Na̱ ítáʼan va̱ʼa xíʼin Ndióxi̱ nina ña̱ va̱ʼa kéʼéna

Tá íyo iin na̱ va̱ʼa ítáʼan xíʼinyó, íxatǒʼoyó na, kúni̱yó kooyó ndi̱a̱ tá íyo miína. “Ra̱ va̱ʼaní kúú Jehová, ta nda̱kúní xíkara”, káchi Tu̱ʼun Ndióxi̱ (Salmo 25:8). Ña̱ va̱ʼa kutáʼanyó xíʼin Jehová xíniñúʼu kaka nda̱kúyó ta keʼéyó nina chiñu va̱ʼa. Tu̱ʼun Ndióxi̱ káʼa̱n: “Keʼéndó ña̱ va̱ʼa ndi̱a̱ tá íxaa Ndióxi̱ chi, kúʼvi̱-inira xínira miíndó chi kúúndó se̱ʼera, ta ndakundiééndó ku̱ʼvi̱-inindó kunindó inkana” (Efesios 5:1, 2). Ña̱yóʼo kúú sava ña̱ náʼa̱ nu̱úyó ni̱saa kundikunyó ichí Jehová:

Chindiétáʼanyó xíʼin na̱ yiví. “Asaayó ña̱ va̱ʼa xíʼin túkúndiʼina.” (Gálatas 6:10.)

Ná kachíñu va̱ʼayó. “Ra̱ íxakuíʼná, ná ǎsakuíʼnákara, va̱ʼaka ndiééní ná kachíñura xíʼin ndaʼára ña̱ keʼéra chiñu va̱ʼa.” (Efesios 4:28.)

Yaa á ndií ná kooyó ti̱xin veʼeyó ta nina ña̱ va̱ʼa ná keʼéyó. “Ná ndakatiayó miíyó nu̱ú ña̱ íxayakua ku̱ñuyó xíʼin ña̱ íxayakua ña̱ ndákanixi̱níyó, ta saá koo yaayó [á ndiíyó] nu̱ú Ndióxi̱ chi íyíʼvi̱yóra.” (2 Corintios 7:1.)

Ná ku̱ʼvi̱-iniyó kuniyó na̱ táʼányó ta asatǒʼoyó na. “Ta iin iindó ku̱ʼvi̱-inindó kunindó ñá síʼindó ndi̱a̱ tá kúʼvi̱-inindó xínindó miíndó; ta saátu ná ñaʼá ná asatǒʼo va̱ʼana yiína. Ndóʼo̱ na̱ kua̱chí, kandixandó yivásiʼíndó.” (Efesios 5:33–6:1.)

Ná ku̱ʼvi̱-iniyó kuniyó na̱ yiví. “Ná ndakundiéé tá iin iinyó ku̱ʼvi̱-iniyó kunitáʼanyó, saáchi Ndióxi̱ kúú ra̱ táxi ña̱ kúʼvi̱-iniyó xínitáʼanyó.” (1 Juan 4:7.)

Ná kandixayó ley na̱ chíñu. “Túkúndiʼi na̱ yiví tiáku ná kandixana na̱ chíñu [...]. Taxindó ndaʼána ña̱ xíniñúʼu taxindó: na̱ káʼa̱n xíʼindó chaʼvindó impuesto, chaʼvindó [ña].” (Romanos 13:1, 7.)