1 Crónicas

26 Ndiʼi na̱yóʼo kúú na̱ nda̱kaxinna ña̱ kundaana yéʼé. Ti̱xin veʼe na̱ coreíta, ta̱ nda̱kaxinna keʼé chiñu yóʼo xi̱kuu ta̱ Meselemías se̱ʼe ta̱ Coré,* ta̱ ki̱xi ti̱xin na̱ veʼe ta̱ Asaf. 2 Ta se̱ʼenu̱ú ta̱ Meselemías xi̱kuu ta̱ Zacarías, ta̱ u̱vi̱ xi̱kuu ta̱ Jediael, ta̱ u̱ni̱ xi̱kuu ta̱ Zebadías, ta̱ ku̱mí xi̱kuu ta̱ Jatniel, 3 ta̱ u̱ʼu̱n xi̱kuu ta̱ Elam, ta̱ i̱ñu̱ xi̱kuu ta̱ Jehohanán ta ta̱ u̱xa̱ xi̱kuu ta̱ Elieho-Enái. 4 Ta se̱ʼenu̱ú ta̱ Obed-Edom xi̱kuu ta̱ Semaya, ta̱ u̱vi̱ xi̱kuu ta̱ Jehozabad, ta̱ u̱ni̱ xi̱kuu ta̱ Joá, ta̱ ku̱mí xi̱kuu ta̱ Sacar, ta̱ u̱ʼu̱n xi̱kuu ta̱ Netanel, 5 ta̱ i̱ñu̱ xi̱kuu ta̱ Amiel, ta̱ u̱xa̱ xi̱kuu ta̱ Isacar ta ta̱ u̱na̱ xi̱kuu ta̱ Peuletái; saáchi Ndióxi̱ ta̱xi bendición ndaʼa̱ra.

6 Ta na̱ se̱ʼe ta̱ Semaya kúú na̱ ni̱xa̱a̱ xi̱niʼi yichi̱ nu̱ú na̱ veʼena, saáchi xi̱kuuna ta̱a na̱ ndakúní ta xi̱ndaaní-ininana. 7 Na̱ se̱ʼe ta̱ Semaya xi̱kuu ta̱ Otní, ta̱ Refael, ta̱ Obed xíʼin ta̱ Elzabad; ta na̱ ñani ta̱yóʼo xi̱kuu ta̱ Elihú xíʼin ta̱ Semakías, ta saátu na̱yóʼo xi̱kuuna ta̱a na̱ xi̱ndaaní-inina. 8 Ndiʼi na̱yóʼo xi̱kuuna se̱ʼe ta̱ Obed-Edom. Miína, na̱ se̱ʼena ta saátu na̱ ñanina xi̱kuuna ta̱a na̱ xi̱ndaaní-inina ta xi̱xini̱nína keʼéna chiñu yóʼo; ta ndiʼi na̱ veʼe ta̱ Obed-Edom 62 xi̱kuuna. 9 Ta na̱ se̱ʼe ta̱ Meselemías xíʼin na̱ ñanira 18 xi̱kuuna ta xi̱ndaaní-ininana. 10 Ta saátu ni̱xi̱yo se̱ʼe ta̱ Hosá, ta̱ xi̱kuu se̱ʼe ta̱ Merarí. Ta̱ Simrí kúú ta̱ xi̱niʼi yichi̱ nu̱úna, saáchi ni va̱ása níxi̱kuura se̱ʼenu̱ú yivára ta̱ Hosá, soo nda̱kaxinrara ña̱ kuniʼira yichi̱ nu̱ú inkana, 11 ta̱ Hilquías xi̱kuu ta̱ u̱vi̱, ta̱ Tebalías xi̱kuu ta̱ u̱ni̱ ta ta̱ ku̱mí xi̱kuu ta̱ Zacarías. Ta ndiʼi na̱ se̱ʼe ta̱ Hosá xíʼin na̱ ñanira 13 xi̱kuuna.

12 Ndiʼika na̱ xi̱niʼi yichi̱ nu̱ú na̱ xi̱ndaa yéʼé na̱ nda̱taʼvína, xi̱kuumiítuna chiñu ña̱ kachíñuna veʼe Jehová nda̱a̱ táki̱ʼva xi̱keʼé na̱ ñanina. 13 Tasaá chi̱kaa̱na suerte* ña̱ va̱ʼa kunda̱a̱-inina ndáa yéʼé kúú ña̱ kundaana, ta na̱yóʼo ka̱nana ti̱xin iin tá iin na̱ familia ni ku̱a̱ʼá kúúna á ni loʼo kúúna. 14 Ta ka̱na ki̱vi̱ ta̱ Selemías ña̱ kundaara yéʼé ña̱ kíndo̱o chí este.* Tasaá chi̱kaa̱na suerte xa̱ʼa̱ se̱ʼera ta̱ Zacarías, iin ta̱ xi̱xini̱ní taxi consejo ta ka̱na ki̱vi̱ra ña̱ kundaara yéʼé ña̱ kíndo̱o chí norte. 15 Ta ka̱natu ki̱vi̱ ta̱ Obed-Edom ña̱ kundaara yéʼé ña̱ kíndo̱o chí sur, ta chiñu ña̱ ta̱xina ndaʼa̱ na̱ se̱ʼera kúú ña̱ kundaana nu̱ú xi̱taánva̱ʼana* ña̱ʼa. 16 Ta̱ Supim xíʼin ta̱ Hosá kúú na̱ ka̱na ki̱vi̱ ña̱ kundaana yéʼé ña̱ kíndo̱o chí oeste* yatin nu̱ú íyo Yéʼé ña̱ Saléket, nu̱ú yáʼa yichi̱ káʼnu ña̱ ku̱a̱ʼa̱n chí ni̱nu; ta xa̱a̱ tiʼvi tá tiʼvi xi̱ndita na̱yóʼo ña̱ va̱ʼa kundaana. 17 I̱ñu̱ xi̱kuu na̱ levita na̱ xi̱ndaa chí este. Ku̱mína xi̱ndita chí norte ta saátu chí sur ta iníí ki̱vi̱ xi̱nditana. Ta u̱vi̱ tá u̱vi̱ xi̱kuu na̱ xi̱ndaa nu̱ú xi̱taánva̱ʼana ña̱ʼa. 18 Ta chí yéʼé ña̱ ni̱xi̱yo chí oeste xi̱ndita ku̱mína yatin yuʼú yichi̱ káʼnu ta u̱vi̱na xi̱ndita mií yéʼé. 19 Saá kúú ña̱ nda̱taʼvína na̱ coreíta xíʼin na̱ merarita ña̱ va̱ʼa kundaana yéʼé.

20 Ta ti̱xin na̱ veʼe na̱ levita nda̱kaxinna ta̱ Ahíya ña̱ kiʼinra kuenta xíʼin cuarto nu̱ú xi̱taánva̱ʼana ña̱ʼa ña̱ ndáyáʼvi veʼe Ndióxi̱ ta̱ nda̱a̱, ta saátu ña̱ kiʼinra kuenta xíʼin cuarto nu̱ú xi̱taánva̱ʼana ña̱ʼa ña̱ ndáyáʼvi ña̱ nda̱sayi̱i̱na.* 21 Na̱ ta̱a na̱ xi̱kiʼin kuenta xíʼinna xi̱kuu na̱ se̱ʼe ta̱ Ladán se̱ʼe ta̱ Guersón ta xi̱niʼituna yichi̱ nu̱ú na̱ veʼe ta̱ Ladán se̱ʼe ta̱ Guersón. Na̱yóʼo xi̱kuu ta̱ Jehielí 22 xíʼin se̱ʼera ta̱ Zetam ta saátu ta̱ Joel. Na̱yóʼo kúú na̱ xi̱kiʼin kuenta xíʼin cuarto nu̱ú xi̱taánva̱ʼana ña̱ʼa ña̱ ndáyáʼvi veʼe Jehová. 23 Ta ti̱xin veʼe na̱ amramita, na̱ izharita, na̱ hebronita xíʼin na̱ uzielita, 24 nda̱kaxinna ta̱ Sebuel se̱ʼe ta̱ Guersom, ta̱ xi̱kuu se̱ʼe ta̱ Moisés, ña̱ kiʼinra kuenta xíʼin nu̱ú xi̱taánva̱ʼana ña̱ʼa. 25 Ta nda̱kaxintuna inkaka na̱ táʼan ta̱ Sebuel, nda̱kaxinna ta̱ Rehabías, ta̱ Jesayá, ta̱ Joram, ta̱ Zicrí xíʼin ta̱ Selomot, na̱ xi̱kuu se̱ʼe ta̱ Eliezer. 26 Ta̱ Selomot xíʼin na̱ ñanira kúú na̱ xi̱kiʼin kuenta xíʼin cuarto nu̱ú xi̱taánva̱ʼana ña̱ʼa ña̱ ndáyáʼvi ña̱ nda̱sayi̱i̱ ta̱ rey David, na̱ xi̱niʼi yichi̱ nu̱ú iin tá iin na̱ familia, na̱ xi̱niʼi yichi̱ nu̱ú mil na̱ ta̱a xíʼin na̱ xi̱niʼi yichi̱ nu̱ú iin cientona ta saátu na̱ xi̱niʼi yichi̱ nu̱ú ndiʼi na̱ soldado. 27 Nda̱sayi̱i̱na iin táʼví ña̱ʼa ña̱ nda̱kiʼinna tá ni̱xi̱kana nu̱ú ku̱a̱chi ña̱ va̱ʼa kuniñúʼuna ña̱yóʼo ña̱ kundaana veʼe Jehová. 28 Ta saátu xi̱kiʼinna kuenta xíʼin ndiʼi ña̱ nda̱sayi̱i̱ ta̱ Samuel ta̱ xi̱taxi consejo, ta̱ Saúl se̱ʼe ta̱ Quis, ta̱ Abner se̱ʼe ta̱ Ner xíʼin ta̱ Joab se̱ʼe ñá Zeruyá. Ta ndiʼika ña̱ʼa ña̱ xi̱ndasayi̱i̱na, ta̱ Selomit xíʼin na̱ ñanira kúú na̱ xi̱kiʼin kuenta xíʼin ña̱yóʼo.

29 Ta ti̱xin veʼe na̱ izharita nda̱kaxinna ta̱ Kenanías xíʼin na̱ se̱ʼera ña̱ keʼéna chiñu ña̱ ndáyáʼvi, ta saátu ña̱ koona juez nu̱ú na̱ ñuu Israel.

30 Ta ti̱xin veʼe na̱ hebronita nda̱kaxinna ta̱ Hasabías xíʼin na̱ ñanira ta ndiʼi na̱yóʼo xi̱kuuna 1,700 ta xi̱ndaaní-ininana, na̱yóʼo kúú na̱ xi̱kiʼin kuenta xíʼin ña̱ xi̱xiniñúʼu na̱ ñuu Israel chí táʼví oeste tá yu̱ta Jordán. Xi̱kiʼinna kuenta xíʼin ndiʼi chiñu ña̱ xi̱keʼéna nu̱ú Jehová ta saátu nu̱ú ta̱ rey. 31 Ta ti̱xin na̱ veʼe na̱ hebronita, ta̱ Jeriya kúú ta̱ xi̱niʼi yichi̱ nu̱ú na̱ hebronita, nda̱a̱ táki̱ʼva íyo na̱ veʼena. Tá xa̱a̱ 40 ku̱i̱ya̱ xáʼndachíñu ta̱ David, na̱ndukúna na̱ ta̱a na̱ ndakúní na̱ xi̱ndaaní-inina ta nda̱ni̱ʼína na̱yóʼo chí Jazer ña̱ kíndo̱o chí Galaad. 32 Ta ndiʼi na̱ ñani ta̱ Jeriya xi̱kuuna 2,700, xi̱ndaaní-inina ndiʼi na̱yóʼo ta xi̱niʼina yichi̱ nu̱ú na̱ veʼena. Ta ta̱ rey David ta̱xira chiñu ndaʼa̱na ña̱ kiʼinna kuenta xíʼin na̱ rubenita, na̱ gadita ta saátu xíʼin iin táʼví tribu na̱ manasita ña̱ va̱ʼa keʼéna chiñu nu̱ú Ndióxi̱ ta̱ nda̱a̱ ta saátu nu̱ú mií ta̱ rey.