Ndióxi̱ káʼa̱nra xíʼinyó ná kutáʼan va̱ʼayó xíʼin ra

Ndióxi̱ kúni̱ra ná kutáʼan va̱ʼayó xíʼin ra. ¿Á xíniún ndí, kuvi xa̱a̱ún kutáʼan va̱ʼún xíʼin Ndióxi̱ ra̱ káʼnuka nu̱ú túkúndiʼi ñuyǐví? Ra̱ Abrahán, ra̱ ni̱xi̱yo tíempo xinaʼá xi̱kuura ta̱ va̱ʼaní xi̱táʼan xíʼin Ndióxi̱ (Santiago 2:23). Tu̱ʼun Ndióxi̱ káʼa̱ña xa̱ʼá sava na̱ ta̱a xíʼin ná ñaʼá na̱ va̱ʼaní xi̱táʼan xíʼin Ndióxi̱, ta kua̱ʼání ña̱ va̱ʼa ni̱ni̱ʼina. Ta vitin, ku̱a̱ʼání na̱ yiví iníí saá ñuyǐví xa̱ ni̱xa̱a̱na ítáʼan va̱ʼana xíʼin Ndióxi̱. Saátu miíún kuvi xa̱a̱ún kutáʼan va̱ʼún xíʼin ra.

Va̱ʼaníka ná kutáʼanyó xíʼin Ndióxi̱ nu̱ú ña̱ kutáʼanyó xíʼin na̱ yiví. Ndi̱a̱ ni iin ichí va̱ása ndákoo Ndióxi̱ na̱ ítáʼan va̱ʼa xíʼin ra (Salmo 18:25). Ña̱ ná kutáʼan va̱ʼayó xíʼin Ndióxi̱ va̱ʼakaña nu̱ú ña̱ kuíká. Ki̱ví xíʼi̱ na̱ kuíká, inka na̱ yiví ndôo xíʼin xu̱ʼúna. Na̱ ítáʼan va̱ʼa xíʼin Ndióxi̱ íyo iin ña̱ ndíáyáʼviní ndaʼána, ta ndi̱a̱ ni iin na̱ yiví kǔvi kindiaaña ndaʼána (Mateo 6:19).

Sava na̱ yiví va̱ása kúni̱na ña̱ sákuaʼakaún xa̱ʼá ña̱ sánáʼa̱ Ndióxi̱. Sava na̱yóʼo kúú na̱ ítáʼan xíʼún á na̱ veʼún (Mateo 10:36, 37). Átu xáku̱ndi̱a̱na yóʼo̱ á káʼa̱n-ndiva̱ʼana xíʼún, ndakatu̱ʼún miíún: “¿Yóó kúni̱i̱ sákusi̱í-ini, na̱ yi̱ví á Ndióxi̱?”. Ndakanixi̱níún xa̱ʼá ña̱yóʼo: átu ná ka̱ʼa̱na xíʼún ndakooún ña̱ kuxiún, ¿á ndakooún ña̱ kuxiún? Ásu̱ú va̱ása kandixaún na. Ña̱ va̱ʼa kutiakuyó xíniñúʼu kuxiyó. Saá íyo ña̱, Ndióxi̱ kuvi taxira ña̱ kutiakuún ndisaá tíempo. Xa̱ʼá ña̱yóʼo, chika̱a̱ún ndieé sákuaʼakaún xa̱ʼá Ndióxi̱ ta va̱ása taxiún kasina nu̱ún ña̱ xa̱a̱ún kutáʼan va̱ʼún xíʼin ra (Juan 17:3).