¿Ni̱saa kuvi kunda̱a̱-iniyó yóó kúú Ndióxi̱?

Kuvi kunda̱a̱-iniyó xa̱ʼá Jehová átu ná kaʼviyó Tu̱ʼunra. Tá xinaʼá, Ndióxi̱ nda̱kaxinra sava na̱ ta̱a, ta saá ka̱ʼyuna Tu̱ʼunra. Ña̱ ka̱ʼyuna naníña Tu̱ʼun Ndióxi̱ á Biblia. Vitin kuvi kunda̱a̱-iniyó xa̱ʼá Ndióxi̱ tá ná kaʼviyó Tu̱ʼunra. Nu̱ú ña̱yóʼo va̱xi ña̱ káʼa̱n Jehová, xa̱ʼá ña̱kán naníña Tu̱ʼun Ndióxi̱. Kuvi kandixayó ña̱ káʼa̱ña chi Jehová va̱ása sándáʼvira. “Ndióxi̱ [...] ní va̱ása káʼa̱nra ña̱ vatá.” (Hebreos 6:18.) Saá íyoña, Tu̱ʼun Ndióxi̱ kúú mií ña̱ nda̱a̱ (Juan 17:17).

Tu̱ʼun Ndióxi̱ kúú iin ña̱ káʼnuní ña̱ ta̱xira ndaʼáyó. Ndi̱a̱ tá íyo iin tutu ña̱ káʼyu iin na̱ yi̱ví kua̱ʼa̱n ndaʼá se̱ʼena, saá íyo Tu̱ʼun Ndióxi̱. Káʼa̱n ña xíʼinyó ña̱ ndasaluvi Ndióxi̱ nu̱ú Ñuʼú yóʼo ta va̱ʼa kundooyó. Káʼa̱ña xíʼinyó xa̱ʼá ña̱ ke̱ʼéra tíempo xinaʼá, ña̱ kéʼéra vitin xíʼin ña̱ keʼéra ki̱ví va̱xi, ta ña̱ taxira ndaʼá se̱ʼera na̱ xíka nda̱kú. Ta saátu chíndiétáʼanra xíʼinyó ña̱ va̱ʼa yâʼayó nu̱ú tu̱ndóʼo ta ni̱ʼiyó ña̱ kusi̱í-iniyó (2 Timoteo 3:16, 17).

Na̱ testigo ra̱ Jehová ítáʼan va̱ʼana xíʼin Ndióxi̱; chindiétáʼana xíʼún ña̱ kunda̱a̱-iniún xa̱ʼá ña̱ sánáʼa̱ Tu̱ʼun Ndióxi̱. Kuvi ka̱ʼún xíʼina ña̱ kúni̱ún sakuaʼún xa̱ʼá Tu̱ʼun Ndióxi̱. Va̱ása kiʼina xu̱ʼún ña̱ sana̱ʼa̱na yóʼo̱ (Mateo 10:8). Saátu kuvi ku̱ʼún nu̱ú ndákutáʼana ña̱ sákuaʼana xa̱ʼá Ndióxi̱. Xíyoña Veʼe nu̱ú Ndákutáʼan na̱ Testigo á ña̱ naní Salón del Reino. Átu ná ku̱ʼún ikán kamaníka kunda̱a̱-iniún xa̱ʼá Ndióxi̱.

Kuvi kunda̱a̱-iniyó xa̱ʼá Ndióxi̱ átu ná ndakanixi̱níyó xa̱ʼá ña̱ʼa ña̱ ke̱ʼé ra. Tu̱ʼun Ndióxi̱ káʼa̱n ña: “Ndióxi̱ i̱xava̱ʼara ndiví xíʼin ñuʼú” (Génesis 1:1). Ki̱ví i̱xava̱ʼa Jehová ndiví, i̱xava̱ʼatura Ñu̱ʼu. ¿Ndíá ña̱ sánáʼa̱ ña̱yóʼo miíyó xa̱ʼá Ndióxi̱? Sánáʼa̱ña miíyó ña̱ íyoní ndieé ndaʼá Jehová. Mitúʼunra ku̱chiñu i̱xava̱ʼa Ñu̱ʼu, ña̱ káʼnuní. Ña̱yóʼo náʼa̱ña nu̱úyó chi Jehová ndíchiníra, chi ku̱a̱ʼání ña̱ ndíchi xi̱niñúʼura ña̱ ke̱ʼéra Ñu̱ʼu, ña̱ tuun nu̱úyó ta táxiña ñiʼní koo ta va̱ása ndáʼva̱ña.

Ña̱ ke̱ʼé Jehová, náʼa̱ña nu̱úyó ña̱ kúʼvi̱ní-inira xínira miíyó. Ndakanixi̱níún xa̱ʼá túkúndiʼi ña̱ʼa va̱ʼa ña̱ íyo nu̱ú Ñuʼú. Jehová átu níkunira kuvi taxira iinda̱á nu̱ú kui̱ʼi kaxiyó, á ndi̱a̱ ni iin ña tǎxira. Ndí, ku̱a̱ʼání nu̱ú ña̱ʼa táxira kaxiyó, sava ña̱ náʼnu xíʼin ña̱ kuálí, ta xa̱ síín color iin iin ña, ta xa̱ síín si̱ko̱ña, ta xa̱ síín síín xáxi iin iin ña. Ña̱yóʼo náʼa̱ ña nu̱úyó chi Jehová kúʼvi̱ní-inira xínira miíyó, ta saátu ku̱a̱ʼáníka inka ña̱ʼa táxira ndaʼáyó, kíʼinra kuenta xíʼinyó, ta va̱ʼaní-inira (Salmo 104:24).