¿Á kúni̱ún kunda̱a̱ iniún ña̱ nda̱a̱?

¿NDIA ña̱ nda̱a̱ kúú ña̱? Xa̱ʼá sava ña̱ ndiééní ndáka̱n tu̱ʼunyó na̱ yi̱ví. Ndia sava xa̱ ndáka̱n tu̱ʼun miún ña̱ va̱xi yóʼó:

• ¿Á ndíi ini Ndióxi̱ xa̱ʼáyó?

• ¿Á kixa̱a̱ iin ki̱ví ndiʼi kua̱chi xíʼín tundóʼó?

• ¿Ndia mií kua̱ʼa̱nyó tá xa̱ ni̱xi̱ʼiyó?

• ¿Á íyo iin ña̱ ndátun na̱ ni̱xi̱ʼi?

• ¿Nisaá ka̱ʼa̱n ndáʼviyó xíʼín Ndióxi̱ ta va̱ʼa kuni so̱ʼo ra̱?

• ¿Nisaá kuvi ndanííyó ña̱ koo si̱í iniyó?

¿Ndia mií ndanííún ña̱ ndakuíín ña̱ ndáka̱n tu̱ʼunkún? Íyo kua̱ʼání nu̱ú tu̱tu̱ káʼa̱n va̱ʼa ndákuíín ña̱ ndáka̱n tu̱ʼunyó. Ndí sava ña̱, vaasa inkáchi káʼa̱n ña̱. Inka ña̱ va̱ʼaní ndáka̱ni ña̱ nu̱úyó, ndí kamaní yâʼa tu̱ʼun káʼa̱n ña̱ ta nda̱sámá tuku na̱ ña̱.

Íyo iin tu̱tu̱ ña̱ sandíkó niʼi ndiʼi ña̱ ndáka̱n tu̱ʼunyó. Jesucristo ni̱ka̱ʼa̱n ra̱ xíʼín yivá ra̱: “Tu̱ʼun yóʼo̱ kúú ña̱ nda̱a̱” (Juan17:17). Ta vichin kundáá iniyó chi Tu̱ʼun kaá kúú Tu̱ʼun Ndióxi̱. Tu̱ʼun ña̱ va̱xi nu̱ú tu̱tu̱ yóʼó ndakuíín ña̱ tukundiʼi ña̱ ndáka̱n tu̱ʼunyó, ta kuvi kundiaa iniyó ña̱ chi ti̱xin Tu̱ʼun Ndióxi̱ va̱xi ña̱.

¿Á ndíi ini Ndióxi̱ xa̱ʼáyó?

¿NICHÚN NDÁKA̱N TU̱ʼUNYÓ ÑA̱ YÓʼÓ? Saáchi íyoyó ti̱xin iin ñu̱u̱ yíví ña̱ kini ta ña̱ vaasa ndakú. Kua̱ʼání ña̱ veʼe ñu̱ʼu ña̱ kándíxá na̱ yi̱ví sánáʼá ña̱ chi Ndióxi̱ kúú ra̱ táxí tundóʼó ndaʼáyó.

TU̱ʼUN NDIÓXI̱ SÁNÁʼÁ ÑA̱. Ndióxi̱ ndia níí ichí vaasa íxáá ra̱ á kéʼé ra̱ ña̱ kini. Job 34:10 káʼa̱n: “¡Xíkání íyo ña̱ nu̱ú Ndióxi̱ ña̱ keʼe ra̱ ña̱ kini, ta nu̱ú ra̱ íyo ndiʼi ndieé ndaʼá ña̱ keʼe ra̱ ña̱ vaasa ndakú!”. Ña̱ kúʼvi̱ ini Ndióxi̱ xíní ra̱ yóó, íyo iin ña̱ va̱ʼa ña̱ taxi ra̱ ndaʼáyó, ta ña̱kán, Jesús sa̱náʼá ra̱ yóó ña̱ ka̱ʼa̱nyó xíʼín Ndióxi̱: “Yivándi̱ ra̱ íyo nu̱ú ndiví [...]. Ná taxiún ra̱ kuniʼi chíñú. Ná koo ña̱ kúni̱ miún, ndia tá íyo nu̱ú ndiví, saátu na̱ koo nu̱ú ñuʼú yóʼó” (Mateo 6:9, 10). Ña̱ nda̱a̱ ndíiní ini Ndióxi̱ xa̱ʼáyó ta ña̱kán ta̱xi̱ ra̱ se̱ʼe ra̱ ni̱xi̱ʼi xa̱ʼáyó tasaá ndaxi̱nu̱ ndiʼi ña̱ kúni̱ ra̱ (Juan 3:16).

Kaʼvi Génesis 1:26-28; Santiago 1:13, xíʼín 1 Pedro 5:6, 7.

¿Á kixa̱a̱ iin ki̱ví ndiʼi kua̱chi xíʼín tundóʼó?

¿NICHÚN NDÁKA̱N TU̱ʼUNYÓ ÑA̱ YÓʼÓ? Saáchi ña̱ xáʼní táʼán na̱ yi̱ví, kua̱ʼání na̱ xi̱ʼi. Ta tukundiʼiyó xúʼvi̱yó xa̱ʼá ña̱ kán.

TU̱ʼUN NDIÓXI̱ SÁNÁʼÁ ÑA̱. Ndióxi̱ káʼa̱n ra̱ ña̱ xa̱ va̱xi iin ki̱ví ña̱ koo va̱ʼayó iníí nu̱ú Ñuʼú. Tá xa̱ ná kixa̱a̱ ki̱ví ndakuniʼi Chíñú se̱ʼe ra̱, na̱ yi̱ví “vaasa sakuáʼá ka na̱ ña̱ kaʼní táʼán na̱”, ndia ndasama na̱ “yu̱chi̱ na̱ nduu ña̱ ya̱tá táʼví na̱” (Isaías 2:4). Saátu, Ndióxi̱ sandiʼi ra̱ xa̱ʼá ña̱ xáʼní táʼán na̱ xíʼín ña xúʼvi̱yó. Tu̱ʼun Ndióxi̱ káʼa̱n ña̱ xa̱ʼá na̱ yi̱ví: “[Ndióxi̱] nda̱ya̱kún ra̱ ti̱kuíi̱ nu̱úyó, vaasa kuvi kayó, níí vaasa koo ka ña̱ kusuchi iniyó, níí vasaa koo ka ña̱ xúʼvi̱yó. Tukundiʼi ña̱ yóʼó ya̱ʼa ndiʼi ña̱” (Revelación [Apocalipsis] 21:3, 4).

Kaʼvi Salmo 37:10, 11; 46:9, xíʼín Miqueas 4:1-4.

¿Ndia mií kua̱ʼa̱nyó tá xa̱ ni̱xi̱ʼiyó?

¿NICHÚN NDÁKA̱N TU̱ʼUNYÓ ÑA̱ YÓʼÓ? Ti̱xin veʼe ñu̱ʼu sánáʼá na̱ chi ki̱ví xíʼiyó ndôo iin ña̱ tiáku iniyó. Sava na̱ káʼa̱n chi na̱ ni̱xi̱ʼi kuvi asaa na̱ ña̱ vǎʼá xíʼín na̱ tiáku, á káʼa̱n tu na̱ chi Ndióxi̱ xáʼmí ra̱ na̱ ni̱xi̱ʼi ti̱xin ndiayá tukundiʼi tiempo.

TU̱ʼUN NDIÓXI̱ SÁNÁʼÁ ÑA̱. Ki̱ví xíʼiyó ndíʼí va xa̱ʼáyó ta kǒó ka ña̱ tiákuyó. Eclesiastés 9:5 káʼa̱n “na̱ ni̱xi̱ʼi [...] kǒó ka ña̱ xíní na̱ xaʼá”. Kǒó ka ña̱ kundáá ini na̱ xa̱ʼá, kǔví ka kachíñú na̱, ta níí vaasa kuvi saxuʼvi na̱ na̱ tiáku, níí kǔví chindieé ña̱ʼa na̱ (Salmo 146:3, 4).

Kaʼvi Génesis 3:19 xíʼín Eclesiastés 9:6, 10.

¿Á íyo iin ña̱ ndátun na̱ ni̱xi̱ʼi?

¿NICHÚN NDÁKA̱N TU̱ʼUNYÓ ÑA̱ YÓʼÓ? Saáchi tukundiʼiyó kúni̱yó kutiakuyó ta si̱í koo iniyó ña̱ kooyó xíʼín na̱ táʼányó. Xa̱ʼá ña̱ yóʼó kúni̱yó ná ndandikó na̱ táʼányó na̱ ni̱xi̱ʼi.

TU̱ʼUN NDIÓXI̱ SÁNÁʼÁ ÑA̱. Kua̱ʼání na̱ yi̱ví na̱ xa̱ ni̱xi̱ʼi ndatiaku na̱. Jesús ni̱ka̱ʼa̱n ra̱ “tukundiʼi na̱ ni̱xi̱ʼi kuni so̱ʼo na̱ ta̱chí ra̱ ta ndako̱o na̱” (Juan 5:28, 29). Na̱ yi̱ví na̱ ndutiaku kuvi kundoo na̱ nu̱ú ñuʼú yóʼó ta kuni na̱ tá na̱ nduu ña̱ iin ñuʼú luvi, ndia tá kûni̱ Ndióxi̱ ki̱ví nuú (Lucas 23:43). Nu̱ú ña̱ luviní ña̱ xa̱ va̱xi, na̱ yi̱ví na̱ xíká ndakú xíʼín Ndióxi̱ kuvi kundoo na̱ ndisaá tiempo, ta vaasa kiʼin ka kue̱ʼe̱ na̱. Tu̱ʼun Ndióxi̱ káʼa̱n ña̱: “Mií na̱ xíká ndakú xíʼín Ndióxi̱ kundoo na̱ nu̱ú ñuʼú ndisaá tiempo” (Salmo 37:29).

Kaʼvi Job 14:14, 15; Lucas 7:11-17, xíʼín Hechos 24:15.

¿Nisaá ka̱ʼa̱n ndáʼviyó xíʼín Ndióxi̱ ta va̱ʼa kuni so̱ʼo ra̱?

¿NICHÚN NDÁKA̱N TU̱ʼUNYÓ ÑA̱ YÓʼÓ? Ti̱xin veʼe ñu̱ʼu káʼa̱n ní na̱ yi̱ví xíʼín Ndióxi̱. Ndí, vaasa xíní na̱ átu ndixa xíní so̱ʼo ra̱ ña̱ káʼa̱n na̱.

TU̱ʼUN NDIÓXI̱ SÁNÁʼÁ ÑA̱. Jesús ni̱ka̱ʼa̱n ra̱ vaasa va̱ʼa iin tuku ta tuku kuni ñúʼúyó iin ndaá nu̱ú tu̱ʼun tá káʼa̱nyó xíʼín Ndióxi̱. Suva ka̱chi̱ ra̱: “Tá káʼa̱nkún xíʼín Ndióxi̱, vaasa va̱ʼa iin tuku ta tuku kuni ñúʼúkún iin ndaá nu̱ú tu̱ʼun” (Mateo 6:7). Átu kúni̱yó na̱ kuni so̱ʼo Ndióxi̱ ña̱ káʼa̱nyó, xíní ñúʼú ka̱ʼa̱nyó xíʼín ra̱ iin tá kúni̱ mií ra̱. Ña̱kán, xíní ñúʼú kundaa iniyó ña̱ kúni̱ ra̱, ta ka̱ʼa̱nyó xíʼín ra̱ iin tá ku̱ʼva̱ kúni̱ ra̱. “Ndia ndiaka ña̱ʼa ndáka̱nyó nu̱ú ra̱, átu va̱ʼa ña̱ nu̱ú ra̱, xíní so̱ʼo va ra̱”, káchi 1 Juan 5:14.

Kaʼvi Salmo 65:2; Juan 14:6, 14, xíʼín 1 Juan 3:22.

¿Nisaá kuvi ndanííyó ña̱ koo si̱í iniyó?

¿NICHÚN NDÁKA̱N TU̱ʼUNYÓ ÑA̱ YÓʼÓ? Saáchi kua̱ʼá na̱ yi̱ví káʼa̱n chi ña̱ kúú xu̱ʼún, ña̱ ndúkáʼnú iin yi̱ví nu̱ú inka na̱, á ña̱ íyo luviní na̱, ña̱ yóʼó taxi ña̱ si̱í koo ini na̱, ña̱kán kua̱ʼá na̱ yi̱ví kua̱ʼa̱n sa̱tá ña̱ yóʼó. Ndí, vaasa ni̱ʼi na̱ ña̱ si̱í ini.

TU̱ʼUN NDIÓXI̱ SÁNÁʼÁ ÑA̱. Jesús ni̱ka̱ʼa̱n ra̱ ndia ña̱ xíní ñúʼúyó ta ni̱ʼiyó ña̱ si̱í ini, ki̱ví ka̱chi̱ ra̱: “Si̱íní íyo ini na̱ kundáá ini, ña̱ xíní ñúʼú sakuáʼá na̱ xa̱ʼá Ndióxi̱” (Mateo 5:3). Kuvi xa̱a̱yó kusi̱í iniyó átu na̱ chika̱a̱yó ndieé ña̱ sákuáʼáyó xa̱ʼá Ndióxi̱, ña̱ yóʼó kúú ña̱: ña̱ kúni̱yó kundaa iniyó ña̱ nda̱a̱ xa̱ʼá ra̱ ta saátu ña̱ kúni̱ ra̱ taxi ra ndaʼáyó. Ña̱ nda̱a̱ yóʼó va̱xi ña̱ nu̱ú Tu̱ʼun Ndióxi̱, tá xa̱ xíníyó ña̱ yóʼó chindieé ña̱ miíyó ña̱ nda̱ka̱nxinyó ndia ña̱ ndiaya̱ʼvi ka ta ndia ña̱ vaasa ndiaya̱ʼvi. Ki̱ví táxíyó sánáʼá Tu̱ʼun Ndióxi̱ ichí nu̱úyó ña̱ nisaá asaayó xíʼín tukundiʼi chiñu, saá ke va̱ʼaní ka kooyó (Lucas 11:28).

Kaʼvi Proverbios 3:5, 6, 13-18 xíʼín 1 Timoteo 6:9, 10.

Vichin xa̱ loʼo ku̱nda̱a̱ iniyó ña̱ káʼa̱n Tu̱ʼun Ndióxi̱ xa̱ʼá i̱ñu̱ ña̱ ndáka̱n tu̱ʼunyó. ¿Á íyo ka ña̱ kúni̱ún kundaa iniún? Átu yóʼo̱ kúú iin ta̱ʼa̱n na̱ “kundáá ini ña̱ xíní ñúʼú sakuáʼá na̱ xa̱ʼá Ndióxi̱”, saara ku̱ni̱ún kundaa ka iniún xa̱ʼá ña̱ yóʼó. Sava ndáka̱n tu̱ʼunkún miún nichún táxí Ndióxi̱ ña̱ íyo tundóʼó xíʼín ña̱ xúʼvíyó átu ndixa ndíi ini ra̱ xa̱ʼáyó. Á sana ku̱ni̱ún kundaa iniún nisaá koo si̱í iniún xíʼín na̱ veʼún. Va̱ʼaní ndákuíín Tu̱ʼun Ndióxi̱ ña̱ ndáka̱n tu̱ʼunyó ta íyo kua̱ʼá ka ña̱ kuvi ndakuíín ña̱ xa̱ʼá.

Ndí, kua̱ʼá na̱ yi̱ví vaasa xíní si̱í na̱ kaʼvi na̱ Tu̱ʼun Ndióxi̱. Káchi na̱ tu̱tu̱ káʼnú kúú ña̱ ta ndíchiní ña̱. ¿Á kúni̱ún kixi na̱ chindieé táʼán xíʼún ta va̱ʼa kundaa iniún ña̱ káʼa̱n Tu̱ʼun Ndióxi̱? Xa̱ʼá ña̱ yóʼó, na̱ testigo ra̱ Jeová táxí na̱ u̱vi̱ ña̱ kuvi chindieé ta̱ʼa̱n xíʼún.

Iin ña̱ chindieé yóʼo̱ kúú tu̱tu̱ ña̱ naní ¿Qué enseña realmente la Biblia?, tu̱tu̱ ña̱ chindieé táʼán xíʼín na̱ yi̱ví kúú ña̱ —na̱ vaasa íyo tiempo nu̱ú— ta va̱ʼa kundaa ini na̱ ña̱ ndákuíín Tu̱ʼun Ndióxi̱ xa̱ʼá ña̱ ndáka̱n tu̱ʼun na̱. Inka ña̱ chindieé yóʼo̱ kúú na̱ testigo ra̱ Jeová, ku̱ʼu̱n na̱ veʼún semana tá semana sanáʼá na̱ yóʼo̱ xa̱ʼá Tu̱ʼun Ndióxi̱, vaasa kúú ña̱, ña̱ ndúxá níí kǐʼín na̱ xu̱ʼún. Millón na̱ yi̱ví xa̱ sákuáʼá na̱ Tu̱ʼun Ndióxi̱, ta kúsi̱í ini na̱ chi xa̱ nda̱níí na̱ ña̱ nda̱a̱.

Ta kuvi xa̱a̱ún kundaa iniún chi ña̱ ndiaya̱ʼvi kúú Tu̱ʼun Ndióxi̱. Ña̱ na̱ sakuáʼáyó saka̱ku ña̱ yóó nu̱ú ña̱ íʼna, nu̱ú ña̱ íxáá ndíchi xíʼínyó ta nu̱ú ña̱ iyuʼviyó, xíʼín ña̱ vatiá sánáʼá sava na̱, tukundiʼi ña̱ yóʼó chiendieé ta̱ʼa̱n ña̱ xíʼínyó ña̱ koo ndiaya̱ʼvi ña̱ ndátúnyó xíʼín ña̱ va̱ʼa íyo iniyó. Mií Jesús ni̱ka̱ʼa̱n: “Ndakunindó ña̱ nda̱a̱, ta ña̱ nda̱a̱ yóʼó saka̱ku ña̱ ndóʼo̱” (Juan 8:32).