Isaías
19 Ña̱yóʼo kúú ña̱ kundoʼo ñuu Egipto:
Kotondó, sa̱tá iin vi̱kó ña̱ ndeéní ku̱a̱ʼa̱n kánuu Jehová ku̱a̱ʼa̱nra, ta ni̱ki̱ʼvira chí Egipto.
Na̱ ndióxi̱ na̱ va̱ása ndáyáʼvi na̱ íyo ti̱xin ñuu Egipto yi̱ʼvínína kuninara,
ta kandita ni̱nu níma̱ na̱ ñuu Egipto xa̱ʼa̱ ña̱ yi̱ʼvínína kuninara.
2 “Chikai̱-ini na̱ egipcio ña̱ ná ku̱ʼu̱nna contra xíʼin táʼanna
ta ná kanitáʼanna,
iin tá iinna kanitáʼanna xíʼin ñanitáʼanna ta saátu na̱ íyo yatin xíʼinna,
kanitáʼan iin ñuu xíʼin inka ñuu, saátu na̱ chíñu xíʼin inka na̱ chíñu.
3 Ta na̱ ndóo chí ñuu Egipto kǒo kunda̱a̱-inina ndáaña keʼéna,
ta nasamai̱ ña̱ kúni̱na keʼéna.
Ka̱ʼa̱nna xíʼin na̱ ndióxi̱ na̱ va̱ása ndáyáʼvi ña̱ ná chindeétáʼanna xíʼinna,
ku̱ʼu̱nna nu̱ú na̱ kéʼé ña̱ tási, na̱ káʼa̱n ña̱ kivi ka̱ʼa̱nna xíʼin na̱ ni̱xi̱ʼi̱ ta saátu nu̱ú na̱ ndáku.*
4 Ndataxii̱ na̱ ñuu Egipto ndaʼa̱ iin ta̱ ndi̱va̱ʼaní-ini,
rey ta̱ ndi̱va̱ʼaní-ini kaʼndachíñu nu̱úna”, káchi táta káʼnu Jehová ta̱ xáʼndachíñu nu̱ú na̱ ángel.
5 Yi̱chi̱ ti̱kui̱í tá mar,
ti̱kui̱í tá íyo yu̱ta ndiʼirá ta yi̱chi̱rá.
6 Kininí kuxaʼa̱n yu̱ta;
ti̱kui̱í tá ñúʼu chi̱chi ñuu Egipto ndiʼirá ta yichi̱rá.
Tú tu̱yo̱ó* xíʼin tú junco* ta̱ʼyi̱nú.
7 Yi̱chi̱ ndiʼi planta tú íyo yuʼú yu̱ta Nilo ta saátu yi̱chi̱ tú íyo nu̱ú ndákutáʼan yu̱ta yóʼo xíʼin inkará,
ta saátu yi̱chi̱ ndiʼi ñuʼú nu̱ú chíʼina ña̱ íyo yuʼú yu̱ta yóʼo.
Ndiʼi túyóʼo ndachínú ku̱ʼu̱nnú xíʼin ta̱chí ta va̱ása kookanú.
8 Kusuchí-ini na̱ tíin ti̱a̱ká,
na̱ táan ka̱a ña̱ xi̱ín* nu̱ú ini yu̱ta Nilo ña̱ va̱ʼa tiinna ti̱a̱ká, kuakuna,
ta ndáa si̱lóʼo koo na̱ taán ñunúna* ini ti̱kui̱í.
9 Na̱ kéʼé tela ña̱ lino
ta saátu na̱ tává tela ña̱ yaa xíʼin yitu̱n tú xíniñúʼuna ña̱ kúnuna, kukaʼan nu̱úna.
11 Na̱ kíʼví kúú na̱ kúúmií chiñu ña̱ ndáyáʼvi ti̱xin ñuu Zoan.
Na̱ ndíchi, na̱ táxi consejo ndaʼa̱ ta̱ faraón su̱ví consejo va̱ʼa kúú ña̱ táxina.
¿Nda̱chun káʼa̱nndó xíʼin ta̱ faraón, “Se̱ʼe na̱ ndíchi kúúndi̱, se̱ʼe na̱ rey na̱ xi̱ndoo xi̱naʼá kúúndi̱”?
12 Tá saá, ¿ndáa míí ku̱a̱ʼa̱n na̱ ndíchi na̱ káchíñu nu̱ún?
Tá ndixa kúnda̱a̱-inina, na̱kán ná ka̱ʼa̱n xíʼún ndáaña keʼé Jehová ta̱ xáʼndachíñu nu̱ú na̱ ángel chí ñuu Egipto.
13 Na̱ kúúmií chiñu ña̱ ndáyáʼvi ti̱xin ñuu Zoan, táki̱ʼva kéʼé na̱ kíʼví saá kéʼéna;
na̱ kúúmií chiñu ña̱ ndáyáʼvi ti̱xin ñuu Nof* sa̱ndáʼvinana.
Na̱ níʼi yichi̱ nu̱ú na̱ tribu na̱ ñuu Egipto, va̱ása vií níʼina yichi̱ nu̱úna.
14 Jehová táxira ña̱ kǒo kunda̱a̱-inina ndáaña keʼéna;
na̱kán va̱ása vií níʼina yichi̱ nu̱ú na̱ ñuu Egipto, ña̱kán va̱ása va̱ʼa íyo ña̱ kéʼéna,
ta ndóʼona nda̱a̱ táki̱ʼva ndóʼo iin ta̱ xíʼi tá kákáa* xa̱ʼa̱ra xíʼin ña̱ ndu̱xanra.
15 Ta va̱ása kooka chiñu ña̱ kivi keʼé na̱ ñuu Egipto,
ni kúúna na̱ va̱lí á na̱ xa̱a̱ chée, ni kúúna na̱ ndáyáʼvi á na̱ va̱ása ndáyáʼvi.
16 Ki̱vi̱ saá, na̱ egipcio táki̱ʼva keʼé ñaʼá saá keʼéna; yi̱ʼvínína ta kisina xa̱ʼa̱ ña̱ keʼé Jehová ta̱ xáʼndachíñu nu̱ú na̱ ángel xíʼinna. 17 Na̱ ñuu Egipto yi̱ʼvína kunina na̱ ñuu Judá. Yi̱ʼvínína tá ná kuniso̱ʼo kuitína ka̱ʼa̱nna xa̱ʼa̱ na̱yóʼo, xa̱ʼa̱ ña̱ nda̱kaxin Jehová ta̱ xáʼndachíñu nu̱ú na̱ ángel keʼéra xíʼinna.
18 Ki̱vi̱ saá, chí Egipto koo u̱ʼu̱n ñuu na̱ ka̱ʼa̱n tu̱ʼun ña̱ káʼa̱nna chí Canaán, ta chinaʼána* ña̱ nda̱kúní koo inina xíʼin Jehová ta̱ xáʼndachíñu nu̱ú na̱ ángel. Iin ñuu yóʼo kunaníña, ñuu ña̱ sándiʼi-xa̱ʼa̱.
19 Ki̱vi̱ saá nu̱ú ñuʼú ña̱ Egipto keʼéna iin altar nu̱ú Jehová, ta chí xáʼñu* ñuʼú na̱ egipcio keʼéna inkaña nu̱ú Jehová. 20 Ña̱yóʼo kooña iin señal nu̱ú na̱ yiví na̱ ñuu Egipto ña̱ va̱ʼa ndakaʼánna xa̱ʼa̱ Jehová ta̱ xáʼndachíñu nu̱ú na̱ ángel; saáchi kuakundáʼvina nu̱ú Jehová ña̱ ná sakǎkurana nu̱ú na̱ íxandi̱va̱ʼa xíʼinna, ta̱yóʼo chindaʼára iin na̱ yiví ña̱ sakǎkurana. 21 Tasaá kunda̱a̱-ini na̱ ñuu Egipto xa̱ʼa̱ Jehová; ki̱vi̱ saá xa̱a̱na kuxini̱na Jehová, taxina ña̱ʼa ndaʼa̱ra ta so̱kónaña nu̱úra, kindo̱ona keʼéna iin ña̱ʼa nu̱ú Jehová ta saxínunaña. 22 Jehová taxira castigo ndaʼa̱ na̱ ñuu Egipto, satúkue̱ʼe̱rana ta sandáʼarana; na̱yóʼo ndikóna nu̱ú Jehová ta ndakuiinra ña̱ ni̱ka̱ʼa̱nna xíʼinra ta sandáʼarana.
23 Ki̱vi̱ saá koo iin yichi̱ ña̱ kita chí Egipto ta xa̱a̱ña nda̱a̱ chí Asiria. Tasaá na̱ ñuu Asiria ki̱ʼvina ñuu Egipto, ta na̱ ñuu Egipto ki̱ʼvina ñuu Asiria. Ta na̱ ñuu Egipto xíʼin na̱ ñuu Asiria, inkáchi ndasakáʼnuna Ndióxi̱. 24 Ki̱vi̱ saá, na̱ ñuu Israel ndakutáʼanna xíʼin na̱ ñuu Egipto ta saátu xíʼin na̱ ñuu Asiria ta koona iin bendición nu̱ú ñuʼú, 25 saáchi Jehová ta̱ xáʼndachíñu nu̱ú na̱ ángel taxira bendición ndaʼa̱na ta kachira: “Ná ndakiʼin na̱ ñui̱ Egipto bendición, saátu na̱ ñui̱ na̱ i̱xava̱ʼi̱ na̱ Asiria, saátu na̱ ñuu Israel na̱ kúú kuentai̱”.