Ná kutáʼan va̱ʼayó xíʼin Ndióxi̱ ndisaá tíempo

Ña̱ ni̱ʼiyó na̱ kutáʼan xíʼinyó ta va̱ása ndakooyó ña̱ kutáʼanyó xíʼin na, yo̱ʼvi̱ní ña̱yóʼo. Átu ná chika̱a̱yó ndieé kutáʼan va̱ʼayó xíʼin Ndióxi̱ saá kuuña ni̱ʼiyó ku̱a̱ʼání ña̱ va̱ʼa. Jesús ni̱ka̱ʼa̱nra xíʼin na̱ ka̱ndi̱xáñaʼá: “Ndakunindó ña̱ nda̱a̱, ta ña̱ nda̱a̱ yóʼo sañá ndóʼo̱” (Juan 8:32). ¿Ndíá ña̱ ku̱ni̱ ka̱chi̱ra?

Kuvi kusi̱í-iniyó vitin chi xa̱ ni̱sa̱ña̱yó. Kuvi sañayó nu̱ú ña̱ vatá xíniñúʼu ra̱ Ndiva̱ʼa xíʼin ña̱ sánáʼa̱ra. Saátu kuvi sañayó nu̱ú ña̱ sándi̱ʼiní-ini ku̱a̱ʼání na̱ yiví chi kǒó kúnda̱a̱-inina ndíá ña̱ va̱ʼa taxi Jehová (Romanos 8:22). Na̱ ítáʼan va̱ʼa xíʼin Ndióxi̱ va̱ása ‘yiʼvikana ña̱ kuvinaʼ, chi xa̱ ni̱sa̱ña̱na nu̱ú ña̱yóʼo (Hebreos 2:14, 15).

Sañayó nu̱ú ña̱ vǎʼá tá ná kundooyó nu̱ú ñuyǐví xa̱á ña̱ taxi Ndióxi̱. ¡Va̱ʼaní kundooyó ki̱ví va̱xi tá xa̱ ná sañayó! Tá ná nduluvi Ñuʼú yóʼo, kǒoka kua̱chi ña̱ xáʼní-táʼan koo, ni kue̱ʼe̱, ni na̱ kǒó íxatǒʼo ley. Va̱ása kooka na̱ ndáʼvi, ni so̱ko. Va̱ása kuxi̱kua̱ʼákayó ni va̱ása kuvikayó, va̱ása yiʼviyó, va̱ása kooka na̱ íxaa ña̱ vǎʼá á ña̱ ni̱kuu xíʼinyó, ni kǒoka kua̱chi síkí, sañayó nu̱ú ndiʼi ña̱yóʼo. Tu̱ʼun Ndióxi̱ káʼa̱n ña xa̱ʼá ra: “Ndákunaún ndaʼún ta táxiún ndiʼi ña̱ kúni̱ túkúndiʼi ña̱ tiáku” (Salmo 145:16).

Na̱ ítáʼan va̱ʼa xíʼin Ndióxi̱ kutiakuna ndisaá tíempo. Ndióxi̱ sani̱ʼira miíyó ña̱ kutiakuyó ndisaá tíempo átu ná chika̱a̱yó ndieé ña̱ kutáʼan va̱ʼayó xíʼin ra (Romanos 6:23). Ndakanixi̱níún ndíá ku̱ʼva̱ koo ña̱ kutiakuún ndisaá tíempo nu̱ú Ñuʼú yóʼo.

Koo ku̱a̱ʼá tíempo nu̱úyó ña̱ keʼéyó ña̱ kúni̱yó. Á sana ku̱ni̱yó sakuaʼayó ña̱ sakaʼayó guitarra, ku̱ni̱tuyó sakuaʼayó ki̱kuyó túkúndiʼi nu̱ú ña̱ʼa, á ña̱ asava̱ʼayó ku̱a̱ʼání nu̱ú ña̱ʼa xíʼin yitún, tukúú ti̱a̱yu̱ xíʼin mesa. Á ku̱ni̱tuyó sakuaʼayó xa̱ʼá túkúndiʼi nu̱ú kití á ndiʼi nu̱ú yitún. Á ndi̱a̱ ku̱ni̱tuyó ku̱ʼu̱nyó inka ñuu xíka kuniyó inka na̱ yiví. Kuvi sakuaʼayó túkúndiʼi ña̱ kúni̱yó chi kutiakuyó ndisaá tíempo.

Ña̱ ku̱a̱ʼání tíempo kutiakuyó koo ku̱a̱ʼá na̱ kutáʼan xíʼinyó. Xa̱ʼá ña̱ kutiakuyó ndisaá tíempo, kuvi kutáʼanyó xíʼin ku̱a̱ʼání na̱ yiví na̱ xa̱ ítáʼan xíʼin Ndióxi̱. Xa̱a̱yó kunda̱a̱-iniyó ndíá ña̱ va̱ʼa kéʼéna, ndíá ña̱ va̱ʼa kúú miína, ta kutáʼanyó xíʼin na. Ku̱ʼvi̱-iniyó kuniyóna, ta ku̱ʼvi̱tu-inina kunina miíyó (1 Corintios 13:8). Xa̱ʼá ña̱ kutiakuyó ndiʼi tíempo, kuvi xa̱a̱yó kutáʼanyó xíʼin túkúndiʼi na̱ kundoo nu̱ú Ñuʼú yóʼo. Ta ña̱ va̱ʼaníka kúú inka ña̱yóʼo, ña̱ ítáʼan va̱ʼayó xíʼin Jehová, kuaʼnukaña kui̱ya̱ tá kui̱ya̱. ¡Ná kutáʼan va̱ʼayó xíʼin Ndióxi̱ ndisaá tíempo!