Ku̱mí na̱ va̱lí ñúʼu ñuu Babilonia

TA̱ REY Nabucodonosor nda̱kiʼinra míí na̱ xíni̱ va̱ʼa na̱ ñuu Israel ku̱a̱ʼa̱n xíʼinra chí ñuu Babilonia. Tándi̱ʼi, ti̱xin na̱kán nda̱ka̱xinra na̱ va̱lí míí na̱ xíni̱ va̱ʼa xíʼin na̱ va̱ʼaka náʼa̱. Ta nu̱ú na̱ʼná yóʼo va̱xi ku̱mína. Iinra naní Daniel ta inka u̱ni̱na na̱ ñuu Babilonia chi̱núuna ki̱vi̱na ta̱ Sadrac, ta̱ Mesac xíʼin ta̱ Abednego.

Ta̱ Nabucodonosor kúni̱ra ná kaʼvi va̱ʼaka na̱yóʼo ña̱ va̱ʼa xa̱a̱na kachíñuna veʼe nu̱ú xáʼndachíñura. Tá ná ya̱ʼa u̱ni̱ ku̱i̱ya̱ ndaka̱xinra míí na̱ xíni̱ va̱ʼaka ña̱ chindeéna miíra ña̱ tiinna ku̱a̱chi. Ta kúni̱ra ndakú va̱ʼa ná koo na̱yóʼo, ña̱kán ni̱ka̱ʼa̱nra ná taxina táʼan ña̱ xíxira xíʼin na̱ veʼera xíʼin vino xíʼira xíʼin na̱ veʼera ná kuxu na̱yóʼo ta koʼotuna víno táʼanrá xíʼira.

Koto ta̱ loʼo Daniel. ¿Á xíni̱ún ndáaña káʼa̱nra xíʼin ta̱ Aspenaz ta̱ káchíñu nu̱ú ta̱ Nabucodonosor? Káchira kǒo kúni̱ra kuxura ña̱ va̱ʼa ña̱ xíxi ta̱ rey. Saá ki̱xaʼá ndíʼi̱-ini ta̱ Aspenaz, ta káchira xíʼinra: ʼTa̱ rey kúú ta̱ ni̱ka̱ʼa̱n ndáa ña̱ʼa kúú ña̱ kuxundó xíʼin ña̱ koʼondó. Tá kǒo náʼa̱ va̱ʼandó tá náʼa̱ inka na̱ va̱lí káa, ta̱ rey sana kaʼnívara yi̱ʼi̱ xa̱ʼandóʼ.

Xa̱ʼa ña̱yóʼo, ta̱ Daniel káʼa̱nra xíʼin ta̱ ta̱xi ta̱ Aspenaz ta̱ kunda̱a̱ miína xa̱ʼa miíra xíʼin xa̱ʼa u̱ni̱ na̱ migora, ta káchira: ʼKotondosó ndi̱ʼi̱ ti̱xin ña̱ 10 ki̱vi̱ ta taxi yiva ná kuxundi̱ xíʼin ti̱kui̱í koʼondi̱. Ta ná ya̱ʼa u̱xu̱ ki̱vi̱ saá kotoún ndi̱ʼi̱, tasaá kuniún ndáakandi̱ va̱ʼa náʼa̱ʼ.

Va̱ʼava káchi ta̱yóʼo. Tá ni̱ya̱ʼa 10 ki̱vi̱ ta̱ Daniel xíʼin na̱ migora va̱ʼaka náʼa̱ na̱yóʼo nu̱ú na̱ xi̱xi ña̱ xíxi ta̱ rey. Tasaá ta̱xikana yiva kuxu na̱yóʼo ta kǒo níxixina ña̱ xíxi ta̱ rey.

Tá ni̱xi̱nu u̱ni̱ ku̱i̱ya̱ ku̱a̱ʼa̱nna xíʼin ndiʼi na̱ va̱lí yóʼo nu̱ú ta̱ rey Nabucodonosor. Tándi̱ʼi na̱túʼun ta̱ rey xíʼinna, xi̱nira ndí na̱ xíni̱ va̱ʼaka kúú ta̱ Daniel xíʼin na̱ u̱ni̱ migora. Ña̱kán sa̱ndákoora na̱yóʼo veʼe nu̱ú xáʼndachíñura ña̱ chindeéna miíra. Tá va̱xi ta̱ rey xíʼin ku̱a̱chi á tu̱ndóʼo nu̱ú ta̱ Daniel, ta̱ Sadrac, ta̱ Mesac xíʼin ta̱ Abednego yáʼaka 10 yichi̱ xíni̱ na̱yóʼo nu̱ú na̱ su̱tu̱ ta̱ rey.