1 Crónicas

21 Tasaá, ta̱ Ndi̱va̱ʼa* ki̱xáʼara íyora contra na̱ ñuu Israel ta chi̱kaa̱ra-ini ta̱ David ña̱ ná ndakaʼvira na̱ ñuu. 2 Tasaá ni̱ka̱ʼa̱n ta̱ David xíʼin ta̱ Joab ta saátu xíʼin na̱ xi̱niʼi yichi̱ nu̱ú na̱ ñuu: “Kúáʼanndó ta ndakaʼvindó na̱ israelita, kixáʼandó chí Beer-Seba iinsaá nda̱a̱ Dan. Tándi̱ʼi natúʼunndó xíʼi̱n ña̱ va̱ʼa kunda̱a̱-inii̱ nda̱saa na̱ yiví kúúna”. 3 Soo ta̱ Joab ni̱ka̱ʼa̱nra xíʼinra: “Mií Jehová Ndióxi̱ún 100 yichi̱ka ná ndasaku̱a̱ʼára na̱ ñuu. Táta rey, ¿á su̱ví na̱ xa̱a̱ káchíñu nu̱ún kúú ndiʼi na̱yóʼo? ¿Nda̱chun kúni̱ún keʼún ña̱yóʼo ta sakíʼviún na̱ ñuu Israel ku̱a̱chi?”.

4 Soo ka̱ndíxakana tu̱ʼun ña̱ ni̱ka̱ʼa̱n ta̱ rey nu̱úka ña̱ ni̱ka̱ʼa̱n ta̱ Joab. Xa̱ʼa̱ ña̱kán, ta̱ Joab ki̱tara ku̱a̱ʼa̱nra iníísaá nu̱ú ndóo na̱ ñuu Israel ña̱ va̱ʼa ndakaʼvirana ta tándi̱ʼi saá ndi̱kóra chí Jerusalén. 5 Tasaá ni̱ka̱ʼa̱n ta̱ Joab xíʼin ta̱ David nda̱saa kúú na̱ nda̱kaʼvira. Ta 1,100,000 xi̱kuu na̱ ta̱a ñuu Israel na̱ xi̱xini̱ní kanitáʼan ta xi̱kuumiína espada ta na̱ ta̱a na̱ tribu ta̱ Judá xi̱kuuna 470,000. 6 Soo va̱ása níndakaʼvira na̱ tribu ta̱ Leví xíʼin na̱ tribu ta̱ Benjamín, saáchi ni loʼo va̱ása níkutóo ta̱ Joab ña̱ ni̱ka̱ʼa̱n ta̱ rey.

7 Ta kǒo níkutóo Ndióxi̱ ta̱ nda̱a̱ ña̱yóʼo, ña̱kán ta̱xira castigo ndaʼa̱ na̱ ñuu Israel. 8 Ta ta̱ David ni̱ka̱ʼa̱nra xíʼin Ndióxi̱ ta̱ nda̱a̱: “Ndeéní ku̱a̱chi ni̱ki̱ʼvii̱ nu̱ún xa̱ʼa̱ ña̱ ke̱ʼíi̱ ña̱yóʼo. Ña̱kán ixaún ña̱ ma̱ní, káʼnu koo iniún xa̱ʼa̱ ña̱ va̱ása va̱ʼa ke̱ʼé yi̱ʼi̱ ta̱ káchíñu nu̱ún, saáchi nda̱a̱ táki̱ʼva kéʼé iin na̱ kíʼví saá ke̱ʼíi̱”. 9 Jehová ni̱ka̱ʼa̱nra ña̱yóʼo xíʼin ta̱ profeta Gad ta̱ xi̱xito visión ta xi̱kaʼa̱nra xa̱ʼa̱ ña̱yóʼo xíʼin ta̱ David: 10 “Kúáʼan ta ka̱ʼa̱n ña̱yóʼo xíʼin ta̱ David: ‘Ña̱yóʼo kúú ña̱ káʼa̱n Jehová: “U̱ni̱ nu̱ú kúú ña̱ʼa ña̱ kivi keʼíi̱ xíʼún, ndaka̱xin ndáaña kúú ña̱ kúni̱ún”’”. 11 Ña̱kán ta̱ Gad ni̱xa̱ʼa̱nra nu̱úra ta ni̱ka̱ʼa̱nra xíʼinra: “Ña̱yóʼo kúú ña̱ káʼa̱n Jehová: ‘¿Ndáaña ndaka̱xiún? 12 ¿Ña̱ kundikaa̱ so̱ko u̱ni̱ ku̱i̱ya̱ iníísaá ñuu yóʼo? ¿Ña̱ kunún nu̱ú na̱ sáa̱-ini xíni yóʼó u̱ni̱ yo̱o̱? ¿Á ña̱ xo̱ʼvi̱ndó* u̱ni̱ ki̱vi̱ xíʼin castigo ña̱ taxi Jehová xíʼin espadara? Chi Jehová kuniñúʼura iin ángel ña̱ va̱ʼa sandíʼi-xa̱ʼa̱ra na̱ ndóo ñuu Israel xíʼin kue̱ʼe̱ xíkun ña̱ ndeéní’. Ndakani va̱ʼa xi̱níún ndáaña ndaka̱xiún ta ka̱ʼún xíʼi̱n ndáaña ndakuii̱n yuʼú ta̱ chi̱ndaʼá yi̱ʼi̱”. 13 Ta ta̱ David ni̱ka̱ʼa̱nra xíʼin ta̱ Gad: “Iin ña̱ yo̱ʼvi̱ní* kúú ña̱yóʼo nu̱úi̱. Soo va̱ʼaka mií Jehová ná taxi castigo ndaʼíi̱, saáchi kúndáʼviní-inira xínira na̱ yiví, ta va̱ása kúni̱i̱ ña̱ ná taxi na̱ yiví castigo ndaʼíi̱”.

14 Tasaá, Jehová chi̱ndaʼára iin kue̱ʼe̱ ña̱ xíkun ña̱ ndeéní nu̱ú na̱ ñuu Israel, ta ni̱xi̱ʼi̱ 70,000 na̱ yiví. 15 Saátu chi̱ndaʼá Ndióxi̱ ta̱ nda̱a̱ iin ángel ña̱ va̱ʼa sandíʼi-xa̱ʼa̱ra ñuu Jerusalén. Soo tá xa̱a̱ si̱lóʼo sandíʼi-xa̱ʼa̱raña, va̱ása va̱ʼa níkuni* Jehová xa̱ʼa̱ tu̱ndóʼo ña̱ kixi nu̱úna ta ni̱ka̱ʼa̱nra xíʼin ta̱ ángel ta̱ sándiʼi-xa̱ʼa̱ ñuu kán: “Xa̱a̱ va̱ʼa, sánuu ndaʼún”. Ta̱ ángel Jehová xi̱ndichira yatin nu̱ú ñuʼú nu̱ú ndátivina trigo* ña̱ kúú kuenta ta̱ Ornán ta̱ jebuseo.

16 Tá nda̱niʼi ta̱ David nu̱úra xi̱nira iin ángel Jehová chí ndiví, ta níʼira iin espada ta náʼa̱ ndaʼa̱ra chí ñuu Jerusalén. Ta ta̱ David xíʼin na̱ níʼi yichi̱ nu̱ú na̱ ñuu nda̱kundixina ti̱ko̱to̱ ndayí* ta ndi̱ku̱n xi̱kuxítína nda̱a̱ nu̱ú ñuʼú. 17 Ta̱ David ni̱ka̱ʼa̱nra xíʼin Ndióxi̱ ta̱ nda̱a̱: “¿Á su̱ví yi̱ʼi̱va kúú ta̱ ni̱ka̱ʼa̱n ña̱ ná ndakaʼvina na̱ ñuu? Yi̱ʼi̱va kúú ta̱ ni̱ki̱ʼvi ku̱a̱chi yóʼo, yi̱ʼi̱va kúú ta̱ ke̱ʼé ña̱ va̱ása va̱ʼa. ¿Ndáa ku̱a̱chiví kúúmií na̱ yiví* yóʼo? Ixaún ña̱ ma̱ní Jehová Ndióxi̱ miíi̱, yi̱ʼi̱ taxiún castigo ndaʼa̱ xíʼin na̱ veʼe yivái̱; soo va̱ása taxiún castigo ndaʼa̱ na̱ ñuún”.

18 Tasaá, ta̱ ángel Jehová xa̱ʼndara chiñu nu̱ú ta̱ Gad ña̱ ná ka̱ʼa̱nra xíʼin ta̱ David ña̱ ku̱ʼu̱nra keʼéra iin altar nu̱ú Jehová nu̱ú ñuʼú nu̱ú ndátivina trigo ña̱ kúú kuenta ta̱ Ornán ta̱ jebuseo. 19 Ta ni̱xa̱ʼa̱nva ta̱ David chi saá kúú ña̱ ni̱ka̱ʼa̱n Jehová xíʼin ta̱ Gad ña̱ ná ka̱ʼa̱nra xíʼinra. 20 Tá ndíkaa̱ ta̱ Ornán sákuachira trigo, saá ndi̱kóko̱ora ta xi̱nira ta̱ ángel yóʼo, ta ku̱mí saá na̱ se̱ʼera na̱ kítáʼan xíʼinra xi̱koose̱ʼéna.* 21 Saá nda̱kiʼin ta̱ David ku̱a̱ʼa̱nra nu̱ú ndíkaa̱ ta̱ Ornán, ta tá xi̱ni ta̱yóʼora ndi̱ku̱n ki̱tara nu̱ú ndíkaa̱ra sákuachira trigo ta xi̱kuxítíra nu̱ú ta̱ David. 22 Tasaá ni̱ka̱ʼa̱n ta̱ David xíʼin ta̱ Ornán: “Xi̱íko* ñuʼú nu̱ú ndátivina trigo ndaʼíi̱ ña̱ va̱ʼa ixava̱ʼi̱ iin altar nu̱ú Jehová, tasaá va̱ása xo̱ʼvi̱ka na̱ ñuu. Mií ya̱ʼviña xi̱íkoúnña kiʼii̱n”. 23 Soo ta̱ Ornán ni̱ka̱ʼa̱nra xíʼin ta̱ David: “Va̱ʼa ndakiʼinvaúnña. Ta kivi keʼún nda̱a̱ ndáaka ña̱ kúni̱ miívaún táta rey. Ta yóʼo íyo si̱ndi̱ki̱ ña̱ va̱ʼa kaʼmiúnrí* ta so̱kóúnrí nu̱ú* Ndióxi̱ ta saátu yitu̱n tú sákuachina trigo ña̱ va̱ʼa ná koonú titu̱n, ta yóʼotu íyo harina ña̱ va̱ʼa so̱kóúnña. Táxii̱ ndiʼi ña̱yóʼo ndaʼún”.

24 Soo ta̱ rey David ni̱ka̱ʼa̱nra xíʼin ta̱ Ornán: “Va̱ása, chi chaʼvivai̱ ya̱ʼviña ndaʼún. Va̱ása ndakiʼii̱n ña̱ʼa ña̱ kúú kuentaún ta taxii̱ña ndaʼa̱ Jehová ta ni va̱ása kaʼmii̱ kití ta so̱kói̱rí nu̱úra tá va̱ása níchaʼvii̱ xa̱ʼa̱rí”. 25 Xa̱ʼa̱ ña̱kán, ta̱ David ta̱xira u̱xa̱ kilo* ña̱ oro ndaʼa̱ ta̱ Ornán xa̱ʼa̱ ñuʼú yóʼo. 26 Ta kán i̱xava̱ʼa ta̱ David iin altar nu̱ú Jehová ta xa̱ʼmira kití ni̱so̱kóra nu̱úra, ni̱so̱kóturarí ña̱ va̱ʼa kutáʼan viína xíʼin Ndióxi̱, ta ni̱ka̱ʼa̱nra ki̱vi̱ Jehová ta nda̱kuiinvara yuʼúra tasaá chi̱ndaʼára iin ñuʼu̱ chí ndiví ta xa̱ʼmiña ña̱ʼa ña̱ níndoso nu̱ú altar. 27 Tasaá xa̱ʼnda Jehová chiñu nu̱ú ta̱ ángel ña̱ ná ndachikaa̱va̱ʼara* espadara. 28 Tá ki̱ʼin ta̱ David kuenta ña̱ nda̱kuiinva Jehová yuʼúra chí nu̱ú ñuʼú nu̱ú xi̱ndativina trigo ña̱ xi̱kuu kuenta ta̱ Ornán ta̱ jebuseo, nda̱kundeévara xi̱so̱kóra ña̱ʼa kán. 29 Tá tiempo saá, tabernáculo Jehová ña̱ i̱xava̱ʼa ta̱ Moisés chí nu̱ú ñuʼú yi̱chí ta saátu altar nu̱ú xi̱xaʼmina kití tí xi̱sokóna, ni̱xi̱yoña chí nu̱ú xi̱ndasakáʼnuna Ndióxi̱* chí Gabaón. 30 Soo kǒo níxi̱kivi ku̱ʼu̱n ta̱ David nda̱ka̱tu̱ʼunra Ndióxi̱ kán, saáchi xi̱yiʼvíníra nu̱ú espada ta̱ ángel Jehová.