PREGUNTA 3
¿Ndáaña kivi keʼíi̱ ña̱ viíní natúʼi̱n xíʼin na̱ yivái̱?
¿NDÁAÑA KEʼÚN?
Ndakanixi̱ní xa̱ʼa̱ ña̱yóʼo: miércoles xa̱a̱ xi̱ku̱aá kúúña. Ta̱ Geoff, 17 ku̱i̱ya̱ kúúmiíra, ta xa̱a̱ sa̱ndíʼira ke̱ʼéra tareara, ña̱kán xa̱a̱ va̱ʼa ndakindee̱ra. Xa̱a̱ ku̱a̱ʼání ka̱chíñura. Ndákaʼmira tele ta kíxáʼara xítoraña.
Ta iin kama kíta yivára chí yéʼé ta náʼa̱ nu̱úra ña̱ sáa̱ra.
“Geoffrey. ¿Á kǒova chiñu keʼún ña̱kán xítoún tele? ¿Á su̱ví ta̱ loʼo ñaniún xíniñúʼu chindeétáʼún xíʼin ña̱ va̱ʼa keʼéra tareara? Ni loʼo kǒo xíún keʼún ña̱ káʼa̱nndi̱ xíʼún”.
“Xa̱a̱ kixáʼa tukún ka̱ʼún”, káchi ta̱ Geoff.
Yivára kúyatinra nu̱úra ta ndáka̱tu̱ʼunrara: “¿Ndáaña káchiún?”.
“Kǒo ña̱ʼa apá”, káchi ta̱ Geoff xíʼin yivára, ta kini xítora.
Soo sáa̱ka yivára. Ta káʼa̱nra xíʼinra: “Kǒo kútói̱ ka̱ʼún saá xíʼi̱n”.
Tá yóʼó níxi̱yo ta̱ Geoff, ¿ndáaña keʼún?
KUNDATU TA NDAKANIXI̱NÍ
Tá kávaún iin carro ku̱a̱ʼún soo yichi̱ nu̱ú ku̱a̱ʼún ndíʼiña, nandukún inka yichi̱ nu̱ú ku̱ʼún. Saá keʼún xíʼin na̱ yiváún, xíniñúʼu nandukún nda̱saa ka̱ʼún xíʼinna.
IIN EJEMPLO:
“Íxayo̱ʼvi̱ña xíʼi̱n natúʼi̱n xíʼin yivái̱”, káchi ñá Leah. Ta káchikañá: “Saáchi tá xa̱a̱ naʼá káʼi̱n xíʼinra káchira xíʼi̱n: ‘Káʼnu koo iniún, ¿ndáaña káchiún?ʼ”.
ÑÁ LEAH KIVI KEʼÉÑÁ U̱NI̱ ÑA̱ʼA
Nda̱ʼyi̱ñá nu̱ú yiváñá.
Ñá Leah ndáʼyi̱ñá ta káʼa̱nñá xíʼinra: “Kuniso̱ʼo, chi ndáyáʼviní ña̱ káʼi̱n xíʼún”.
Kǒo ka̱ʼa̱nkañá xíʼinra.
Ñá Leah kǒo káʼa̱nkañá xíʼin yiváñá xa̱ʼa̱ ña̱yóʼo.
Ndaka̱xinñá inka tiempo ña̱ va̱ʼa ka̱ʼa̱nñá xíʼinra.
Ñá Leah káʼa̱nñá xíʼin yiváñá tá xa̱a̱ ni̱ya̱ʼa loʼo tiempo á káʼyíñá iin carta nu̱ú nátúʼunñá xíʼinra xa̱ʼa̱ ña̱ ndákanixi̱níñá.
¿Ndáaña túvi miíún kivi keʼé ñá Leah?
NDAKANIXI̱NÍ XA̱ʼA̱ ÑA̱YÓʼO: Yivá ñá Leah inkava ña̱ʼa ndákanixi̱níra xa̱ʼa̱, ta kǒo níxiniso̱ʼora ña̱ káʼa̱nñá. Tá ñá Leah ndáka̱xinñá opción A ta ndáʼyi̱ñá nu̱ú yiváñá, sana kǒo kunda̱a̱-inira nda̱chun kéʼéñá saá. Ta va̱ása kuniso̱ʼora ña̱ ka̱ʼa̱nñá. Tá kéʼéñá saá kúni̱ kachiña ña̱ kǒo íxato̱ʼóñá yiváñá (Efesios 6:2). Ta ña̱yóʼo va̱ása chindeéña ni iinna.
Sana íxayo̱ʼvi̱ña xíʼún ña̱ natúʼún xíʼin na̱ yiváún, soo kuchiñuvaún ndani̱ʼún nda̱saa natúʼún xíʼinna.
Ña̱ opción B kiviva keʼéñáña, soo su̱ví ña̱ va̱ʼa kúúña. ¿Nda̱chun? Saáchi tá kúni̱ñá ndasaviíñá ku̱a̱chi, xíniñúʼu natúʼunñá xíʼin yiváñá. Ta ta̱yóʼo xíniñúʼu kunda̱a̱-inira ndáaña ndóʼoñá ña̱ va̱ʼa chindeétáʼanra xíʼinñá. Tá ná kǒo ka̱ʼa̱nñá xíʼinra kǒo kivi chindeétáʼanra xíʼinñá.
Soo, xíʼin ña̱ opción C, ñá Leah va̱ása táxiñá ña̱ kasi ni iin ña̱ʼa nu̱úñá ña̱ natúʼunñá xíʼin yiváñá. Saáchi, ndúkúñá inka tiempo ña̱ ka̱ʼa̱nñá xíʼinra. Saátu tá ná kaʼyíñá iin carta taxiñá ndaʼa̱ yiváñá, sana si̱íníka kooñá.
Ña̱ kaʼyí ñá Leah iin carta nu̱ú yiváñá chindeéña miíñá ña̱ viíka ka̱ʼa̱nñá xíʼinra xa̱ʼa̱ ña̱ kúni̱ñá. Saáchi tá ná kaʼvi yiváñá carta yóʼo, va̱ʼaka kunda̱a̱-inira xa̱ʼa̱ ña̱ ndóʼoñá. Ña̱ opción C kúú ña̱ va̱ʼaníka chindeétáʼan xíʼin ñá Leah ta saátu xíʼin yiváñá. Ña̱ natúʼun xíʼin táʼanna a ña̱ kaʼyíñá iin carta kúú ña̱ va̱ʼa, saáchi saá kundiku̱nna consejo ña̱ va̱xi nu̱ú Biblia nu̱ú káʼa̱nña “ná ndakundeéyó nandukúyó ña̱ʼa ña̱ táxi ña̱ táxin kooyó” (Romanos 14:19).
¿Ndáa inka ña̱ʼa kivi keʼé ñá Leah?
Ndákanixi̱ní xa̱ʼa̱ inka ña̱ʼa kivi keʼéñá, ta ndáaña va̱ʼa ndakiʼinñá xa̱ʼa̱ ña̱yóʼo.
KÁXI VA̱ʼA KA̱ʼÚN
Ndakaʼán: su̱ví nda̱a̱ táki̱ʼva ndákanixi̱ní miíún ña̱ ni̱ka̱ʼún saá kunda̱a̱-ini na̱ yiváún xíʼinña.
IIN EJEMPLO:
Na̱ yiváún káʼa̱nna xíʼún nda̱chun kamaní sáún. Yóʼó siʼa káchiún xíʼinna: “Kǒo kúni̱i̱ ka̱ʼi̱n xa̱ʼa̱ ña̱yóʼo”.
Ta na̱yóʼo ndákanixi̱nína ña̱ kúni̱ kachiún ña̱yóʼo: “Va̱ása ndáaka-inii̱ na̱ yivái̱. Na̱ migo kuitívai̱ natúʼi̱n xíʼin ndáaña ndóʼi̱”.
Ndakanixi̱ní ña̱ kúúmiíún iin ku̱a̱chi káʼnuní ta iin na̱ yiváún kúni̱na chindeétáʼanna xíʼún, soo yóʼó káchiún: “Kǒo kúni̱i̱ chindeétáʼún xíʼi̱n, kuchiñuva iinlá miíi̱ xíʼinña”.
¿Ndáaña sana kivi kunda̱a̱-ini na̱ yiváún?
¿Ndáaña kúú ña̱ va̱ʼaka ka̱ʼún?