¿Nda̱saa kivi sána̱ʼún na̱ chée ña̱ kaʼvina letra?

Ku̱a̱ʼání na̱ chée kúni̱na sána̱ʼa̱yóna kaʼvina letra. Tu̱ʼun ña̱ va̱xi yóʼo kuniñúʼúnña xíʼin ndiʼi na̱ sána̱ʼún, ta xíniñúʼu kuniñúʼu va̱ʼakaúnña tá sána̱ʼún na̱ chée.

1. Kuee kuee sána̱ʼúnna ta va̱ása kundatún ndi̱kun va̱ʼa kaʼvina letra. Chi kivi ndikó-inina ta kǒó ku̱ni̱kana sána̱ʼúnna.

2. Ka̱ʼa̱n xíʼinna ná ndakundeéna sákuaʼana kaʼvina letra. Saáchi kuee kuee kutu̱ʼvana kaʼvina ña̱yóʼo. Tá ná ka̱ʼún ña̱yóʼo xíʼinna, kusi̱íní-inina.

3. Ka̱ʼa̱n xíʼinna ná kuniñúʼuna ña̱ xa̱sákuaʼana. Chindeé táʼan xíʼinna ña̱ taxina comentario á kaʼvina iin texto tá ndákutáʼanyó sákuaʼayó xa̱ʼa Ndióxi̱ á tá kua̱ʼa̱nyó veʼe tá veʼe. Xíʼin ña̱yóʼo kunda̱a̱-inina ña̱ xíniñúʼu kutu̱ʼva va̱ʼana kaʼvina letra.

4. Kuniñúʼu va̱ʼún tíempo ña̱ sána̱ʼúnna. Saáchi íyoní chon nu̱úna.

5. Tǒʼoní ka̱ʼún xíʼinna. Va̱ása sákaʼún nu̱úna ni va̱ása sandákavaún-inina.

6. Tá iin hora sána̱ʼúnna, saá ná kuniñúʼuna ku̱a̱ʼá hora ña̱ keʼéna tarea ña̱ sándákooún ndaʼa̱na. Kivi ka̱ʼún xíʼin na̱ xíni̱ kaʼvi ná chindeé táʼana xíʼinna.

7. Kiʼin va̱ʼún kuenta xíʼinna ta saá va̱ʼa kuniún ndáaña kǒó kúchiñuna xíʼin. Savana va̱ása túvika nu̱úna kaʼvina letra válí chi kǒó lente kúúmiína á kǒó xíniso̱ʼo va̱ʼakana.