1 Crónicas

28 Tasaá sa̱ndátaka ta̱ David ndiʼi na̱ xi̱niʼi yichi̱ nu̱ú na̱ ñuu Israel chí Jerusalén: na̱ xi̱niʼi yichi̱ nu̱ú na̱ tribu, na̱ xi̱niʼi yichi̱ nu̱ú na̱ nda̱taʼvína ña̱ kachíñuna nu̱ú ta̱ rey, na̱ xi̱niʼi yichi̱ nu̱ú mil na̱ ta̱a, na̱ xi̱niʼi yichi̱ nu̱ú iin cientona, na̱ xi̱kiʼin kuenta xíʼin ña̱ʼa ña̱ xi̱kuumií ta̱ rey, na̱ xi̱kiʼin kuenta xíʼin kití sa̱na̱ra, na̱ xi̱sanáʼa̱ se̱ʼera, na̱ xi̱kuumií chiñu ña̱ ndáyáʼvi nu̱ú xi̱ndatiinra ku̱a̱chi xíʼin ndiʼika na̱ ta̱a na̱ ndakúní na̱ va̱ʼaní xi̱ndaa-inina. 2 Tasaá, ta̱ rey David nda̱kundichira ta ni̱ka̱ʼa̱nra xíʼinna:

“Na̱ ñani miíi̱ xíʼin na̱ ñuu miíi̱, kuniso̱ʼondó ña̱ ka̱ʼi̱n. Yi̱ʼi̱ xi̱kuni̱i̱ ixava̱ʼi̱ iin veʼe nu̱ú kundikaa̱ arca ña̱ trato tú kúú kuenta Jehová ta saátu ña̱ va̱ʼa kooña nda̱a̱ táki̱ʼva íyo iin tayi̱ loʼo nu̱ú ndakindee̱ xa̱ʼa̱ Ndióxi̱yó. Ta xa̱a̱ i̱xatu̱ʼvavai̱ ndiʼi ña̱ʼa ña̱ va̱ʼa keʼíi̱ ña̱yóʼo. 3 Soo Ndióxi̱ ta̱ nda̱a̱ ni̱ka̱ʼa̱nra xíʼi̱n: ‘Su̱ví yóʼó kúú ta̱ ixava̱ʼa iin veʼe nu̱ú ndasakáʼnuna ki̱víi̱, saáchi iin ta̱a ta̱ xíka nu̱ú ku̱a̱chi kúún ta ku̱a̱ʼání na̱ yiví xa̱ʼníún’. 4 Soo Jehová Ndióxi̱ na̱ ñuu Israel nda̱kaxinra yi̱ʼi̱ nu̱ú ndiʼika na̱ veʼe yivái̱ ña̱ va̱ʼa xa̱i̱ koi̱ rey nu̱ú na̱ ñuu Israel ndiʼi tiempo. Saáchi nda̱kaxinra ta̱ Judá ña̱ kuniʼira yichi̱ nu̱ú inkana; ta ti̱xin na̱ veʼe ta̱ Judá nda̱kaxinra na̱ veʼe yivái̱; ta ti̱xin ndiʼi na̱ se̱ʼe yivái̱ nda̱kaxinra yi̱ʼi̱ ña̱ koi̱ rey nu̱ú ndiʼi na̱ ñuu Israel. 5 Jehová ta̱xira ña̱ ku̱a̱ʼání ná koo na̱ se̱ʼi̱, ta ti̱xin ndiʼi na̱yóʼo nda̱kaxinra se̱ʼi̱ ta̱ Salomón ña̱ va̱ʼa koora nu̱ú trono Jehová ta kaʼndachíñura nu̱ú na̱ ñuu Israel.

6 ”Ndióxi̱ ni̱ka̱ʼa̱nra xíʼi̱n: ‘Se̱ʼún ta̱ Salomón kúú ta̱ ixava̱ʼa veʼi̱ ta saátu yéʼéña, saáchi nda̱kaxii̱nra ña̱ koora se̱ʼi̱ ta yi̱ʼi̱ koi̱ yivára. 7 Ta yi̱ʼi̱ taxii̱ ña̱ ndiʼi tiempo ná kaʼndachíñura tá ná ndakundeéra kuniso̱ʼora chiñu ña̱ xáʼndai̱ xíʼin ley ña̱ táxii̱, nda̱a̱ táki̱ʼva xa̱a̱ kéʼéra vitin’. 8 Ña̱kán ndóʼó na̱ israelita na̱ kúú ñuu mií Jehová kuniso̱ʼondó ña̱ ka̱ʼi̱n ta saátu ná kuniso̱ʼo Ndióxi̱yó ña̱ ka̱ʼi̱n: chikaa̱níndó ndee̱ ña̱ kunda̱a̱-inindó xa̱ʼa̱ chiñu ña̱ xáʼnda Jehová Ndióxi̱yó ta keʼéndóña, ña̱ va̱ʼa ku̱a̱ʼání tiempo kundoondó nu̱ú ñuʼú ña̱ va̱ʼaní yóʼo tasaá kúú ña̱ kivi ndataxindóña ndaʼa̱ na̱ se̱ʼendó.

9 ”Ta yóʼó Salomón se̱ʼe miíi̱, chika̱ún ndee̱ ña̱ kuxini̱ún Ndióxi̱ ta̱ ndásakáʼnui̱ ta kachíñún nu̱úra xíʼin ndiʼi níma̱ún ta saátu xíʼin ña̱ si̱í-ini, saáchi Jehová xítora ndáaña kúú ña̱ ñúʼu níma̱ na̱ yiví xíʼin ña̱ kúni̱na keʼéna ta saátu ña̱ ndákanixi̱nína. Tá ná nandukúnra taxivara ña̱ ná ndani̱ʼúnra; soo tá ná kuxíkáún nu̱úra sandákoondaʼa̱ra yóʼó ndiʼi tiempo. 10 Mií Jehová kúú ta̱ nda̱kaxin yóʼó ña̱ ixava̱ʼún iin veʼe ta ña̱ yi̱i̱ koo ña̱yóʼo. Ndakú koo iniún ta kixáʼún keʼún ña̱yóʼo”.

11 Tándi̱ʼi, ta̱ David ta̱xira iin tutu ndaʼa̱ se̱ʼera ta̱ Salomón ña̱ káʼa̱n ndáa ki̱ʼva kuva̱ʼa yéʼé veʼe yóʼo, cuarto ña̱ kuumiíña, cuarto nu̱ú taánva̱ʼana* ña̱ʼa, cuarto ña̱ koo chí xi̱ní, cuarto ña̱ koo chí ini ta saátu cuarto nu̱ú ixakáʼnu-ini Ndióxi̱ xa̱ʼa̱ ku̱a̱china. 12 Saátu ta̱xira tutu ña̱ káʼa̱n ndáa ki̱ʼva koo patio veʼe Jehová ndaʼa̱ ta̱ Salomón, ña̱ káʼa̱n ndáa ki̱ʼva koo cuarto nu̱ú kuxuna, cuarto nu̱ú taánva̱ʼana ña̱ʼa ña̱ ndáyáʼvi veʼe Ndióxi̱ ta̱ nda̱a̱, ta saátu ña̱ʼa ña̱ ndáyáʼvi ña̱ nda̱sayi̱i̱na* nda̱a̱ táki̱ʼva ni̱na̱ʼa̱ espíritu santo Ndióxi̱ nu̱úra ña̱ kooña; 13 saátu ni̱ka̱ʼa̱nra xíʼin se̱ʼera ta̱ Salomón ndáa ki̱ʼva ndataʼvíra na̱ su̱tu̱ xíʼin na̱ levita, ta saátu ndáa chiñu kúú ña̱ keʼé na̱yóʼo veʼe Jehová ta ndáa ña̱ʼatu kúú ña̱ kuniñúʼuna ña̱ keʼéna chiñuna ini veʼe Jehová. 14 Saátu ni̱ka̱ʼa̱nra xíʼinra nda̱saa kilo ña̱ oro kuniñúʼuna ña̱ ixava̱ʼana iin tá iin ña̱ʼa ña̱ kuniñúʼuna ña̱ keʼéna chiñuna, nda̱saa kilo ña̱ plata kuniñúʼuna ña̱ ixava̱ʼana ndiʼi ña̱ʼa ña̱ kuniñúʼuna ña̱ keʼéna xa̱a̱ síín síín chiñu; 15 nda̱saa kilo ña̱ oro kuniñúʼuna ña̱ ixava̱ʼana iin tá iin candelabro xíʼin lámpara ña̱ kuumiíña, nda̱saa kilo ña̱ plata kuniñúʼuna ña̱ ixava̱ʼana iin tá iin candelabro xíʼin lámpara ña̱ kuumiíña; 16 nda̱saa kilo ña̱ oro kuniñúʼuna ña̱ ixava̱ʼana iin tá iin mesa nu̱ú kundóso si̱ta̱váʼa ña̱ sóko̱na nu̱ú* Ndióxi̱, nda̱saa kilo ña̱ plata kuniñúʼuna ña̱ ixava̱ʼana inkaka mesa, 17 nda̱saa kilo nina oro kuniñúʼuna ña̱ ixava̱ʼana tenedor, ko̱ʼo̱ ña̱ kúnú ini xíʼin jarra, ta saátu nda̱saa oro kuniñúʼuna ña̱ ixava̱ʼana iin tá iin ko̱ʼo̱ válí ña̱ kúnú ini, saátu nda̱saa kilo ña̱ plata kuniñúʼuna ña̱ ixava̱ʼana iin tá iin ko̱ʼo̱ válí ña̱ kúnú ini. 18 Ta ni̱ka̱ʼa̱ntura xíʼinra nda̱saa oro mií ña̱ va̱ʼaní kuniñúʼuna ña̱ ixava̱ʼana altar nu̱ú chiʼmána ña̱ʼa ña̱ xáʼa̱n támi ta saátu nda̱saa oro kuniñúʼuna ña̱ ixava̱ʼana na̱ querubín na̱ ndándika̱ ndi̱xi̱n sa̱tá arca ña̱ trato tú ndánaʼa̱ carro Jehová. 19 Ta̱ David ni̱ka̱ʼa̱nra: “Mií Jehová kúú ta̱ xi̱niʼi yichi̱ nu̱úi̱ ta ta̱xira ña̱ ndíchi ndaʼíi̱ ña̱ va̱ʼa kaʼyii̱ ndiʼi ña̱ va̱xi nu̱ú tutu yóʼo, ña̱ káʼa̱n ndáa ki̱ʼva kuva̱ʼa veʼera”.

20 Tasaá ni̱ka̱ʼa̱n ta̱ David xíʼin se̱ʼera ta̱ Salomón: “Ndakú koo iniún ta va̱ása yi̱ʼvíún, ta kixáʼún keʼún chiñu yóʼo. Va̱ása yi̱ʼvíún saáchi Jehová Ndióxi̱, ta̱ kúú Ndióxi̱ miíi̱ íyora xíʼún. Va̱ása sandákoondaʼa̱ra yóʼó ta ni va̱ása kuxíkára nu̱ún. Koora xíʼún ta chindeétáʼanra xíʼún nda̱a̱ ná sandíʼún ixava̱ʼún veʼe Jehová. 21 Yóʼo íyo na̱ su̱tu̱ xíʼin na̱ levita na̱ xa̱a̱ nda̱taʼvína ña̱ va̱ʼa keʼéna iin tá iin chiñu ti̱xin veʼe Ndióxi̱ ta̱ nda̱a̱. Kúúmiíún ku̱a̱ʼání na̱ xíni̱ní kachíñu ta xa̱a̱ íyo tu̱ʼvana ña̱ keʼéna ndiʼi nu̱ú chiñu, saátu na̱ níʼi yichi̱ nu̱ú na̱ ñuu xíʼin ndiʼi mií na̱ ñuu, ta na̱yóʼo keʼévana ndiʼi ña̱ ná ka̱ʼún xíʼinna”.