Xíniñúʼu kunda̱a̱-iniyó yóó kúú Ndióxi̱

Ña̱ va̱ʼa kutáʼanyó xíʼin Ndióxi̱, xíniñúʼu sakuaʼayó xa̱ʼá ra. Na̱ ítáʼan xíʼinyó xínina ki̱víyó ta xíniñúʼuna ña tá káʼa̱na xíʼinyó, ¿ásu̱ú saá íyoña? Saátu Ndióxi̱, kúni̱ra ná sakuaʼayó xa̱ʼára ta ná kuniñúʼuyó ki̱víra. Ki̱ví Ndióxi̱ kúú Jehová (Salmo 83:18; Mateo 6:9). Xíniñúʼu kunda̱a̱-iniyó ndíá ña̱ xínisi̱íra ta ndíá ña̱ va̱ása kútóora, yóó kúú na̱ ítáʼan va̱ʼa xíʼinra ta yóó kúú na̱ sâá-ini xíniñaʼá. ¿Ásu̱ú kua̱ʼá tíempo xíniñúʼuyó ña̱ xa̱a̱yó kutáʼanyó xíʼin iin na̱ yiví? Saátu káʼa̱n Tu̱ʼun Ndióxi̱ xíniñúʼu ndakanixi̱níyó ña̱ tavayó tíempo ña̱ sakuaʼayó xa̱ʼá Jehová (Efesios 5:15, 16).

Na̱ ítáʼan va̱ʼa xíʼin Ndióxi̱ kéʼéna chiñu kúni̱ ra. Ndakanixi̱níún xa̱ʼá na̱ ítáʼan xíʼún. Átu ná ka̱ʼa̱n kiniún xíʼin na, ta ná keʼún chiñu ña̱ va̱ása kútóona, ¿á ku̱ni̱na kutáʼankana xíʼún? Ásu̱ú va̱ása. Ta saátu íyo ña̱yóʼo, átu kúni̱yó kutáʼan va̱ʼayó xíʼin Ndióxi̱, xíniñúʼu asaayó ña̱ kúni̱ ra (Juan 4:24).

Su̱ví túkúndiʼi veñu̱ʼu chíndiétáʼan xíʼinyó ña̱ xa̱a̱yó kutáʼan va̱ʼayó xíʼin Ndióxi̱. Jesucristo ra̱ va̱ʼaní ítáʼan xíʼin Ndióxi̱, ni̱ka̱ʼa̱nra xa̱ʼá u̱vi̱ ichí. Iin ichí kúú ña̱ ndíkaní ta chítú na̱ yiví nu̱ú ña. Na̱ kua̱ʼa̱n chí ichí ndíka ndiʼi-xa̱ʼána. Ndí íyo inka ichí ña̱ tiáñu ta loʼoní kúú na̱ kua̱ʼa̱n nu̱ú ña. Ichí tiáñu yóʼo kúú ña̱ ku̱ʼu̱nyó ta va̱ʼa kutiakuyó ndisaá tíempo. Ña̱ yóʼo kúni̱ kachiña, átu kúni̱yó kutáʼan va̱ʼayó xíʼin Ndióxi̱, xíniñúʼu kunda̱a̱-iniyó ni̱saa kúni̱ra ndasakáʼnuyó ra á kañúʼuyó ra (Mateo 7:13, 14).