1 Crónicas

17 Tá xa̱a̱ íyo ta̱ David veʼera,* ni̱ka̱ʼa̱nra xíʼin ta̱ profeta Natán: “Yi̱ʼi̱ íyoi̱ ini iin veʼe ña̱ ku̱vaʼa xíʼin yitu̱n tú cedro, soo arca ña̱ trato tú kúú kuenta Jehová ndíkaa̱nú ini iin veʼe loʼo ña̱ ku̱vaʼa xíʼin ti̱ko̱to̱”. 2 Ta ta̱ Natán ni̱ka̱ʼa̱nra xíʼin ta̱ David: “Va̱ʼa keʼún ña̱ ndíkaa̱ níma̱vaún, saáchi Ndióxi̱ ta̱ nda̱a̱ íyora xíʼún”.

3 Ta mií ñuú saá, Ndióxi̱ ni̱ka̱ʼa̱nra ña̱yóʼo xíʼin ta̱ Natán: 4 “Kúáʼan ta ka̱ʼún ña̱yóʼo xíʼin ta̱ David ta̱ káchíñu nu̱úi̱: ‘Ña̱yóʼo kúú ña̱ káʼa̱n Jehová: “Su̱ví yóʼó kúú ta̱ ixava̱ʼa veʼe nu̱ú koi̱. 5 Nda̱a̱ tá ki̱vi̱ ña̱ ta̱vái̱ na̱ ñuu Israel chí Egipto iinsaá nda̱a̱ vitin ta̱ʼán koi̱ ini iin veʼe, saáchi xa̱a̱ síín síínva nu̱ú ni̱xi̱kai̱ ta ini veʼe válí xíʼin ini tabernáculova kúú ña̱ ni̱xi̱yoi̱. 6 Ndiʼi tiempo ña̱ ni̱xi̱kai̱ xíʼin na̱ ñuu Israel, ¿á xa̱a̱ ni̱ka̱ʼi̱n xa̱ʼa̱ ña̱yóʼo xíʼin sava na̱ juez na̱ nda̱kaxii̱n ña̱ kundaana na̱ ñui̱ Israel? ¿Á xa̱a̱ ni̱nda̱ka̱tu̱ʼíi̱nna ‘¿Nda̱chun ta̱ʼán ixava̱ʼandó iin veʼe xíʼin yitu̱n tú cedro nu̱ú koi̱?’?”’.

7 ”Ña̱kán vitin ka̱ʼa̱n ña̱yóʼo xíʼin ta̱ David ta̱ káchíñu nu̱úi̱: ‘Ña̱yóʼo kúú ña̱ káʼa̱n Jehová ta̱ xáʼndachíñu nu̱ú na̱ ángel: “Yi̱ʼi̱ kúú ta̱ ta̱vá yóʼó chí yuku̱ nu̱ú ni̱xi̱kaún xi̱ndaún ndikachi,* ña̱ va̱ʼa xa̱ún koún ta̱ kuniʼi yichi̱ nu̱ú na̱ ñui̱ Israel. 8 Ta koi̱ xíʼún nda̱a̱ ndáaka nu̱ú ná ku̱ʼún. Sandíʼi-xa̱ʼíi̱ ndiʼi na̱ sáa̱-ini xíni yóʼó. Ta taxii̱ ña̱ ku̱a̱ʼánína ná xa̱a̱ kuxini̱ ki̱vi̱ún, nda̱a̱ táki̱ʼva xíni̱na ki̱vi̱ na̱ yiví na̱ ndáyáʼviní na̱ íyo nu̱ú ñuʼú yóʼo. 9 Taxii̱ iin lugar nu̱ú kundoo na̱ ñui̱ Israel. Ta nu̱ú taxii̱ kundoona kán, nda̱a̱ ni iin yichi̱ va̱ása keʼékanana. Ta na̱ ndi̱va̱ʼa-ini, va̱ása ixandi̱va̱ʼakana xíʼinna nda̱a̱ táki̱ʼva xi̱keʼéna tá ya̱chi̱, 10 nda̱a̱ tá ki̱vi̱ ña̱ nda̱kaxii̱n na̱ ndatiin ku̱a̱chi xíʼin na̱ ñui̱ Israel. Ta sakǎkui̱ yóʼó nu̱ú ndiʼi na̱ sáa̱-ini xíni yóʼó. Saátu káʼi̱n ña̱yóʼo xíʼún: ‘Jehová taxira ña̱ ná xa̱a̱ na̱ se̱ʼún kaʼndachíñuna’.*

11 ”’”Tá xa̱a̱ ná kuviún ta ndakindeún xíʼin na̱ táʼún na̱ xi̱ndoo xi̱naʼá, yi̱ʼi̱ taxii̱ ña̱ ná xa̱a̱ se̱ʼún kaʼndachíñura ta va̱ása ndiʼi-xa̱ʼa̱ ña̱ kaʼndachíñura. 12 Ta̱yóʼo kúú ta̱ ixava̱ʼa iin veʼe nu̱ú ndasakáʼnuna yi̱ʼi̱, ta yi̱ʼi̱ taxii̱ ña̱ ndiʼi tiempo ná kaʼndachíñura. 13 Yi̱ʼi̱ xa̱i̱ koi̱ yivára ta ta̱kán koora se̱ʼi̱. Ta va̱ása keʼíi̱ xíʼinra nda̱a̱ táki̱ʼva ke̱ʼíi̱ xíʼin ta̱ rey ta̱ xi̱xaʼndachíñu tá kúma̱níka xa̱ún kaʼndachíñún, saáchi ndiʼi tiempova na̱ʼi̱ ña̱ ndixaní kúʼvi̱-inii̱* xínii̱ra. 14 Taxii̱ ña̱ ná koora nu̱ú tronoi̱ ndiʼi tiempo ta ña̱ kaʼndachíñu miíra xíʼin ña̱ kaʼndachíñu na̱ se̱ʼera kooña ndiʼi tiempo”’”.

15 Ta̱ Natán ni̱ka̱ʼa̱nra xíʼin ta̱ David xa̱ʼa̱ ndiʼi tu̱ʼun yóʼo ta saátu xa̱ʼa̱ visión ña̱ xi̱nira.

16 Xa̱ʼa̱ ña̱kán, ta̱ rey David ni̱xa̱ʼa̱nra ta xi̱koora* nu̱ú Jehová ta ni̱ka̱ʼa̱nra xíʼinra: “Jehová Ndióxi̱ miíi̱, ¿ndáa ta̱ kúú yi̱ʼi̱? ¿Ndáana kúú na̱ veʼi̱ ña̱kán ku̱a̱ʼání ña̱ʼa kéʼún xa̱ʼíi̱? 17 Xa̱a̱ ku̱a̱ʼáníva ña̱ʼa kéʼún xa̱ʼíi̱ Ndióxi̱ miíi̱, ta saátu káʼún ña̱ ku̱a̱ʼání tiempo koo na̱ veʼi̱, ta nda̱a̱ táki̱ʼva íyo iin ta̱a ta̱ xíniñúʼu kundayáʼvika* saá íyoi̱ nu̱ún Jehová Ndióxi̱ miíi̱. 18 ¿Ndáaka ña̱ kivi ka̱ʼa̱n yi̱ʼi̱ ta̱ David ta̱ káchíñu nu̱ún xa̱ʼa̱ ña̱ ta̱xiún ña̱ kundayáʼvii̱, saáchi miíún xa̱a̱ xíni̱va̱ʼavaún yi̱ʼi̱? 19 Jehová, xa̱ʼa̱ yi̱ʼi̱ kúú ña̱ ke̱ʼún ndiʼi ña̱ʼa ña̱ ndáyáʼviní yóʼo ta ni̱na̱ʼún ña̱ káʼnuníún, ta ke̱ʼún ña̱yóʼo nda̱a̱ táki̱ʼva kúni̱ miíún. 20 Jehová, kǒo inka na̱ íyo nda̱a̱ táki̱ʼva íyo yóʼó ta kǒo inka ndióxi̱ íyo chi iinlá miíún kúú Ndióxi̱; ta ndiʼi ña̱ xi̱niso̱ʼondi̱ náʼa̱ña ña̱ saá íyoña. 21 Nda̱a̱ ni iin ñuu ña̱ íyo nu̱ú ñuʼú yóʼo va̱ása inkáchi íyoña xíʼin na̱ ñuún Israel. Miíún kúú Ndióxi̱ ta̱ nda̱a̱, miíún kúú ta̱ ni̱xa̱ʼa̱n ta sa̱kǎkúnna ña̱ va̱ʼa koona na̱ ñuún; ta ndiʼina ni̱xa̱a̱ ku̱ndaa̱-ini xa̱ʼa̱ ki̱vi̱ún xa̱ʼa̱ ña̱ nda̱kanda̱ní-inina* xíʼin ña̱ʼa ña̱ ndáyáʼviní ña̱ ke̱ʼún xa̱ʼa̱ na̱ ñuún. Ta ta̱váún na̱ inka ñuu ña̱ va̱ʼa xa̱a̱ na̱ ñuún na̱ sa̱kǎkún chí Egipto kundoona nu̱ú ñuʼúna. 22 Ta ta̱xiún ña̱ na̱ ñuún Israel ná xa̱a̱na koona na̱ ñuún ndiʼi tiempo. Ta miíún Jehová ni̱xa̱ún ndu̱ún Ndióxi̱na. 23 Ña̱kán Jehová, ndiʼi tiempo ná koo ña̱ ni̱ka̱ʼún xa̱ʼa̱ yi̱ʼi̱ ta̱ káchíñu nu̱ún ta saátu xa̱ʼa̱ na̱ veʼi̱, ta saxínún ña̱ ni̱ka̱ʼún. 24 Ndiʼi tiempo ná koo ki̱vi̱ún ta ná ndukáʼnuña ndiʼi tiempo, ta na̱ yiví ná ka̱ʼa̱nna ña̱yóʼo: ‘Jehová ta̱ xáʼndachíñu nu̱ú na̱ ángel kúú Ndióxi̱ na̱ ñuu Israel, ta̱yóʼo kúú Ndióxi̱ nu̱ú na̱ ñuu Israel’. Ta chindeétáʼún xíʼin na̱ veʼe yi̱ʼi̱ ta̱ David ta̱ káchíñu nu̱ún, ña̱ va̱ʼa ndiʼi tiempo ná kaʼndachíñuna. 25 Saáchi miíún Ndióxi̱ miíi̱ ni̱ka̱ʼún xíʼin yi̱ʼi̱ ta̱ káchíñu nu̱ún ña̱ taxiún ña̱ ná kaʼndachíñu na̱ se̱ʼi̱. Xa̱ʼa̱ ña̱kán kúú ña̱ va̱ása yíʼvii̱ káʼi̱n ña̱yóʼo xíʼún. 26 Jehová, yóʼó kúú Ndióxi̱ ta̱ nda̱a̱ ta ni̱ka̱ʼún ña̱ keʼún ña̱ʼa va̱ʼa yóʼo xa̱ʼa̱ yi̱ʼi̱ ta̱ káchíñu nu̱ún. 27 Xa̱ʼa̱ ña̱kán, ixaún ña̱ ma̱ní taxiún bendición ndaʼa̱ na̱ veʼi̱ ta ndiʼi tiempo ná xa̱a̱ na̱yóʼo kaʼndachíñuna. Saáchi miíún Jehová ta̱xiún bendición ndaʼa̱ na̱ veʼi̱ ta ndiʼi tiempo koo ña̱yóʼo xíʼinna”.