Sákuaʼa xa̱ʼa Tu̱ʼun Ndióxi̱

KAʼVI TU̱ʼUN NDIÓXI̱

Chika̱a̱ nde̱e ña̱ sákuaʼún kaʼviún letra, chi ná keʼún ña̱yóʼo saá kúú ña̱ kivi kaʼviún Tu̱ʼun Ndióxi̱. Tá xa̱loʼo loʼo ku̱a̱ʼún káʼviúnña, saá kúú ña̱ kunda̱a̱ va̱ʼaka iniún xa̱ʼa Ndióxi̱, saáchi tu̱ʼun miíra kúú ña̱yóʼo ta ku̱a̱ʼa̱nña ndaʼa̱ ndiʼi na̱ yiví.

Nu̱ú Tu̱ʼun Ndióxi̱ va̱xi 66 tutu válí ta u̱vi̱ xiko ta̱a kúú na̱ ta̱aña, ta ni̱ya̱ʼa 1.600 ku̱i̱ya ta saáví ni̱xi̱nuña.

Nu̱ú tutu yóʼo xa̱sa̱kuaʼún nandukún capítulo xíʼin versículo nu̱ú ku̱mí tutu ña̱ naní: Génesis, Isaías, Mateo xíʼin Hechos. Génesis kúú tutu ña̱ kíxáʼa xíʼin Tu̱ʼun Ndióxi̱. Ta̱ Moisés kúú ta̱ ta̱a tutu Génesis, ta̱araña tá sa̱kán ki̱ta na̱ ñuu Israel ña̱ ñuu Egipto. Ta̱ profeta Isaías kúú ta̱ ta̱a tutu ña̱ naní Isaías, ta iin ta̱ apóstol ni̱xi̱ka xíʼin Jesucristo kúú ta̱ ta̱a tutu Mateo. Iin ta̱ xi̱naní Lucas kúú ta̱ ta̱a tutu Hechos, ta saátu ni̱xi̱kara xíʼin ta̱ apóstol Pablo.

Iin táʼvi ña̱ Tu̱ʼun Ndióxi̱ ta̱anaña tu̱ʼun hebreo ta naníña Escrituras Hebreas. Inka táʼvi Tu̱ʼun Ndióxi̱ ta̱anaña tu̱ʼun griego ta naníña Escrituras Griegas Cristianas. Íyo 39 libro á tutu ti̱xin Tu̱ʼun Ndióxi̱ ña̱ ni̱ka̱ʼyi tu̱ʼun hebreo ta íyo 27 ña ti̱xin Tu̱ʼun Ndióxi̱ ña̱ ni̱ka̱ʼyi tu̱ʼun griego.

Tu̱ʼun Ndióxi̱ ku̱a̱ʼání ña̱ va̱ʼa káʼa̱nña xíʼinyó xa̱ʼa Ndióxi̱. Káʼa̱nña xíʼinyó xa̱ʼa ña̱ íyo tíempo vitin ta káʼa̱nña xíʼinyó xa̱ʼa tíempo va̱xi. Sána̱ʼa̱ña miíyó ña̱ vi̱í kooyó nu̱ú ñuyǐví yóʼo, saáchi ku̱a̱ʼání tu̱ndóʼo íyo nu̱úña. Nu̱ú Tu̱ʼun Ndióxi̱ va̱xi nina ña̱ káʼa̱n Ndióxi̱, ña̱kán kándíxayó ña̱ káʼa̱nña. Saáchi saá ni̱ka̱ʼa̱n Jesús xíʼin Yivára, Jehová: “Tu̱ʼun yóʼó kúú ña̱ nda̱a̱” (Juan 17:17).

1. ¿Nda̱saa tutu válí va̱xi nu̱ú Tu̱ʼun Ndióxi̱?

2. ¿Nda̱saa naní iin táʼvi Tu̱ʼun Ndióxi̱ nu̱ú va̱xi 39 tutu, ta nda̱saa naní inka táʼvi nu̱ú va̱xi 27 ña?

3. ¿Ndáaña sána̱ʼa̱ Tu̱ʼun Ndióxi̱ miíyó?