Xi̱kuyatin ndiʼi-xa̱ʼá tu̱ndóʼo

¿Á sava xa̱ ndáka̱tuʼún miíún ni̱chun íyoní tu̱ndóʼo nu̱ú ñuyǐví yóʼo? Xa̱ yâʼaní ku̱a̱ʼá kui̱ya íyo ku̱a̱chi ña̱ xáʼní-táʼana, íyo so̱ko, íyoní tu̱ndóʼo nu̱ú ñuʼu yóʼo tákiʼva ña̱ táan á ndieénítu kúun sa̱ví xíʼin tachí, íyo na̱ xáʼní á na̱ íxakuiʼna, íyo na̱ va̱ása kéʼé ña̱ nda̱kú, íyo kue̱ʼe̱ ta ndiʼiyó xáa̱yó xíʼi̱yó. Xa̱ ku̱a̱ʼa̱n iin ciento kui̱ya ña̱ ndieéníka íyo ku̱a̱ʼá tu̱ndóʼo vitin. ¿Á kixa̱a̱ iin ki̱ví ña̱ ndiʼi-xa̱ʼá ña̱yóʼo?

Xi̱kuyatin kixa̱a̱ iin ki̱ví ña̱ ndiʼi-xa̱ʼáña. Tu̱ʼun Ndióxi̱ káʼa̱ña: “Na̱ yiví na̱ kéʼé ña̱ ndiva̱ʼa ndiʼi-xa̱ʼána [...]. Ndí Ndióxi̱ taxira ñuʼú yóʼo ndaʼá na̱ vitá-ini, ta ndixa kusi̱íní-inina kundoona nu̱úña chi kǒóka ku̱a̱chi koo”. ¿Ni̱saa tíempo kundoona nu̱ú Ñuʼú yóʼo? Tu̱ʼun Ndióxi̱ káʼa̱n: “Ndióxi̱ taxira ñuʼú yóʼo ndaʼá na̱ xíka nda̱kú xíʼinra, ta kundoona nu̱úña ndisaá tíempo” (Salmo 37:10, 11, 29).

Tá ná sandiʼi Ndióxi̱ xa̱ʼá tu̱ndóʼo xíʼin ña̱ vǎʼá, saá kúúña nduluvi nu̱ú Ñuʼú yóʼo ta na̱ yiví si̱íní koo-inina kundoona nu̱úña ndisaá tíempo ta va̱ása kíʼinka kue̱ʼe̱na. Tu̱ʼun Ndióxi̱ káʼa̱ña: “[Ndióxi̱] ndaya̱kunra ti̱kuíi nu̱úna, va̱ása kuvikana, ni va̱ása kooka ña̱ kusuchí-inina ni va̱ása kuakukana, ni va̱ása kooka ña̱ xúʼvi̱na” (Revelación [Apocalipsis] 21:4).

Nu̱ú ñuyǐví xa̱á, ku̱a̱ʼání na̱ ni̱xi̱ʼi̱ ndatiakuna ta ndakiʼina ndiʼi ña̱ va̱ʼa ña̱ táxi Ndióxi̱. Tu̱ʼun Ndióxi̱ káʼa̱n: “Ndatiaku na̱ ke̱ʼé ña̱ va̱ʼa ta saátu na̱ va̱ása níkeʼe ña̱ va̱ʼa” (Hechos 24:15). Xa̱ʼá ña̱kán va̱ʼa ni̱ka̱ʼa̱n Jesús xíʼin iin ta̱a ta̱ ni̱xi̱ʼi̱ xíʼinra tá ndikó-inira xa̱ʼá ku̱a̱chira ta ka̱ndǐxara Jesús xíʼin ndiʼi níma̱ra: “Kooún xíʼin nu̱ú Ñuʼú luvi” (Lucas 23:43).

¿Ni̱chun ki̱xa̱á tu̱ndóʼo ñuyǐví yóʼo?

¿Á ña̱ nda̱a̱ xi̱kuni Ndióxi̱ ña̱ koo va̱ʼa ndiʼi na̱ yiví? Ta saá íyoña, ¿ni̱chun ta̱xira ña̱ ki̱xa̱á tu̱ndóʼo ñuyǐví yóʼo? ¿Ta ni̱chun táxira xa̱ ku̱a̱ʼání tíempo íyoña?

Ki̱ví i̱xava̱ʼa Ndióxi̱ ta̱ Adán xíʼin ñá Eva, va̱ʼaní i̱xava̱ʼara na chi kǒó ku̱a̱chi níxi̱kuu miína. Ta̱xira iin Ñuʼú luvi ndaʼána ta ta̱xira iin chiñu va̱ʼa ndaʼána. Tu̱ʼun Ndióxi̱ káʼa̱ña: “Ndióxi̱ xi̱nira ndiʼi ña̱ i̱xava̱ʼara, ta xi̱nira ndí va̱ʼaní íyo ndiʼi ña̱yóʼo” (Génesis 1:31). Tá níxiniso̱ʼona ña̱ ni̱ka̱ʼa̱n Ndióxi̱, se̱ʼena na̱ kaku ikán, kǒó ku̱a̱chi kuu miína ta iníí nu̱ú Ñuʼú yóʼo ndulatúña ta ndiʼi na̱ yiví si̱íní kuu-inina kundoona nu̱úña ndisaá tíempo.

Ki̱ví i̱xava̱ʼa Ndióxi̱ ta̱ Adán xíʼin ñá Eva ta̱xira ña̱ va̱ʼa ndakani-xinína ta saá va̱ʼa ndakaxina ña̱ kúni̱na keʼéna. Ndí ña̱ va̱ʼa koo si̱í-inina ndisaá tíempo xíniñúʼu ndakaxina keʼéna nina ña̱ va̱ʼa, tákiʼva ña̱ kuniso̱ʼona chiñuxáʼndia Ndióxi̱. Ndióxi̱ káʼa̱n: “Yu̱ʼu̱ kúú Jehová, yu̱ʼu̱ kúú Ndióxi̱ún, ta sánáʼa̱ yóʼo̱ ña̱ va̱ʼa miíún kúú ña̱yóʼo, yu̱ʼu̱ kúú ta sánáʼa̱ yóʼo̱ ichí nu̱ú xíniñúʼu kakaún” (Isaías 48:17). Ta va̱ása ndákaxin va̱ʼana chiñu keʼéna saára ku̱a̱ʼání tu̱ndóʼo kixi nu̱úna, chi na̱ yiví va̱ása níkuva̱ʼana ña̱ kaʼndiachíñuna nu̱ú miína. Tu̱ʼun Ndióxi̱ káʼa̱ña na̱ yiví va̱ása íyo ichína ña̱ kaʼndiachíñuna nu̱ú miína (Jeremías 10:23).

Ta̱ Adán xíʼin ñá Eva saá nda̱kani xi̱nina, ña̱ va̱ása xíniñúʼu kaʼndiachíñu Ndióxi̱ nu̱úna ña̱ va̱ʼa koo si̱í-inina. Ta xa̱ʼá ña̱ ni̱xíinkana kaʼndiachíñu Ndióxi̱ nu̱úna ña̱kán ni̱ki̱ʼvina ku̱a̱chi ta ni̱xíndiaakara na. Ta kuee kuee ni̱xaana ku̱chéena ta ni̱xi̱ʼina. Ta xa̱ʼá ña̱ kúúyó se̱ʼena, ña̱kán sa̱yâʼana ku̱a̱chi ndaʼáyó (Romanos 5:12).

Íyo ndieéní xa̱ʼá ña̱ kunda̱a̱-iniyó: ¿Á íyo ichí Ndióxi̱ ña̱ kaʼndiachíñura nu̱úyó?

¿Ni̱chun ni̱sándiʼi Ndióxi̱ xa̱ʼá ta̱ Adán xíʼin ñá Eva ta asava̱ʼara inkana? Saáchi íyo iin na̱ ni̱ka̱ʼa̱n vatá xa̱ʼá Ndióxi̱, ña̱ kǒó ichíra kaʼndiachíñura nu̱úyó. Ña̱kán íyo ndieéní xa̱ʼá ña̱ kunda̱a̱-iniyó: ¿Yóó kúú na̱ íyo ichí kaʼndiachíñu nu̱úyó? ¿Á va̱ʼaka koo na̱ yiví ná kaʼndiachíñuna nu̱ú miína? ¿Ta yóó kúú na̱ va̱ʼaníka xáʼndiachíñu? Ndióxi̱ táxira tíempo ndaʼá na̱ yiví ña̱ ná keʼéna ña̱ kúni̱ miína, ta xíʼin ña̱yóʼo kunda̱a̱-inina ndíá ña̱ kúú ña̱ va̱ʼaka: ¿Ña̱ kaʼndiachíñuna nu̱ú miína á ña̱ kaʼndiachíñu Ndióxi̱ nu̱úna? Ku̱a̱ʼání tíempo xíniñúʼuna ña̱ va̱ʼa kunda̱a̱-inina ña̱yóʼo ta saá va̱ʼa kotondosóna ndiʼi ña̱ íyo ñuyǐví yóʼo, ña̱ ndakaxina na̱ kaʼndiachíñu ku̱ʼva kúni̱ miína, kuniñúʼu ndiʼina ña̱ íyo ñuyǐví yóʼo ta kundiku̱na veñu̱ʼu ña̱ kúni̱ miína, Ndióxi̱ va̱ása ka̱ʼa̱nra xíʼina ndíá ku̱ʼva keʼéna ña̱yóʼo.

¿Ndíá ña̱ kúú ña̱ kúnda̱a̱-iniyó vitin? Xa̱ yâʼa i̱ñu̱ mil kui̱ya ña̱ íyo tu̱ndóʼo ñuyǐví yóʼo. Ta xa̱ íyo iin ciento kui̱ya ña̱ ndieéníka ndakoo tu̱ndóʼo, tá ni̱xi̱yo ku̱a̱chi nu̱ú xáʼní-táʼana ña̱ naní segunda guerra mundial, ta ku̱ʼva cien millón na̱ yiví ni̱xi̱ʼi̱ ikán. Ta tíempo vitin íyoní na̱ kǒó íxatǒʼo ley, íyo na̱ kánitáʼan. Ku̱a̱ʼa̱n ndúku̱a̱ʼáka na̱ xáʼmi yuku sána. Ku̱a̱ʼáka na̱ yiví xíkun kue̱ʼe̱ tá kíxi̱ xíʼin táʼana. Ndiʼi kui̱ya millón na̱ yiví xíʼi̱ xíʼin kue̱ʼe̱ ta saátu xíʼin so̱ko. Na̱ xa̱ ta̱ndaʼá, va̱ása íxatǒʼo táʼana, na̱ ku̱a̱chí va̱ása xíniso̱ʼona ña̱ káʼa̱n yivásiʼína, ta saátu kéʼéna ña̱yóʼo xíʼin inka na̱ yiví. Vitin kúnda̱a̱-iniyó chi ndi̱a̱ ni iin na̱ chíñu ñuyǐví yóʼo va̱ása kuvi sákutiaʼana tu̱ndóʼo ña̱ íyo vitin. Ta na̱yóʼo va̱ása kuchíñuna sandiʼi-xa̱ʼána kue̱ʼe̱, sandiʼi-xa̱ʼána ña̱ kúchéeyó ta saátu ña̱ xíʼi̱yó.

Xinaʼáví ni̱ka̱ʼa̱n Tu̱ʼun Ndióxi̱ ña̱ saá koo tíempo vitin. Tu̱ʼun Ndióxi̱ káʼa̱ña, ña̱ ki̱ví nu̱ú ndíʼi, ñuyǐví kini yóʼo yo̱ʼviní kooña. Ta xa̱ ku̱a̱ʼa̱n ndáxi̱nu tu̱ʼun yóʼo: “Na̱ yiví na̱ kéʼé ña ndiva̱ʼa, na̱ sándáʼvi táʼan, ndakundieékana keʼéna ku̱a̱ʼáka ña̱ ndiva̱ʼa” (2 Timoteo 3:1-5, 13).

Xi̱kuyatin ndiʼi-xa̱ʼá tu̱ndóʼo

Ndiʼi ña̱ xíniyó vitin náʼa̱ña nu̱úyó ña̱ xa̱ kunu̱mí ndiʼi-xa̱ʼá na̱ kǒó kúni̱ kuniso̱ʼo ña̱ káʼa̱n Ndióxi̱. Xíʼin ña̱yóʼo kúnda̱a̱-iniyó chi na̱ chíñu ñuyǐví yóʼo va̱ása kuchíñuna sandiʼina xa̱ʼá ku̱a̱chi, mitúʼun ta̱ nda̱kaxin Ndióxi̱ ta̱ kaʼndiachíñu nu̱úyó kúú ta̱ taxi kutiakuyó ndisaá tíempo, sandiʼira xa̱ʼá ku̱a̱chi ta si̱íní koo iniyó. Vitin xa̱ kúnda̱a̱-iniyó ña̱ xa̱ ku̱a̱ʼa̱n ndíʼi tíempo ña̱ táxi Jehová ña̱ íyo tu̱ndóʼo. Xa̱ kunu̱mí taxi Ndióxi̱ iin ta̱ kaʼndiachíñu nu̱úyó tá ta̱yóʼo sandiʼi-xa̱ʼára ñuyǐví ndiva̱ʼa yóʼo.

Tu̱ʼun Ndióxi̱ ni̱ka̱ʼa̱n xinaʼá: “Ki̱ví ná kundoo na̱ chíñu ikán Ndióxi̱ ta̱ íyo nu̱ú ndiví, chindúʼura iin ra̱ kaʼndiachíñu [nu̱ú ndiví] ta va̱ása ndiʼi xa̱ʼá ña̱ kuniʼi chíñura. [...] Sandiʼira xa̱ʼá na̱ chíñu ñuyǐví yóʼo, ta mitúʼunra koo ndisaá tíempo” (Daniel 2:44). Íyo iin ña̱ ndíáyáʼviní ña̱ sánáʼa̱ Tu̱ʼun Ndióxi̱, sánáʼa̱ña chi mitúʼun Jehová íyo ichí kaʼndiachíñu nu̱úyó. Jesús ni̱ka̱ʼa̱nra xa̱ʼá iin ña̱ kuniyó ta̱ xi̱kuyatin ndiʼi-xa̱ʼá ñuyǐví yóʼo: “Tu̱ʼun va̱ʼa ña̱ káʼa̱n xa̱ʼá ta̱ kaʼndiachíñu, ku̱ʼu̱ña nu̱ú ndiʼi na̱ ñuu ña̱ va̱ʼa kunda̱a̱-ini ndiʼi na̱ yiví; ta saá kixa̱a̱ ña̱ ndiʼi xa̱ʼá ñuyǐví ndiva̱ʼa” (Mateo 24:14).

¿Yóó kúú na̱ ka̱ku tá ná ndiʼi-xa̱ʼá ñuyǐví yóʼo? Tu̱ʼun Ndióxi̱ káʼa̱ña: “Na̱ xíka nda̱kú xíʼin Ndióxi̱ xíʼin na̱ kǒó ku̱a̱chi, na̱yóʼo kúú na̱ kundoo nu̱ú ñuʼú yóʼo. Na̱ yiví na̱ kéʼé ña ndiva̱ʼa, kaʼndiara na nu̱ú ñuʼú yóʼo” (Proverbios 2:21, 22). Na̱ yiví xíka nda̱kú xíʼin Ndióxi̱ kúú na̱ sákuaʼa xa̱ʼára ta kéʼéna ña̱ kúni̱ra. Jesucristo ni̱ka̱ʼa̱n: “Ña̱ va̱ʼa kutiakuna ndisaá tíempo, xíniñúʼu ndakundieéna sákuaʼana xa̱ʼá yóʼo̱, mitúʼun Ndióxi̱ ra̱ nda̱a̱, ta saátu xa̱ʼá ta̱ chi̱ndaʼún nu̱ú ñuʼú yóʼo, Jesucristo” (Juan 17:3). Ña̱ ndixa kúúña, ñuyǐví yóʼo ña̱ ndiʼi-xa̱ʼá kúúña ta saátu ña̱ʼa íyo nu̱úña, ta na̱ kéʼé ña̱ kúni̱ Ndióxi̱, na̱yóʼo kúú na̱ kutiaku ndisaá tíempo (1 Juan 2:17).

Tu̱ʼun Ndióxi̱ ña̱ va̱xi yóʼo ta̱vandi̱ña ti̱xin Tu̱ʼun Ndióxi̱ ña̱ naní Traducción del Nuevo Mundo de las Santas Escrituras (con referencias) ta sa̱ndáya̱ʼandi̱ña tu̱ʼun sâví.