Ta̱ Jesús nátúʼunra xa̱ʼa Reino Ndióxi̱

Ni̱ya̱ʼa loʼo tiempo ña̱ nda̱kuchi ta̱ Jesús, ki̱xaʼára nátúʼunra xíʼin na̱ yiví: “Xa̱a̱ ku̱yatin kaʼndachíñu Reino Ndióxi̱”. Na̱ discípulora ni̱xi̱kana xíʼinra iníísaá ñuu Galilea xíʼin ñuu Judea. Tá ndi̱kó ta̱ Jesús ñuura Nazaret, ni̱xa̱ʼa̱nra sinagoga ta xu̱nára rollo ta̱ Isaías ta ka̱ʼviraña: “Jehová ta̱xira espíritu ndaʼíi̱ ña̱ sánáʼi̱ xa̱ʼa tu̱ʼun va̱ʼa ña̱ káʼa̱nra”. ¿Nda̱chun ni̱ka̱ʼa̱n ta̱ Jesús ña̱yóʼo? Saáchi na̱ yiví xi̱kuni̱ kuitína kotona milagro ña̱ xi̱keʼéra. Soo su̱ví nda̱saa xa̱ʼa ña̱yóʼo níndakiʼinra espíritu santo. Chi nda̱kiʼinraña ña̱ ka̱ʼa̱nra xa̱ʼa Reino Ndióxi̱. Tasaá ni̱ka̱ʼa̱nra xíʼin na̱ ndóo xíniso̱ʼo: “Vitin xínu tu̱ʼun yóʼo”.

Tándi̱ʼi, ta̱ Jesús ku̱a̱ʼa̱nra chí mar Galilea. Kán xi̱nira ku̱mí na̱ discípulora na̱ tává ti̱a̱ká ta ni̱ka̱ʼa̱nra xíʼinna: “Xaandó ndakutáʼanndó xíʼi̱n, ta yi̱ʼi̱ sánáʼi̱ ndóʼó ña̱ sanáʼa̱ndó na̱ yiví”. Na̱ tává ti̱a̱ká yóʼo kúú ta̱ Pedro ta̱ Andrés ta̱ Santiago xíʼin ta̱ Juan. Kama nda̱koona chiñuna ta ku̱a̱ʼa̱nna xíʼinra. Ni̱xi̱kana ndiʼi ñuu Galilea sa̱náʼa̱na xa̱ʼa Reino Ndióxi̱. Xi̱natúʼunna xa̱ʼa Ndióxi̱ nu̱ú Sinagoga nu̱ú ya̱ʼvi xíʼin calle. Ku̱a̱ʼání na̱ yiví xi̱ndiku̱nna sa̱tára nda̱a̱ míí nu̱ú ni̱xi̱kara. Iníísaá na̱kunda̱a̱-inina xa̱ʼa ta̱ Jesús, nda̱a̱ ñuu Siria.

Ni̱ya̱ʼa tiempo, ta̱ Jesús ta̱xira ndée ndaʼa̱ sava na̱ xi̱ndiku̱n sa̱tára ña̱ sandáʼana na̱ xi̱kuumií kue̱ʼe̱ xíʼin ña̱ tavána na̱ ta̱chí ndi̱va̱ʼa. Savatuna ni̱xa̱ʼa̱nna xíʼinra natúʼunra xa̱ʼa Ndióxi̱ ñuu tá ñuu. Saátu ku̱a̱ʼa̱n sava ná ñaʼá xíʼinra, náyóʼo xi̱chindeéna ta̱ Jesús xíʼin na̱ xi̱ndiku̱n sa̱tára. Tá kúú ñá María Magdalena, ñá Juana, ñá Susana xíʼin inkakaná.

Tándi̱ʼi sa̱náʼa̱ra na̱ discípulora, chi̱ndaʼárana ku̱a̱ʼa̱nna sanáʼa̱na na̱ yiví. Tá ni̱ya̱ʼana ñuu Galilea, ku̱a̱ʼánína ndu̱u discípulora ta nda̱kuchina. Ni̱xi̱yo ku̱a̱ʼánína xi̱kuni̱ kundiku̱n ta̱ Jesús, ña̱kán ni̱ka̱ʼa̱nra táki̱ʼva íyo nu̱ú ña̱ chi̱ʼina ta xa̱a̱ ni̱nu̱mí sakeenaña saá íyona. Ni̱ka̱ʼa̱ntura: “Ka̱ʼa̱nndó xíʼin Ndióxi̱ ná chindaʼára ku̱a̱ʼákana kixi kachíñu ña̱ sakeena xíʼinndó”. Tándi̱ʼi, nda̱ka̱xinra 70 na̱ discípulora ta u̱vi̱ tá u̱vi̱ chi̱ndaʼárana ña̱ ku̱ʼu̱nna sanáʼa̱na iníísaá ñuu Judea. Xi̱ka̱ʼa̱nna xíʼin ndiʼi na̱ yiví xa̱ʼa Reino Ndióxi̱. Tá ndi̱kóna, ni̱kusi̱íní-inina ta kúni̱na ka̱ʼa̱nna xíʼin ta̱ Jesús xa̱ʼa ña̱ ke̱ʼéna. Ni kǒo ña̱ níkivi keʼé ta̱ Ndi̱va̱ʼa ña̱ kasira ña̱ sanáʼa̱na na̱ yiví.

Ta̱ Jesús viíní sa̱náʼa̱ra na̱ discípulora ña̱ va̱ʼa keʼéna chiñu yóʼo tá ná ndikóra chí ndiví. Ni̱ka̱ʼa̱nra xíʼinna: “Sanáʼa̱ndó ndiʼi na̱ yiví xa̱ʼa Reino Ndióxi̱. Ta sanáʼa̱ndóna xa̱ʼa tu̱ʼun Ndióxi̱ nda̱a̱ ná xa̱a̱na ndakuchina”.