Na̱ ítáʼan va̱ʼa xíʼin Ndióxi̱ kundoona nu̱ú Ñuʼú luvi

Ñuʼú luvi ña̱ xa̱ va̱xi va̱ása kooña tá íyo ñuyǐví vitin. Ndióxi̱ va̱ása níkunira kooní kua̱chi á tu̱ndóʼo xíʼin ña̱ xúʼvi̱yó ti̱xin ñuyǐví yóʼo. Ki̱ví va̱xi, Ndióxi̱ ndasaluvira iníí saá nu̱ú Ñuʼú yóʼo. ¿Ndíá ku̱ʼva̱ kooña? Ná kotoyó ña̱ káʼa̱n Tu̱ʼun Ndióxi̱:

Nina na̱ yiví va̱ʼa koo nu̱ú ña. Nina na̱ ítáʼan va̱ʼa xíʼin Ndióxi̱ kúú na̱ kundoo nu̱ú Ñuʼú luvi. Keʼéna ña̱ va̱ʼa xíʼin táʼana, ta kakana ichí nda̱kú ña̱ kúni̱ Jehová (Proverbios 2:21).

Kooní ña̱ kuxina. Nu̱ú Ñuʼú luvi, va̱ása kooka so̱ko. Tu̱ʼun Ndióxi̱ káʼa̱n: “kixa̱a̱ ki̱ví ña̱ koo ku̱a̱ʼání ndikín [á nu̱ní] nu̱ú ñuʼú” (Salmo 72:16).

Nina veʼe va̱ʼa koo ta keʼéna chiñu ña̱ xínisi̱ína. Nu̱ú Ñuʼú luvi, túkúndiʼi na̱ yiví koo veʼena, ta keʼéna chiñu ña̱ xínisi̱ína (Isaías 65:21-23).

Táxin ní koo iníí saá nu̱ú Ñuʼú. Va̱ása kaʼní-táʼanka na̱ yiví ní kǒoka na̱ kuvi chi kǒoka kua̱chi koo. Tu̱ʼun Ndióxi̱ káʼa̱n: “[Ndióxi̱] sandiʼira xa̱ʼá kua̱chi ña̱ xáʼní-táʼana” (Salmo 46:8, 9).

Va̱ása kooka kue̱ʼe̱. Tu̱ʼun Ndióxi̱ káʼa̱n: “Ndi̱a̱ ni iin na̱ kundoo ikán [nu̱ú Ñuʼú luvi], va̱ása ka̱ʼa̱na: ‘Ndiééní ndóʼi̱ʼ” (Isaías 33:24). Nduva̱ʼa ndiʼi na̱ kǔví kaka, na̱ kuáa nu̱ú, na̱ sóʼó, ta saátu na̱ kǔví ka̱ʼa̱n (Isaías 35:5, 6).

Va̱ása kooka ña̱ xúʼvi̱na, ni va̱ása kuvikana. Tu̱ʼun Ndióxi̱ káʼa̱n ña: “Va̱ása kuvikayó, ni va̱ása kooka ña̱ kúsuchí-iniyó ni va̱ása kuakukayó, ni va̱ása kooka ña̱ xúʼvi̱yó. Túkúndiʼi ña̱yóʼo xa̱ ni̱ya̱ʼa ndiʼiña” (Revelación [Apocalipsis] 21:4).

Va̱ása kooka na̱ yiví vǎʼá á na̱ ni̱kuu. Jehová káʼa̱nra: “Na̱ yiví vǎʼá, kaʼndiara na nu̱ú ñuʼú yóʼo; ta na̱ kǒé xíka nda̱kú, tuʼunra na nu̱ú ña” (Proverbios 2:22).

Ndiʼi na̱ yiví ku̱ʼvi̱-inina kunitáʼana ta asatǒʼo-táʼana. Va̱ása kooka na̱ íxaa ña̱ vǎʼá xíʼin na̱ yiví, ni na̱ xa̱ íyo ña̱ʼa ta kúni̱ kua̱ʼákana ña, ni na̱ kúndasítáʼan. Túkúndiʼi na̱ yiví, va̱ʼaní kutáʼana ta keʼéna chiñu ña̱ kúni̱ Ndióxi̱, ta kakana ichíra (Isaías 26:9).