Ña̱ xíniñúʼu keʼún ña̱ va̱ʼa sána̱ʼún

Nda̱a̱ tá íyo Escuela nu̱ú Sákuaʼayó ña̱ Sána̱ʼa̱yó xa̱ʼa Ndióxi̱, saátu íyo ña̱yóʼo, kivi sána̱ʼún na̱ xa̱nda̱kuchi xíʼin na̱ kúma̱níka ndakuchi.

Tá ná ka̱ʼa̱n na̱ ndísochíñu xíʼin congregación ña̱ koo iin ki̱vi̱ ndataka iin grupo na̱ kúni̱ sákuaʼa kaʼvi ta taana letra, xíniñúʼu ndakaxina iin na̱ xa̱xíni̱ sána̱ʼa̱. Na̱ anciano kivi sána̱ʼa̱na na̱yóʼo tá íyo tíempona tá kǒó inkana kivi sána̱ʼa̱. Saáchi na̱ anciano íyoní chiñu nu̱úna ña̱ sána̱ʼa̱na Tu̱ʼun Ndióxi̱ ti̱xin congregación.

Na̱ ta̱a kúú na̱ xíniñúʼu sána̱ʼa̱, tá kǒó ni iin na̱ xíni̱ sána̱ʼa̱, saá kúú ña̱ kivi kuniñúʼuna iin ñá ku̱ʼvayó ñá xíni̱ sána̱ʼa̱. Tá íyo ku̱a̱ʼá grupo na̱ kúni̱ sákuaʼa letra ta kǒó ta̱a ta̱ kivi sána̱ʼa̱ miína, saá kúú ña̱ kivi ka̱ʼa̱n na̱ anciano xíʼin iin ñá ku̱ʼvayó ña̱ ná sána̱ʼa̱ñá nina ná ku̱ʼvayó ná xa̱nda̱kuchi ta saátu na̱ valí na̱ kúni̱ka ndakuchi. Ñá ku̱ʼvayó xíniñúʼu kasiñá xi̱níñá tá sána̱ʼa̱ñá xa̱ʼa ña̱ ndákiʼinñá iin chiñu ña̱ kéʼe iin ta̱a, chi na̱yóʼo kúú na̱ íyo yichi̱ sána̱ʼa̱na.

Kamaka kutu̱ʼva na̱yóʼo, tá ná sána̱ʼúnna u̱vi̱ á u̱ni̱ yichi̱ ña̱ iin iin semana. Ki̱vi̱ sána̱ʼúnna ndakooún tarea ña̱ keʼéna, ta inka ki̱vi̱ ka̱ʼún xíʼinna á va̱ʼa ke̱ʼénaña.

Na̱ anciano kúú na̱ ka̱ʼa̱n ndáa míí koo ña̱yóʼo ta ndáa hora kooña. Ndí xíniñúʼu ndakaxina iin hora ña̱ kǒóka chiñu nu̱ú na̱ kúni̱ sákuaʼa letra, ña̱kán kivi ku̱ʼu̱nna. Va̱ása koo ña̱yóʼo hora ña̱ xíyo Escuela nu̱ú Sákuaʼayó ña̱ Sána̱ʼa̱yó xa̱ʼa Ndióxi̱. Xíniñúʼu ku̱a̱ʼáka tíempo kuniñúʼún ña̱ va̱ʼa chindeé táʼún xíʼin na̱ kúni̱ sákuaʼa letra nu̱úka tíempo ña̱ xíniñúʼuyó tá xíyo Escuela nu̱ú Sákuaʼayó ña̱ Sána̱ʼa̱yó xa̱ʼa Ndióxi̱.