Ta̱ Jesús káʼa̱nra xíʼin iin ñaʼá yuʼú pozo

Tándi̱ʼi ni̱ya̱ʼa pascua, ta̱ Jesús xíʼin na̱ discípulora ndi̱kóna ku̱a̱ʼa̱nna chí Galilea, ni̱ya̱ʼana ñuu Samaria ta ni̱xa̱a̱na nda̱a̱ ñuu Sicar, nu̱ú ke̱ʼé ta̱ Jacob iin pozo. Ta̱ Jesús ni̱xa̱a̱ra ndákiʼin ndeé loʼora ñuu kán ta na̱ discípulora ku̱a̱ʼa̱nna satána ña̱ʼa kuxuna.

Iin ñaʼá ki̱xa̱a̱ñá yuʼú pozo taváñá ti̱kui̱í, ta ni̱ka̱ʼa̱n ta̱ Jesús xíʼinñá: “Taxi loʼo ti̱kui̱í koʼi̱”. Ta ni̱ka̱ʼa̱nñá: “¿Nda̱chun káʼún xíʼi̱n ta ñá ñuu Samaria kúi̱? Na̱ judío va̱ása káʼa̱nna xíʼin na̱ ñuu Samaria”. Soo ta̱ Jesús ni̱ka̱ʼa̱nra: “Tá ná kunda̱a̱-iniún ndáa ta̱a kúi̱, miívaún kúú ñá ndukú ti̱kui̱í nu̱úi̱, ta yi̱ʼi̱ taxii̱ ti̱kui̱í koʼún tá taxi kutakún ndi̱ʼi tiempo”. Ta nda̱kuiinñá: “¿Ndáaña káchiún? Ta kǒo ña̱ʼa níʼún ña̱ taváúnrá”. Ta ni̱ka̱ʼa̱nra xíʼinñá: “Na̱ koʼo ti̱kui̱í tá taxi yi̱ʼi̱, va̱ása yi̱chi̱ka-inina”. Ta nda̱kuiinñá: “Taxi ti̱kui̱í táʼan tá káʼún xa̱ʼa ná koʼi̱ táta”.

Ta̱ Jesús ni̱ka̱ʼa̱nra xíʼinñá: “Ka̱ʼa̱n xíʼin yiíún ná kixira”. Soo ni̱ka̱ʼa̱nñá: “Kǒo yiíi̱”. Ta ni̱ka̱ʼa̱n ta̱ Jesús: “Ña̱ nda̱a̱ kúú ña̱ káʼún, chi xa̱a̱ ni̱xi̱yo u̱ʼu̱n yiíún soo ta̱ íyoún xíʼin vitin ta̱ʼán koora yiíún”. Ñáyóʼo ni̱ka̱ʼa̱nñá: “Iin profeta kúún. Ñuu nu̱ú íyoi̱ kándíxana ña̱ va̱ʼa ndasakáʼnundi̱ Ndióxi̱ xi̱ní yuku̱ káa, soo na̱ judío káchina ña̱ iinlá ñuu Jerusalén kúú nu̱ú xíniñúʼu ndasakáʼnuyó Ndióxi̱. Yi̱ʼi̱ ndákanixi̱níi̱ tá ná kixa̱a̱ ta̱ Mesías sánáʼa̱ra miíyó nda̱saa xíniñúʼu ndasakáʼnuyó Ndióxi̱”. Tasaá ni̱ka̱ʼa̱n ta̱ Jesús xíʼinñá iin ña̱ʼa ña̱ ta̱ʼán ka̱ʼa̱nra xíʼin ni iin na̱ yiví, ka̱chira: “Yi̱ʼi̱ kúú ta̱ Mesías”.

Tasaá xi̱nu ñá ñaʼá yóʼo ku̱a̱ʼa̱nñá, ta ni̱ka̱ʼa̱nñá xíʼin na̱ ñuu Samaria: “Nda̱niʼíi̱ ta̱ Mesías. Xíni̱ ndiʼira xa̱ʼíi̱. Naʼandó ta kunindó”. Tasaá ku̱a̱ʼa̱nna xíʼin ñáyóʼo yuʼú pozo ña̱ kuniso̱ʼona ña̱ sánáʼa̱ ta̱ Jesús.

Na̱ ñuu Samaria ni̱ka̱ʼa̱nna xíʼin ta̱ Jesús ná ndo̱ora xíʼinna. U̱vi̱ ki̱vi̱ ni̱xi̱yora ñuu yóʼo ta ku̱a̱ʼání ña̱ʼa sa̱náʼa̱rana, ta ku̱a̱ʼánína ka̱ndíxañaʼá. Tándi̱ʼi na̱ ñuu Samaria ni̱ka̱ʼa̱nna xíʼin ñá ñaʼá yóʼo: “Vitin xa̱ʼa ña̱ xi̱niso̱ʼondi̱ ña̱ ni̱ka̱ʼa̱n ta̱ ta̱a yóʼo, kándíxandi̱ ta̱yóʼo kúú ta̱ sáka̱ku ndiʼi na̱ yiví”.