¿Á ña̱yóʼo xi̱kuni̱ Ndióxi̱ koo nu̱úyó?

TÁ KÁʼVIYÓ periódico, á xítoyó tele á xíniso̱ʼoyó radio, nina noticia nu̱ú íyo ku̱a̱chi, nu̱ú xáʼni táʼanna nu̱ú íyo guerra kúú ña̱ xíniso̱ʼoyó xa̱ʼa. Ta vitin ndakanixi̱ní xa̱ʼa tu̱ndóʼo ña̱ íyo ti̱xin veʼe miíún. Sana íyo kue̱ʼe̱ nu̱úndó, á iin na̱ táʼún ni̱xi̱ʼi̱, á iin na̱ migoún, ta ña̱yóʼo sákusuchíña-iniún. Sana ndóʼún tá ndo̱ʼo iin ta̱a ta̱ xi̱naní Job, ta̱yóʼo ni̱ka̱ʼa̱nra ña̱ ku̱a̱ʼání tu̱ndóʼo ni̱xi̱yo nu̱úra (Job 10:15).

Sana ndákanixi̱níun:

¿Á ña̱yóʼo kúú ña̱ xi̱kuni̱ Ndióxi̱ ndoʼo na̱ yiví?
¿Ndáa míí va̱ʼa ndani̱ʼíi̱ ña̱ kivi chindeé yi̱ʼi̱ ña̱ yaʼi̱ nu̱ú tu̱ndóʼo ndóʼi̱?
¿Á kixa̱a̱ iin ki̱vi̱ kǒoka ku̱a̱chi koo nu̱ú ñuʼú yóʼo?

Ña̱ Biblia káʼa̱nña xíʼinyó xa̱ʼa ña̱yóʼo.

ÑA̱ BIBLIA KÁʼA̱NÑA XÍʼINYÓ XA̱ʼA ÑA̱ KEʼÉ NDIÓXI̱ NU̱Ú ÑUʼÚ YÓʼO.

“Ta ya̱kúnra ti̱kui̱í nu̱úna, ta kǒo kuvikana, ni va̱ása kooka ña̱ kusuchí-inina ni va̱ása kuakukana, ni va̱ása kooka ña̱ xóʼvi̱na.” (Revelación 21:4)

“Na̱ kǒo kívi kaka va̱ʼa kakana nda̱a̱ va̱ʼa kanditana táki̱ʼva íxaa tí yusu.” (Isaías 35:6)

“Na̱ kǒo túvi nu̱ú kutu̱vi nu̱úna.” (Isaías 35:5)

“Ndiʼi na̱ ni̱xi̱ʼi̱ kuniso̱ʼona ta̱chíra ta keena.” (Juan 5:28, 29)

“Ni iinna kǒo ka̱ʼa̱nka: ‘Kue̱ʼe̱ kúúmiíʼ.” (Isaías 33:24)

“Nu̱ú ñuʼú ku̱a̱ʼání ña̱ʼa koo kuxuna.” (Salmo 72:16)

Na̱sama ñuʼú nda̱a̱ táki̱ʼva xi̱kuni̱ Ndióxi̱ kooña. Ta̱ ku̱chée kúúra ta ndu̱u loʼora, ñá kúúmií kue̱ʼe̱ xíʼin ta̱ kǒo túvi nu̱ú nda̱ʼana, na̱ ni̱xi̱ʼi̱ nda̱takuna, íyoní ña̱ kuxuna

ÑA̱ SÁNÁʼA̱ BIBLIA CHINDEÉÑA YÓʼÓ

Va̱ása ndakanixi̱níún xa̱ʼa ña̱ ka̱ʼviún nu̱ú página chí sa̱tá ña̱ kúúña ña̱ vatá. Chi Ndióxi̱ kúú ta̱ káʼa̱n keʼéña ta ña̱ Biblia káʼa̱n ña̱ saxínuvaraña.

U̱vi̱ ta̱a káʼvina Biblia ta xíniñúʼuna libro ña̱ sánáʼa̱ Biblia

Ta su̱ví ña̱yóʼo kúú ndiʼiña. Ña̱ Biblia káʼa̱nña xíʼinyó ndáaña va̱ʼa keʼéyó ña̱ va̱ʼa koo si̱í-iniyó kundooyó tiempo vitin. Ndakanixi̱ní xa̱ʼa tu̱ndóʼo ña̱ kúúmiíún á ña̱ sandi̱ʼi̱-iniún. Sana ndíʼi̱-iniún xa̱ʼa xu̱ʼún, xa̱ʼa na̱ veʼún, xa̱ʼa kue̱ʼe̱ kúúmiíún, á iin na̱ táʼún ni̱xi̱ʼi̱ nu̱ún. Ña̱ Biblia kivi chindeé yóʼó ña̱ va̱ʼa ya̱ʼún nu̱ú tu̱ndóʼo ndóʼún ta sandi̱koña-iniún chi ku̱a̱ʼá ña̱ʼa káʼa̱nña xa̱ʼa tá kúú ña̱ va̱xi yóʼo:

¿Nda̱chun íyo tu̱ndóʼo nu̱úyó?
¿Ndáaña keʼéyó ña̱ va̱ʼa ná kǒo kundi̱ʼi̱ní-iniyó?
¿Ndáaña keʼéyó ña̱ va̱ʼa koo si̱íyó xíʼin na̱ veʼeyó?
¿Ndáaña ndóʼoyó tá xíʼi̱yó?
¿Á kixa̱a̱ iin ki̱vi̱ kuniyó na̱ táʼanyó na̱ ni̱xi̱ʼi̱?
¿Nda̱chun va̱ʼa kandíxayó ña̱ ndixa kúú ña̱ saxínu Ndióxi̱ ña̱ káʼa̱nra?

Xa̱ʼa ña̱ káʼviún libro yóʼo kúni̱ kachiña ña̱ kúni̱ún kunda̱a̱-iniún xa̱ʼa ña̱ sánáʼa̱ Biblia. Libro yóʼo chindeé yóʼó ña̱ va̱ʼa kunda̱a̱-iniún xa̱ʼaña. Chí xa̱ʼa libro yóʼo va̱xi pregunta iin iin párrafo. Ku̱a̱ʼání na̱ yiví kútóona táki̱ʼva sánáʼa̱ na̱ testigo Jehová ña̱ kéʼéna pregunta xíʼin na̱ káʼvina xíʼin ña̱ va̱ʼa sakuaʼakana xa̱ʼa Biblia, kúni̱ndi̱ ña̱ ná kutóotu miíún ña̱yóʼo. Jehová ná taxi ña̱ va̱ʼa ndaʼún ña̱ va̱ʼa sakuaʼún xa̱ʼa míí ña̱ ndíxa sánáʼa̱ Biblia.

SAKUAʼA NDÁA KI̱ʼVA ÍYO BIBLIA

Nu̱ú Biblia va̱xi 66 libro xíʼin carta, ta va̱xi capítulo xíʼin versículo ña̱ va̱ʼa kama ndani̱ʼíyóña. Tá va̱xi iin texto ña̱ Biblia nu̱ú libro yóʼo, siʼna ki̱vi̱ libro á carta ña̱ va̱xi nu̱ú Biblia va̱xi, saá va̱xi número ña̱ káʼa̱nna xíʼin capítulo, saáví va̱xi inka número ña̱ káʼa̱nna xíʼin versículo. Ná kotoyó iin ejemplo “2 Timoteo 3:16”, kúni̱ kachiña carta u̱vi̱ Timoteo, capítulo 3, versículo 16.

Tá ná nandukún texto ña̱ va̱xi nu̱ú libro yóʼo, kamaní sakuaʼún kuniñuʼún Biblia. Saátu tá ná chika̱ún ndée ña̱ kaʼviún Biblia ndiʼi ki̱vi̱, u̱ni̱ á u̱ʼu̱n capítulo kaʼviún, ta ti̱xin ña̱ iin ku̱i̱ya̱ sandiʼi nííún kaʼviúnña.