Ki̱ʼva ña̱ xi̱nda̱savií inkana miína xi̱sandákavaña-inii̱
ÑA̱ NÁTÚʼUN ÑÁ EILEEN BRUMBAUGH
XA̱ʼNUI̱ ti̱xin iin religión táʼan ña̱ ndíku̱n na̱ amish ta saátu na̱ menonita ña̱ xi̱naní: la Antigua Orden de Hermanos Bautistas Alemanes [á xi̱ka̱ʼa̱ntuna xíʼinna dunkers]. Tá ku̱i̱ya̱ 1708 ki̱xáʼa xa̱ʼa̱ veʼe-ñu̱ʼu yóʼo chí Alemania, ña̱ xi̱kaʼa̱nna xíʼin pietismo ña̱yóʼo kúú ña̱ xi̱kuni ku̱a̱ʼá na̱ yiví kunda̱a̱-inina xa̱ʼa̱ Ndióxi̱, nda̱a̱ táki̱ʼva káchi The Encyclopedia of Religion— na̱ veʼe-ñu̱ʼu yóʼo xi̱kuni̱nína kundaa-inina xa̱ʼa̱ ña̱ sa̱náʼa̱ ta̱ Cristo. Ta ke̱ʼéna campaña ña̱ chi̱ndaʼána na̱ misionero ña̱ ku̱ʼu̱nna natúʼunna xíʼin na̱ yiví inkaka país.
Ku̱i̱ya̱ 1719 ki̱xaa̱ iin tiʼvi na̱ yiví chí Pensilvania (Estados Unidos), ta ta̱ xi̱niʼi yichi̱ nu̱úna xi̱kuu ta̱ Alexander Mack, ta nani saá ki̱xáʼa ndátaʼví veʼe-ñu̱ʼu yóʼo, ta ña̱ xi̱sanáʼa̱ ta̱ Mack síín síín xi̱sanáʼa̱naña. Veʼe-ñu̱ʼu nu̱ú xi̱xaʼi̱n ki̱ʼva cincuenta kuití na̱ yiví xi̱xaʼa̱n, ta nu̱ú ndi̱ʼi̱ ña̱ ndáyáʼviní xi̱kuu ña̱ kaʼvindi̱ Biblia ta kundiku̱nndi̱ ña̱ xi̱sanáʼa̱na ndi̱ʼi̱.
Nda̱a̱ na̱ xi̱íi̱ xíʼin mií xi̱ndiku̱nníndi̱ veʼe-ñu̱ʼu yóʼo ta saátu ki̱ʼva ña̱ xi̱sanáʼa̱na. Tá xi̱kuumiíi̱ 13 ku̱i̱ya̱ nda̱kuchi ti̱xin veʼe-ñu̱ʼu yóʼo. Sa̱kuaʼi̱ ña̱ va̱ása va̱ʼa kuniñúʼuyó carro, tractor, teléfono, radio á inkaka ña̱ʼa ña̱ xíniñúʼu luz. Ta ná ñaʼá ná xi̱xaʼa̱n veʼe-ñu̱ʼu yóʼo va̱ása níxindixíndi̱ ti̱ko̱to̱ ña̱ yaʼviní, va̱ása níxixaʼndandi̱ yixí xi̱nindi̱ ta ndiʼi tiempo xi̱ndasi xi̱nindi̱ xíʼin ti̱ko̱to̱, ta ndiʼi na̱ ta̱a va̱ása níxixaʼndana yixí yuʼúna. Xi̱ndakanixi̱níndi̱ ña̱ va̱ása xíniñúʼu koondi̱ táki̱ʼva íyo na̱ ñuyǐví yóʼo, tá kúú ña̱ kundixíndi̱ táʼan ti̱ko̱to̱ ña̱ ndíxina, ni ña̱ ndakaʼyíndi̱ nu̱úndi̱ á ña̱ kuniñúʼundi siki̱ so̱ʼo, chi xi̱ndakanixi̱níndi̱ ña̱ na̱ yiví na̱ ni̱nu-ini kúú na̱ xíniñúʼu ndiʼi ña̱yóʼo.
Ta saátu xi̱sanáʼa̱na ndi̱ʼi̱ ña̱ xíniñúʼu ixato̱ʼóndi̱ Biblia, chi nu̱ú ña̱yóʼo kúú ña̱ xi̱sakuʼandi xa̱ʼa̱ Ndióxi̱. Ndiʼi ki̱vi̱, tá kuma̱níka kuxundi̱, xindatakandi chí sala ña̱ veʼendi̱ ña̱ kuniso̱ʼondi̱ iin capítulo ña̱ xi̱kaʼvi yivándi̱ nu̱úndi̱ ña̱ va̱xi nu̱ú Biblia ta saátu ña̱ xi̱kaʼa̱nra xa̱ʼa̱ ña̱yóʼo. Tándi̱ʼi xi̱kuxítindi̱ nani xi̱kaʼa̱nra xíʼin Ndióxi̱. Tá so̱ndíʼi, siʼíi̱ xi̱ka̱ʼa̱nñá oración ña̱ sa̱náʼa̱ ta̱ Jesús ña̱ naní padrenuestro. Yi̱ʼi̱ ndiʼi tiempo xi̱ndatui̱ ña̱ kixaa̱ ki̱vi̱ ña̱ ndikóndi̱ keʼé tukundi̱ ña̱yóʼo, saáchi ndiʼi na̱ veʼi̱ xi̱ndakutáʼan ña̱ ndakanixi̱níndi̱ xa̱ʼa̱ ña̱ káʼa̱n Biblia.
Ni̱xi̱yondi̱ nu̱ú iin ñuʼú ña̱ káʼnuní ña̱ ndíkaa̱ yatin ñuu Delphi (Indiana), nu̱ú xi̱chi̱ʼindi̱ ku̱a̱ʼání ña̱ʼa, tándi̱ʼi xi̱sandáandiña sa̱tá iin carruaje tú xi̱xitá iin kuáyi̱ ña̱ va̱ʼa ku̱ʼu̱nndi̱ xi̱kóndiña chí ñuu káʼnu, tá kúú chí calle ta saátu veʼe tá veʼe. Xi̱ndakanixi̱níndi̱ ña̱ ndeéní kachíñundi̱ kúú ña̱ kachíñundi̱ nu̱ú Ndióxi̱, xa̱ʼa̱ ña̱kán xi̱ndi̱ʼi̱ní-inindi̱ xa̱ʼa̱ ña̱ kachíñundi̱, iinlá domingo kúú ña̱ va̱ása níxi̱kachíñundi̱, saáchi ki̱vi̱ saá va̱ása xíniñúʼu keʼéndi̱ nda̱a̱ ni iin chiñu. Soo, sava yichi̱ xa̱ʼa̱ ña̱ ku̱a̱ʼání chiñu xi̱kuumiíndi̱ va̱ása níkivi kundikundi̱ ley yóʼo.
Ti̱ndaʼíi̱ ta ka̱ku se̱ʼi̱
Tá ku̱i̱ya̱ 1963, tá xi̱kuumií 17 ku̱i̱ya̱, ti̱ndaʼíi̱ xíʼin ta̱ James, ta inkáchi veʼe-ñu̱ʼu xi̱xa̱ʼa̱nndi̱, ta saátu na̱ veʼera veʼe-ñu̱ʼu yóʼo xi̱xa̱ʼa̱nna nani tiempo xi̱í xíkúara. Ta u̱vi̱ saándi̱ ndiʼi tiempo xi̱xa̱ʼa̱nndi̱ veʼe-ñu̱ʼu ta xi̱ndakanixi̱níndi̱ ña̱ veʼe-ñu̱ʼu yóʼo kúú ña̱ nda̱a̱.
Tá ku̱i̱ya̱ 1975 xa̱a̱ ni̱xi̱yo i̱ñu̱ se̱ʼendi̱, ta tá ku̱i̱ya̱ 1983 ka̱ku se̱ʼendi̱ ta̱ so̱ndíʼi, ta̱ u̱xa̱. Iinlá ñaʼá se̱ʼi̱ ka̱ku, ñá Rebecca, ñá u̱vi̱ kúú ñáyóʼo. Xi̱kachíñuníndi̱, loʼova xu̱ʼún xi̱xiniñúʼundi̱ ta kǒo ku̱a̱ʼá ña̱ʼa níxikuumiíndi̱. Ta nda̱kundeéndi̱ sa̱náʼa̱ndi̱ na̱ válí se̱ʼendi̱ nda̱a̱ táki̱ʼva sa̱kuaʼandi̱ nu̱ú Biblia, ña̱ sa̱náʼa̱ na̱ yivándi̱ miíndi̱ ta saátu ña̱ sa̱náʼa̱ na̱ xi̱xaʼa̱n veʼe-ñu̱ʼu ndi̱ʼi̱.
Veʼe-ñu̱ʼu nu̱ú xi̱xa̱ʼa̱nndi̱ xi̱ndiʼiní-inina xa̱ʼa̱ ndáa ki̱ʼva náʼa̱ iin na̱ yiví. Xi̱ndakanixi̱níndi̱, ña̱ va̱ása kivi kunda̱a̱-iniyó ndáaña ñúʼu níma̱ na̱ yiví, xa̱ʼa̱ ña̱kán ki̱ʼva ndíxina kúú ña̱ náʼa̱ ndáa ki̱ʼva íyona. Ña̱kán, xi̱ndakanixi̱níndi̱ ña̱ iin na̱ yiví na̱ ni̱nuní-ini kúú na̱ xi̱ndasaviíní yixí xi̱nina á ña̱ ndíxina ti̱ko̱to̱ ña̱ íyoní dibujo nu̱ú. Ta xa̱ʼa̱ ña̱ xi̱ndakanixi̱níndi̱ ña̱yóʼo, kǒo níxindikundi̱ ña̱ káʼa̱n Biblia.
Ña̱ ndo̱ʼo na̱ xi̱ñuʼu veʼeka̱a
Tá xa̱a̱ ku̱nu̱mí ndiʼi ku̱i̱ya̱ sesenta, saátu ta̱ cuñadoi̱ ta̱ Jesse, inkáchi religión xi̱kuumiíndi̱, chi̱kaa̱nara veʼeka̱a xa̱ʼa̱ ña̱ va̱ása níxa̱ʼa̱nra ña̱ Ejército. Ta̱yóʼo xi̱nitáʼanra xíʼin na̱ testigo Jehová, ta saátu na̱yóʼo inkáchi ndákanixi̱nína ña̱ ku̱ʼu̱nna nu̱ú guerra va̱ása va̱xiña nu̱ú Biblia (Isaías 2:4; Mateo 26:52). Ku̱a̱ʼání yichi̱ na̱túʼunra xa̱ʼa̱ Biblia xíʼinna ta ki̱ʼinra kuenta ña̱ kúúmiína ku̱a̱ʼání ña̱ va̱ʼa. Ta xa̱ʼa̱ ña̱ ka̱ʼvi va̱ʼara Biblia, nda̱kuchira ta ndu̱ura Testigo, ña̱yóʼo sa̱sáa̱níña miíndi̱.
Ta̱ Jesse na̱túʼunra xíʼin yiíi̱ xa̱ʼa̱ ña̱ sa̱kuaʼara ta saátu ki̱ʼinra kuenta ña̱ ndiʼi tiempo ná ndakiʼin ta̱yóʼo revista La Atalaya xíʼin ña̱ ¡Despertad! Ta xa̱ʼa̱ ña̱yóʼo ni̱kutóoníka ta̱ James ña̱ sákuaʼara xa̱ʼa̱ Biblia. Xi̱kutóoníra kaʼvira xa̱ʼa̱ ndiʼi ña̱ chíndeétáʼan xíʼinra ña̱ kuyatinra nu̱ú Ndióxi̱, saáchi ndiʼi tiempo xi̱kunira kachíñura nu̱úra, soo xi̱ndakanixi̱níra ña̱ íyo xíkara nu̱ú Ndióxi̱.
Na̱ xi̱niʼi yichi̱ nu̱ú veʼe-ñu̱ʼu nu̱ú xi̱xa̱ʼa̱nndi̱ xi̱kaʼa̱nna xíʼindi̱ ña̱ ná kaʼvindi̱ sava revista tá kúú ña̱ Antigua Orden, ña̱ xi̱tavá na̱ amish á na̱ menonita, ni xi̱ndakanixi̱níndi̱ ña̱ íyoña táki̱ʼva íyo ña̱ ndákanixi̱ní na̱ ñuyǐví yóʼo. Yivái̱ xi̱saa̱ní-inira xi̱xinira na̱ Testigo ta xi̱kaʼa̱nra xíʼinndi̱ ña̱ nda̱a̱ ni iin yichi̱ ná va̱ása kaʼvindi̱ ña̱ La Atalaya á ña̱ ¡Despertad! Tá xi̱xinii̱ ta̱ James ña̱ xi̱kaʼvira ña̱yóʼo, xi̱saa̱níi̱, saáchi xi̱ndakanixi̱níi̱ ña̱ xa̱a̱ra keʼéra táʼan ña̱ kéʼé na̱ veʼe-ñu̱ʼu vatá.
Ta̱ James xa̱a̱ ku̱a̱ʼání tiempo xi̱ndakanixi̱níra ña̱ sava ña̱ xi̱sanáʼa̱na miíndi̱ va̱ása kítáʼanña xíʼin ña̱ káʼa̱n Biblia, tá kúú iin ku̱a̱chi káʼnu xi̱kuu ña̱ keʼéyó iin chiñu iin ki̱vi̱ domingo. Ta ña̱ Antigua Orden xi̱sanáʼa̱na ña̱ ki̱vi̱ kán kiviva taxiyó koʼo tí si̱ndi̱ki̱, soo va̱ása kivi tuʼunyó ku̱ʼu̱ va̱lí, ta na̱ xi̱niʼi yichi̱ nu̱ú na̱ veʼe-ñu̱ʼundi̱ va̱ása níndani̱ʼína ndáa ki̱ʼva na̱ʼa̱na nu̱úndi̱ ña̱ va̱xiña nu̱ú Biblia. Saátu miíi̱ ki̱xáʼa xíka-inii̱ xa̱ʼa̱ ña̱ xi̱sanáʼa̱na yi̱ʼi̱.
Ku̱a̱ʼání ku̱i̱ya̱ nda̱kanixi̱níndi̱ ña̱ xi̱ñuʼundi̱ veʼe-ñu̱ʼu Ndióxi̱ ta xi̱kundaa-inindi̱ ndáaña kundoʼondi̱ tá ná sandákoondi̱ ña̱yóʼo, xa̱ʼa̱ ña̱yóʼo i̱xayo̱ʼvi̱níña xíʼindi̱. Ta, ña̱ xínitúni̱ndi̱ va̱ása nítaxikaña kuñuʼundi̱ ti̱xin iin religión ña̱ va̱ása sána̱ʼa̱ ña̱ nda̱a̱ ña̱ va̱xi nu̱ú Biblia, ña̱kán tá ku̱i̱ya̱ 1983 ka̱ʼyíndi̱ iin carta nu̱ú ni̱ka̱ʼa̱nndi̱ ndáa xa̱ʼa̱ kúú ña̱ keendi̱ ti̱xin religión kán ta ni̱ka̱ʼa̱nndi̱ xíʼinna ña̱ ná kaʼvinaña nu̱ú ndiʼina. Xa̱ʼa̱ ña̱kán, tavána ndi̱ʼi̱ ti̱xin religión kán.
Ki̱xáʼandi̱ nándukúndi̱ religión ña̱ nda̱a̱
Tasaá ki̱xáʼandi̱ nándukúndi̱ religión ña̱ nda̱a̱. Ta na̱ religión kán xi̱niñúʼu kundiku̱nna ña̱ xi̱sanáʼa̱na. Ña̱ nu̱ú ke̱ʼéndi̱ kúú ña̱ va̱ása kutáʼanndi̱ xíʼin na̱ veʼe-ñu̱ʼu na̱ xi̱xaʼa̱n guerra. Xi̱kuni̱ndi̱ ku̱ʼu̱nndi̱ xíʼin na̱ religión na̱ va̱ása kúúmií “ku̱a̱ʼání ña̱ʼa”, saáchi xi̱ndakanixi̱níndi̱ ña̱ na̱yóʼo kúú na̱ va̱ása kítáʼan xíʼin na̱ ñuyǐví yóʼo. Ña̱kán, nani tá ku̱i̱ya̱ 1983 nda̱a̱ 1985 ni̱xi̱kandi̱ iníísaá país ña̱ na̱ndukúndi̱ inka religión tá kúú: na̱ menonita, na̱ cuáqueros xíʼin inkaka religión.
Tiempo saá, na̱ testigo Jehová ki̱xáʼana xáʼa̱nna xítona ndi̱ʼi̱ chí granja nu̱ú ni̱xi̱yondi̱, ña̱ xi̱ndikaa̱ chí Camden (Indiana). Ni xi̱xiniso̱ʼondi̱ ña̱ xi̱kaʼa̱nna, soo xi̱ka̱ʼa̱nndi̱ xíʼinna ña̱ ná kaʼvina texto ña̱ va̱xi nu̱ú King James Version (Versión del Rey Jacobo) nu̱úndi̱. Yi̱ʼi̱ xi̱ ixato̱ʼóvai̱ na̱yóʼo saáchi va̱ása níxi̱xa̱ʼa̱nna guerra, soo i̱xayo̱ʼvi̱ña xíʼi̱n kuniso̱ʼi̱ ña̱ káʼa̱nna saáchi na̱yóʼo va̱ása níxindixí núuna ña̱ va̱ʼa na̱ʼa̱na ña̱ síín íyona nu̱ú na̱ ñuyǐví, xa̱ʼa̱ ña̱kán nda̱kanixi̱níi̱ ña̱ va̱ása kúúna religión ña̱ nda̱a̱. Ta saátu xi̱ndakanixi̱níi̱, ña̱ xa̱ʼa̱ ña̱ va̱ʼaní xi̱ndixí na̱ yiví kúú ña̱ ni̱nuní xi̱kuni̱na nu̱ú inkana, ta saátu xa̱ʼa̱ ña̱ xi̱kuumiína ku̱a̱ʼání ña̱ʼa kúú ña̱ xi̱kuta̱aní-inina.
Ni̱saa̱níi̱ tá ki̱xáʼa ta̱ James xáʼa̱nra Salón ña̱ Reino xíʼin sava na̱ va̱lí se̱ʼendi̱. Xi̱kaʼa̱nra xíʼi̱n ná ku̱ʼi̱n xíʼinra, soo va̱ása níxii̱n ku̱ʼi̱n. Iin ki̱vi̱ ni̱ka̱ʼa̱nra xíʼi̱n: “Ni kǒo kutóún ña̱ ndákanixi̱nína, va̱ʼaka ku̱ʼu̱n miíún kotoún ndáa ki̱ʼva viíní kítáʼan na̱yóʼo”, saáchi xi̱kutóoníra ki̱ʼva ña̱ xi̱kitáʼanna.
Tándi̱ʼi ni̱xa̱ʼa̱nvai̱, soo kiʼinní kuenta. Tá ni̱ki̱ʼvi salón ndíxii̱ ti̱ko̱to̱ ña̱ núu loʼo xíʼin iin gorro, ta na̱ va̱lí se̱ʼi̱ kǒo nduxa̱ ñúʼu xáʼana. Soo ni saá, na̱ Testigo chi̱ndeéna ndi̱ʼi̱ ta va̱ʼaní ke̱ʼéna xíʼindi̱. Nda̱kanixi̱níi̱: “Síínníva íyondi̱, soo ni saá va̱ʼaní nda̱kiʼinna ndi̱ʼi̱.”
Nda̱kanda̱ní-inii̱ xa̱ʼa̱ ña̱ va̱ʼaní inina, ta xi̱xito kuitíi̱ ndáaña xi̱keʼéna, va̱ása níxindichi̱ tá xi̱xitana ni nda̱a̱ ni iin yaana kǒo níxixitai̱. Ta tá xa̱a̱ ndi̱ʼi reunión, xi̱keʼíi̱ pregunta xíʼinna xa̱ʼa̱ ña̱ʼa ña̱ xi̱tivi ña̱ va̱ása va̱ʼa xi̱keʼéna ta saátu xa̱ʼa̱ sava ña̱ va̱xi nu̱ú Biblia. Ni va̱ása vií níxika̱ʼi̱n xíʼinna, soo ndiʼi na̱yóʼo xi̱ndi̱ʼi̱va-inina xa̱ʼíi̱. Saátu xi̱ndakandaní-inii̱ ta xi̱keʼíi̱ suvi mií pregunta yóʼo xíʼin inkana, inkáchi xi̱ndakuiinna yuʼíi̱. Ta sava yichi̱ xi̱kaʼyína ña̱ xi̱ndaka̱tu̱ʼíi̱n miína, ta ña̱yóʼo xi̱chindeétáʼanníña xíʼi̱n, saáchi kivi kaʼvii̱ ña̱yóʼo inka ki̱vi̱.
Tá ku̱i̱ya̱1985 ni̱xa̱ʼa̱nndi̱ xi̱tondi̱ iin asamblea na̱ testigo Jehová ña̱ ni̱xi̱yo chí Memphis (Tennessee). Ta̱ James ni̱xi̱yokava yixí yuʼúra, ta saátu ndi̱ʼi̱ va̱ása vií níxindixíndi̱. Ta tá ni̱xi̱yo intermedio ña̱ asamblea kán, ndiʼi tiempo ni̱xi̱yo na̱ ni̱xa̱a̱ na̱túʼun xíʼindi̱. Ku̱si̱íní-inindi̱ xa̱ʼa̱ ña̱ va̱ʼaní ni̱xi̱yo inina xíʼindi̱ ta saátu xa̱ʼa̱ ña̱ ni̱ndi̱ʼi̱-inina xa̱ʼa̱ndi̱. Ta nda̱kanda̱ní-inindi̱ xa̱ʼa̱ ña̱ va̱ʼaní xi̱kitáʼanna, ta xi̱naʼa̱na ña̱yóʼo nda̱a̱ ndáaka nu̱ú xi̱ndakutáʼanna.
Nda̱kanda̱ní-ini ta̱ James xa̱ʼa̱ ña̱ va̱ʼaní ni̱xi̱yo ini na̱ Testigo xíʼinndi̱, xa̱ʼa̱ ña̱kán ki̱xáʼara káʼvira Biblia xíʼinna, ta kiʼinníra kuenta xíʼin ndiʼi ña̱ xi̱sanáʼa̱na miíra (Hechos 17:11; 1 Tesalonicenses 5:21). Ta saá kiʼinra kuenta ña̱ nda̱ni̱ʼíra ña̱ nda̱a̱. Soo yi̱ʼi̱, ni̱xi̱ka-inii̱, saáchi ni xi̱kuni̱i̱ keʼíi̱ ña̱ nda̱kú, va̱ása níxikuni̱ kundixíi̱ táki̱ʼva ndíxi na̱ ñuyǐví yóʼo. Tándi̱ʼi ki̱xai̱ káʼvi Biblia xíʼin na̱yóʼo, soo ña̱ xi̱xiniñúʼii̱ kúú ña̱ King James Version ta saátu xi̱niñúʼíi̱ ña̱ Traducción del Nuevo Mundo, ta ki̱xai̱ chítáʼii̱n ndiʼi versículo yóʼo ña̱ va̱ʼa kunda̱a̱-inii̱ ña̱ va̱ása sándaʼvina yi̱ʼi̱.
Ndáa ki̱ʼva sa̱xínuna-inii̱
Tá ki̱xáʼíi̱ káʼvi xíʼin na̱ Testigo, sa̱kúaʼandi̱, yiváyó ta̱ íyo chí ndiví iinlá Ndióxi̱va kúúra, su̱ví u̱ni̱ na̱ yiví kúúna, ta saátu ku̱ndaa̱-inindi̱, tá xa̱a̱ xíʼiyó va̱ása kíndo̱oka níma̱yó (Génesis 2:7; Deuteronomio 6:4; Ezequiel 18:4; 1 Corintios 8:5, 6). Ta saátu ku̱ndaa̱-inindi̱ ña̱ ndayá su̱ví nu̱ú xíxi na̱ yiví xíʼin ñuʼu̱ kúúña, chi nu̱ú ndúxu̱n ndiʼi na̱ yivíva kúúña (Job 14:13; Salmo 16:10; Eclesiastés 9:5, 10; Hechos 2:31). Ña̱ ni̱xa̱i̱ ku̱ndaa̱-inii̱ xa̱ʼa̱ ndayá iin ña̱ va̱ʼaní xi̱kuu ña̱yóʼo nu̱ui̱, saáchi religión nu̱ú xi̱ndikai̱ xa̱a̱ síín síín xi̱ndakanixi̱nína xa̱ʼa̱ ña̱yóʼo.
Soo ni̱xi̱ka loʼoka-inii̱ á ndixa religión ña̱ nda̱a̱ kúú na̱ Testigo, saáchi xa̱ʼa̱ ki̱ʼva ña̱ xi̱ndixina xi̱ndakanixi̱níi̱ ña̱ kúúna na̱ ñuyǐví yóʼo. Xi̱kunda̱a̱-inii̱ ña̱ xi̱xiniso̱ʼona ña̱ ni̱ka̱ʼa̱n ta̱ Jesús ña̱ natúʼunna xa̱ʼa̱ tu̱ʼun va̱ʼa xa̱ʼa̱ Reino Ndióxi̱ xíʼin ndiʼi na̱ yiví, xa̱ʼa̱ ña̱kán ni̱xi̱kaníka-inii̱ (Mateo 24:14; 28:19, 20).
Xa̱ʼa̱ ña̱ kúʼvi̱ní-ini na̱ Testigo xínitáʼanna ña̱yóʼo kúú ña̱ chi̱ndeétáʼan xíʼi̱n ña̱ na̱ndukúkai̱ xa̱ʼa̱ ña̱yóʼo. Ndiʼi na̱ congregación va̱ʼaní ni̱xa̱a̱na ki̱táʼanna xíʼin na̱ veʼi̱. Ta xa̱ʼa̱ ña̱ xi̱xaʼa̱n ku̱a̱ʼá na̱ hermano xi̱xitona ndi̱ʼi̱ ni xi̱kaʼa̱nna ña̱ xi̱xa̱ʼa̱nna ña̱ satána leche á ndi̱ví, xi̱kunda̱a̱-inindi̱ ña̱ va̱ʼaní na̱ yiví xi̱kuuna. Nu̱úka ña̱ va̱ása ya̱ʼana veʼendi̱ xa̱ʼa̱ ña̱ xi̱kaʼvindi̱ xíʼin iin na̱ hermano, ndiʼi yichi̱ xi̱yaʼa na̱ hermano na̱ congregación ña̱ xi̱xitona ndi̱ʼi̱ á íyo va̱ʼandi̱. Xi̱xiniñúʼundi̱ ña̱ ya̱ʼana kotona miíndi̱, ta tíxa̱ʼvi ña̱yóʼo ni̱xa̱a̱ndi̱ ku̱ndaa̱-inindi̱ ndáana yiví kúúna ta saá ki̱ʼinndi̱ kuenta ña̱ ndixa ndíʼi̱ní-inina xa̱ʼa̱ndi̱ ta kúʼvi̱ní-inina xínina miíndi̱.
Ta su̱ví iinlá congregación nu̱ú xi̱xa̱ʼa̱nndi̱ xi̱keʼé saá xíʼindi̱. Tá xi̱xika-inii̱ xa̱ʼa̱ ndáa ki̱ʼva kúú ña̱ vií kundixiyó, ki̱xi iin ñá testigo ñá naní Kay Briggs xi̱toñá yi̱ʼi̱, ta inka congregación xi̱xa̱ʼa̱nñá, ta ñáyóʼo va̱ása níxikutóoñá kundixiñá ti̱ko̱to̱ ña̱ yaʼviní, ta ni kǒo níxixiniñúʼuñá maquillaje. Va̱ʼaní kunii̱ xíʼin ñáyóʼo, tasaá ki̱xai̱ nátúʼi̱n xa̱ʼa̱ ña̱yóʼo xíʼinñá. Inka yichi̱ ki̱xi ta̱ hermano Lewis Flora xi̱tora yi̱ʼi̱, ta ta̱yóʼo xa̱ʼnura ti̱xin iin religión ña̱ xi̱sanáʼa̱ ña̱ va̱ása xíniñúʼu kuumiíyó “ña̱ ku̱i̱ká”. Ta̱kán, xa̱ʼa̱ ña̱ xi̱to kuitíra nu̱ui̱ ku̱ndaa̱-inira xíʼin ña̱ xi̱ndoʼi̱, tasaá ti̱ʼvíra iin carta ña̱ u̱xu̱ página ndaʼi̱ ña̱ va̱ʼa sandíkoña inii̱. Xa̱kuníi̱ xa̱ʼa̱ ña̱ va̱ʼaní inira. Xa̱a̱ ku̱a̱ʼání yichi̱ ndikói̱ káʼvi carta yóʼo.
Iin ta̱ hermano ta̱ kúú superintendente viajante, ta̱ naní O’Dell, ni̱ka̱ʼi̱n xíʼinra ña̱ ná ndakanira nu̱ui̱ ña̱ káʼa̱n Isaías 3:18-23 xíʼin 1 Pedro 3:3, 4. Ni̱ka̱ʼi̱n xíʼinra: “¿Á su̱ví ña̱ nda̱a̱ kúú ña̱ káʼa̱n versículo xíʼinyó ña̱ va̱ʼa sakúsi̱íyó ini Ndióxi̱ ni va̱ása xíniñúʼu kundixiyó ti̱ko̱to̱ ña̱ yaʼviní?”. Soo ta̱yóʼo ni̱ka̱ʼa̱nra xíʼi̱n: “ ¿Á va̱ása va̱ʼa kunúu iin gorro loʼo xi̱niyó? ¿Á iin ku̱a̱chi kúúña katúnyó lazo xi̱niyó? ”. Ti̱xin veʼe-ñu̱ʼu ña̱ xi̱ñuʼundi̱ tá ya̱chi̱ xi̱katúnna lazo xi̱ni ná ñaʼá va̱lí, ta ná ñaʼá xi̱chinúna gorro xi̱niná, tasaá kiʼi̱n kuenta ña̱ va̱ása níxikitáʼan ña̱ xi̱sakúaʼandi̱ xíʼin ña̱ xi̱keʼéndi̱. Nda̱kanda̱ní-inii̱ xíʼin ña̱ sa̱náʼa̱ ta̱ superintendente yóʼo yi̱ʼi̱.
Loʼo ta loʼo ki̱xai̱ kandíxai̱, soo ni̱xi̱yo iin ña̱ xi̱sandíʼi̱ní-inii̱: ña̱ xi̱xaʼnda ná ñaʼá yixí xi̱niná. Na̱ anciano viíní nda̱kanina nu̱ui̱ ña̱ sava ná ñaʼá kániníka xáʼnu yixí xi̱niná nu̱ú inkana. ¿Á ndáyáʼvikana xa̱ʼa̱ ña̱kán? Ta saátu chi̱ndeétáʼanna xíʼi̱n ña̱ ki̱ʼi̱n kuenta ndáa ki̱ʼva chíndeétáʼan ña̱ xínitúni̱yó xíʼinyó xa̱ʼa̱ ki̱ʼva ña̱ ndasaviíyó miíyó ta saátu ta̱xina tutu ndaʼi̱ ña̱ kivi kaʼvii̱ veʼi̱.
Ki̱xaa̱ndi̱ kéʼéndi̱ ña̱ sa̱kuaʼandi̱
Na̱ndukúndi̱ ña̱ nda̱a̱, ta nda̱niʼivandiña. Ta̱ Jesús ka̱chira: “Tasaá kúú ña̱ kunda̱a̱-ini ndiʼina ña̱ kúúndó discípuloi̱: tá kúʼvi̱-inindó xínitáʼanndó” (Juan 13:35). Ni̱xa̱a̱ndi̱ ku̱ndaa̱-inindi̱ ña̱ na̱ testigo Jehová kuʼvi̱-inina xíni táʼanna. Soo ni saá, xi̱ i̱xayo̱ʼvi̱níña xíʼin se̱ʼendi̱ na̱ xa̱a̱ chéeka, ta̱ Nathan xíʼin ñá Rebecca, saáchi na̱yóʼo xa̱a̱ xi̱ndiku̱nna religión ña̱ xi̱kuumiíndi̱ tá ya̱chi̱ ta xa̱a̱ nda̱kuchina ti̱xin ña̱yóʼo. Soo ña̱ xi̱ka̱ʼa̱nndi̱ xíʼinna xa̱ʼa̱ tu̱ʼun Ndióxi̱ ni̱xa̱a̱ña nda̱a̱ níma̱na ta ki̱ʼinna kuenta ña̱ kúʼvi̱ní-ini na̱ Testigo xíni táʼanna.
Ñá Rebecca, xi̱kuniñá viíní kutáʼanñá xíʼin Ndióxi̱. Xa̱ʼa̱ ña̱kán, va̱ása ní ixayo̱ʼvi̱ña xíʼinñá ka̱ʼa̱nña xíʼin Ndióxi̱ saáchi ku̱ndaa̱-iniñá ña̱ va̱ása ndaka̱xinra ndáa ki̱ʼva koo na̱ yiví ta saátu ña̱ koona chí nu̱únínu. Ta saátu ku̱yatinkañá nu̱úra saáchi ku̱ndaa̱-iniñá Ndióxi̱ su̱ví u̱ni̱ kúúra, chi iinlá Ndióxi̱ kuitíva kúúra ta kivi kundiku̱nñá yichi̱ra (Efesios 5:1). Ta saátu ku̱tóoníñá tá ku̱ndaa̱-iniñá ña̱ va̱ása xíniñúʼu ka̱ʼa̱nñá xíʼin Ndióxi̱ tu̱ʼun yo̱ʼvi̱ní ña̱ va̱xi nu̱ú Biblia ña̱ xi̱kuumiíñá. Ta ku̱ndaa̱-iniñá ndáaña kivi ka̱ʼa̱nyó xíʼin Ndióxi̱, ta saátu ña̱ kúni̱ra ná koo na̱ yiví nu̱ú ñuʼú livi ndiʼi tiempo, saá ku̱yatinníkañá nu̱ú Ndióxi̱ (Salmo 37:29; Apocalipsis 21:3, 4).
Ña̱ va̱ʼa ña̱ nda̱kiʼinndi̱
Ta̱ James xíʼin miíi̱, xíʼin u̱ʼu̱n se̱ʼendi̱ na̱ xa̱a̱ chéeka ta̱ Nathan, ñá Rebecca, ta̱ George, ta̱ Daniel xíʼin ta̱ John, nda̱kuchindi̱ ta ndu̱undi̱ testigo Jehová tá ku̱i̱ya̱ 1987. Ta̱ Harley nda̱kuchira tá ku̱i̱ya̱ 1989, ta ta̱ Simon tá ku̱i̱ya̱ 1994. Ndiʼi na̱ veʼi̱ chíkaa̱na ndee̱ ña̱ keʼéna chiñu ña̱ sa̱ndákoo ta̱ Jesús ndaʼa̱ na̱ ndíku̱n satára, ña̱ natúʼunyó tu̱ʼun va̱ʼa xa̱ʼa̱ Reino Ndióxi̱.
Ta u̱ʼu̱n se̱ʼi̱ na̱ xa̱a̱ chéeka ta̱ Nathan, ta̱ George, ta̱ Daniel, ta̱ John xíʼin ta̱ Harley ta saátu ñá Rebecca, xa̱a̱ xi̱kachíñuna ti̱xin sucursal na̱ Testigo Jehová ña̱ ndíkaa̱ chí Estados Unidos. Ta̱ George ndíkaakavara kán (xa̱a̱ catorce ku̱i̱ya̱ ndíkaara), ta ta̱ Simon, sa̱ndíʼira ka̱ʼvira tá ku̱i̱ya̱ 2001, sa̱kán íyo loʼo ki̱xaa̱ra káchíñura kán. Ndiʼi na̱ se̱ʼendi̱ kúúna anciano á siervo ministerial ti̱xin congregación na̱ Testigo Jehová. Yiíi̱ kúúra anciano ti̱xin congregación ña̱ ndíkaa̱ chí Thayer (Misuri), ta yi̱ʼi̱ ndíʼiní-inii̱ ña̱ natúʼi̱n xíʼin na̱ yiví xa̱ʼa̱ tu̱ʼun Ndióxi̱.
Xa̱a̱ u̱ni̱ se̱ʼe ñánindi̱ íyo ñá Jessica, ñá Latisha xíʼin ta̱ Caleb ta kúsi̱íní-inindi̱ ña̱ xítondi̱ ña̱ na̱ yivána chíkaa̱nína ndee̱ ña̱ sána̱ʼa̱nana kuʼvi̱-inina kunina Jehová. Kúsi̱íní-inindi̱ ña̱ ka̱na Jehová ndi̱ʼi̱ ta saátu ña̱ nda̱ni̱ʼíndi̱ na̱ ñuura na̱ níʼi ki̱vi̱ra, na̱ kúʼvi̱ní-ini xíni táʼan.
Ku̱ndaa̱-inindi̱ ndáa ki̱ʼva ndóʼo na̱ kúni̱ sákusi̱í-ini Ndióxi̱ soo íxayo̱ʼvi̱ña xíʼinna xa̱ʼa̱ ki̱ʼva ña̱ xa̱ʼnuna. Kúnindi̱ ña̱ ná kusi̱í-inindó nda̱a̱ táki̱ʼva kúsi̱í-inindi̱ tá ku̱a̱ʼa̱nndi̱ veʼe tá veʼe, soo su̱ví xa̱ʼa̱ ña̱ íxikondi̱ ña̱ʼa kúúña, chi kúúña xa̱ʼa̱ ña̱ nátúʼunndi̱ xa̱ʼa̱ Reino Ndióxi̱ xíʼin xa̱ʼa̱ ndiʼi ña̱ va̱ʼa keʼé Reino yóʼo chí nu̱únínu kúúña. Tá ndakaʼíi̱n xa̱ʼa̱ ndiʼi ña̱yóʼo, nda̱a̱ kúnii̱ kuakui̱ xa̱ʼa̱ ña̱ va̱ʼaní ni̱xi̱yo ini na̱ ñuu Ndióxi̱ xíʼindi̱, kúee ni̱xi̱yo inina ta ni̱na̱ʼa̱na ña̱ kúʼvi̱-inina xínina ndi̱ʼi̱.
[Na̱ʼná]
Tá xi̱kuumiíi̱ siete ku̱i̱ya̱, ta saá xa̱ʼnui̱
[Na̱ʼná]
Ta̱ James, ta̱ George, ta̱ Harley xíʼin ta̱ Simon ndíxira iin ti̱ko̱to̱ ña̱ va̱ása yaʼvi
[Na̱ʼná]
Nu̱ú iin periódico kitai̱ ña̱ ndísoi̱ ña̱ʼa ku̱a̱ʼi̱n chí mercado
[Reconocimiento]
Journal and Courier (Lafayette, Indiana)
[Na̱ʼná]
Na̱ veʼendi̱ tiempo vitin