1 Crónicas
16 Ta̱ David i̱xava̱ʼara iin veʼe loʼo nu̱ú kundikaa̱ Arca Ndióxi̱ ta̱ nda̱a̱. Xa̱ʼa̱ ña̱kán chi̱kaa̱nanú kán, tasaá xa̱ʼmi ta̱ David kití* ta ni̱so̱kórarí nu̱ú* Ndióxi̱ ta̱ nda̱a̱, ta saátu ni̱so̱kóra ña̱ʼa ña̱ va̱ʼa kutáʼan viína xíʼin Ndióxi̱. 2 Tá sa̱ndiʼi ta̱ David xa̱ʼmira kití ta ni̱so̱kórarí ta saátu ña̱ ni̱so̱kóra ña̱ʼa ña̱ va̱ʼa kutáʼan viína xíʼin Ndióxi̱, ni̱ka̱ʼa̱nra xíʼin Jehová ña̱ ná taxira ña̱ va̱ʼa ndaʼa̱ na̱ ñuura. 3 Tándi̱ʼi, ta̱xira iin si̱ta̱váʼa ña̱ ti̱ku̱i̱ta̱,* iin si̱ta̱váʼa ña̱ ku̱vaʼa xíʼin dátil ta saátu iin si̱ta̱váʼa ña̱ ku̱vaʼa xíʼin pasa ndaʼa̱ ndiʼi na̱ ñuu Israel, kúúna ta̱a á ñaʼá. 4 Tasaá nda̱kaxinra sava na̱ levita ña̱ va̱ʼa kachíñuna nu̱ú Arca Jehová, ña̱ va̱ʼa sandákaʼánna na̱ ñuu xa̱ʼa̱ Jehová Ndióxi̱ na̱ ñuu Israel ta taxina tíxa̱ʼvi ndaʼa̱ra ta saátu ndasakáʼnunara. 5 Ta̱ Asaf kúú ta̱ nu̱ú xi̱niʼi yichi̱ nu̱úna ta ta̱ Zacarías xi̱kuu ta̱ u̱vi̱. Ta̱ Jeiel, ta̱ Semiramot, ta̱ Jehiel, ta̱ Matitías, ta̱ Eliab, ta̱ Benaya, ta̱ Obed-Edom xíʼin ta̱ Jeiel kúú na̱ xi̱sakáʼa arpa xíʼin inkaka instrumento tú kúúmií yi̱ʼva̱; ta ta̱ Asaf kúú ta̱ xi̱sakáʼa címbalo, 6 ta ta̱ su̱tu̱ Benaya xíʼin ta̱ Jahaziel kúú na̱ xi̱tivi ni̱ʼi trompeta nu̱ú arca ña̱ trato tú kúú kuenta Ndióxi̱ ta̱ nda̱a̱.
7 Ki̱vi̱ kán kúú yichi̱ nu̱ú ña̱ ka̱ʼyi ta̱ David iin yaa ña̱ va̱ʼa taxira tíxa̱ʼvi ndaʼa̱ Jehová, ta na̱ xi̱ta ña̱yóʼo xi̱kuu ta̱ Asaf xíʼin na̱ ñanira:
8 “Taxindó tíxa̱ʼvi ndaʼa̱ Jehová, kuniñúʼundó ki̱vi̱ra ña̱ ka̱ʼa̱nndó xíʼinra,
ta natúʼunndó xíʼin inkaka na̱ ñuu xa̱ʼa̱ ña̱ kéʼéra.
9 Sakáʼandó ta katandó yaa nu̱úra ña̱ va̱ʼa ndasakáʼnundóra,
ndakanixi̱níndó* xa̱ʼa̱ ndiʼi ña̱ʼa ña̱ ndáyáʼviní ña̱ kéʼéra.
10 Kusi̱í-inindó ka̱ʼa̱nndó xa̱ʼa̱ ki̱vi̱ra ña̱ yi̱i̱ní.
Ná kusi̱í-ini na̱ nándukú Jehová ña̱ va̱ʼa kuniʼira yichi̱ nu̱úna.
11 Nandukúndó Jehová ña̱ kuniʼira yichi̱ nu̱úndó
ta ka̱ʼa̱nndó xíʼinra ña̱ ná taxira ndee̱ ndaʼa̱ndó.
Ndukúndó ki̱ʼva ña̱ kindo̱o va̱ʼandó nu̱úra.
12 Ndakaʼánndó xa̱ʼa̱ ña̱ʼa ña̱ ndáyáʼviní ke̱ʼéra,
xa̱ʼa̱ milagro ña̱ ke̱ʼéra ta saátu xa̱ʼa̱ ña̱ʼa ña̱ ni̱ka̱ʼa̱nra kuu,
13 ndóʼó na̱ se̱ʼe ta̱ Israel ta̱ xi̱kachíñu nu̱úra,
ndóʼó na̱ se̱ʼe ta̱ Jacob na̱ nda̱kaxinra.
14 Ta̱yóʼo kúú Jehová Ndióxi̱yó.
Chiñu ña̱ xáʼndara íyoña iníí nu̱ú ñuʼú.
15 Ndiʼi tiempo ndakaʼánndó xa̱ʼa̱ trato ña̱ ke̱ʼéra,
ta ni ku̱a̱ʼání ku̱i̱ya̱ ná ya̱ʼa,
ndakaʼánndó xa̱ʼa̱ ña̱ ki̱ndoora keʼéra,
16 trato ña̱ ke̱ʼéra xíʼin ta̱ Abrahán,
ta saátu ña̱ ki̱ndoora xíʼin ta̱ Isaac,
17 ña̱ ki̱ndoora xíʼin ta̱ Jacob ña̱ saxínura
ta saátu trato ña̱ ke̱ʼéra xíʼin ta̱ Israel
18 tá ka̱chira ‘Taxii̱ ñuʼú ña̱ íyo chí Canaán ndaʼún;
ña̱yóʼo kúú herencia ña̱ ndakiʼinndó’.
19 Ke̱ʼéra ña̱yóʼo tá loʼoní xi̱kuundó,
tá loʼoní xi̱kuundó ta xi̱ndoondó nu̱ú ñuʼú inkana.
20 Xa̱a̱ síín síín ñuu xi̱ndoona,
ta xa̱a̱ síín síín ñuu náʼnu ni̱xi̱kana.
21 Kǒo nítaxira ña̱ ixandi̱va̱ʼa ni iin na̱ yiví xíʼinna;
chi nu̱úka ña̱yóʼo nda̱a̱ ni̱nda̱ʼyi̱ra xíʼin na̱ rey xa̱ʼa̱na.
22 Ka̱chira: ‘Kǒo keʼéndó na̱ nda̱kaxii̱n
ta kǒo keʼéndó nda̱a̱ ni iin ña̱ʼa ña̱ va̱ása va̱ʼa xíʼin na̱ profetai̱’.
23 Ndiʼi na̱ ndóo iníísaá nu̱ú ñuʼú ná katana nu̱ú Jehová.
Ndiʼi ki̱vi̱ natúʼunndó xíʼin na̱ yiví ndáa ki̱ʼva sáka̱kura na̱ ñuura.
24 Ka̱ʼa̱nndó xa̱ʼa̱ ña̱ káʼnuníra xíʼin na̱ inka ñuu,
ka̱ʼa̱nndó xíʼin inkaka na̱ ñuu xa̱ʼa̱ ndiʼi ña̱ʼa ña̱ ndáyáʼviní ña̱ kéʼéra.
25 Saáchi Jehová káʼnuníra ta ndiʼina xíniñúʼu ndasakáʼnu-ñaʼá.
Káʼnuníkara nu̱ú ndiʼika na̱ ndióxi̱.
26 Na̱ ndióxi̱ na̱ inka ñuu ni loʼo kǒo ña̱ kivi keʼéna,
soo Jehová kúú ta̱ i̱xava̱ʼa ndiví.
27 Chí nu̱ú íyora táxaníña* ta ndákanda̱ní-iniyó* xíʼinña;
chí nu̱ú íyora, íyoní ndee̱ ta saátu ña̱ si̱í-ini.
28 Ndóʼó na̱ familia na̱ ndóo iin tá iin ñuu ndasakáʼnundó Jehová,
ndasakáʼnundó Jehová xa̱ʼa̱ ndee̱ ña̱ kúúmiíra ta saátu xa̱ʼa̱ ña̱ káʼnuníra.
29 Ndasakáʼnundó ki̱vi̱ Jehová chi ña̱yóʼo kúú ña̱ xíniñúʼu ndukáʼnu,
kuniʼindó iin ña̱ʼa taxindó ndaʼa̱ra ta kixindó nu̱úra.
Ndakundixindó ti̱ko̱to̱ ña̱ yi̱i̱ ta kuxítíndó nu̱ú* Jehová.
30 Iníísaá ñuʼú ná kanda̱ña nu̱úra.
Va̱ʼaní chi̱ndúʼúra xa̱ʼa̱ ñuʼú yóʼo;
kǒo nda̱a̱ ni iin na̱ kivi sakánda̱ña.
31 Ná kusi̱í-ini na̱ ndóo chí ndiví ta saátu ná kusi̱í-ini na̱ ndóo nu̱ú ñuʼú;
ka̱ʼa̱nndó ña̱yóʼo xíʼin ndiʼi na̱ ñuu: ‘Xa̱a̱ Rey kúú Jehová’.
32 Ndeéní ná nda̱ʼyi̱ tá mar ta saátu ndiʼi ña̱ ñúʼu inirá;
ná kusi̱í-ini yuku̱ ta saátu ndiʼi ña̱ʼa ña̱ íyo nu̱úña.
33 Inkáchi ná nda̱ʼyi̱ kóʼó* yitu̱n tú íyo chí yuku̱ xa̱ʼa̱ ña̱ kúsi̱í-ininú nu̱ú Jehová,
saáchi va̱xira ndatiinra ku̱a̱chi xíʼin na̱ ndóo nu̱ú ñuʼú yóʼo.
34 Taxindó tíxa̱ʼvi ndaʼa̱ Jehová saáchi va̱ʼaní-inira;
ta ndiʼi tiempo náʼa̱ra ña̱ ndixaní kúʼvi̱-inira* xínira inkana.
35 Ta ná ka̱ʼa̱nna: ‘Chindeétáʼan xíʼinndi̱, Ndióxi̱ ta̱ sáka̱ku ndi̱ʼi̱,
sandátaka ndi̱ʼi̱ ta sakǎkún ndi̱ʼi̱ nu̱ú na̱ inka ñuu,
ña̱ va̱ʼa taxindi̱ tíxa̱ʼvi xa̱ʼa̱ ki̱vi̱ún ña̱ yi̱i̱ní
ta kusi̱íní-inindi̱ ndasakáʼnundi̱ yóʼó.
36 Ndiʼi tiempo ná ndukáʼnu Jehová Ndióxi̱ na̱ ñuu Israel’”.
Ta ndiʼi na̱ ñuu ni̱ka̱ʼa̱nna “Saá koo”, ta nda̱sakáʼnuna Jehová.
37 Tasaá, ta̱ David nda̱kaxinra ta̱ Asaf xíʼin na̱ ñanira ña̱ kachíñu ni̱ʼina nu̱ú ni̱xi̱yo arca ña̱ trato tú kúú kuenta Jehová, ta ke̱ʼéna chiñu ña̱ xi̱niñúʼu keʼéna ki̱vi̱ tá ki̱vi̱. 38 Saátu nda̱kaxinra ta̱ Obed-Edom xíʼin 68 na̱ ñanira. Ta ta̱xira chiñu ndaʼa̱ ta̱ Hosá xíʼin ta̱ Obed-Edom ta̱ xi̱kuu se̱ʼe ta̱ Jedutún ña̱ kundaana yéʼé. 39 Ta ta̱ su̱tu̱ Sadoc xíʼin inkaka na̱ su̱tu̱ na̱ xi̱kitáʼan xíʼinra kúú na̱ xi̱kachíñu ini tabernáculo Jehová ña̱ xi̱ndichi chí nu̱ú xi̱ndasakáʼnuna Ndióxi̱* chí Gabaón, 40 ña̱ va̱ʼa kaʼmina kití ta so̱kó ni̱ʼinarí nu̱ú Jehová chí nu̱ú altar ndiʼi xi̱ta̱a̱n xíʼin ndiʼi xi̱kuaá. Ta saátu ña̱ keʼéna ndiʼi ña̱ káʼa̱n Ley ña̱ ta̱xi Jehová ndaʼa̱ na̱ ñuu Israel. 41 Ta xíʼin na̱yóʼo xi̱kitáʼan ta̱ Hemán, ta̱ Jedutún ta saátu ndiʼika na̱ ta̱a na̱ nda̱kaxinna ña̱ taxina tíxa̱ʼvi ndaʼa̱ Jehová, saáchi “ndiʼi tiempo náʼa̱ra ña̱ ndixaní kúʼvi̱-inira* xínira inkana”; 42 ta̱ Hemán xíʼin ta̱ Jedutún xi̱kitáʼanna xíʼin na̱yóʼo ña̱ va̱ʼa tivina trompeta, sakáʼana címbalo xíʼin inkaka instrumento tú xi̱xiniñúʼuna ña̱ ndasakáʼnuna Ndióxi̱ ta̱ nda̱a̱; ta na̱ se̱ʼe ta̱ Jedutún xi̱nditana chí yéʼé. 43 Tasaá ndiʼi na̱ ñuu nda̱kiʼinna ku̱a̱ʼa̱nna veʼena, ta ta̱ David nda̱kiʼinra ku̱a̱ʼa̱nra taxira bendición ndaʼa̱ na̱ veʼera.