Ná na̱ʼa̱yó ña̱ kúʼvi̱-iniyó xíniyó Ndióxi̱

Ña̱ va̱ʼa kutáʼanyó xíʼin na̱ yiví ndiʼi tíempo, xíniñúʼu ka̱ʼa̱níyó xíʼin na. Xíniso̱ʼoyó ña̱ káʼa̱na, ta xíniso̱ʼona ña̱ káʼa̱nyó. Ta va̱ʼa káʼa̱nyó xa̱ʼána xíʼin inka na̱ yiví. Saátu íyo ña̱yóʼo, átu kúni̱yó kutáʼan va̱ʼayó xíʼin Ndióxi̱ ndiʼi tíempo, xíniñúʼu ka̱ʼa̱níyó xíʼin ra. Koto ña̱ káʼa̱n Tu̱ʼun Ndióxi̱ xa̱ʼá ña̱yóʼo:

Ka̱ʼa̱níyó xíʼin Jehová. “Va̱ása ndakoondó ña̱ ka̱ʼa̱ndó xíʼin Ndióxi̱.” (Romanos 12:12.)

Kaʼviníyó Tu̱ʼun Ndióxi̱. “Ndiʼi Tutu ña̱ ni̱ka̱ʼyu̱, xíʼin tachí yi̱í Ndióxi̱ ni̱ka̱ʼyu̱ña, ta va̱ʼaní sánáʼa̱ña, ndáchikáa̱ña yóó ichí nda̱kú, ta saá ndasamayó chiñu kéʼéyó.” (2 Timoteo 3:16.)

Sana̱ʼa̱yó na̱ yiví xa̱ʼá Ndióxi̱. “Kuáʼandó nu̱ú na̱ yiví túkúndiʼi ñuu ta chindiétáʼandó xíʼin na, ña̱ ná ndakundiku̱na sa̱tái̱, [...] sana̱ʼa̱ndó na ná saxi̱nuna túkúndiʼi chiñu xáʼndiai̱ nu̱úndó.” (Mateo 28:19, 20.)

Ná kuyachinyó nu̱ú na̱ ítáʼan va̱ʼa xíʼin Ndióxi̱. “Na̱ xíka xíʼin na̱ yiví ndíchi, ndíchi koona.” (Proverbios 13:20.)

Ku̱ʼu̱nyó Veʼe nu̱ú Ndákutáʼan na̱ Testigo ra̱ Jehová. “Ná kundi̱ʼi-iniyó xa̱ʼá na̱ táʼanyó ta ná ku̱ʼvi̱ka-iniyó kuniyóna ta keʼéyó ña̱ va̱ʼa xíʼin na, [...] ta ná chika̱a̱yó ndieé xíʼin na̱ táʼanyó.” (Hebreos 10:24, 25.)

Ná taxiyó ña̱ kúú miíyó ta va̱ʼa kuaʼnuka chiñu Ndióxi̱. “Ta iin iinyó ná taxiyó ña̱ xa̱ chi̱ka̱a̱ iniyó xa̱ʼá, ndi̱a̱ tá káchi níma̱yó, va̱ása xíʼin ña̱ ndúxa ni ña̱ sâá-ini chi Ndióxi̱ kúni̱ra na̱ táxi xíʼin ña̱ si̱í-ini.” (2 Corintios 9:7.)