Zacarías
10 “Ka̱ʼa̱nndó xíʼin Jehová ña̱ ná taxira kuun sa̱vi̱ kuee.
Mií Jehová kúú ta̱ íxava̱ʼa vi̱kó ña̱ va̱ʼa ndeéní kuun sa̱vi̱,
miíra kúú ta̱ táxi ña̱ ná kuun sa̱vi̱ tá kuniñúʼu na̱ yiví
ta saátu ña̱ va̱ʼa ná kuaʼnu ña̱ʼa nu̱ú ñuʼúna.
Káʼa̱nna xa̱ʼa̱ xa̱ni ña̱ ni loʼo va̱ása ndáyáʼvi
ta ni kúni̱na sandíkona-ini inkana, kǒo kívi keʼéna ña̱yóʼo.
Xa̱ʼa̱ ña̱kán, na̱ yiví kakana yóʼo ta káa nda̱a̱ táki̱ʼva íyo ndikachi* tí xíka mií
ta xo̱ʼvi̱na* xa̱ʼa̱ ña̱ kǒo na̱ kundaañaʼá.
3 Sáa̱níi̱ xíʼin na̱ ndáa ndikachi
ta ndatii̱n ku̱a̱chi xíʼin na̱ ndi̱va̱ʼa-ini na̱ níʼi yichi̱ nu̱úrí;
saáchi Jehová ta̱ xáʼndachíñu nu̱ú na̱ ángel xa̱a̱ ki̱ʼinra kuenta ndáaña ndóʼo ndikachi sa̱na̱ra, na̱ veʼe ta̱ Judá,
ta nda̱sarana nda̱a̱ táki̱ʼva íyo kuáyi̱ sa̱na̱ra, tí ndakúní, tí ndáyáʼviní tí xíka nu̱ú ku̱a̱chi.
4 Ti̱xin veʼe ta̱ Judá kixi iin ta̱a ta̱ ndáyáʼviní,*
ti̱xin veʼe ta̱yóʼo kixi ta̱ chíñu ta̱ chindeétáʼan xíʼinna,
ti̱xin veʼe ta̱yóʼo kixi ta̱ kuniʼi kuxu̱n* ku̱ʼu̱n nu̱ú ku̱a̱chi;
ti̱xin veʼe ta̱yóʼo kixi ndiʼi na̱ kiʼin kuenta xíʼinna,
ta inkáchi kutáʼan ndiʼina kixina.
5 Ta xa̱a̱na koona nda̱a̱ táki̱ʼva íyo na̱ ta̱a na̱ ndakúní na̱ xíka nu̱ú ku̱a̱chi,
na̱ xáñi̱* nda̱ʼyi̱ ña̱ ndóo chí calle tá kánitáʼanna xíʼin inkana.
Kanitáʼanna xíʼin inkana, saáchi íyo Jehová xíʼinna;
ta kukaʼanní nu̱ú na̱ yósó* kuáyi̱.
6 Taxii̱ ña̱ ná kundayáʼviníka na̱ veʼe ta̱ Judá
ta sakǎkui̱ na̱ veʼe ta̱ José.
Taxii̱ ña̱ ná ndikóna,
saáchi na̱ʼi̱ ña̱ kúndáʼvi-inii̱ xínii̱na;
ta va̱ása kookana nda̱a̱ táki̱ʼva íyo na̱ ku̱ndasíi̱ xi̱nii̱;
saáchi yi̱ʼi̱ kúú Jehová Ndióxi̱na, ta ndakuiinvai̱ yuʼúna.
7 Na̱ ñuu ta̱ Efraín koona nda̱a̱ táki̱ʼva íyo iin ta̱a ta̱ ndakúní ta̱ xíni̱ní kanitáʼan,
ta kusi̱íní-inina nda̱a̱ táki̱ʼva kúsi̱íní-ini na̱ xíʼi vino.
Na̱ se̱ʼena kunina ña̱yóʼo ta kusi̱íní-inina;
mií Jehová kúú ta̱ taxi ña̱ ná kusi̱í-inina.
8 ‘Yi̱ʼi̱ kanai̱na ña̱ va̱ʼa sandákutáʼi̱nna;
saáchi sakǎkui̱na ta ku̱a̱ʼání xa̱a̱na koona,
ta ndakundeéna ku̱a̱ʼání xa̱a̱na koona.
9 Ni nda̱a̱ táki̱ʼva kéʼéna tá xátayávána si̱ʼva̱ saá keʼíi̱ xíʼinna chi chindaʼíi̱na ku̱ʼu̱nna inka ñuu,
ndakaʼánvana xa̱ʼíi̱ nda̱a̱ nu̱ú xíkání ku̱ʼu̱nna kundoona;
taxi tukui̱ ndee̱ ndaʼa̱na ta saátu ndaʼa̱ na̱ se̱ʼena ta ndikóvana.
10 Ku̱ʼi̱n ndakiʼinna nda̱a̱ nu̱ú ñuʼú ña̱ íyo chí Egipto
ta sandákutáʼi̱n ndiʼi na̱ ná ku̱ʼu̱n chí Asiria;
ku̱ʼi̱n xíʼinna chí nu̱ú ñuʼú ña̱ íyo chí Galaad ta saátu chí Líbano,
ta ni va̱ása kunanika kundoona.
11 Tá ná ya̱ʼi̱ nu̱ú mar, xo̱ʼvi̱nírá,
ta va̱ása taxikai̱ ña̱ kanda̱ nu̱úrá;
tá yu̱ta Nilo yi̱chi̱vará.
Sakúkaʼi̱n nu̱ú na̱ ñuu Asiria na̱ ni̱nuní kúni
ta va̱ása taxikai̱ ña̱ kaʼndachíñu na̱ ñuu Egipto.
12 Xa̱ʼa̱ ki̱vi̱ yi̱ʼi̱ Jehová, taxii̱ ña̱ ndakúní ná xa̱a̱ na̱ ñui̱ koona ta xíʼin ña̱ keʼé na̱yóʼo ndukáʼnu ki̱víi̱’, káchi Jehová”.