Abril

¿Á yáʼún nu̱ú iin tu̱ndóʼo ña̱ yo̱ʼvi̱ní? Sana iin na̱ hermano ti̱xin congregación ke̱ʼéna iin ña̱ va̱ása va̱ʼa xíʼún (Sant. 3:2). Á sanatu na̱ káʼvi xíʼún escuela á na̱ káchíñu xíʼún kúsi̱kindaana yóʼó xa̱ʼa̱ ña̱ káchíñún nu̱ú Jehová (1 Ped. 4:3, 4). Á iin na̱ veʼún kúni̱na ña̱ ná sandákoún ku̱ʼún reunión á ña̱ natúʼún xíʼin na̱ yiví xa̱ʼa̱ ña̱ kándíxaún (Mat. 10:35, 36). Tá túviyó ña̱ xóʼvi̱níyó xíʼin ña̱yóʼo, sana kuni̱yó sandákooyó ña̱ ndasakáʼnuyó Jehová. Soo kiviva kandíxayó ña̱ ni nda̱a̱ ndáaka tu̱ndóʼo ná ya̱ʼayó nu̱ú, mií Jehová taxi ña̱ ndíchi ndaʼa̱yó, ta taxitura ndee̱ ndaʼa̱yó ña̱ va̱ʼa kundeé-iniyó ya̱ʼayó nu̱ú ña̱yóʼo. Ta nu̱ú tu̱ʼunra nátúʼunra xíʼinyó, ndáa ki̱ʼva ni̱ya̱ʼa sava na̱ yiví nu̱ú tu̱ndóʼo ña̱ ndeéní. Ke̱ʼéra ña̱yóʼo ña̱ va̱ʼa sakúaʼayó xíʼin ña̱ ndo̱ʼona, ta saátu chi̱kaa̱ra-ini ta̱ apóstol Pablo ña̱ kaʼyíraña. Tá ná kaʼviyó tu̱ʼun Ndióxi̱, kivi sándi̱koña-iniyó ta taxiña ndee̱ ndaʼa̱yó. Soo ña̱ va̱ʼa keʼéña ña̱yóʼo va̱ása xíniñúʼu kaʼvi kuitíyóña, chi xíniñúʼu taxiyó ña̱ ná nasamaña ki̱ʼva ña̱ ndákanixi̱níyó ta ná xa̱a̱ña nda̱a̱ níma̱yó. w21.03 14 párr. 1, 2

¿Á ndákanixi̱níyó ña̱ nda̱a̱ táki̱ʼva íyo si̱ʼva̱ ña̱ xa̱a̱ íyo tu̱ʼva ña̱ sakéeyó saá íyo na̱ yiví na̱ nátúʼunyó xíʼin? Tá saá íyoña, u̱ni̱ ña̱ kivi keʼéyó. Ña̱ nu̱ú, kamaka ku̱ʼu̱nyó natúʼunyó xíʼin na̱ yiví. Chi nda̱a̱ táki̱ʼva íyo ña̱ sákéeyó, loʼova tiempo íyo ña̱ keʼéyó ña̱yóʼo. Ña̱ u̱vi̱, kusi̱íní-iniyó tá ná keʼéyó ña̱ chiñu yóʼo. Ña̱ Biblia káchiña ña̱ na̱ yiví kúsi̱í-inina tá kíxaa̱ tiempo ña̱ sakéena (Is. 9:3). Ña̱ u̱ni̱, kandíxayó ña̱ kivi xa̱a̱ iin tá iin na̱ yiví yóʼo koona discípulo ta̱ Jesús, ña̱kán xa̱a̱ síín síín xíniñúʼu koo ña̱ natúʼunyó xíʼinna ña̱ va̱ʼa kuni̱na kunda̱a̱-inina. Ta̱ Jesús kǒo níndakanixi̱níra ña̱ va̱ása kivi xa̱a̱ na̱ ñuu Samaria sakuaʼana xa̱ʼa̱ra, nda̱a̱ táki̱ʼva nda̱kanixi̱ní na̱ xi̱ndiku̱nñaʼá. Chi ka̱ndíxara ña̱ kivi xa̱a̱na koona discípulora. Ki̱ʼva saá xíniñúʼu kotoyó na̱ yiví na̱ íyo nu̱ú territorio ña̱ kúúmiíyó. Ta̱ apóstol Pablo va̱ʼaní yichi̱ chi̱núura nu̱úyó xíʼin ña̱ ke̱ʼéra. Chi xi̱kunda̱a̱ loʼo inira xa̱ʼa̱ ña̱ xi̱kandíxa na̱ yiví na̱ xi̱natúʼunra xíʼin, ta saátu xi̱kunda̱a̱-inira ndáaña xi̱ndi̱ʼi̱-inina xa̱ʼa̱, ta xi̱kandíxara ña̱ kivi xa̱a̱na koona discípulo ta̱ Jesús. w20.04 8, 9 párr. 3, 4

Nu̱úka ña̱ ka̱ʼa̱nyó ña̱ va̱ása va̱ʼa xa̱ʼa̱ ña̱ kéʼé iin na̱ yiví, ná chika̱a̱yó ndee̱ ña̱ kunda̱a̱-iniyó xíʼin ña̱ ndóʼona. Iinlá Jehová kúú ta̱ kúnda̱a̱-ini xíʼin ndiʼi ña̱ ndóʼoyó. Ña̱kán ná ka̱ʼa̱nyó xíʼinra ña̱ chindeétáʼanra xíʼinyó ña̱ kotoyó inkana nda̱a̱ táki̱ʼva xítorana, ta kundáʼvi-iniyó kuniyóna. Va̱ása xíniñúʼu ndaka̱xinyó ndáa na̱ hermano kúú na̱ kundáʼvi-iniyó kuniyó. Ndiʼina íyo tu̱ndóʼo nu̱ú, nda̱a̱ táki̱ʼva ndo̱ʼo ta̱ Jonás, ta̱ Elías, ñá Agar xíʼin ta̱ Lot. Sava na̱yóʼo ndu̱kú miína tu̱ndóʼo ña̱ ndo̱ʼona. Soo mií ña̱ nda̱a̱, ¿á nda̱a̱ ni iinyó ta̱ʼán ndukú miíyó tu̱ndóʼo ña̱ kundoʼoyó? Xa̱ʼa̱ ña̱kán kúú ña̱ káʼa̱n Jehová xíʼinyó ña̱ ná kunda̱a̱-iniyó xíʼin ña̱ ndóʼo inkana (1 Ped. 3:8). Tá xíniso̱ʼoyó ña̱ káʼa̱nra saá kúú ña̱ va̱ʼaníka kítáʼanyó xíʼin na̱ hermanoyó, ni xa̱a̱ síín síín ñuuna. Ña̱kán, ná chika̱a̱yó ndee̱ ña̱ kundi̱ʼi̱-iniyó xa̱ʼa̱ na̱ hermanoyó ta ná kundáʼvi-iniyó kuniyóna. w20.04 18, 19 párr. 15-17

Ta̱ Jesús kúú ta̱ xi̱niso̱ʼo ndiʼi ña̱ ni̱ka̱ʼa̱n Jehová tasaá va̱ʼaní yichi̱ sa̱ndákoora nu̱úyó. Ña̱kán, ña̱ va̱ʼa kuniso̱ʼoyó ña̱ káʼa̱n Jehová xíniñúʼu keʼéyó nda̱a̱ táki̱ʼva ke̱ʼé ta̱ Jesús (Juan 8:29). Ña̱ va̱ʼa ndakundeéyó kandíxayó ña̱ nda̱a̱, xíniñúʼu kandíxayó ña̱ nina ña̱ nda̱a̱ kúú ña̱ káʼa̱n Jehová ña̱kán ndiʼi ña̱ va̱xi nu̱ú tu̱ʼunra ña̱ nda̱a̱ kúúña. Ta saátu xíniñúʼu kandíxayó ña̱ mií Ndióxi̱ kúú ta̱ nda̱kaxin ta̱ Jesús. Tiempo vitin, ku̱a̱ʼání na̱ yiví va̱ása kándíxana ña̱ nda̱kaxin Ndióxi̱ ta̱ Jesús ña̱ koora rey ti̱xin Reinora. Ta̱ Juan ni̱ka̱ʼa̱nra ña̱ kooní na̱ vatá na̱ kivi sandáʼvi na̱ xa̱a̱ kándíxa Jehová xíʼin ta̱ Jesús (2 Juan 7-11). Ta̱ Juan ka̱ʼyíra ña̱yóʼo: “¿Ndáana kúú na̱ vatá? ¿Á su̱ví na̱ káʼa̱n ña̱ va̱ása kúú ta̱ Jesús ta̱ Cristo?” (1 Juan 2:22). Tá ná kaʼviyó tu̱ʼun Ndióxi̱ saá kúú ña̱ va̱ása taxiyó ña̱ ná sandáʼvina miíyó. Tasaá kuxini̱kayó Jehová xíʼin ta̱ Jesús (Juan 17:3). Tá ná keʼéyó ña̱yóʼo va̱ása kaka-iniyó ña̱ kúúmiíyó ña̱ nda̱a̱. w20.07 21 párr. 4, 5

Tá va̱ása kúni̱yó kasiyó nu̱ú na̱ hermano na̱ xínu xíʼinyó, va̱ása xíniñúʼu kuni̱yó ña̱ ná keʼéna ndiʼi ña̱ kúni̱ miíyó (Rom. 14:19-21; 1 Cor. 8:9, 13). Síín íyo ña̱yóʼo nu̱ú ña̱ kéʼé na̱ ndixa xínu iin carrera. Chi na̱yóʼo chíka̱a̱na ndee̱ ña̱ xa̱a̱na nda̱a̱ nu̱ú ndíʼi, ta va̱ása ndíʼi̱-inina xa̱ʼa̱ táʼanna. Xa̱ʼa̱ ña̱kán, sana chíndaʼána na̱ xínu xíʼinna ña̱ va̱ʼa ya̱ʼana nu̱úna. Soo miíyó va̱ása kéetáʼanyó xíʼin na̱ hermanoyó (Gál. 5:26; 6:4). Chi ña̱ kúni̱yó kúú ña̱ chindeétáʼanyó xíʼin ndiʼina, ña̱ va̱ʼa xa̱a̱na xíʼinyó nda̱a̱ nu̱ú ndíʼi ta ndakiʼinna ña̱ kutakuna. Xa̱ʼa̱ ña̱yóʼo, chíka̱a̱yó ndee̱ ña̱ kundiku̱nyó consejo ña̱ va̱xi nu̱ú texto ña̱ káʼviyó ki̱vi̱ vitin, ña̱ va̱ása kundi̱ʼi̱-iniyó xa̱ʼa̱ iinlá miíyó chi saátu xíniñúʼu kundi̱ʼi̱-iniyó xa̱ʼa̱ inkana (Filip. 2:4). Xa̱ʼa̱ ña̱ kúʼvi̱ní-ini Jehová xínira miíyó, káʼa̱nra ña̱ ndiʼiyó na̱ sa̱ndíʼi xi̱nu ndakiʼinyó ña̱ kutakuyó ndiʼi tiempo, kúúña chí ndiví á nu̱ú ñuʼú yóʼo. w20.04 28 párr. 10; 29 párr. 12

Ku̱a̱ʼání na̱ ndásakáʼnu Ndióxi̱ ka̱kuna ti̱xin ña̱ gran tribulación ta xa̱a̱na koona nu̱ú ñuyǐví xa̱á. Ta na̱yóʼo kuni nu̱úna ndáa ki̱ʼva ndiʼi-xa̱ʼa̱ ña̱ xíʼi̱yó, saáchi kunina ndataku ku̱a̱ʼání na̱ yiví na̱ ni̱xi̱ʼi̱ tiempo xi̱naʼá. Ta kusi̱íní-inina tá ná kuu ña̱yóʼo (Hech. 24:15). Ta ndiʼi na̱ nda̱kú ná koo ini xíʼin Jehová kuchiñuna nu̱ú ña̱ xíʼi̱yó ña̱ sa̱ndákoo ta̱ Adán ndaʼa̱yó, chi kutakuna ndiʼi tiempo. Ndiʼi miíyó na̱ ndásakáʼnu Ndióxi̱ tiempo vitin táxiníyó tíxa̱ʼvi xa̱ʼa̱ ña̱ ka̱ʼyí ta̱ Pablo xa̱ʼa̱ ña̱ ndataku na̱ ni̱xi̱ʼi̱ nu̱ú carta ña̱ ku̱a̱ʼa̱n ndaʼa̱ na̱ ñuu Corinto, saáchi va̱ʼaní sándi̱koña-iniyó. Ña̱kán xíniñúʼu kundiku̱nyó consejo ña̱ ta̱xi ta̱ Pablo ña̱ ndiʼi tiempo keʼéyó chiñu ta̱ táta (1 Cor. 15:58). Tá nda̱kú íyo iniyó ta chíka̱a̱yó ndee̱ ña̱ keʼéyó chiñu yóʼo, va̱ʼaní koo ña̱ ndakiʼinyó chí nu̱únínu ta kusi̱íní-iniyó xíʼinña. Tasaá taxi Ndióxi̱ ña̱ va̱ʼa ndaʼa̱yó xa̱ʼa̱ ña̱ chi̱ka̱a̱níyó ndee̱ ka̱chíñuyó nu̱úra. w20.12 13 párr. 16, 17

Profecía ña̱ va̱xi nu̱ú Ezequiel 38:10-23; Daniel 2:43-45; 11:44-12:1 xíʼin Apocalipsis 16:13-16, 21 inkáchi ña̱ʼa káʼa̱nña xa̱ʼa̱ ta inkáchi tiempo kuuña. Tá saá íyoña, ña̱yóʼo kúú ña̱ ndátuyó kuu. Tá ná ya̱ʼa loʼo tiempo ña̱ kixáʼa ña̱ gran tribulación, “ndiʼi na̱ chíñu ña̱ iníísaá ñuyǐví” ndakutáʼanna (Apoc. 16:13, 14). Ta ña̱ Biblia káʼa̱nña, ña̱ na̱ ndakutáʼanna yóʼo kunanína “Gog ña̱ ke̱e nu̱ú ñuʼú ña̱ Magog” (Ezeq. 38:2). Na̱ chíñu na̱ ndakutáʼan yóʼo ixandi̱va̱ʼana xíʼin na̱ ñuu Ndióxi̱ ta kuni̱na sandíʼi-xa̱ʼa̱na na̱yóʼo. Ta̱ apóstol Juan xi̱nira ña̱ ni̱ko̱yo íʼin á ñíí ña̱ náʼnuní sa̱tá na̱ sáa̱-ini xíni Ndióxi̱. Sana nda̱a̱ táki̱ʼva ndeéní ku̱un ña̱yóʼo, saá koo ña̱ natúʼun na̱ ndásakáʼnu Ndióxi̱. Ta sana ña̱ natúʼun na̱ ndásakáʼnu Ndióxi̱ chindaʼáña ña̱ Gog ña̱ Magog ña̱ kixáʼaña ixandi̱va̱ʼaña xíʼin na̱yóʼo, ta kuni̱ña sandíʼi-xa̱ʼa̱ñana (Apoc. 16:21). w20.05 15 párr. 13, 14

Xíniñúʼu kundayáʼvi espíritu santo Ndióxi̱ nu̱úyó. Ta kivi kundayáʼvika ña̱yóʼo nu̱úyó tá ná ndakanixi̱níyó xa̱ʼa̱ ki̱ʼva ña̱ chíndeétáʼanña xíʼinyó tiempo vitin. Tá kúma̱níka ku̱ʼu̱n ta̱ Jesús chí ndiví, ni̱ka̱ʼa̱nra ña̱yóʼo xíʼin na̱ discípulora: “Ndakiʼinndó ndee̱ tá ná kixaa̱ espíritu santo Ndióxi̱ sa̱tándó. Ta ku̱ʼu̱nndó natúʼunndó xa̱ʼíi̱ [...] iníísaá ñuyǐví” (Hech. 1:8). Xa̱ʼa̱ ña̱ chíndeétáʼan espíritu santo xíʼinyó, xa̱a̱ yáʼaka u̱na̱ millón sava kúú na̱ ndásakáʼnu Ndióxi̱ na̱ íyo iníísaá ñuyǐví. Saátu va̱ʼaní kítáʼan ndiʼiyó, saáchi espíritu santo chíndeétáʼanña xíʼinyó ña̱ kuumiíyó ku̱a̱ʼání ña̱ va̱ʼa, ña̱ kuʼvi̱-iniyó kunitáʼanyó, ña̱ kusi̱í-iniyó, ña̱ táxi̱n koo iniyó, ña̱ kúee koo iniyó, ña̱ vií koo iniyó, ña̱ va̱ʼa koo iniyó, ña̱ kandíxayó Ndióxi̱, ña̱ vitá koo iniyó xíʼin ña̱ ka̱ʼnu̱-iniyó. Ña̱yóʼo kúú ña̱ va̱ʼa kúúmií ña̱ espíritu santo (Gál. 5:22, 23). Ta iin regalo ña̱ ndáyáʼviní kúú ña̱yóʼo. w20.05 28 párr. 10; 29 párr. 13

Íyo ku̱a̱ʼá xa̱ʼa̱ kúú ña̱ káʼa̱nyó ña̱ ndakunivayó na̱ táʼanyó na̱ ni̱xi̱ʼi̱ tá ná ndatakuna. Tá kúú, xíʼin ki̱ʼva ña̱ sa̱ndátaku Jehová na̱ ni̱xi̱yo tiempo xi̱naʼá, kúnda̱a̱-iniyó ña̱ tá ná sandatakurana va̱ása nasamara ki̱ʼva ña̱ náʼa̱na, ni ki̱ʼva ña̱ káʼa̱nna ni ña̱ ndákanixi̱nína chi kooña nda̱a̱ táki̱ʼva ni̱xi̱yoña tá kúma̱ní si̱lóʼo kuvina. Ta saátu ná ndakaʼányó chi ta̱ Jesús ni̱ka̱ʼa̱nra ña̱ na̱ ni̱xi̱ʼi̱ táki̱ʼva íyo na̱ kísi̱ saá íyona, ta tá ná ndatakuna táki̱ʼva koo na̱ ndako̱o saá koona (Mat. 9:18, 24; Juan 11:11-13). Tá ndáko̱o iin na̱ yiví va̱ása nása̱ma ta̱chína, ni ki̱ʼva ña̱ náʼa̱na ni ña̱ ndákaʼánna xa̱ʼa̱. Ná ndakaʼányó chi tá sa̱ndátaku ta̱ Jesús ta̱ Lázaro xa̱a̱ ku̱mí ki̱vi̱ kúú ña̱ ni̱xi̱ʼi̱ra, ña̱kán xa̱a̱ ku̱a̱ʼa̱n táʼyi̱ ku̱ñura. Soo ná ki̱ʼvara kamaní nda̱kuninára, ta saátu miíra nda̱kaʼánvara xa̱ʼa̱ná (Juan 11:38-44; 12:1, 2). w20.08 14 párr. 3; 16 párr. 8

Na̱ nda̱kaxin Ndióxi̱ ku̱ʼu̱n chí ndiví ta saátu na̱ kúú inkaka ndikachi, inkáchi ndáyáʼvina nu̱ú Ndióxi̱. Kúʼvi̱-inira xíni̱ra u̱vi̱ saána, saáchi ña̱ táku se̱ʼéra kúú ña̱ cha̱ʼvira xa̱ʼa̱ na̱ nda̱kaxinra ku̱ʼu̱n chí ndiví ta saátu na̱ kúú inkaka ndikachi. Xa̱a̱ síín síín íyo ña̱ ndátu na̱yóʼo ndakiʼinna, soo inkáchi xíniñúʼu nda̱kú koo inina xíʼin Ndióxi̱ ta saátu xíʼin ta̱ Cristo (Sal. 31:23). Ná ndakaʼányó chi espíritu santo Ndióxi̱ kivi inkáchi chindeétáʼanña xíʼin ndiʼi na̱ káchíñu nu̱úra. Jehová kivi taxira espíritu santora ndaʼa̱ iin tá iin na̱ yiví tá xíniñúʼunaña, ni kúúna na̱ nda̱kaxinra ku̱ʼu̱n chí ndiví á na̱ inkaka ndikachi. Na̱ xa̱a̱ nda̱taxi mií ndaʼa̱ Jehová ta káchíñuna nu̱úra, íyo iin ña̱ va̱ʼaní taxira ndaʼa̱na chí nu̱únínu (Jer. 29:11). Ti̱xin Conmemoración kúú ña̱ kivi ndasakáʼnu ndiʼiyó Ndióxi̱ ta saátu ta̱ Cristo, xa̱ʼa̱ ña̱ ke̱ʼéna xa̱ʼa̱yó ña̱ va̱ʼa ndakiʼinyó ña̱ kutakuyó ndiʼi tiempo. Ña̱kán nu̱ú miíyó na̱ ndíku̱n ta̱ Cristo, Conmemoración kúú iin ña̱ ndáyáʼviní kéʼéyó ku̱i̱ya̱ tá ku̱i̱ya̱. w21.01 18 párr. 16; 19 párr. 19

Ku̱a̱ʼání na̱ xáʼa̱n Conmemoración ndátuna koona nu̱ú ñuʼú yóʼo. Tá saá, ¿nda̱chun xáʼa̱nna? Saáchi kéʼéna nda̱a̱ táki̱ʼva kéʼé iin na̱ yiví na̱ xáʼa̱n nu̱ú tíndaʼa̱ iin na̱ migona, chi kúni̱na na̱ʼa̱na ña̱ kúsi̱í-inina xíʼin na̱ tíndaʼa̱ kán ta kúni̱na chindeétáʼanna xíʼinna. Ki̱ʼva saá kéʼé na̱ kúú inkaka ndikachi tá xáʼa̱nna Conmemoración, chi saá náʼa̱na ña̱ kúʼvi̱-inina xínina ta̱ Cristo xíʼin na̱ nda̱kaxin Ndióxi̱ ku̱ʼu̱n chí ndiví, ta kúni̱na chindeétáʼanna xíʼinna. Ta xíʼin ña̱yóʼo náʼa̱na ña̱ táxina tíxa̱ʼvi xa̱ʼa̱ ña̱ ni̱xi̱ʼi̱ ta̱ Jesús, chi saá kivi ndakiʼinna ña̱ kutakuna ndiʼi tiempo nu̱ú ñuʼú yóʼo. Ta saátu na̱ kúú inkaka ndikachi xáʼa̱nna Conmemoración, saáchi kándíxana chiñu ña̱ xa̱ʼnda ta̱ Jesús. Ñuú tá xi̱xira xíʼin na̱ apóstolra ka̱chira: “Kǒo sandákoondó keʼéndó ña̱yóʼo” (1 Cor. 11:23-26). Ña̱kán, na̱ kúú inkaka ndikachi ndákundeévana ndákaʼánna xa̱ʼa̱ ña̱ ni̱xi̱ʼi̱ ta̱ Jesús, nani kíndo̱oka na̱ nda̱kaxin Ndióxi̱ ku̱ʼu̱n chí ndiví nu̱ú ñuʼú yóʼo. w21.01 17, 18 párr. 13, 14

Tá iin na̱ yiví kúʼvi̱-inina xínina inkana va̱ása káʼa̱n kuitínaña xíʼinna, saáchi xíʼin ña̱ kéʼéna náʼa̱na ña̱ ndixa kúʼvi̱-inina xíninana (Sant. 2:17, 26). Tá kúú, Jehová kúʼvi̱-inira xínira miíyó (1 Juan 4:19). Nu̱ú tu̱ʼunra viíní káʼa̱nra xíʼinyó ña̱ kúʼvi̱-inira xínira miíyó (Sal. 25:10; Rom. 8:38, 39). Soo kúnda̱a̱-iniyó ña̱ va̱ása káʼa̱n kuitíra ña̱ kúʼvi̱-inira xínira miíyó, saáchi xíʼin ña̱ kéʼéra náʼa̱ra ña̱yóʼo. Jehová ta̱xira ña̱ ná xo̱ʼvi̱ se̱ʼera ta kuvira xa̱ʼa̱yó (Juan 3:16). Xa̱ʼa̱ ña̱yóʼo va̱ása xíka-iniyó ña̱ kúʼvi̱-ini Ndióxi̱ xínira miíyó. Náʼa̱yó ña̱ kúʼvi̱-iniyó xíniyó Jehová ta saátu ta̱ Jesús, tá kándíxayó ña̱ káʼa̱nna (Juan 14:15; 1 Juan 5:3). Soo ta̱ Jesús ni̱ka̱ʼa̱nra xíʼinyó ña̱ ná kuʼvi̱-iniyó kunitáʼanyó (Juan 13:34, 35). Va̱ása xíniñúʼu ka̱ʼa̱n kuitíyó xíʼin na̱ hermanoyó ña̱ kúʼvi̱-iniyó xíniyóna, chi saátu xíniñúʼu na̱ʼa̱yóña xíʼin ña̱ kéʼéyó (1 Juan 3:18). w21.01 9 párr. 6; 10 párr. 8

Na̱ hermano na̱ nda̱kaxin espíritu santo, ndátuna koona ndiʼi tiempo xíʼin ta̱ Jesús ta kaʼndachíñuna xíʼinra ti̱xin Reino Ndióxi̱. Kuninu̱únara, ka̱ʼa̱nna xíʼinra ta ku̱a̱ʼá tiempo kutáʼanna xíʼinra (Juan 14:2, 3). Ta na̱ ndátu kundoo nu̱ú ñuʼú yóʼo, ndakiʼinna ña̱ va̱ʼa xa̱ʼa̱ ña̱ kuʼvi̱-ini ta̱ Jesús kunirana ta kundaarana. Ni va̱ása kuninu̱únara, soo ña̱ kítáʼanna xíʼinra ndundakúkaña xa̱ʼa̱ ña̱ kúsi̱í-inina ña̱ ta̱xi Jehová xíʼin ta̱ Jesús ña̱ koona nu̱ú ñuʼú yóʼo (Is. 9:6, 7). Ki̱vi̱ kándíxayó kooyó migo ta̱ Jesús ku̱a̱ʼání bendición ndákiʼinyó. Tá kúú, kúʼvi̱ní-inira xínira miíyó vitin ta chíndeétáʼanra xíʼinyó. Ta saátu kivi ndakiʼinyó ña̱ kutakuyó ndiʼi tiempo. Tá kítáʼan viíyó xíʼin ta̱ Jesús ndakiʼinyó iin ña̱ ndáyáʼviní, ña̱ kutáʼan viíyó xíʼin yivára Jehová. Iin ña̱ va̱ʼaní kúú ña̱ kooyó migo ta̱ Jesús. w20.04 25 párr. 15, 16

Ta̱ apóstol Pablo ka̱ʼyíra carta ku̱a̱ʼa̱n ndaʼa̱ na̱ hermano na̱ ñuu Corinto, na̱ nda̱kaxin Ndióxi̱ xi̱kuu na̱yóʼo ña̱kán xi̱ndatuna ndatakuna chí ndiví. Na̱yóʼo ndu̱yi̱i̱na ña̱ nda̱kutáʼanna xíʼin ta̱ Cristo, ta ka̱narana ña̱ koona na̱ yi̱i̱. Ta saátu ni̱ka̱ʼa̱n ta̱ Pablo xa̱ʼa̱ “na̱ ni̱xi̱ʼi̱ na̱ kítáʼan xíʼin ta̱ Cristo” (1 Cor. 1:2; 15:18; 2 Cor. 5:17). Espíritu santo Ndióxi̱ kúú ña̱ chi̱ndeétáʼan xíʼinra ña̱ ka̱ʼyíra ña̱yóʼo nu̱ú inka carta: “Tá inkáchi ni̱xi̱ʼi̱yó xíʼinra [ta̱ Jesús], saátu inkáchi ndatakuyó táki̱ʼva nda̱takura” (Rom. 6:3-5). Tá nda̱taku ta̱ Jesús ndu̱ura iin espíritu ta ku̱a̱ʼa̱nra chí ndiví. Ta ña̱yóʼo kúú ña̱ ndoʼo ndiʼi “na̱ kítáʼan xíʼin ta̱ Cristo” á na̱ nda̱kaxin Ndióxi̱ ku̱ʼu̱n chí ndiví. Ta̱ Pablo ka̱ʼyíra xa̱ʼa̱ ta̱ Cristo ña̱ kúúra “ta̱ nu̱ú nda̱taku nu̱ú ndiʼika na̱ ni̱xi̱ʼi̱ nda̱a̱ táki̱ʼva íyo ku̱i̱ʼi ña̱ siʼna kána” (1 Cor. 15:20). Ta̱ Jesús kúú ta̱ nu̱ú nda̱taku ta ndu̱ura iin espíritu, ta saátu nda̱kiʼinra ña̱ kutakura ndiʼi tiempo. w20.12 6 párr. 15, 16

Tá xíʼi̱ na̱ nda̱kaxin Ndióxi̱ tiempo vitin, ndi̱ku̱n ndátakuna chí ndiví. ¿Nda̱chun va̱ʼa kúnda̱a̱-iniyó ña̱yóʼo? Kúnda̱a̱-iniyó xa̱ʼa̱ña, saáchi ta̱ apóstol Pablo ni̱ka̱ʼa̱nra xa̱ʼa̱ña nu̱ú 1 Corintios 15:51, 52. Tá xa̱a̱ ná ndataku na̱ ñani ta̱ Cristo saá kúú ña̱ kusi̱íní-inina. Ña̱ Biblia káʼa̱nña ndáaña keʼé na̱ nda̱kaxin Ndióxi̱ ku̱ʼu̱n chí ndiví tá ná ndatakuna. Ta̱ Jesús káʼa̱nra ña̱yóʼo xíʼinna: “Na̱ kuchiñu keʼé ña̱ ni̱ka̱ʼa̱n yi̱ʼi̱ nda̱a̱ ki̱vi̱ nu̱ú ndíʼi, na̱kán kúú na̱ taxii̱ ña̱ kaʼndachíñuna nu̱ú ku̱a̱ʼání ñuu nda̱a̱ táki̱ʼva ke̱ʼé yivái̱ xíʼi̱n chi ta̱xira kaʼndachíñui̱” (Apoc. 2:26, 27). w20.12 12 párr. 14, 15

Tá ni̱ka̱ʼa̱n ta̱ apóstol Pablo xa̱ʼa̱ ta̱ Jesús ña̱ kúúra “ta̱ nu̱ú”, xi̱kuni̱ kachira ña̱ ndataku inkaka na̱ yiví ña̱ koona chí ndiví. Tá ná ya̱ʼa tiempo, ndiʼi “na̱ kítáʼan xíʼin ta̱ Cristo” tá kúú na̱ apóstolra, ndatakuna ta koona chí ndiví nda̱a̱ táki̱ʼva íyo mií ta̱ Jesús (1 Cor. 15:18). “Na̱ kítáʼan xíʼin ta̱ Cristo” ta̱ʼán kixáʼana ndatakuna chí ndiví tá ka̱ʼyí ta̱ Pablo carta ku̱a̱ʼa̱n ndaʼa̱ na̱ ñuu Corinto. Ta xíʼin ña̱ ka̱ʼyíra xi̱kuni̱ kachira ña̱ ya̱ʼa tiempo saáví ndatakuna. Ka̱chira: “Yiku̱n koo ña̱ ndatakuna: ta̱ siʼna nda̱taku kúú ta̱ Cristo, tándi̱ʼi, saá ndataku na̱ kúú kuenta ta̱ Cristo tá xa̱a̱ ná koo tiempo ña̱ kixaa̱ra” (1 Cor. 15:23; 1 Tes. 4:15, 16). Ña̱kán na̱ apóstol xíʼin inkaka na̱ nda̱kaxin Ndióxi̱, ndakiʼinna ña̱ kutakuna chí ndiví tá xa̱a̱ ná koo “tiempo ña̱ kixaa̱” ta̱ Cristo, tasaá inkáchi ndatakuna nda̱a̱ táki̱ʼva nda̱takura. Vitin kúú ña̱ ndóoyó “tiempo ña̱ kixaa̱” ta̱ Cristo (Rom. 6:5). w20.12 5 párr. 12; 6 párr. 16, 17

Na̱ ni̱ka̱ʼa̱n ta̱ apóstol Pablo xa̱ʼa̱ kúú na̱ ndataku chí ndiví ta ku̱ñuna nduuña iin espíritu (1 Cor. 15:43, 44). Tá ni̱xi̱yo ta̱ Jesús nu̱ú ñuʼú yóʼo, nda̱a̱ táki̱ʼva íyo ku̱ñu miíyó saá ni̱xi̱yo ku̱ñura. Soo tá nda̱takura “ndu̱ura iin espíritu ta̱ táxi ña̱ tákuyó”, ta nda̱ndikóra chí ndiví. Ki̱ʼva saá koo na̱ nda̱kaxin Ndióxi̱ ku̱ʼu̱n chí ndiví, chi tá ná ndatakuna nduuna iin espíritu. Ta̱ Pablo ni̱ka̱ʼa̱nra xa̱ʼa̱ ña̱yóʼo: “Íyoyó táki̱ʼva ni̱xi̱yo ta̱ na̱kuva̱ʼa xíʼin ñuʼú ta saátu kooyó táki̱ʼva íyo ta̱ ku̱a̱ʼa̱n chí ndiví” (1 Cor. 15:45-49). Ta saátu ná ndakaʼányó chi tá nda̱taku ta̱ Jesús va̱ása níxikuumiíra iin ku̱ñu táʼan ña̱ kúúmií na̱ yiví. Ta̱ Pablo ka̱chira: “Ku̱ñu xíʼin leke kǒo kivi ki̱ʼviña ti̱xin ña̱ Reino Ndióxi̱” ña̱ íyo chí ndiví (1 Cor. 15:50). Tá ná ku̱ʼu̱n na̱ apóstol chí ndiví ta saátu inkaka na̱ nda̱kaxin Ndióxi̱, va̱ása kuumiína ku̱ñu xíʼin leke ña̱ ndíʼi-xa̱ʼa̱. w20.12 10, 11 párr. 10-12

Ndióxi̱ chi̱ndeétáʼanra xíʼin sava na̱ discípulo ta̱ Jesús na̱ ni̱xi̱yo tá siglo nu̱ú, ña̱ va̱ʼa ka̱ʼyína xa̱ʼa̱ ña̱ ndataku na̱ ku̱ʼu̱n chí ndiví. Ta̱ apóstol Juan ni̱ka̱ʼa̱nra ña̱yóʼo: “Vitin kúúyó se̱ʼe Ndióxi̱, soo ta̱ʼán kunda̱a̱-iniyó ndáa ki̱ʼva kooyó. Kúnda̱a̱-iniyó ña̱ kooyó nda̱a̱ táki̱ʼva íyora tá ná kuniyóra” (1 Juan 3:2). Na̱ nda̱kaxin Ndióxi̱ va̱ása kúnda̱a̱-inina ndáa ki̱ʼva koo ña̱ kutakuna chí ndiví tá ná ndatakuna. Soo ña̱ kúnda̱a̱-inina kúú ña̱ tá ná ndatakuna chí ndiví kuni nu̱úna Jehová. Ña̱ Biblia kǒo káʼa̱nña xa̱ʼa̱ ndiʼi ña̱ kuu tá ná ndatakuna chí ndiví. Soo ta̱ apóstol Pablo ni̱ka̱ʼa̱nra xa̱ʼa̱ sava ña̱ kuu, tá kúú ni̱ka̱ʼa̱nra ña̱ kitáʼan na̱ nda̱kaxin Ndióxi̱ xíʼin ta̱ Cristo tá ná “sandíʼi-xa̱ʼa̱ra ndiʼi na̱ chíñu ta saátu ndiʼi na̱ kúúmií ndee̱”, ta sandíʼi-xa̱ʼa̱na ña̱ xíʼi̱yó. Ta̱ Jesús xíʼin na̱ kaʼndachíñu xíʼinra ndataxina Reino ndaʼa̱ Ndióxi̱, tasaá ndáa iinlá Jehová kúú ta̱ kaʼndachíñu nu̱ú ndiʼi ña̱ʼa (1 Cor. 15:24-28). Kusi̱íní-iniyó tá ná kuu ña̱yóʼo. w20.12 8 párr. 2

¿Ndáaña kuu xíʼin na̱ va̱ása ndátu koo xíʼin ta̱ Cristo chí ndiví? Saátu na̱yóʼo kándíxana ña̱ ndatakuna. Kúnda̱a̱-iniyó ña̱yóʼo, chi ña̱ Biblia káʼa̱nña xa̱ʼa̱ ta̱ Pablo xíʼin inkaka na̱ ku̱ʼu̱n chí ndiví ña̱ kúú na̱yóʼo “na̱ xa̱a̱ ya̱chi̱ka ndataku” (Filip. 3:11). Ña̱yóʼo náʼa̱ña nu̱úyó ña̱ siʼna na̱yóʼo ndataku, tándi̱ʼi ndataku inkana. Ña̱yóʼo kítáʼanña xíʼin ña̱ ni̱ka̱ʼa̱n ta̱ Job xa̱ʼa̱ ña̱ xi̱ndatura ndakiʼinra chí nu̱únínu (Job 14:15). “Na̱ kúú kuenta ta̱ Cristo”, koona xíʼinra chí ndiví tá ná “sandíʼi-xa̱ʼa̱ra ndiʼi na̱ chíñu xíʼin ndiʼi na̱ kúúmií ndee̱”. Tasaá, nda̱a̱ ña̱ xíʼi̱yó ndiʼi-xa̱ʼa̱. Xíʼin ña̱yóʼo kúnda̱a̱ káxi iniyó ña̱ va̱ása kuvika na̱ ndataku koo chí ndiví (1 Cor. 15:23-26). Na̱ ndátu koo nu̱ú ñuʼú yóʼo kivi ka̱ʼa̱nna nda̱a̱ táki̱ʼva ni̱ka̱ʼa̱n ta̱ apóstol Pablo nu̱ú texto ña̱ káʼviyó ki̱vi̱ vitin. Xa̱a̱ kúnda̱a̱-iniyó ña̱ nda̱a̱ ni iin na̱ yiví na̱ kéʼé ña̱ va̱ása va̱ʼa kǒo kivi ku̱ʼu̱nna chí ndiví, ña̱kán na̱ ni̱ka̱ʼa̱n ta̱ Pablo xa̱ʼa̱ kúú na̱ ndataku koo nu̱ú ñuʼú yóʼo. w20.12 7 párr. 18, 19

Sana ndakanixi̱níyó ña̱yóʼo: “¿Ndáa ki̱ʼva kunda̱a̱-inii̱ ña̱ ndáyáʼvíkai̱ nu̱ú Jehová?”. Tá ndákanixi̱níyó xa̱ʼa̱ ña̱yóʼo, kúni̱ kachiña ña̱ xa̱a̱ kúnda̱a̱va-iniyó ña̱ ndáyáʼviyó nu̱ú Jehová. ¿Nda̱chun káʼa̱nyó ña̱yóʼo? Xa̱a̱ íyo ku̱a̱ʼá ku̱i̱ya̱ chí sa̱tá, tutu La Atalaya ni̱ka̱ʼa̱nña xa̱ʼa̱ ña̱yóʼo: “Sana ku̱a̱ʼá yichi̱ ndíkóyó kéʼéyó iin ña̱ va̱ása va̱ʼa saáchi ña̱yóʼo kúú ña̱ xi̱keʼéyó tá ya̱chi̱ tá kúma̱níka kixáʼayó kachíñuyó nu̱ú Ndióxi̱, xa̱ʼa̱ ña̱kán íxayo̱ʼvi̱ña xíʼinyó ña̱ sandákooyóña”. Ta ni̱ka̱ʼa̱nkaña: “Va̱ása ndakanixi̱níún ña̱ ke̱ʼún iin ña̱ va̱ása va̱ʼa ña̱ kǒo kívi ixakáʼnu-ini Jehová xa̱ʼa̱, chi ña̱yóʼo kúú ña̱ kúni̱ ta̱ Ndi̱va̱ʼa ná ndákanixi̱níún. Tá kúsuchí-iniún ta sáún xa̱ʼa̱ ña̱ ke̱ʼún iin ña̱ va̱ása va̱ʼa, ña̱yóʼo náʼa̱ña ña̱ kúni̱vaún keʼún ña̱ va̱ʼa ta kivi ixakáʼnu-ini Jehová xa̱ʼún, chika̱a̱ ndee̱ ña̱ vitá koo iniún ta ndakundeún ka̱ʼún xíʼin Ndióxi̱ ña̱ ná ixakáʼnu-inira xa̱ʼún, ta saátu ña̱ ná chindeétáʼanra xíʼún ña̱ va̱ása ndakavaka-iniún ta va̱ása ndikókaún keʼún ña̱ va̱ása va̱ʼa”. Ku̱a̱ʼání ña̱ va̱ása va̱ʼa ke̱ʼé ta̱ apóstol Pablo tá kúma̱ní xa̱a̱ra nduura cristiano. Xi̱ndakaʼánvara xa̱ʼa̱ ña̱ ke̱ʼéra (1 Tim. 1:12-15). Soo xi̱kandíxara ña̱ kivi koo káʼnu-ini Ndióxi̱ xa̱ʼa̱ ku̱a̱chira tíxa̱ʼvi ña̱ ni̱xi̱ʼi̱ ta̱ Jesús xa̱ʼa̱ra, ta xi̱xitoraña nda̱a̱ táki̱ʼva íyo iin regalo. Tasaá, va̱ása níchika̱a̱níra ku̱a̱chi miíra ta iinlá ña̱ xi̱ndi̱ʼi̱-inira xa̱ʼa̱ kúú ña̱ viíní kachíñura nu̱ú Jehová. w20.11 27, 28 párr. 14, 17

Ta̱ Ndi̱va̱ʼa xíniñúʼura inkaka ña̱ʼa ña̱ kivi chindaʼá miíyó ña̱ xa̱a̱yó keʼéyó ña̱ va̱ása va̱ʼa. ¿Ndáaña kéʼéyó tá kúu ña̱yóʼo? Sana kivi ndakanixi̱níyó xa̱ʼa̱ ña̱yóʼo: “Va̱ása tavávína yi̱ʼi̱ ti̱xin congregación, saáchi su̱ví ku̱a̱chi ndeé kúúña”. Soo va̱ása va̱ʼa ña̱ ndakanixi̱níyó saá. Va̱ʼaka ná ndakanixi̱níyó xa̱ʼa̱ ña̱ va̱xi yóʼo: “¿Á ta̱ Ndi̱va̱ʼa kúú ta̱ xíniñúʼu ña̱yóʼo ña̱ va̱ʼa ndataʼvíra níma̱i̱? Tá ná keʼíi̱ ña̱ va̱ása va̱ʼa yóʼo, ¿á ixayaku̱a̱i̱ ki̱vi̱ Jehová? ¿Á sakúyatinka ña̱yóʼo yi̱ʼi̱ nu̱ú Ndióxi̱, á sakúxíkavaña yi̱ʼi̱ nu̱úra?”. Ná ndukúyó ña̱ ndíchi nu̱ú Jehová ña̱ va̱ʼa vií kunda̱a̱-iniyó xa̱ʼa̱ ña̱yóʼo, ta va̱ása sandáʼviyó miíyó. Ta ña̱yóʼo kivi kundaaña miíyó. Ta saátu chindeétáʼanña xíʼinyó ña̱ kǒo keʼéyó ña̱ va̱ása va̱ʼa, tasaá keʼéyó nda̱a̱ táki̱ʼva ke̱ʼé ta̱ Jesús tá ni̱ka̱ʼa̱nra ña̱yóʼo: “Kúáʼan, ta̱ Ndi̱va̱ʼa” (Mat. 4:10). Ná ndakaʼányó chi tá ná ndataʼví níma̱yó va̱ása chindeétáʼanña xíʼinyó. w20.06 12, 13 párr. 16, 17

Miíyó na̱ káchíñu nu̱ú Jehová vitá íyo iniyó ta kándíxayó ña̱ káʼa̱nra, chi kúnda̱a̱-iniyó ña̱ ndiʼi ña̱ káʼa̱nra ña̱ va̱ʼa miíyó kúúña (Efes. 4:22-24). Tá vitá-iniyó saá kúú ña̱ keʼéyó ña̱ kúni̱ Jehová ta su̱víka ña̱ kúni̱ miíyó, ta saátu ndakanixi̱níyó ña̱ ndáyáʼvika inkana nu̱úyó. Ta xa̱ʼa̱ ña̱yóʼo va̱ʼa kítáʼanyó xíʼin Jehová ta saátu xíʼin na̱ hermanoyó (Filip. 2:3). Tá ná va̱ása kiʼinyó kuenta, kivi kixáʼayó ni̱nuní kuniyó ta iinlá xa̱ʼa̱ miíyó kundi̱ʼi̱-iniyó, nda̱a̱ táki̱ʼva kéʼé na̱ ñuyǐví ta̱ Ndi̱va̱ʼa. Sana táʼan ña̱yóʼo kúú ña̱ ndo̱ʼo na̱ hermano na̱ ni̱xi̱yo tá siglo nu̱ú, chi ta̱ apóstol Pablo ta̱xira consejo yóʼo ndaʼa̱ na̱ congregación ña̱ ñuu Roma, ka̱chira: “Káʼi̱n xíʼinndó ña̱ va̱ása ndakanixi̱níndó ña̱ ndáyáʼviníndó, va̱ʼaka vií ndakanixi̱níndó tasaá na̱ʼa̱ndó ña̱ vií íyo ña̱ kéʼéndó”. Nda̱a̱ táki̱ʼva xi̱niyó, ta̱ Pablo ni̱ka̱ʼa̱nra ña̱ xíniñúʼu viíva ndakanixi̱níyó xa̱ʼa̱ miíyó. Soo tá vitá íyo iniyó kiʼinvayó kuenta xíʼin ki̱ʼva ña̱ ndákanixi̱níyó xa̱ʼa̱ miíyó. Ta va̱ása ndakanixi̱níyó ña̱ ndáyáʼviníkayó nu̱ú inkana. w20.07 2 párr. 1, 2

Tá ni̱xi̱yo ta̱ rey Asá, su̱ví ndiʼi tiempo va̱ʼa níxi̱yo na̱ ñuu Judá, saáchi iin millón na̱ soldado ña̱ ñuu Etiopía ni̱xa̱a̱na kanitáʼanna xíʼinna. Ta̱ xi̱niʼi yichi̱ nu̱úna xi̱kuu ta̱ Zérah, ta xi̱ndakanixi̱níra ña̱ kuchiñura sandíʼi-xa̱ʼa̱ra na̱ ñuu Judá. Soo ta̱ Asá xi̱kandíxara Jehová, ña̱kán xa̱kundáʼvira nu̱úra: “Chindeétáʼan xíʼindi̱, Jehová Ndióxi̱ miíndi̱, saáchi kándíxandi̱ yóʼó, xa̱ʼa̱ ki̱vi̱ún kúú ña̱ va̱xindi̱ kanitáʼanndi̱ xíʼin ndiʼi na̱ yiví yóʼo” (2 Crón. 14:11). Ni ku̱a̱ʼáníka ni̱xi̱yo na̱ soldado na̱ ñuu Etiopía nu̱ú na̱ soldado na̱ ñuu Judá, soo ta̱ Asá xi̱kunda̱a̱-inira ña̱ kúúmií Jehová ndee̱ ña̱ chindeétáʼanra xíʼin na̱ ñuura. Tasaá kúú ña̱ ke̱ʼéva Jehová. Chi ku̱chiñuvana xíʼin na̱ soldado na̱ ñuu Etiopía (2 Crón. 14:8-13). Ni va̱ása kúnda̱a̱ káxi iniyó ndáaña kundoʼo iin tá iin na̱ káchíñu nu̱ú Ndióxi̱, soo kúnda̱a̱va-iniyó ña̱ su̱ví ndiʼi tiempo kúú ña̱ va̱ʼa kundooyó. Ná ndakaʼányó chi ta̱ Jesús ni̱ka̱ʼa̱nra ña̱ ki̱vi̱ nu̱ú ndíʼi, “ndiʼi na̱ yiví sa̱a̱-inina kunina” na̱ ndíku̱nñaʼá (Mat. 24:9). w20.09 17, 18 párr. 14-16

Nda̱a̱ ni iinyó va̱ása kútóoyó ña̱ ná ka̱ʼa̱n ndi̱va̱ʼana xíʼinyó. Soo tá ná ndi̱ʼiní-iniyó xa̱ʼa̱ ña̱ káʼa̱nna xíʼinyó, kivi ndakava-iniyó (Prov. 24:10). Tá saá, ¿ndáaña xíniñúʼu keʼéyó? Kivi keʼéyó nda̱a̱ táki̱ʼva ke̱ʼé ta̱ apóstol Pablo ta kusi̱í-iniyó “tá káʼa̱n ndi̱va̱ʼana” xíʼinyó. ¿Nda̱chun? Saáchi tá kéʼéna ña̱yóʼo á tá sásina nu̱úyó ña̱ keʼéyó chiñu Ndióxi̱, náʼa̱ña ña̱ ndixa kúúyó discípulo ta̱ Cristo (1 Ped. 4:14). Ta̱ Jesús ni̱ka̱ʼa̱nra ña̱ ixandi̱va̱ʼana xíʼin na̱ ndíku̱nñaʼá (Juan 15:18-20). Ta ña̱yóʼo kúú ña̱ ku̱u tá siglo nu̱ú. Na̱ xi̱ndakanixi̱ní nda̱a̱ táki̱ʼva xi̱ndakanixi̱ní na̱ griego, xi̱ka̱ʼa̱nna xa̱ʼa̱ na̱ cristiano ña̱ va̱ása xíni̱na ta va̱ása ndáyáʼvina. Ta na̱ judío xi̱ka̱ʼa̱nna xa̱ʼa̱na ña̱ su̱ví na̱ níkaʼvi va̱ʼa kúúna, nda̱a̱ táki̱ʼva ni̱ka̱ʼa̱nna xa̱ʼa̱ ta̱ apóstol Pedro xíʼin ta̱ Juan (Hech. 4:13). Ku̱a̱ʼánína xi̱ndakanixi̱nína ña̱ va̱ása ndáyáʼvi na̱ cristiano xa̱ʼa̱ ña̱ va̱ása níki̱ʼvina xíʼin ña̱ política á xa̱ʼa̱ ña̱ va̱ása níkitáʼanna xíʼin na̱ xi̱xa̱ʼa̱n nu̱ú ku̱a̱chi, ta xa̱ʼa̱ ña̱yóʼo na̱ yiví ku̱ndasína xi̱ninana. Ni xi̱ka̱ʼa̱n na̱ yiví ña̱ va̱ása va̱ʼa xa̱ʼa̱ na̱ cristiano yóʼo, va̱ása nítaxina ña̱ ná kasi ña̱yóʼo nu̱úna. w20.07 15 párr. 3, 4

Ta̱ apóstol Juan xi̱kuʼvi̱ní-inira xi̱xinira na̱ hermano ta xi̱kuni̱ra ña̱ ndakú ná koo ña̱ kándíxana Ndióxi̱. Ta ni̱na̱ʼa̱ra ña̱yóʼo xíʼin consejo ña̱ ta̱xira nu̱ú u̱ni̱ saá carta ña̱ ka̱ʼyíra. Kúsi̱íní-iniyó chi na̱ ku̱ʼu̱n kaʼndachíñu xíʼin ta̱ Cristo chí ndiví, kúʼvi̱-inina xínina miíyó nda̱a̱ táki̱ʼva ni̱xi̱yo ta̱ Juan (1 Juan 2:27). Viíní ná kundiku̱nyó consejo ña̱ ta̱xira. Ná ndakundeéyó kandíxayó ña̱ nda̱a̱, tasaá na̱ʼa̱yó xíʼin ña̱ kéʼéyó ña̱ kándíxayó Jehová. Ná kaʼviyó tu̱ʼunra ta ná kandíxayó ña̱ káʼa̱nña. Ná ndakundeéyó kandíxayó ta̱ Jesús. Ná va̱ása ndakanixi̱níyó nda̱a̱ táki̱ʼva ndákanixi̱ní na̱ ñuyǐví yóʼo, ta ná va̱ása kandíxayó ña̱ káʼa̱n na̱ apóstata. Ná va̱ása ndakanixi̱níyó ña̱ kivi ndasakáʼnuyó Ndióxi̱ ta saátu keʼéyó ña̱ va̱ása va̱ʼa, chi tá ná keʼéyó ña̱yóʼo saá ki̱ʼviyó ku̱a̱chi nu̱úra. Va̱ʼaka ná keʼéyó ña̱ káʼa̱n Jehová xíʼinyó. Ná chindeétáʼanyó xíʼin na̱ hermanoyó ña̱ ndakú koona, ta kivi keʼéyó ña̱yóʼo, tá íxakáʼnu-iniyó xa̱ʼa̱na ta chíndeétáʼanyó xíʼinna. Tasaá, ni nda̱a̱ ndáaka ña̱ ná ya̱ʼayó nu̱ú ndakundeéyó kandíxayó ña̱ nda̱a̱. w20.07 24, 25 párr. 15-17

Kúʼvi̱ní-ini Jehová xínira miíyó xa̱ʼa̱ ña̱ nda̱kú íyo iniyó xíʼinra, ña̱kán táxira iin chiñu ndaʼa̱ iin tá iinyó ti̱xin congregación. Ni xa̱a̱ síín síín íyo chiñu ña̱ kéʼéyó, ndiʼiyó ndáyáʼviníyó ta xíniñúʼu chindeétáʼanyó xíʼin táʼanyó. Ta̱ apóstol Pablo ni̱ka̱ʼa̱nra ña̱ va̱ása kívi kotoyó inka na̱ káchíñu nu̱ú Jehová ta ndakanixi̱níyó “Va̱ása xíniñúʼi̱ yóʼó” (1 Cor. 12:21). Ña̱ vií kutáʼanyó ti̱xin congregación xíniñúʼu kundayáʼvi inkana nu̱úyó ta inkáchi kutáʼanyó kachíñuyó (Efes. 4:16). Tá inkáchi kítáʼanyó, na̱ hermano va̱ʼaní kúnina ta kúnda̱a̱-inina ña̱ kúni̱yó xíniyóna. Espíritu santo Jehová kúú ña̱ nda̱kaxin na̱ anciano, soo iin tá iin na̱yóʼo xa̱a̱ síín íyo ña̱ xíni̱na keʼéna (1 Cor. 12:17). Sava na̱yóʼo sa̱kán loʼo tiempo kúú ña̱ ki̱xáʼana kúúna anciano ta va̱ása xíni̱ va̱ʼana keʼéna chiñu yóʼo, ta inkana va̱ása kívika keʼéna ku̱a̱ʼá chiñu xa̱ʼa̱ ña̱ ku̱chéena á xa̱ʼa̱ ña̱ ndeé ndóʼona. Soo nda̱a̱ ni iin na̱ anciano va̱ása xíniñúʼu kotona inka na̱ anciano, ta ndakanixi̱nína “Va̱ása xíniñúʼi̱ yóʼó”. Chi ña̱ xíniñúʼu keʼéna kúú ña̱ kundiku̱nna consejo ña̱ ta̱xi ta̱ Pablo nu̱ú Romanos 12:10. w20.08 26 párr. 1, 2; 27 párr. 4

Jehová xíniñúʼura na̱ ñuura ña̱ va̱ʼa ka̱ʼa̱nra xíʼinyó ndáaña xíniñúʼu keʼéyó ña̱ va̱ʼa ndakundeéyó ku̱ʼu̱nyó yichi̱ ña̱ taxi ña̱ kutakuyó. Ña̱ nda̱a̱ kúúña, tá káʼa̱n na̱ ñuu Ndióxi̱ xíʼinyó ña̱ nasamayó ña̱ kúnda̱a̱-iniyó xíʼin iin ña̱ va̱xi nu̱ú Biblia á tá káʼa̱nna xíʼinyó ña̱ ná kǒo keʼéyó ña̱ va̱ása va̱ʼa, va̱ása xíka-iniyó ña̱ kandíxayó ña̱yóʼo. Soo, ¿ndáaña ndóʼoyó tá násama na̱ ñuu Ndióxi̱ iin ña̱ʼa ta xa̱ʼa̱ ña̱yóʼo xíniñúʼu nasamayó ku̱a̱ʼá ña̱ kéʼéyó, tá kúú tá íxi̱kóna veʼe nu̱ú ndátakayó? Ña̱ va̱ʼa ndakundeéyó kusi̱í-iniyó xíniñúʼu ndakaʼányó ña̱ nu̱ú Jehová kúú ña̱ káchíñuyó, ta ta̱yóʼo kúú ta̱ níʼi yichi̱ nu̱ú na̱ ñuura (Col. 3:23, 24). Ta va̱ʼaní yichi̱ sa̱ndákoo ta̱ rey David nu̱úyó tá ta̱xira xu̱ʼún ña̱ va̱ʼa ixava̱ʼana templo. Ka̱chira: “¿Ndáa ta̱a kúi̱ ta ndáana kúú na̱ ñui̱, ña̱ va̱ʼa taxindi̱ ña̱ʼa ndaʼún? Saáchi miíún táxi ndiʼi ña̱ʼa ndaʼa̱ndi̱, ta ña̱ táxiún ndaʼa̱ndi̱ kúú ña̱ táxindi̱ ndaʼún” (1 Crón. 29:14). Ta saátu miíyó tá táxiyó donación, ña̱ ta̱xi mií Jehová ndaʼa̱yó kúú ña̱ táxiyó ndaʼa̱ra. Soo ni saá, Jehová táxiníra tíxa̱ʼvi xa̱ʼa̱ ña̱ xíniñúʼuyó tiempoyó, ndee̱yó xíʼin xu̱ʼúnyó ña̱ va̱ʼa keʼéyó chiñu ña̱ kúni̱ra ná keʼéyó (2 Cor. 9:7). w20.11 22, 23 párr. 14-16

Ni ku̱a̱ʼá kúú na̱ yiví na̱ chíndeétáʼanyó xíʼin ña̱ xa̱a̱na koona testigo Jehová á va̱ása, su̱ví ña̱yóʼo kúú ña̱ náʼa̱ á vií kéʼéyó chiñuyó (Luc. 8:11-15). Tá ná ndakundeéyó natúʼunyó xa̱ʼa̱ Ndióxi̱ xíʼin na̱ yiví ta sanáʼa̱yóna, kusi̱í-ini Jehová xíʼin chiñu ña̱ kéʼéyó. ¿Nda̱chun? Saáchi kándíxayó ña̱ káʼa̱nra ta saátu ña̱ káʼa̱n se̱ʼera (Mar. 13:10; Hech. 5:28, 29). Ta saátu miíyó íyo inka xa̱ʼa̱ kúú ña̱ xíniñúʼu ku̱ʼu̱nyó natúʼunyó xíʼin na̱ yiví tiempo vitin: saáchi xa̱a̱ ku̱yatinní ndiʼi-xa̱ʼa̱ ña̱ íyo nu̱ú ñuyǐví yóʼo. Ndáa si̱lóʼo tiempo kíndo̱o ña̱ va̱ʼa keʼéyó chiñu ña̱ sakǎku na̱ yiví. Va̱ása ndakanixi̱níún ña̱ xíniñúʼu koo iin tiempo ña̱ va̱ʼaka ta saáví kixáʼún keʼún chiñu yóʼo. Vitin kúú ña̱ xíniñúʼu kuni̱kayó keʼéyó chiñu yóʼo, ña̱ kuxini̱kayo xa̱ʼa̱ ña̱ káʼa̱n Biblia, ña̱ ndakú koo iniyó ta sakuaʼayó vií keʼéyó chiñu yóʼo. Tá ná ndakutáʼún xíʼin yáʼaka u̱na̱ millón na̱ nándukú na̱ yiví na̱ íyo iníísaá nu̱ú ñuʼú, Jehová taxira ña̱ sákusi̱í-iniún (Neh. 8:10; Luc. 5:10). Xíniñúʼu chika̱a̱-iniún ña̱ ndakundeéún keʼún chiñu yóʼo nda̱a̱ ná ka̱ʼa̱n Jehová ña̱ va̱ása keʼékayóña. w20.09 7 párr. 18-20

Ná va̱ása kuni̱yó kuumiíyó ña̱ ku̱i̱ká chi kivi sandákooyó ña̱ kundi̱ʼi̱-iniyó xa̱ʼa̱ chiñu Ndióxi̱. Ña̱ kuni̱yó kuumiíyó ña̱ ku̱i̱ká kivi sandíʼi-xa̱ʼa̱ña ña̱ kúʼvi̱-iniyó xíniyó Jehová, ta va̱ása kundayáʼvika tu̱ʼunra nu̱úyó ni va̱ása kuni̱kayó natúʼunyó xíʼin na̱ yiví xa̱ʼa̱ ña̱ káʼa̱nña (Mat. 13:22). Xíniñúʼu koo tu̱ʼvayó ña̱ va̱ʼa kundaayó ña̱ ta̱xi Jehová ndaʼa̱yó. Xa̱a̱ ya̱chi̱ka ná ndakanixi̱níyó ndáaña keʼéyó tá xíniñúʼuyó Internet á tá xítonde̱ʼéyó iin película á inkaka ña̱ kána nu̱ú televisión, ta kíxáʼa kána ña̱ vatá ña̱ káʼa̱n na̱ apóstata, na̱ kéʼé ña̱ kini á na̱ kánitáʼan. Tá xa̱a̱ íyo tu̱ʼvayó, kunda̱a̱-iniyó ndáaña keʼéyó ña̱ va̱ʼa kundaayó ña̱ kítáʼanyó xíʼin Jehová ta limpio kooyó nu̱úra (Sal. 101:3; 1 Tim. 4:12). Miíyó na̱ cristiano xíniñúʼu kundaayó ña̱ ndáyáʼviní ta̱xi Jehová ndaʼa̱yó: ña̱yóʼo kúú ña̱ nda̱a̱ ña̱ va̱xi nu̱ú tu̱ʼunra ta saátu ña̱ sánáʼa̱yó inkana. Tá ná keʼéyó ña̱yóʼo, va̱ʼaní koo ña̱ xínitúni̱yó, vií kutakuyó ta kusi̱í-iniyó tá ná chindeétáʼanyó xíʼin inkana ña̱ sakúaʼana xa̱ʼa̱ Jehová. w20.09 30 párr. 16-19

Tá xa̱a̱ nda̱kuchiyó, ña̱yóʼo kúni̱ kachiña ña̱ xa̱a̱ ni̱na̱ʼa̱yó nu̱ú inkana ña̱ kándíxayó Jehová, ta íyo tu̱ʼvayó ña̱ kachíñuyó nu̱úra xíʼin na̱ ñuura. Ki̱ʼva ña̱ níʼi Jehová yichi̱ nu̱ú na̱ ñuura tiempo vitin náʼa̱ña ndáa ki̱ʼva íyora, ña̱ kúni̱ra keʼéra, ta saátu ña̱ kúni̱ra ná keʼéyó. Ná kotoyó u̱ni̱ ña̱ va̱ʼa ña̱ kúúmií Jehová ña̱ náʼa̱ na̱ ñuura. Ña̱ nu̱ú, “va̱ása ndáka̱xin Ndióxi̱ na̱ yiví” (Hech. 10:34). Xa̱ʼa̱ ña̱ kúʼvi̱-ini Jehová xínira miíyó ta̱xira se̱ʼera ña̱ ni̱xi̱ʼi̱ra xa̱ʼa̱yó ña̱ va̱ʼa sakǎkura ndiʼi miíyó (Juan 3:16; 1 Tim. 2:6). Ña̱ va̱ʼa chindeétáʼanra xíʼin na̱ yiví ña̱ ndakiʼinna ña̱ va̱ʼa xa̱ʼa̱ ña̱ ni̱xi̱ʼi̱ ta̱ Jesús, Jehová xíniñúʼura na̱ ñuura ña̱ va̱ʼa natúʼunna xa̱ʼa̱ tu̱ʼun va̱ʼa xíʼin ndiʼi na̱ kúni̱ kuniso̱ʼoña. Ta ña̱ u̱vi̱, Jehová kúúra iin Ndióxi̱ ta̱ viíní kéʼé chiñu, ta kúni̱ra ña̱ táxi̱n koo iniyó (1 Cor. 14:33, 40). Ña̱kán na̱ ñuura xíniñúʼu viíní kachíñuna ta táxi̱n koona. Ta ña̱ u̱ni̱, Jehová kúú ta̱ sánáʼa̱ miíyó (Is. 30:21). Ña̱kán na̱ ñuura sánáʼa̱na xa̱ʼa̱ tu̱ʼunra ti̱xin congregación á tá ku̱a̱ʼa̱nna natúʼunna xíʼin na̱ yiví. w20.10 20 párr. 1-3