9 Xíniñúʼu kunda̱a̱-iniún ndáa na̱ yiví kúún

¿NDÁAÑA KÚNI̱ KACHI ÑA̱YÓʼO?

Ña̱ náʼa̱ ndáa na̱ yiví kúún, kúú ña̱ va̱ʼa ña̱ kúúmiíún, ña̱ kándíxaún ta saátu ndáa ki̱ʼva íyo iniún, ta su̱ví ki̱vi̱ún kúú ña̱ náʼa̱ ndáa na̱ yiví kúún ni ndáa ki̱ʼva náʼún.

¿NDA̱CHUN NDÁYÁʼVINÍ ÑA̱YÓʼO?

Tá kúnda̱a̱-iniún ndáa na̱ yiví kúún, xíni̱ún ndáaña kúú ña̱ xíniñúʼu keʼún, tasaá va̱ása taxiún ña̱ ná ka̱ʼa̱n inka na̱ va̱lí kúa̱an xíʼún ndáaña keʼún.

“Ku̱a̱ʼání na̱ yiví íyona nda̱a̱ táki̱ʼva íyo iin muñeco, saáchi va̱ása ndáka̱xin miína ndáa ti̱ko̱to̱ kúú ña̱ kundixina” (ta̱ Adrian).

“Sa̱kuaʼi̱ keʼíi̱ ña̱ va̱ʼa ni íxayo̱ʼvi̱ña xíʼi̱n ña̱ keʼíi̱ña. Xíni̱i̱ ndáana ndixa kúú migoi̱ xa̱ʼa̱ ki̱ʼva ña̱ íyona, ta saátu ndáa ki̱ʼva íyo miíi̱ tá kítáʼi̱n xíʼinna” (ñá Courtney).

TEXTO ÑA̱ VA̱XI NU̱Ú BIBLIA: “Ta va̱ása taxindó ña̱ nasama ña̱ ñuyǐví yóʼo miíndó; va̱ʼaka taxindó ña̱ ná nasama Ndióxi̱ ña̱ ndákanixi̱níndó” (Romanos 12:2).

¿NDÁAÑA KIVI KEʼÚN?

Ña̱ va̱ʼa kunda̱a̱-iniún ndáa na̱ yiví kúún vitin ta ndáa na̱ yiví kúni̱ún xa̱ún koún, ndakanixi̱ní ndáaña xíni̱ún keʼún, ndáaña va̱ása kúchiñún keʼún ta ndáaña kándíxaún. Kivi kixáʼún ndakanixi̱níún xa̱ʼa̱ pregunta ña̱ va̱xi yóʼo.

Ña̱ xíni̱ún keʼún: “¿Ndáa ña̱ʼa kúú ña̱ xíni̱i̱ keʼíi̱? ¿Á xíni̱i̱ ka̱ʼnu̱-inii̱? ¿Á ya̱chi̱ xái̱, á va̱ʼa káchíñui̱ ta á va̱ʼa-inii̱? ¿Ndáa ña̱ʼa kúu ña̱ va̱ʼa kéʼíi̱?”.

ÑA̱ KIVI KEʼÚN: Tá íxayo̱ʼvi̱ña xíʼún ña̱ kunda̱a̱-iniún ndáaña va̱ʼa kúú ña̱ kúúmiíún, ka̱ʼa̱n xíʼin na̱ yiváún á na̱ migoún ña̱ ná chindeétáʼanna xíʼún.

TEXTO ÑA̱ VA̱XI NU̱Ú BIBLIA: “Soo iin tá iinna ná kotona ndáa ki̱ʼva íyo ña̱ kéʼéna tasaá kúú ña̱ kusi̱í-inina xa̱ʼa̱ ña̱ kéʼéna, ta ná va̱ása chitáʼanna miína xíʼin inkana” (Gálatas 6:4).

Ña̱ va̱ása kúchiñún keʼún: “¿Ndáaña kéʼíi̱ kúú ña̱ xíniñúʼu nasamai̱? ¿Ama kúú ña̱ kúni̱kai̱ keʼíi̱ iin ña̱ va̱ása va̱ʼa? ¿Ama kúú ña̱ xíniñúʼu ka̱ʼnu̱-inii̱ xa̱ʼa̱ ña̱ kúni̱i̱ keʼíi̱?”.

TEXTO ÑA̱ VA̱XI NU̱Ú BIBLIA: “Tá káʼa̱nyó ‘Kǒo ku̱a̱chi kúúmiíndi̱’, sándaʼviyó miívayó ta kǒo ña̱ nda̱a̱ ndíka̱a̱ níma̱yó” (1 Juan 1:8).

Ña̱ kándíxaún: “¿Ndáaña chíndeétáʼan xíʼi̱n ña̱ va̱ʼa ndaka̱xin ndáaña keʼíi̱? ¿Á kándíxai̱ Ndióxi̱, ta nda̱chun? ¿Ndáaña náʼa̱ nu̱úi̱ ña̱ ndixa íyo Ndióxi̱? ¿Ndáa ña̱ʼa kúú ña̱ va̱ása va̱ʼa kéʼéna túvii̱, ta nda̱chun? ¿Ndáa ki̱ʼva ndákanixi̱níi̱ koo chí nu̱únínu?”.

TEXTO ÑA̱ VA̱XI NU̱Ú BIBLIA: “Ña̱ vií ndakanixi̱níún kundaaña yóʼó, ta ña̱ ndíchi koún sakǎkuña yóʼó” (Proverbios 2:11).