱nú
ta ni̱ka̱a̱ña nda̱a̱ nu̱ú ñuʼú yi̱chí.
Xa̱ʼnuní ndaʼa̱nú ta nda̱a̱ mar ni̱xa̱a̱ña.
9 Ña̱kán kuakui̱ xa̱ʼa̱ tú uva tú íyo chí Sibmá, nda̱a̱ táki̱ʼva xákui̱ xa̱ʼa̱ ñuu Jazer.
Sandáxii̱* ñuu Hesbón ta saátu ñuu Elealé xíʼin ti̱kui̱í nu̱úi̱,
saáchi va̱ása nda̱ʼyi̱ kóʼókana* xa̱ʼa̱ ku̱i̱ʼi tí kána tiempo niʼní ni xa̱ʼa̱ ña̱ sákeena.*
10 Va̱ása kúsi̱íka-inina nu̱ú chi̱ʼina
kǒoka na̱ xíta ta ni kǒoka na̱ ndáʼyi̱ kóʼó xa̱ʼa̱ ña̱ kúsi̱í-inina chí nu̱ú íyo tú uva.
Kǒoka na̱ kúʼni tí uva xíʼin xa̱ʼa̱na nu̱ú kúʼninarí,
va̱ása taxikai̱ nda̱ʼyi̱ kóʼóna.
11 Nda̱a̱ táki̱ʼva kísi yi̱ʼva̱ tú arpa,
saá kísi-inii̱ xa̱ʼa̱ ñuu Moab,
ta kúsuchíní-inii̱ xa̱ʼa̱ ñuu Quir-Haréset.
12 Ni ná kunaa na̱ ñuu Moab ña̱ ndasakáʼnuna ndióxi̱na nu̱ú súkun* ta ni ku̱a̱ʼání ná ka̱ʼa̱nna xíʼin ndióxi̱na nu̱ú ndásakáʼnunana, kǒo ña̱ ni̱ʼína.
13 Ña̱yóʼo kúú ña̱ xa̱a̱ ni̱ka̱ʼa̱n Jehová xa̱ʼa̱ ñuu Moab. 14 Ta vitin káʼa̱n Jehová ña̱yóʼo: “Ni ndáyáʼviní na̱ ñuu Moab, ti̱xin u̱ni̱ ku̱i̱ya̱* kukaʼan nu̱úna saáchi kǒo kunda̱a̱-inina ndáaña keʼéna, ta si̱lóʼoní koo na̱ kindo̱o ta va̱ása kundayáʼvina”.