1 Crónicas
22 Tasaá ni̱ka̱ʼa̱n ta̱ David: “Yóʼo koo veʼe Jehová Ndióxi̱ ta̱ nda̱a̱, ta saátu yóʼo koo iin altar nu̱ú kaʼmi na̱ ñuu Israel kití* ña̱ so̱kónarí nu̱úra”.*
2 Tándi̱ʼi, ta̱ David xa̱ʼndara chiñu ña̱ ná ndataka ndiʼi na̱ ke̱e inka ñuu na̱ ki̱xaa̱ ndóo nu̱ú ñuʼú na̱ ñuu Israel, ta ta̱xira chiñu ndaʼa̱na ña̱ taʼvína yu̱u̱ ta tuxínaña ña̱ va̱ʼa kuva̱ʼa veʼe Ndióxi̱ ta̱ nda̱a̱. 3 Ta saátu xa̱a̱ i̱xatu̱ʼva ta̱ David ku̱a̱ʼání ka̱a ña̱ ixava̱ʼana clavo xíʼin grapa ña̱ kuniñúʼuna xíʼin yéʼé, saátu i̱xatu̱ʼvara ku̱a̱ʼání cobre ta xa̱ʼa̱ ña̱ ku̱a̱ʼání xi̱kuuña va̱ása níxi̱kivi katanaña ña̱ va̱ʼa kunda̱a̱-inina nda̱saa ve̱eña. 4 Saátu i̱xatu̱ʼvara ku̱a̱ʼání yitu̱n tú cedro, saáchi na̱ sidonio xíʼin na̱ tirio ku̱a̱ʼání yitu̱n tú cedro ta̱xina ndaʼa̱ ta̱ David. 5 Ta ta̱ David ni̱ka̱ʼa̱nra: “Se̱ʼi̱ ta̱ Salomón iin ta̱ loʼova kúúra ta va̱ása xíni̱va̱ʼara keʼéra ku̱a̱ʼá ña̱ʼa, ta veʼe ña̱ ixava̱ʼara nu̱ú ndasakáʼnuna Jehová va̱ʼaníka kooña ta liviníka kooña ña̱ va̱ʼa ndiʼi na̱ ñuu ná kunda̱a̱-ini xa̱ʼa̱ña. Ña̱kán xa̱a̱ i̱xatu̱ʼvai̱ ña̱ʼa ña̱ kuniñúʼura”. Xa̱ʼa̱ ña̱kán, ku̱a̱ʼání ña̱ʼa i̱xatu̱ʼva ta̱ David tá kúma̱níka kuvira.
6 Ta saátu ka̱nara se̱ʼera ta̱ Salomón ta xa̱ʼndara chiñu nu̱úra ña̱ ná ixava̱ʼara iin veʼe nu̱ú ndasakáʼnuna Jehová Ndióxi̱ na̱ ñuu Israel. 7 Ta̱ David ni̱ka̱ʼa̱nra ña̱yóʼo xíʼin se̱ʼera ta̱ Salomón: “Yi̱ʼi̱ xi̱kuni̱i̱ ixava̱ʼi̱ iin veʼe nu̱ú ndasakáʼnuna ki̱vi̱ Jehová Ndióxi̱. 8 Soo Jehová chi̱ndaʼára na̱ ni̱ka̱ʼa̱n ña̱yóʼo xíʼi̱n: ‘Ku̱a̱ʼání nu̱ú ku̱a̱chi ni̱xi̱kaún ta xa̱ʼníún ku̱a̱ʼání na̱ yiví. Ña̱kán va̱ása ixava̱ʼún iin veʼe nu̱ú ndasakáʼnuna ki̱víi̱, saáchi xi̱nii̱ ña̱ ku̱a̱ʼání na̱ yiví xa̱ʼníún. 9 Koo iin se̱ʼún ta ta̱yóʼo va̱ʼaní koora saáchi na̱ sáa̱-ini xíniñaʼá na̱ ndóo yatin xíʼinra va̱ása taxii̱ ña̱ kanitáʼanna xíʼinra, ta ta̱yóʼo kunaníra Salomón* ta ndiʼi tiempo ña̱ ná kutakura taxii̱ ña̱ viíní ná kundoo na̱ ñuu Israel ta va̱ása koo ku̱a̱chi nu̱úna. 10 Ta̱yóʼo kúú ta̱ ixava̱ʼa iin veʼe nu̱ú ndasakáʼnuna ki̱víi̱. Ta̱yóʼo koora se̱ʼi̱ ta yi̱ʼi̱ koi̱ yivára. Ta yi̱ʼi̱ taxii̱ ña̱ ndiʼi tiempo ná koo iin trono nu̱ú kaʼndachíñura nu̱ú na̱ ñuu Israel’.
11 ”Se̱ʼe miíi̱, ná koo Jehová xíʼún ta va̱ʼaní ná kana ndiʼi ña̱ keʼún tasaá kuchiñún saxínún veʼe Jehová Ndióxi̱yó nda̱a̱ táki̱ʼva ni̱ka̱ʼa̱nra xa̱ʼún. 12 Mií Jehová ná taxi ña̱ ndíchi koún ta saátu ña̱ kunda̱a̱-iniún ndáaña keʼún tá ná taxira ña̱ kaʼndachíñún nu̱ú na̱ ñuu Israel, ña̱ va̱ʼa kandíxaún ndiʼi ley Jehová Ndióxi̱yó. 13 Viíní kundiku̱ún ndiʼi chiñu ña̱ xáʼnda Ndióxi̱ ta saátu ndiʼi ley ña̱ táxira, ña̱ ni̱ka̱ʼa̱n Jehová xíʼin ta̱ Moisés taxira ndaʼa̱ na̱ ñuu Israel, tasaá kúú ña̱ vií kana ndiʼi ña̱ keʼún. Ndakú koo iniún ta va̱ása yi̱ʼvíún. Nda̱a̱ ni loʼo va̱ása yi̱ʼvíún. 14 Chi̱kaa̱níi̱ ndee̱ ta xa̱a̱ sa̱ndákoo tu̱ʼvai̱ 3,420,000 kilo* ña̱ oro, 34,200,000 kilo* ña̱ plata ta saátu ku̱a̱ʼání cobre xíʼin hierro ña̱ kuniñúʼún ixava̱ʼún veʼe Jehová, ta xa̱ʼa̱ ña̱ ku̱a̱ʼání kúúña va̱ása kívi katanaña ña̱ va̱ʼa kunda̱a̱-inina nda̱saa ve̱eña; ta saátu xa̱a̱ íyo tu̱ʼva yitu̱n xíʼin yu̱u̱, soo ku̱a̱ʼákavaña ndukú yóʼó. 15 Kúúmiíún ku̱a̱ʼání na̱ xíni̱ kachíñu: na̱ túxí yu̱u̱, na̱ albañil, na̱ carpintero xíʼin inkaka na̱ xíni̱ keʼé ku̱a̱ʼání nu̱ú chiñu. 16 Ta saátu kúúmiíún ku̱a̱ʼání oro, plata, cobre xíʼin hierro ta nda̱a̱ ni va̱ása kívi ndakaʼvinaña. Kixáʼa keʼé chiñu yóʼo, ta mií Jehová ná koora xíʼún”.
17 Saátu xa̱ʼnda ta̱ David chiñu nu̱ú ndiʼi na̱ níʼi yichi̱ nu̱ú na̱ ñuu Israel ña̱ ná chindeétáʼanna xíʼin se̱ʼera ta̱ Salomón. Ta ka̱chira xíʼinna: 18 “Íyova Jehová xíʼinndó, ta ta̱kán kúú ta̱ chi̱ndeétáʼan xíʼinndó ña̱ kǒoka na̱ kánitáʼan xíʼinndó. Ta xa̱a̱ chi̱ndeétáʼanra xíʼi̱n ña̱ ku̱chiñui̱ ka̱nitáʼi̱n xíʼin na̱ xi̱ndoo nu̱ú ñuʼú yóʼo, xa̱ʼa̱ ña̱kán kuenta mií Jehová xíʼin na̱ ñuura kúú ñuʼú yóʼo. 19 Ña̱kán, xíʼin ndiʼi níma̱ndó ta saátu xíʼin ndiʼi ña̱ tákundó* nandukúndó Jehová Ndióxi̱yó ta kixáʼandó ixava̱ʼandó veʼe Jehová Ndióxi̱ ta̱ nda̱a̱, ña̱ va̱ʼa ku̱ʼu̱nndó ndakiʼinndó arca ña̱ trato tú kúú kuenta Jehová ta saátu ña̱ʼa ña̱ yi̱i̱ ña̱ kúú kuenta Ndióxi̱ ta̱ nda̱a̱ ña̱ va̱ʼa kixiña veʼe ña̱ ixava̱ʼandó nu̱ú ndasakáʼnundó ki̱vi̱ Jehová”.