Xíniñúʼu kundasínu̱úyó veñu̱ʼu ña̱ vatá

Ra̱ Ndiva̱ʼa xíʼin na̱ tachí ndiva̱ʼa va̱ása kúni̱na ná kachíñuyó nu̱ú Ndióxi̱. Kúni̱na kuxíka ndiʼi na̱ yiví nu̱ú Ndióxi̱. ¿Ni̱saa íxaana ña̱yóʼo? Iin ña̱ xíniñúʼuna kúú veñu̱ʼu ña̱ vatá (2 Corintios 11:13-15). Veñu̱ʼu ña̱ vatá kúú ña̱ va̱ása sánáʼa̱ ña̱ nda̱a̱ xa̱ʼá Tu̱ʼun Ndióxi̱. Veñu̱ʼu vatá ndi̱a̱ tá íyo iin mango tiáʼyu saá íyoña, va̱ʼaní náʼa̱ chí sa̱táña, ndí iin chítú ti̱kuxí ti̱xin ña, ta va̱ása ndíáyáʼviña.

Ña̱ vatá ña̱ sánáʼa̱ veñu̱ʼu kǒó kútóo Jehová ña, chi Ndióxi̱ ta̱ kúú mií ña̱ nda̱a̱ kúú ra. Ki̱ví ki̱xi Jesús nu̱ú ñuʼú yóʼo, na̱ su̱tu̱ veñu̱ʼu ku̱ni̱na kaʼnína ra. Na̱yóʼo xa̱ni-inina, ndí ña̱ káñúʼuna Ndióxi̱ kúú ña̱ nda̱a̱. Ni̱ka̱ʼa̱na: “Íyo iinda̱á Yivándi, Ndióxi̱”. Ndí, ¿á va̱ʼa ni̱xi̱yo ña̱kán nu̱ú Jesús? Va̱ása va̱ʼaña. Ni̱ka̱ʼa̱nra xíʼin na: “Yivá ndóʼo̱ kúú ra̱ Ndiva̱ʼa” (Juan 8:41, 44). Ki̱ví vitin, ku̱a̱ʼání na̱ yiví káʼa̱na, Ndióxi̱ kúú ra̱ íxakáʼnuna, ndí ra̱ Ndiva̱ʼa xíʼin na̱ ndíkun sa̱tára káñúʼuna (1 Corintios 10:20).

Tá íyo yitún táxi kui̱ʼi ña̱ tiáʼyu, saá íyo veñu̱ʼu ña̱ vatá, nina na̱ yiví na̱ va̱ása kéʼé ña̱ va̱ʼa ñúʼu ti̱xin ña. Nu̱ú ñuyǐví yóʼo íyo ku̱a̱ʼání tu̱ndóʼo xa̱ʼá chiñu kini ña̱ kéʼé na̱ yiví. Tukúú kua̱chi ña̱ kíʼvi iin ta̱a xíʼin iin ñaʼá, saátu íyo na̱ kánítáʼán, na̱ íxakuíʼná, na̱ íxaa ña̱ vǎʼá xíʼin inkana, na̱ xáʼní, íyotuna̱ ta̱a na̱ tiin tuún iin ñaʼá. Ku̱a̱ʼání na̱yóʼo íyo veñu̱ʼu nu̱ú ndíkuna ndí, veñu̱ʼuna va̱ása chíndieéñana, ña̱ keʼéna ña̱ va̱ʼa xíʼin táʼan na. Va̱ása kuvi xa̱a̱na kutáʼana xíʼin Ndióxi̱, átu va̱ása kúni̱na ndakoona chiñu kini ña̱ kéʼéna (Mateo 7:17, 18).

Veñu̱ʼu vatá sánáʼa̱ña na̱ yiví ná ka̱ʼa̱na xíʼin ndióxi̱ ña̱ kúva̱ʼa xíʼin ndaʼána. Jehová káʼa̱nra xíʼinyó va̱ása va̱ʼa ka̱ʼa̱nyó xíʼin ña̱yóʼo. ¿Á kutóoyó ná ka̱ʼa̱n iin na̱ yiví xíʼin naʼnáyó, ndí kǒé káʼa̱n na xíʼin miíyó? ¿Á kuvi xa̱a̱na kutáʼana xíʼinyó? Ásu̱ú va̱ása kuvi. Jehová kúni̱ra ná ka̱ʼa̱na̱ yiví xíʼin miíra, va̱ása kúni̱ra ka̱ʼa̱na xíʼin iin naʼná ña̱ kúva̱ʼa xíʼin ndaʼána (Éxodo 20:4, 5).

Veñu̱ʼu ña̱ vatá sánáʼa̱ña na̱ yiví ña̱ va̱ʼa kaʼní-táʼana, tá íyo kua̱chi náʼnu. Jesús ni̱ka̱ʼa̱nra, na̱ ítáʼan va̱ʼa xíʼin Ndióxi̱ ku̱ʼvi̱-inina kunitáʼan na. Va̱ása xáʼníyó na̱ yiví na̱ kúni̱yó (Juan 13:35). Ni va̱ása va̱ʼa kaʼníyó na̱ yiví vǎʼá á na̱ ni̱kuu. Tá ni̱xa̱a̱ na̱ sâá-ini xíni Jesús tiin na ra, va̱ása nítaxira kanitáʼan na̱ xi̱táʼan xíʼinra xíʼin na̱ ni̱xa̱a̱ tiin ñaʼá, ña̱ va̱ʼa ka̱kura (Mateo 26:51, 52).

Veñu̱ʼu vatá sánáʼa̱ña, ndí na̱ yiví vǎʼá á na ni̱kuu ku̱ʼu̱na ndíayá tá ná kuvina. Ndí, Tu̱ʼun Ndióxi̱ sánáʼa̱ña chi xíʼiyó xa̱ʼá kua̱chiyó (Romanos 6:23). Jehová kúú iin Ndióxi̱ ra kúʼvi̱ní-ini xíni miíyó. ¿Á sandoʼora yóó ndiʼi tíempo átu ndixa kúni̱ra miíyó? Va̱ása sandoʼora miíyó. Nu̱ú Ñuʼú luvi ña̱ xa̱ va̱xi iinda̱á nu̱ú kañúʼuyó Jehová koo, iin ndi̱a̱ tá ku̱ʼva̱ kútóo miíra ndasakáʼnuyó ra (Revelación 15:4). Ndiʼi-xa̱ʼá túkúndiʼi veñu̱ʼu vatá ña̱ kéʼé ña̱ kuni ra̱ Ndiva̱ʼa.