¿Ndáaña káʼa̱n Biblia xa̱ʼa̱ na̱ ndáka̱xinyó kutáʼan xíʼinyó?
Ña̱ káʼa̱n Biblia xa̱ʼa̱ ña̱yóʼo
Na̱ migoyó kivi sakúsi̱ína-iniyó ta kivitu chindeétáʼanna xíʼinyó ña̱ va̱ʼa vií kana ña̱ kéʼéyó. Na̱ ndixa kúú migoyó kivi chindeétáʼanna xíʼinyó ña̱ keʼéyó ña̱ va̱ʼa (Proverbios 27:17).
Soo Biblia káʼa̱nña ña̱ ndáyáʼviní vií ndaka̱xinyó na̱ kutáʼan xíʼinyó ta káʼa̱nña xíʼinyó ndáaña kivi kundoʼoyó tá ná kutáʼanyó xíʼin na̱ kéʼé ña̱ va̱ása va̱ʼa (Proverbios 13:20; 1 Corintios 15:33). Chi kivi xa̱a̱yó ndaka̱xinyó keʼéyó ña̱ va̱ása va̱ʼa á sandákooyó keʼéyó ña̱ va̱ʼa.
Nu̱ú artículo yóʼo ka̱ʼa̱nyó xa̱ʼa̱ ña̱yóʼo:
¿Ndáaña kéʼé na̱ ndixa kúú migoyó?
Biblia káʼa̱nña xa̱ʼa̱ na̱ ndixa kúú migoyó ña̱ va̱ása xíniñúʼu kutóo kuitína ña̱ kútóo miíyó. Tá kúú, Salmo 119:63 káʼa̱nña ña̱yóʼo: “Kítáʼi̱n xíʼin ndiʼi na̱ íxato̱ʼó yóʼóa ta saátu kítáʼi̱n xíʼin ndiʼi na̱ sáxi̱nu chiñu ña̱ xáʼndaún”. Ta̱ ka̱ʼyi texto yóʼo ni̱ka̱ʼa̱nra ña̱ viíní xi̱ndaka̱xinra na̱ koo migora saáchi na̱yóʼo xi̱niñúʼu sakúsi̱ína-ini Ndióxi̱ ta keʼéna ña̱ káʼa̱n Ndióxi̱.
Biblia káʼa̱ntuña ndáa ki̱ʼva xíniñúʼu koo na̱ migoyó. Tá kúú káchiña:
“Na̱ ndixa kúú migoyó kúʼvi̱-inina xíninana miíyó ndiʼi tiempo ta nda̱a̱ táki̱ʼva íyo na̱ veʼe miíyó na̱ kúni̱níyó xíniyó saá íyona tá kúúmiíyó tu̱ndóʼo” (Proverbios 17:17).
“Íyo na̱ yiví na̱ kéʼé ña̱ va̱ása va̱ʼa xíʼin na̱ kítáʼan xíʼinna, soo íyo na̱ kúʼvi̱níka-ini xíni na̱ kítáʼan xíʼinna nu̱úka na̱ veʼe miína” (Proverbios 18:24).
Xíʼin ña̱ káʼa̱n versículo yóʼo sákuaʼayó ña̱ iin na̱ ndixa kúú migoyó xíniñúʼu keʼéna ña̱ nda̱kú, vií keʼéna xíʼin inkana, to̱ʼó koo inina ta va̱ʼa koo inina. Iin na̱ ndixa kúú migoyó chindeétáʼanna xíʼinyó tá kúúmiíyó tu̱ndóʼo ta saátu taxina consejo ndaʼa̱yó tá va̱ása vií íyo ña̱ ndáka̱xinyó keʼéyó (Proverbios 27:6, 9).
¿Ndáaña káʼa̱n Biblia xa̱ʼa̱ na̱ viíní xi̱kitáʼan xi̱naʼá?
Biblia káʼa̱nña xa̱ʼa̱ sava na̱ yiví na̱ va̱ʼaní xi̱kitáʼan ni xa̱a̱ síín ñuuna, ni xa̱a̱ síín ku̱i̱ya̱na á ni xa̱a̱ síín chiñu xi̱kuumiína. Ná ka̱ʼa̱nyó xa̱ʼa̱ u̱ni̱na.
Ná Rut xíʼin ñá Noemí. Xa̱ʼa̱ ña̱ xi̱kuu ñá Rut xa̱nu ñá Noemí, ñá loʼokava xi̱kuu ñá Rut nu̱ú ñá Noemí. Saátu xa̱a̱ síínva xi̱kuu ñuu iin tá iin náyóʼo. Soo ni saá va̱ʼaníva xi̱kitáʼanna ta xi̱kuʼvi̱ní-ininá xi̱xinitáʼanná (Rut 1:16).
Ta̱ David xíʼin ta̱ Jonatán. Loʼokava ni̱xi̱yo ta̱ David nu̱ú ta̱ Jonatán, 30 ku̱i̱ya̱ka káʼnu ta̱ Jonatán nu̱ú ta̱ David soo Biblia káʼa̱nña ña̱ viíníva xi̱kitáʼanra (1 Samuel 18:1).
Ta̱ Jesús xíʼin na̱ apóstolra. Xi̱kuumiíva ta̱ Jesús nda̱yí ña̱ kaʼndara chiñu nu̱ú na̱ apóstolra chi xi̱sanáʼa̱rana ta xi̱kaʼa̱nna táta xíʼinra (Juan 13:13). Soo ni saá xi̱kuuvara migona. Saátu va̱ʼaní xi̱kitáʼan ta̱ Jesús xíʼin na̱ xi̱xiniso̱ʼo ña̱ xi̱sanáʼa̱ra. Ka̱chira: “Káʼi̱n xíʼinndó ña̱ kúúndó migoi̱ saáchi na̱túʼi̱n xíʼinndó xa̱ʼa̱ ndiʼi ña̱ ni̱ka̱ʼa̱n yivái̱ xíʼi̱n” (Juan 15:14, 15).
¿Á kivi xa̱a̱yó kooyó migo Ndióxi̱?
Miíyó na̱ yiví kiviva xa̱a̱yó kooyó migo Ndióxi̱. Biblia káchiña ña̱ “va̱ʼaní kítáʼanra xíʼin na̱ kéʼé ña̱ nda̱kú” (Proverbios 3:32). Ña̱yóʼo kúni̱ kachiña ña̱ viíní ndáka̱xin Ndióxi̱ na̱ koo migora ta na̱yóʼo xíniñúʼu keʼéna ña̱ va̱ʼa ta va̱ása sandáʼvina ta saátu xíniñúʼu chikaa̱na ndee̱ ña̱ kundiku̱nna ña̱ káʼa̱nra. Tá kúú, Biblia káʼa̱nña xa̱ʼa̱ ta̱ Abrahán ña̱ xi̱kuura iin ta̱a ta̱ nda̱kú-ini ta xi̱kuutura migo Ndióxi̱ (2 Crónicas 20:7; Isaías 41:8; Santiago 2:23).
a Ña̱ káʼa̱n ndiʼi salmo yóʼo náʼa̱ña ña̱ tu̱ʼun yóʼó káʼa̱nña xa̱ʼa̱ Ndióxi̱.