¿Ni̱saa ndani̱ʼiyó nu̱ú kañúʼuyó Ndióxi̱ xíʼin ña̱ nda̱a̱?

Ña̱ kutáʼan va̱ʼayó xíʼin Ndióxi̱, xíniñúʼu kundika̱a̱yó nu̱ú káñúʼuna ra xíʼin ña̱ nda̱a̱. Jesús ni̱ka̱ʼa̱nra chi na̱ “ndixa íxakáʼnu Ndióxi̱” xíniñúʼu kañúʼuna ra “xíʼin ña̱ nda̱a̱” (Juan 4:23, 24). Xíniñúʼu kañúʼuyó Ndióxi̱ ku̱ʼva̱ kúni̱ miíra (Efesios 4:4-6). Átu ná kañúʼuyó ra xíʼin ña̱ nda̱a̱, kutiakuyó ndisaá tíempo, ndí átu ndíkáa̱yó ti̱xin veñu̱ʼu vatá ndiʼi va xa̱ʼáyó (Mateo 7:13, 14).

Kuvi kunda̱a̱-iniyó ndíá mií kúú nu̱ú káñúʼuna Ndióxi̱ xíʼin ña̱ nda̱a̱ átu ná kotoyó ña̱ kéʼé na̱ ñúʼu ti̱xin ña. Jehová va̱ʼaní inira, ña̱kán na̱ káñúʼu-ñaʼá xíniñúʼu va̱ʼa koo inina xíʼin na̱ yiví. Ndi̱a̱ tá íyo iin yitún láxa tú táxi láxa va̱ʼa, saá íyo nu̱ú íxakáʼnuna Ndióxi̱ xíʼin ña̱ nda̱a̱, nina na̱ va̱ʼa ini ñúʼu ti̱xin ña (Mateo 7:15-20).

Na̱ ítáʼan va̱ʼa xíʼin Jehová íxatǒʼonína Tu̱ʼunra. Kúnda̱a̱-inina chi Ndióxi̱ kúú ra ta̱xi Biblia ña̱ kúú Tu̱ʼunra. Ña̱kán, táxina sánáʼa̱ña ichí nu̱ú na, ta va̱ʼa yâʼana nu̱ú kua̱chi, ta chíndiééñana ña̱ va̱ʼa ndakuni va̱ʼana Ndióxi̱ (2 Timoteo 3:16). Ndi̱a̱ tá ku̱ʼva̱ íyo ña̱ sánáʼa̱na, saátu miína chíkáa̱na ndieé ña̱ kéʼéna ña̱kán.

Na̱ ítáʼan va̱ʼa xíʼin Jehová kúʼvi̱-inina xínitáʼan na. Jesús kûʼvi̱-inira xi̱nira na̱ yiví, ña̱kán sa̱náʼa̱ra na xa̱ʼá Ndióxi̱ ta sa̱ndáʼara na̱ ndiéé ndóʼo. Na̱ ñúʼu nu̱ú íxakáʼnuna Ndióxi̱ xíʼin ña̱ nda̱a̱ kúʼvi̱-inina xínina na̱ yiví. Ndi̱a̱ tá ni̱xi̱yo Jesús, va̱ása kúndasína na̱ ndáʼvi, ni na̱ káʼa̱n inka tu̱ʼun, ni na̱ inka ñuu. Jesús ni̱ka̱ʼa̱nra, túkúndiʼi na̱ yiví kunda̱a̱-inina yóó kúú na̱ ndixa ndíkun sa̱tára, ta ndakuniñaʼána xa̱ʼá ña̱ kúʼvi̱-inina xíni táʼan na (Juan 13:35).

Na̱ ítáʼan va̱ʼa xíʼin Ndióxi̱ íxatǒʼonína ki̱víra: Jehová. Átu íyo iin na̱ va̱ása xíniñúʼu ki̱víyó, ¿á kutáʼan va̱ʼayó xíʼin na? Ásu̱ú va̱ása. Tá ítáʼan va̱ʼayó xíʼin iin na̱ yiví, xíniñúʼuyó ki̱vína ta káʼa̱n va̱ʼayó xa̱ʼána xíʼin inkana. Ña̱kán, na̱ kúni̱ kutáʼan va̱ʼa xíʼin Ndióxi̱ xíniñúʼuna ki̱víra ta ndátúʼuna xa̱ʼára xíʼin na̱ yiví. Saá kúni̱ Jehová ná keʼéyó ña̱ yóʼo (Mateo 6:9; Romanos 10:13, 14).

Ndi̱a̱ tá ni̱xi̱yo Jesús, na̱ ítáʼan va̱ʼa xíʼin Ndióxi̱ sánáʼa̱na na̱ yiví ndíá ku̱ʼva̱ ­kaʼndiachíñu Ndióxi̱ nu̱ú Ñuʼú. Ndióxi̱ xáʼndiachíñura nu̱ú ndiví ta ndasaluvira nu̱ú Ñuʼú yóʼo. Na̱ ítáʼan xíʼin Ndióxi̱ ndátúʼuna xíʼin na̱ yiví xa̱ʼá tu̱ʼun va̱ʼa, ña̱ ndíá ku̱ʼva̱ kaʼndiachíñu Ndióxi̱ nu̱ú Ñuʼú (Mateo 24:14).

Na̱ testigo ra̱ Jehová chíkáa̱na ndieé ña̱ va̱ʼa ítáʼana xíʼin Ndióxi̱. Íxatǒʼonína Tu̱ʼunra ta kúʼvi̱ní-inina xínitáʼan na. Xíniñúʼuna ki̱ví Ndióxi̱ ta íxatǒʼonína ña, sánáʼa̱na na̱ yiví ndíá ku̱ʼva̱ kaʼndiachíñu Ndióxi̱ nu̱ú Ñúʼú yóʼo. Na̱ testigo ra̱ Jehová ñúʼuna nu̱ú íxakáʼnuna Ndióxi̱ xíʼin ña̱ nda̱a̱ nu̱ú Ñuʼú yóʼo.