Ña̱ va̱ʼa ni̱ʼiyó na̱ kutáʼan xíʼinyó xíniñúʼu va̱ʼa koo iniyó xíʼin na

Ña̱ va̱ʼa kutáʼanyó xíʼin iin na̱ yiví xíniñúʼu ku̱ʼvi̱-iniyó kuniyó na. Tá xa̱ víʼi kua̱ʼa̱n kúnda̱a̱-iniún xa̱ʼá Jehová, ku̱ʼvi̱níka-iniún kuniúnra ta ku̱ni̱ún kachíñuún nu̱úra. Ña̱yóʼo chindiétáʼan xíʼún ña̱ xa̱a̱ún kundikuún sa̱tá Jesucristo (Mateo 28:19). Kuvi xa̱a̱ún kunisi̱íún ña̱ kutáʼan va̱ʼaún xíʼin Ndióxi̱ ndisaá tíempo átu ná ndakutáʼún xíʼin na̱ testigo ra̱ Jehová. ¿Ndíá ña̱ xíniñúʼu asaaún ña̱ va̱ʼa xa̱a̱ún kooún ndíá tá íyo na̱ ñuu Ndióxi̱?

Na̱ʼa̱ún ña̱ kúʼvi̱-iniún xíniún Ndióxi̱ ta kándíxáún leyra. “Ña̱yóʼo kúni̱ kachi ña̱ kúʼvi̱-iniyó xíniyó Ndióxi̱: ña̱ ná kandíxáyó chiñu xáʼndia ra; ta, chiñu xáʼndia ra va̱ása yo̱ʼvi̱ ña.” (1 Juan 5:3.)

Keʼéún ndiʼi chiñu xáʼndia Ndióxi̱ ña̱ xa̱ sákuaʼaún. Jesús nda̱túʼúnra xa̱ʼá iin ña̱ kuvi chindiétáʼan xíʼinyó ña̱ va̱ʼa keʼéyó ña̱yóʼo. Iin ta̱a ra̱ ndíchi-xi̱ní i̱xava̱ʼara veʼera sa̱tá iin yu̱ú káʼnu, ta inka ta̱a kíʼvi i̱xava̱ʼara ña nu̱ú yu̱ti. Tá ku̱un ndiééní sa̱ví, veʼe ña̱ ku̱vâʼa sa̱tá yu̱ú va̱ása nínduva ña, ndí veʼe ña̱ ku̱vâʼa nu̱ú yu̱ti iin ka̱xán nduvaña. Jesús ni̱ka̱ʼa̱nra, na̱ yiví na̱ xíniso̱ʼo tu̱ʼunra ndi̱a̱ tá íyo ta̱a ndíchi ra i̱xava̱ʼa veʼe sa̱tá yu̱ú saá íyona. Ni̱ka̱ʼa̱ntura chi na̱ xíniso̱ʼo tu̱ʼun ra, ndí va̱ása kéʼéna ña ndi̱a̱ tá íyo ta̱a kíʼvi ra̱ i̱xava̱ʼa veʼe nu̱ú yu̱ti saá íyona. ¿Ni̱saa kúni̱ún kooún? Tá íyo ra̱ ta̱a ndíchi á tá íyo ra̱ ta̱a kíʼvi (Mateo 7:24-27).

Ndataxiún miíún ndaʼá Ndióxi̱. Kuvi ka̱ʼún xíʼin Jehová ña̱ kúni̱ún kachíñuún nu̱ú ra ndisaá tíempo. Átu kéʼéyó ña̱ kúni̱ Ndióxi̱, saá kuu ña na̱ʼa̱yó ña̱ ndixa ndíkunyó sa̱tá Jesucristo (Mateo 11:29).

Ndakuchiún. “Ndakuchiún ta ndakatiaún kua̱chiún chi xa̱ ndákuniún ki̱ví [Jesús].” (Hechos 22:16.)

Kachíñuún nu̱ú Ndióxi̱ xíʼin ndiʼi níma̱ún. “Túkúndiʼi ña̱ kéʼéndó, kachíñundó xíʼiña xíʼin ndiʼi ña̱ kúú miíndó [á xíʼin ndiʼi níma̱ndó] ndi̱a̱ tá ku̱ʼva̱ íxachíñundó nu̱ú Jehová, ta su̱ví nu̱ú na̱ yiví.” (Colosenses 3:23.)