Diciembre

Sava yichi̱ kivi ixayo̱ʼvi̱ña xíʼinyó kunda̱a̱-iniyó xíʼin iin ña̱ káʼviyó nu̱ú tu̱ʼun Ndióxi̱. Á sana va̱ása ndákuiin Jehová oración ña̱ kéʼéyó nu̱úra nda̱a̱ táki̱ʼva kúni̱ miíyó. Ta xa̱ʼa̱ ña̱yóʼo kivi kixáʼa kaka-iniyó. Tá va̱ása nándukúyó xa̱ʼa̱ ña̱yóʼo, loʼo tá loʼo va̱ása kandíxakayó Ndióxi̱ ta kivi sandíʼi-xa̱ʼa̱yó ña̱ vií kítáʼanyó xíʼinra (Sant. 1:7, 8). Tasaá sana va̱ása ndakiʼinyó ña̱ káʼa̱n Ndióxi̱ taxira ndaʼa̱yó chí nu̱únínu. Ta̱ apóstol Pablo chi̱táʼanra ña̱ ndátuyó ndakiʼinyó chí nu̱únínu xíʼin iin ka̱a ña̱ tíin tú barco (Heb. 6:19). Saáchi ka̱a yóʼo chíndeétáʼanña xíʼin tú barco tá kúun sa̱ví kini ña̱ va̱ása kanindaanú yu̱u̱. Soo va̱ása kivi chindeétáʼan ka̱a yóʼo xíʼin tú barco tá ná ndiʼi-xa̱ʼa̱ cadena ña̱ tíin xa̱ʼa̱ña. Cadena yóʼo kivi ndiʼi-xa̱ʼa̱ña tá ná ku̱xuña, ta saátu kivi kundoʼo miíyó chi kivi ndiʼi-xa̱ʼa̱ ña̱ kándíxayó Ndióxi̱ tá ná va̱ása nandukúyó xa̱ʼa̱ ña̱ xíka-iniyó xíʼin. Tá xíka iniyó tá yáʼayó nu̱ú tu̱ndóʼo kivi xa̱a̱yó ndakanixi̱níyó ña̱ va̱ása saxínu Jehová ña̱ ni̱ka̱ʼa̱nra. Ta tá va̱ása kándíxayó Ndióxi̱ va̱ása ndakiʼinyó ña̱ ni̱ka̱ʼa̱nra taxira ndaʼa̱yó. Tá ndóʼoyó ña̱yóʼo va̱ása kúsi̱í-iniyó. w21.02 30 párr. 14, 15

Sana yáʼaka 70 ku̱i̱ya̱ xi̱kuumií ta̱ Abrahán tá ki̱tara ñuu Ur xíʼin na̱ veʼera (Gén. 11:31-12:4). Ki̱ʼva 100 ku̱i̱ya̱ ni̱xi̱yora ini veʼe válí ña̱ manta, ta ni̱xi̱kara iníí saá nu̱ú ñuʼú ña̱ Canaán. Ta ni̱xi̱ʼi̱ra tá xi̱kuumiíra 175 ku̱i̱ya̱ (Gén. 25:7). Soo, va̱ása níxini nu̱úra ña̱ saxínu Jehová ña̱ ki̱ndoora xíʼinra, ña̱ taxira ñuʼú nu̱ú ni̱xi̱kara ndaʼa̱ na̱ se̱ʼera. Ta saátu va̱ása níxinira ñuu ña̱ xi̱ndatura ndakiʼinra ña̱ kúú Reino Ndióxi̱. Soo ni saá, nu̱ú Biblia káʼa̱nña xa̱ʼa̱ra ña̱ va̱ʼaní ni̱xi̱yo ña̱ xi̱takura (Gén. 25:8). Ni ni̱ya̱ʼara nu̱ú ku̱a̱ʼání tu̱ndóʼo ndakú ni̱xi̱yo ña̱ xi̱kandíxara Ndióxi̱, ta chi̱ka̱a̱-inira ña̱ kundatura saxínu Jehová ña̱ ki̱ndoora xíʼinra. ¿Nda̱chun ku̱chiñura ku̱ndeé-inira? Saáchi ndiʼi tiempo ña̱ xi̱takura, Jehová kúú ta̱ ki̱ʼin kuenta xíʼinra ta va̱ʼaní xi̱táʼanra xíʼinra (Gén. 15:1; Is. 41:8; Sant. 2:22). Nda̱a̱ táki̱ʼva ke̱ʼé ta̱ Abrahán, saátu miíyó ndátuyó ndakiʼinyó ñuu ña̱ va̱ʼaní na̱kuva̱ʼa (Heb. 11:10). Ña̱ nda̱a̱ kúúña va̱ása ndátuyó ña̱ ná ixandúvi Ndióxi̱ ña̱yóʼo, chi ña̱ Reino yóʼo xa̱a̱ ki̱xáʼa íyoña tá ku̱i̱ya̱ 1914 ta xa̱a̱ xáʼndachíñuña chí ndiví (Apoc. 12:7-10). Soo ndátuyó ña̱ ná kixáʼaña kaʼndachíñuña iníísaá nu̱ú ñuʼú. w20.08 4 párr. 11, 12

Ña̱ viíní kuniso̱ʼoyó ña̱ káʼa̱n inkana, xíniñúʼu vitá ta kúee koo iniyó. Ndáyáʼviní keʼéyó ña̱yóʼo xa̱ʼa̱ u̱ni̱ ña̱ʼa. Ña̱ nu̱ú, chi saá va̱ása ka̱ʼa̱nyó ña̱ va̱ása va̱ʼa xa̱ʼa̱ inkana. Ña̱ u̱vi̱, va̱ʼa kunda̱a̱-iniyó ndáaña ndóʼo na̱ hermanoyó ta nda̱chun kéʼéna sava ña̱ʼa. Ña̱yóʼo kivi chindeétáʼanña xíʼinyó ña̱ kundáʼvi-iniyó kuniyóna. Ta ña̱ u̱ni̱, saá kúú ña̱ kivi chindeétáʼanyó xíʼinna ña̱ kunda̱a̱-inina sava ña̱ʼa xa̱ʼa̱ miína. Sava yichi̱, va̱ása kúnda̱a̱ va̱ʼa inina xíʼin ña̱ ndóʼona, ta nda̱a̱ tá nátúʼunnaña xíʼin inkana saá kúú ña̱ kúnda̱a̱-inina. Sava na̱ hermano íxayo̱ʼvi̱ña xíʼinna ña̱ ka̱ʼa̱nna xa̱ʼa̱ ña̱ ndóʼona, xa̱ʼa̱ ki̱ʼva ña̱ xa̱ʼnuna á xa̱ʼa̱ ki̱ʼva ña̱ íyona. Sana na̱ hermanoyó xíniñúʼuna ku̱a̱ʼá tiempo ña̱ kuxini̱na miíyó, ta saáví natúʼunna xíʼinyó xa̱ʼa̱ ña̱ ndóʼona. Soo tá kúee íyo iniyó nda̱a̱ táki̱ʼva íyo Jehová, na̱ hermanoyó kivi xa̱a̱na kandíxana miíyó ta natúʼunna xíʼinyó xa̱ʼa̱ ña̱ ndóʼona. Tá ná keʼéna ña̱yóʼo viíní ná kuniso̱ʼoyóna. w20.04 15, 16 párr. 6, 7

Tí ti̱a̱ká kútóorí koorí nu̱ú íyo ku̱a̱ʼá ña̱ kaxírí xíʼin nu̱ú va̱ʼaní ti̱kui̱í. ¿Á nda̱a̱ ndáaka hora kivi ku̱ʼu̱nna tiinna ti̱a̱ká? Ná kotoyó ña̱ ni̱ka̱ʼa̱n iin ta̱ hermano ta̱ íyo nu̱ú iin isla ña̱ íyo chí Pacífico xíʼin iin ta̱ misionero. Ta̱ hermano yóʼo ni̱ka̱ʼa̱nra xíʼin ta̱ misionero ña̱ ná ku̱ʼu̱nra xíʼinra ña̱ tiinna ti̱a̱ká, ta ta̱ misionero nda̱kuiinra: “Ndakutáʼanyó ka̱a̱ i̱i̱n xi̱ta̱an”. Soo ta̱ hermano yóʼo ni̱ka̱ʼa̱nra xíʼinra: “Su̱ví saá íyoña. Xíniñúʼu ku̱ʼu̱nyó hora ña̱ kivi ndani̱ʼíyó ti̱a̱ká, su̱ví hora ña̱ kúni̱ miíyó”. Ki̱ʼva saá íyo ña̱ ke̱ʼé na̱ xi̱nandukú na̱ yiví tá siglo nu̱ú, chi xi̱xa̱ʼa̱nna xi̱nandukúna na̱ yiví hora xíʼin nu̱ú kivi ndani̱ʼínana. Tá kúú, na̱ discípulo ta̱ Jesús xi̱natúʼunna chí templo, chí sinagoga, veʼe tá veʼe xíʼin nu̱ú ya̱ʼvi (Hech. 5:42; 17:17; 18:4). Ta saátu miíyó xíniñúʼu kuxini̱yó costumbre ña̱ kúúmií na̱ yiví na̱ íyo nu̱ú nátúʼunyó. Xíniñúʼu nasamayó ña̱ kéʼéyó ña̱ va̱ʼa ku̱ʼu̱nyó nandukúyóna nu̱ú kivi ndani̱ʼíyóna xíʼin hora ña̱ kivi ndani̱ʼíyóna (1 Cor. 9:19-23). w20.09 4 párr. 8, 9

Iin ki̱ʼva ña̱ xa̱a̱yó vií kutáʼanyó xíʼin ta̱ Jesús kúú ña̱ kundiku̱nyó ña̱ ndáka̱xin na̱ congregación keʼéna. Ña̱ kítáʼanyó xíʼin ta̱ Jesús ta̱ níʼi yichi̱ nu̱ú na̱ congregación, ndúndakúkaña tá chíndeétáʼanyó xíʼin na̱ hermano na̱ nda̱kaxinra ña̱ kundaana miíyó (Efes. 4:16). Tá kúú, na̱ ñuu Ndióxi̱ kúni̱na ña̱ viíní ná kuniñúʼuyó veʼe nu̱ú ndátakayó. Ña̱kán, nda̱kutáʼan sava congregación. Xa̱ʼa̱ ña̱yóʼo, loʼo xu̱ʼún xíniñúʼu na̱ ñuu Ndióxi̱. Xa̱ʼa̱ ña̱ na̱sama ndiʼi ña̱yóʼo, sava na̱ publicador xi̱niñúʼu kandíxana keʼéna ña̱yóʼo. Sana na̱ hermano yóʼo ku̱a̱ʼání ku̱i̱ya̱ xi̱ñuʼuna ti̱xin iin congregación ta va̱ʼaní xi̱kitáʼanna xíʼin ndiʼi na̱ hermano. Soo, ni̱ka̱ʼa̱nna xíʼinna ña̱ ná ku̱ʼu̱nna inka congregación. Kúsi̱íní-ini ta̱ Jesús tá xítora ña̱ va̱ʼaní ndíku̱n na̱ hermano yóʼo ña̱ ndáka̱xin na̱ congregación keʼéna. w20.04 24 párr. 14

Ta̱ rey ña̱ norte xíʼin ta̱ rey ña̱ sur ndákundeéna kánitáʼanna xa̱ʼa̱ ña̱ kúni̱na kaʼndachíñuna nu̱ú na̱ ñuyǐví. Tá kúú, ná ndakanixi̱níyó xa̱ʼa̱ ña̱ ku̱u tá ndi̱ʼi ña̱ Segunda Guerra Mundial, tá ki̱xáʼa xáʼndachíñu na̱ Unión Soviética xíʼin na̱ xi̱kitáʼan xíʼinna nu̱ú ku̱a̱ʼání ñuu ña̱ íyo chí Europa. Xa̱ʼa̱ ña̱yóʼo, ta̱ rey ña̱ sur sa̱ndáku̱táʼanra na̱ soldadora xíʼin na̱ inka ñuu ña̱ va̱ʼa kanitáʼanra xíʼin ta̱ rey ña̱ norte, ta na̱yóʼo ni̱xa̱a̱na nda̱kunanína Organización del Tratado del Atlántico Norte. Xa̱ʼa̱ ña̱yóʼo, u̱vi̱ saá na̱ rey yóʼo ku̱a̱ʼání xu̱ʼún xíniñúʼuna, chi kúni̱na kuumiína ku̱a̱ʼáka ña̱ʼa ña̱ kuniñúʼuna ña̱ kanitáʼanna. Ta kánitáʼan xíʼin táʼan miína tá chíndeétáʼanna xíʼin ñuu nu̱ú íyo guerra, tá kúú chí África, Asia xíʼin América Latina. Ta tiempo vitin na̱ Rusia xíʼin na̱ kítáʼan xíʼinna xa̱a̱ ndu̱ndakúnína. Ta saátu xíniñúʼuna computadora á Internet ña̱ keʼéna ña̱ va̱ása va̱ʼa xíʼin ta̱ rey ña̱ sur. U̱vi̱ saá na̱ rey yóʼo chíka̱a̱na ku̱a̱chi táʼanna ña̱ xíniñúʼuna computadora á Internet ña̱ va̱ʼa sándiʼi-xa̱ʼa̱na xu̱ʼúnna á ña̱ chíñuna. Ta nda̱a̱ táki̱ʼva ni̱ka̱ʼa̱n profecía ta̱ Daniel, ta̱ rey ña̱ norte ndákundeéra íxandi̱va̱ʼara xíʼin na̱ ñuu Ndióxi̱ (Dan. 11:41). w20.05 13 párr. 5, 6

Tá tiempo ña̱ ni̱xi̱yo ta̱ profeta Isaías, Jehová ni̱ka̱ʼa̱nra ña̱yóʼo xíʼin na̱ ñuura: “¿Á kivi nandósó iin ñá ñaʼá xa̱ʼa̱ se̱ʼe loʼoñá [...]? Ni ná nandósó ná ñaʼá yóʼo xa̱ʼa̱ se̱ʼená, soo yi̱ʼi̱ va̱ása nandósó-inii̱ xa̱ʼún” (Is. 49:15). Va̱ása ku̱a̱ʼá yichi̱ chítáʼan Jehová miíra xíʼin iin ñaʼá ñá íyo se̱ʼe, soo ke̱ʼévaraña. Xi̱niñúʼura ña̱ va̱ʼaní kítáʼan iin ñá ñaʼá xíʼin se̱ʼe loʼoñá, ña̱ va̱ʼa ka̱ʼa̱nra xa̱ʼa̱ ña̱ kúʼvi̱ní-inira xínira na̱ káchíñu nu̱úra. Ku̱a̱ʼání ná ñaʼá ná íyo se̱ʼe ndóʼoná nda̱a̱ táki̱ʼva ni̱ka̱ʼa̱n iin ñá hermana ñá naní Jasmín: “Tá sáchichíún se̱ʼe loʼún, va̱ʼaníka xáún kítaʼún xíʼin se̱ʼún ta ña̱yóʼo ndiʼi tiempo íyoña”. Jehová kíʼinra kuenta tá sándakoo iin se̱ʼera ña̱ ku̱ʼu̱nna natúʼunna xa̱ʼa̱ra á ña̱ ku̱ʼu̱nna reunión. Ku̱a̱ʼání na̱ hermano yóʼo ndándikóna ti̱xin congregación ta kúsi̱íní-iniyó ndákiʼinyóna. Jehová kúni̱níra ña̱ ná ndikóna nu̱úra, ta saátu miíyó kúni̱yó ná ndikóna (1 Ped. 2:25). w20.06 18 párr. 1-3

¿Á íyo ña̱ ku̱i̱ká ña̱ va̱ása kívi kuniyó? Íyovaña, chi ña̱ ku̱i̱ká ña̱ va̱ása kívi kuniyó kúú ña̱ ndáyáʼviníka. Tá ni̱ka̱ʼa̱n ta̱ Jesús nu̱ú iin yuku̱, ni̱ka̱ʼa̱nra xa̱ʼa̱ ña̱ ku̱i̱ká ña̱ íyo chí ndiví ña̱ ndáyáʼviníka nu̱ú ña̱ ku̱i̱ká ña̱ íyo nu̱ú ñuyǐví yóʼo. Ta ka̱chira: “Nu̱ú táxiva̱ʼún ña̱ ku̱i̱ká ña̱ kúúmiíún, kán koo níma̱ún” (Mat. 6:19-21). Níma̱yó chindaʼáña miíyó ña̱ nandukúyó ña̱ʼa ña̱ íyo nda̱a̱ táki̱ʼva íyo ña̱ ku̱i̱ká á ña̱ ndáyáʼviní nu̱úyó. Táxiva̱ʼayó ña̱ ku̱i̱ká chí ndiví tá vií íyo ña̱ kéʼéyó nu̱ú Ndióxi̱ ta kúsi̱í-inira xíʼinña. Nda̱a̱ táki̱ʼva ni̱ka̱ʼa̱n ta̱ Jesús, nda̱a̱ ni iinna va̱ása kivi sandíʼi-xa̱ʼa̱ ña̱ ku̱i̱ká yóʼo á ixakuíʼnánaña. Ta̱ apóstol Pablo chíka̱a̱ra ndee̱ xíʼinyó ña̱ ná koto “káxiyó nu̱ú ña̱ʼa ña̱ va̱ása kívi kuniyó” (2 Cor. 4:17, 18). Táʼan ña̱ʼa ña̱ va̱ása kívi kuniyó kúú bendición ña̱ ndakiʼinyó nu̱ú ñuyǐví xa̱á ña̱ ni̱ka̱ʼa̱n Ndióxi̱ taxira ndaʼa̱yó. ¿Á náʼa̱yó ña̱ táxiyó tíxa̱ʼvi xa̱ʼa̱ ña̱yóʼo? w20.05 26 párr. 1, 2

Ña̱ sa̱náʼa̱ ta̱ Moisés na̱ ñuu Israel sa̱ndíkoña-inina ta nda̱sandakúña-inina, nda̱a̱ táki̱ʼva kéʼé sa̱vi̱ tá kúun yáárá sa̱tá ku̱ʼu̱. Ta ña̱ sánáʼa̱ miíyó na̱ yiví, ¿á chíndeétáʼanña xíʼinna? Tá ku̱a̱ʼa̱nyó natúʼunyó veʼe tá veʼe á nu̱ú íyo ku̱a̱ʼá na̱ yiví, ná kuniñúʼuyó Biblia ña̱ sanáʼa̱yóna xa̱ʼa̱ ki̱vi̱ Ndióxi̱. Ta kivi kuniñúʼuyó ndiʼi ña̱ ndásakáʼnu ki̱vi̱ra tá kúú, kivi taxiyó tutu ña̱ kúúmiíyó ndaʼa̱na, na̱ʼa̱yó video nu̱úna ta ka̱ʼa̱nyó xíʼinna ná ki̱ʼvina nu̱ú sitio ña̱ kúúmiíyó nu̱ú Internet. Tá ndíka̱a̱yó nu̱ú káchíñuyó, escuela á tá ku̱a̱ʼa̱nyó inka ñuu, ná ndukúyó ki̱ʼva ña̱ sanáʼa̱yó na̱ yiví xa̱ʼa̱ Ndióxi̱ xíʼin xa̱ʼa̱ ki̱ʼva ña̱ íyora. Ná ka̱ʼa̱nyó xa̱ʼa̱ ña̱ kúni̱ra taxira ndaʼa̱yó ta saátu xa̱ʼa̱ ña̱ kúni̱ra keʼéra xíʼin ñuʼú yóʼo. Tá ná kuniso̱ʼo na̱ yiví ña̱yóʼo, sana ña̱ nu̱ú yichi̱ kúú ña̱ kiʼinna kuenta ña̱ kúʼvi̱níva-ini Jehová xínira miíyó. Tá sánáʼa̱yó ña̱ nda̱a̱ xa̱ʼa̱ yiváyó, chíndeétáʼanyó xíʼinra ña̱ nduyi̱i̱ ki̱vi̱ra ta saátu náʼa̱yó ña̱ vatá kúú ña̱ sánáʼa̱ inkana xa̱ʼa̱ra. Ña̱ sánáʼa̱yó na̱ yiví xa̱ʼa̱ Biblia kúú ña̱ va̱ʼaní sándi̱ko-inina (Is. 65:13, 14). w20.06 10 párr. 8, 9

¿Ndáaña va̱ʼa kúú ña̱ xíniñúʼu kuumiíyó ña̱ va̱ʼa chindeétáʼanyó xíʼin na̱ kúni̱ ndandikó nu̱ú Jehová? Ná kotoyó ndáaña kivi sakuaʼayó xíʼin parábola ña̱ káʼa̱n xa̱ʼa̱ ta̱ loʼo ta̱ nda̱ñúʼu (Luc. 15:17-24). Ta̱ loʼo yóʼo chi̱ka̱a̱-inira ña̱ ndikóra veʼera. Ta yivára xínura ni̱xa̱a̱ra nu̱úra ta nu̱mira ta̱yóʼo, tasaá ni̱na̱ʼa̱ra ña̱ kúʼvi̱ka-inira xínirara. Ta ta̱ loʼo yóʼo va̱ása va̱ʼa kúnira xa̱ʼa̱ ña̱ ke̱ʼéra, ta túvira ña̱ va̱ása xíniñúʼuka ka̱ʼa̱n yivára xíʼinra ña̱ kúúra se̱ʼera. Yivára ku̱ndáʼviní-inira xi̱nira ta̱yóʼo tá na̱túʼunra xíʼinra ña̱ ndándikó-inira xa̱ʼa̱ ña̱ ke̱ʼéra. Ña̱kán ke̱ʼéra iin vikó, ta ni̱ka̱ʼa̱nra xíʼin na̱ káchíñu nu̱úra ña̱ ná taxina iin ti̱ko̱to̱ míí ña̱ va̱ʼaka kundixi ta̱ loʼo se̱ʼera. Jehová íyora nda̱a̱ táki̱ʼva íyo ta̱ yivá ta̱ káʼa̱n ña̱ parábola yóʼo xa̱ʼa̱. Kúʼvi̱ní-inira xínira na̱ hermano na̱ ku̱xíka nu̱úra, ta kúni̱ra ná ndikóna nu̱úra. Tá ná keʼéyó nda̱a̱ táki̱ʼva kéʼéra, kivi chindeétáʼanyó xíʼin na̱ ku̱xíka nu̱úra ña̱ ndandikóna. Xa̱ʼa̱ ña̱yóʼo xíniñúʼu kúee koo iniyó xíʼinna, na̱ʼa̱yó ña̱ kúnda̱a̱-iniyó xíʼin ña̱ ndóʼona ta kuʼvi̱-iniyó kuniyóna. w20.06 25, 26 párr. 8, 9

Ta̱ Jesús ni̱ka̱ʼa̱nra ña̱ “xíʼin ña̱ si̱í-ini” kixáʼa sava na̱ yiví sakúaʼana xa̱ʼa̱ ña̱ nda̱a̱, soo tá ná kixi tu̱ndóʼo nu̱úna sandákoona ña̱ kandíxana Ndióxi̱ (Mat. 13:3-6, 20, 21). Sana va̱ása kúnda̱a̱-inina ña̱ koo tu̱ndóʼo nu̱úna tá ná kundiku̱nna ta̱ Jesús (Mat. 16:24). Á sanatu ndákanixi̱nína ña̱ nda̱a̱ ni iin yichi̱ va̱ása koo tu̱ndóʼo nu̱úna saáchi Ndióxi̱ sakútaʼaraña nu̱úna. Soo xa̱ʼa̱ ña̱ kininí káa ñuyǐví yóʼo, ndiʼivayó íyo tu̱ndóʼo nu̱ú, ta va̱ása kívi kasiyóña. Ña̱ ndóʼoyó kivi nasa̱maña, ta xa̱ʼa̱ ña̱yóʼo va̱ása kusi̱íka-iniyó (Sal. 6:6; Ecl. 9:11). Ku̱a̱ʼání na̱ káchíñu nu̱ú Jehová náʼa̱na ña̱ kándíxana ña̱ nda̱a̱. ¿Nda̱chun va̱ʼa xíni̱yó ña̱yóʼo? Saáchi tá kéʼé iin na̱ hermano ña̱ va̱ása va̱ʼa á tá sáxo̱ʼvi̱na-inina va̱ása sándakoona ña̱ kandíxana Ndióxi̱ (Sal. 119:165). Ña̱kán, tá yáʼana nu̱ú tu̱ndóʼo ndúndakúka ña̱ kándíxana Ndióxi̱, ta su̱ví ña̱ ndúvitá kúúña (Sant. 1:2-4). Xíniñúʼu ndakú koo ña̱ kándíxayó Ndióxi̱ nda̱a̱ táki̱ʼva kéʼé na̱yóʼo. w20.07 8 párr. 1; 9 párr. 4, 5

Tá kúma̱níka kixáʼayó kaʼviyó Biblia, ná ka̱ʼa̱nyó xíʼin Jehová ña̱ chindeétáʼanra xíʼinyó ña̱ ndakiʼinyó ña̱ va̱ʼa xa̱ʼa̱ ña̱ káʼviyó. Tá kúú, tá nándukúyó iin consejo ña̱ kivi chindeétáʼan xíʼinyó ña̱ ndasaviíyó iin tu̱ndóʼo, ná ka̱ʼa̱nyó xíʼinra ña̱ chindeétáʼanra xíʼinyó ndani̱ʼíyó ña̱yóʼo nu̱ú tu̱ʼunra (Filip. 4:6, 7). Ña̱ ndakanixi̱níyó iin regalo ña̱ va̱ʼaní ta̱xi Jehová ndaʼa̱yó kúúña. Ta ña̱ va̱ʼa kunda̱a̱-iniyó xíʼin ña̱ káʼviyó, ná ndakanixi̱níyó xa̱ʼa̱ ña̱ kúu, ta ná ndakanixi̱níyó ña̱ miíyó kúú na̱ yiví na̱ káʼviyó xa̱ʼa̱. Ná kotoyó ña̱ʼa ña̱ xi̱nina, ta ná ndoʼoyó nda̱a̱ táki̱ʼva ndo̱ʼona á na̱ ni̱kusi̱í-ini kúúna á na̱ ku̱suchí-ini kúúna á íyo inkaka ña̱ ndo̱ʼona. Tándi̱ʼi ná ndakanixi̱níyó xa̱ʼa̱ ña̱ káʼviyó. Ña̱yóʼo kúni̱ kachiña viíní ndakanixi̱níyó xa̱ʼa̱ ña̱ káʼviyó, ta ndáaña kivi sakúaʼayó xíʼin ña̱yóʼo. Ña̱yóʼo chindeétáʼanña xíʼinyó ña̱ kunda̱a̱-iniyó ndáa ki̱ʼva kítáʼan ña̱ káʼa̱n tu̱ʼun Ndióxi̱, tasaá káxiní kunda̱a̱-iniyó xíʼinña. Tá ná kaʼviyó Biblia ta va̱ása ndakanixi̱níyó xa̱ʼa̱ña, íyoña nda̱a̱ táki̱ʼva íyo ña̱ kotoyó iin rompecabeza ña̱ ni̱tani̱ ndóo nu̱ú mesa, ta va̱ása ndáchi̱táʼanyóña. Tá ná ndakanixi̱níyó saá kúú ña̱ va̱ʼaní kunda̱a̱-iniyó xa̱ʼa̱ ña̱ káʼviyó. w21.03 15 párr. 3-5

Tá ná ndakaniníxi̱ní ta̱ apóstol Pablo xa̱ʼa̱ ña̱ sa̱ndákoora tá ya̱chi̱, kivi xa̱a̱ra ndakanixi̱níra ña̱ va̱ása kundika̱a̱víra veʼeka̱a tá inkaña ní ndaka̱xinra keʼéra. Ta saátu kivi sa̱a̱ra xíʼin na̱ ta̱a na̱ ke̱e chí Asia xa̱ʼa̱ ña̱ sa̱ndákoonara, ta va̱ása kundaaka-inira na̱ migora. Soo kǒo níkeʼéra nda̱a̱ ni iin ña̱yóʼo. Ni xi̱kunda̱a̱-inira ña̱ si̱lóʼo tiempo kúma̱ní ta kuvira, va̱ása nínandósó-inira ña̱ ndáyáʼviníka kúú ña̱ ndasakáʼnura Jehová. Ta nda̱kundeéra ndu̱kúra ki̱ʼva ña̱ chika̱a̱ra ndee̱ xíʼin inkana ta saátu ni̱ka̱ʼa̱nníra xíʼin Jehová. Va̱ása níndi̱ʼi̱ní-inira xa̱ʼa̱ ña̱ sa̱ndákoo savanara, nu̱úka ña̱ keʼéra ña̱yóʼo nda̱kundeéra ta̱xira tíxa̱ʼvi ndaʼa̱ na̱ migora xa̱ʼa̱ ña̱ chi̱ndeétáʼanna xíʼinra, ta ni̱kuʼvi̱-inina xi̱ninara. Ta saátu nda̱kundeéra ka̱ʼvira tu̱ʼun Ndióxi̱ (2 Tim. 3:16, 17; 4:13). Ta inka ña̱ ndáyáʼviní ke̱ʼéra kúú ña̱ va̱ása nínandósó-inira ña̱ kúʼvi̱ní-ini Jehová xíʼin ta̱ Jesús xíninara. w21.03 18 párr. 17, 18

Tá siglo u̱vi̱ ña̱ tiempo vitin, ku̱a̱ʼání na̱ xi̱ka̱ʼa̱n ña̱ xi̱kuuna cristiano, ni̱ki̱ʼvina ti̱xin ñuu Ndióxi̱ ta xi̱sanáʼa̱na ña̱ vatá, ta va̱ása níxika̱ʼa̱nna xa̱ʼa̱ ña̱ nda̱a̱ ña̱ va̱xi nu̱ú Biblia. Xa̱ʼa̱ ña̱yóʼo nda̱a̱ tá siglo xa̱ʼu̱n ku̱mí, va̱ása níxi̱yo iin tiʼvi na̱ xi̱ndasakáʼnu Ndióxi̱ nu̱ú ñuʼú yóʼo. Ta na̱ xi̱ka̱ʼa̱n ña̱ xi̱kuuna cristiano xa̱ʼnuna nda̱a̱ táki̱ʼva íyo ku̱ʼu̱ ña̱ va̱ása va̱ʼa, xa̱ʼa̱ ña̱yóʼo va̱ása níkunda̱a̱ka-inina ndáana kúú na̱ cristiano na̱ nda̱a̱ (Mat. 13:36-43). ¿Nda̱chun ndáyáʼviní kunda̱a̱-iniyó xa̱ʼa̱ ña̱yóʼo? Saáchi ña̱ káʼa̱n Daniel capítulo 11 náʼa̱ña ña̱ na̱ chíñu na̱ ni̱xi̱yo tá siglo u̱vi̱ nda̱a̱ tá siglo xa̱ʼu̱n ku̱mí, va̱ása níxi̱yona ta̱ rey ña̱ norte xíʼin ta̱ rey ña̱ sur. Chi tá tiempo saá, va̱ása níxi̱yo iin tiʼvi na̱ xi̱ndasakáʼnu Ndióxi̱ na̱ kivi ixandi̱va̱ʼana xíʼin. Soo tá xa̱a̱ kúni̱ ndiʼi ña̱ siglo xa̱ʼu̱n ku̱mí ki̱xáʼa íyo ta̱ rey ña̱ norte xíʼin ta̱ rey ña̱ sur. w20.05 3 párr. 5

Ta̱ Joel ni̱ka̱ʼa̱nra ña̱ ku̱a̱ʼání tí ti̱ka náʼnu sandiʼi-xa̱ʼa̱rí ña̱ ñuu Israel ta kaxírí ndiʼi ña̱ ndani̱ʼírí (Joel 1:4). Xa̱a̱ ku̱a̱ʼání ku̱i̱ya̱, xi̱kunda̱a̱-iniyó ña̱ káʼa̱n ña̱ profecía yóʼo xa̱ʼa̱ na̱ ñuu Jehová na̱ chíka̱a̱ní ndee̱ ña̱ nátúʼunna xa̱ʼa̱ra xíʼin na̱ yiví, ta nda̱a̱ ni iinna va̱ása kívi kasi nu̱úna nda̱a̱ táki̱ʼva íyo tí ti̱ka náʼnu. Xi̱ndakanixi̱níyó ña̱ chiñu yóʼo sándiʼi-xa̱ʼa̱ña ndiʼi ña̱ kéʼé na̱ yiví na̱ ndíku̱n ña̱ veʼe-ñu̱ʼu vatá. Soo tá káʼviyó ndiʼika ña̱ káʼa̱n xa̱ʼa̱ ña̱yóʼo, kíʼinyó kuenta ña̱ xíniñúʼu nasamayó ki̱ʼva ña̱ kúnda̱a̱-iniyó xíʼin ña̱ profecía yóʼo. Ná kotoyó ndáaña káʼa̱n Jehová keʼéra nu̱ú Joel 2:20: “Ta na̱ va̱xi chí norte [á ku̱a̱ʼání tí ti̱ka náʼnu] xíkaní chindaʼíi̱na nu̱úndó”. Tá tí ti̱ka náʼnu yóʼo kúú na̱ testigo Jehová na̱ xíka nátúʼun xa̱ʼa̱ra xíʼin na̱ yiví, ta chíndeétáʼanna xíʼinna ña̱ xa̱a̱na koona discípulo nda̱a̱ táki̱ʼva ni̱ka̱ʼa̱n ta̱ Jesús, ¿nda̱chun xíkaní chindaʼá Jehová na̱yóʼo? (Ezeq. 33:7-9; Mat. 28:19, 20). Ndióxi̱ va̱ása xíka chíndaʼára na̱ nda̱kú íyo ini káchíñu nu̱úra, chi na̱ kéʼéra ña̱yóʼo xíʼin kúú na̱ kúni̱ keʼé ña̱ va̱ása va̱ʼa xíʼinna. w20.04 2, 3 párr. 3-5

¿Ndáaña keʼéyó tá túviyó ña̱ va̱ása kama ndákuiin Jehová oración ña̱ kéʼéyó nu̱úra? Ta̱ Santiago ni̱ka̱ʼa̱nra ña̱ ná ndakundeéyó ka̱ʼa̱nyó xíʼin Ndióxi̱. Jehová va̱ása sáa̱ra xíʼinyó tá tuku ta tuku káʼa̱nyó xíʼinra ña̱ ná taxira ña̱ ndíchi ndaʼa̱yó, ña̱ va̱ʼa kundeé-iniyó nu̱ú tu̱ndóʼo. Nu̱úka ña̱ sa̱a̱ra, taxivara ña̱ ndíchi ndaʼa̱yó (Sal. 25:12, 13). Jehová kúnda̱a̱-inira ndáa tu̱ndóʼo kúú ña̱ yáʼayó nu̱ú, kúndáʼvi-inira xínira miíyó ta kúni̱ra chindeétáʼanra xíʼinyó. ¿Á su̱ví ña̱ nda̱a̱ kúú ña̱ sákusi̱íní ña̱yóʼo iniyó? Soo, ¿ndáa ki̱ʼva táxi Jehová ña̱ ndíchi ndaʼa̱yó? Jehová xíniñúʼura tu̱ʼunra ña̱ va̱ʼa taxira ña̱ ndíchi ndaʼa̱yó (Prov. 2:6). Ña̱ va̱ʼa kuumiíyó ña̱ ndíchi xíniñúʼu kaʼviyó tu̱ʼun Ndióxi̱, ta saátu tutu ña̱ ka̱na nu̱ú ña̱yóʼo. Soo va̱ása xíniñúʼu kaʼvi kuitíyóña. Saáchi xíniñúʼu kundiku̱nyó consejo ña̱ táxi Jehová ndaʼa̱yó. Ta̱ Santiago ni̱ka̱ʼa̱nra: “Keʼéndó ña̱ káʼa̱n tu̱ʼun Ndióxi̱ ta va̱ása kuniso̱ʼo kuitíndóña” (Sant. 1:22). Tá kéʼéyó ña̱ káʼa̱n Ndióxi̱ xíʼinyó va̱ása kanitáʼanyó xíʼin inkana, vií ndakanixi̱níyó ta kundáʼvi-iniyó kuniyóna (Sant. 3:17). Tá kúúmiíyó ña̱ va̱ʼa yóʼo, chindeétáʼanña xíʼinyó ña̱ ya̱ʼayó nu̱ú nda̱a̱ ndáaka tu̱ndóʼo, ta ndakundeéyó kusi̱í-iniyó. w21.02 29 párr. 10, 11

Sana va̱ʼaníka xa̱a̱ na̱ káʼviyó xíʼin kuaʼnuna xíʼin tu̱ʼun Ndióxi̱ ta ndakuchina tá ná chindeétáʼan na̱ congregación xíʼinna. Ndiʼi na̱ publicador kivi chika̱a̱na ndee̱ ña̱ va̱ʼa kuaʼnuka ña̱ congregación. Iin ñá precursora káchiñá: “Na̱ yiví káʼa̱nna ña̱ iníísaá na̱ ñuu kúú na̱ kivi chindeétáʼan xíʼin iin na̱ va̱lí ña̱ va̱ʼa kuaʼnuna. Ta ki̱ʼva saátu íyo ña̱ kéʼéyó tá chíndeétáʼanyó xíʼin na̱ yiví ña̱ va̱ʼa xa̱a̱na koona discípulo ta̱ Cristo: iníísaá na̱ congregación kúú na̱ kivi chindeétáʼan xíʼin iin na̱ yiví ña̱ va̱ʼa xa̱a̱na ndakuchina”. Ña̱ va̱ʼa kuaʼnu iin na̱ va̱lí, xíniñúʼu chindeétáʼan na̱ veʼena xíʼinna, na̱ migona ta saátu na̱ maestrona, saáchi ndiʼi na̱yóʼo kivi chika̱a̱na ndee̱ xíʼinna ta sanáʼa̱nana xa̱ʼa̱ ña̱ʼa ña̱ ndáyáʼviní. Ta ki̱ʼva saá kivi chindeétáʼan iin na̱ publicador xíʼin na̱ sa̱kán sákuaʼa xa̱ʼa̱ Ndióxi̱ ña̱ va̱ʼa xa̱a̱na ndakuchina, tá ná taxina consejo ndaʼa̱na, chika̱a̱na ndee̱ xíʼinna ta chinúuna iin yichi̱ va̱ʼa nu̱úna (Prov. 15:22). ¿Nda̱chun xíniñúʼu taxiyó ná chindeétáʼan inka na̱ publicador xíʼin na̱ káʼviyó xíʼin? Saáchi na̱yóʼo kivi chindeétáʼanna xíʼin na̱ káʼviyó xíʼin ña̱ kuaʼnuna xíʼin tu̱ʼun Ndióxi̱. w21.03 8 párr. 1-3

Kúúyó na̱ va̱lí á na̱ náʼnu, kǒo kivi keʼéyó ña̱ va̱ása va̱ʼa ta ka̱ʼa̱nyó ña̱ ndásakáʼnuyó Ndióxi̱. Ta̱ apóstol Juan ni̱ka̱ʼa̱nra xa̱ʼa̱ ña̱yóʼo tá ka̱chira ña̱ va̱ása kivi kandíxayó ña̱ nda̱a̱ soo saátu keʼéyó ña̱ kini (1 Juan 1:6). Tá kúni̱yó ña̱ ná kusi̱í-ini Jehová xíʼin ña̱ kéʼéyó vitin ta saátu chí nu̱únínu, xíniñúʼu ndakaʼányó ña̱ ni va̱ása xíto na̱ yiví ña̱ kéʼéyó, Jehová xítovaraña (Heb. 4:13). Ná va̱ása ndakanixi̱níyó nda̱a̱ táki̱ʼva ndákanixi̱ní na̱ ñuyǐví yóʼo xa̱ʼa̱ ña̱ va̱ása va̱ʼa. Tá tiempo ña̱ ni̱xi̱yo ta̱ Juan, na̱ apóstata xi̱ka̱ʼa̱nna ña̱ kiviva koo na̱ yiví migo Ndióxi̱ ni ndákundeéna kéʼéna ña̱ kini. Saá ndákanixi̱ní ku̱a̱ʼánína tiempo vitin. Káʼa̱nna ña̱ kándíxana Ndióxi̱, soo va̱ása xíínna kandíxana ña̱ káʼa̱nra xa̱ʼa̱ ña̱ va̱ása va̱ʼa, tá kúú ña̱ kísi̱ na̱ yiví xíʼin táʼanna. Sava ña̱ kéʼé na̱ yiví iin ku̱a̱chi ndeé kúúña nu̱ú Jehová, soo nu̱ú miína ña̱ va̱ʼava kúúña ta káʼa̱nna ña̱ kiviva keʼénaña tá kúni̱na. w20.07 22 párr. 7, 8

¿Á ndákiʼinyó tu̱ʼun ná hermanayó tá xíniñúʼunáña? Ná kachiyó ña̱ ku̱a̱ʼá na̱ hermano kíʼinna kuenta ña̱ xi̱ku̱aání xáa̱ iin ñá hermana reunión, ñá íyo yií ta̱ va̱ása kúú testigo Jehová, ta ndi̱ku̱n tá ndíʼiña ndákiʼinñá ku̱a̱ʼa̱nñá. Ta saátu, va̱ása xáʼa̱n ni̱ʼi na̱ va̱lí se̱ʼeñá xíʼinñá. Xa̱ʼa̱ ña̱yóʼo kíxáʼana káʼa̱nna ña̱ va̱ása va̱ʼa xa̱ʼa̱ñá, ta ndákanixi̱nína nda̱chun kúú ña̱ va̱ása káʼa̱nñá xíʼin yiíñá ña̱ ná taxira na̱ va̱lí yóʼo ku̱ʼu̱n xíʼinñá. Soo mií ña̱ nda̱a̱ chíka̱a̱nívañá ndee̱. Chi su̱ví iinlá miíñá kúú ñá ndáka̱xin ña̱ kivi keʼéñá xíʼin tiempoñá á ña̱ keʼé na̱ va̱lí se̱ʼeñá. Tá ná ka̱ʼa̱nyó tu̱ʼun va̱ʼa xíʼinñá xa̱ʼa̱ ña̱ kéʼéñá ta natúʼunyó xíʼin inkana xa̱ʼa̱ ña̱ va̱ʼaní kéʼéñá, saá kǒo ka̱ʼa̱nkana ña̱ va̱ása va̱ʼa xa̱ʼa̱ñá. Na̱ anciano kúnda̱a̱-inina ña̱ xíto Jehová ndáa ki̱ʼva kéʼéna xíʼin ná hermana (Sant. 1:27). Xa̱ʼa̱ ña̱yóʼo na̱ anciano ndíku̱nna yichi̱ ta̱ Jesús ta vií ndákanixi̱nína. Kéʼéna ña̱yóʼo tá va̱ása káʼa̱nna xíʼinná ndáaña kúú ña̱ xíniñúʼu keʼéná chi va̱ʼa íyo inina xíʼinná ta kúnda̱a̱-inina xíʼin ña̱ ndóʼoná (Mat. 15:22-28). Tá chíndeétáʼanna xíʼinná saá kúú ña̱ kúnda̱a̱-ininá ña̱ ndíʼi̱-ini Jehová xa̱ʼa̱ná xíʼin na̱ ñuura. w20.09 24 párr. 17-19

Ta̱ profeta Daniel vitání ni̱xi̱yo inira ña̱kán xi̱ka̱ʼa̱nra xíʼin Jehová ña̱ ná chindeétáʼanra xíʼinra. Tá kúú, tá xi̱niñúʼu Jehová ta̱yóʼo ña̱ ka̱ʼa̱nra xa̱ʼa̱ ña̱ ni̱xa̱ní ta̱ Nabucodonosor, ta̱ Daniel va̱ása níka̱ʼa̱nra ña̱ miíra ke̱ʼé ña̱yóʼo, chi nda̱kunira ña̱ chi̱ndeétáʼan Ndióxi̱ xíʼinra ta xíʼin ña̱ ke̱ʼéra nda̱sakáʼnura Jehová (Dan. 2:26-28). Xíʼin ña̱yóʼo sákuaʼayó ña̱ tá kútóo na̱ hermano discurso ña̱ táxiyó á tá va̱ʼaní xíniso̱ʼo na̱ yiví ña̱ nátúʼunyó, iinlá Jehová kúú ta̱ xíniñúʼu ndukáʼnu xa̱ʼa̱ ña̱yóʼo. Ná ndakuniyó ña̱ va̱ása kuchiñu iinlá miíyó keʼéyó ña̱yóʼo tá va̱ása chíndeétáʼan Jehová xíʼinyó (Filip. 4:13). Ta saátu, tá kéʼéyó ña̱yóʼo ndíku̱nyó yichi̱ ta̱ Jesús. Ta̱ Jesús ndiʼi tiempo xi̱kandíxara Jehová (Juan 5:19, 30). Nda̱a̱ ni iin yichi̱ va̱ása níkuni̱ra kindaara chiñu ndaʼa̱ yivára ta̱ íyo chí ndiví. Filipenses 2:6 káʼa̱nña xa̱ʼa̱ ta̱ Jesús ña̱ “va̱ása níndakanixi̱níra ña̱ kindaara chiñu ña̱ kúúmií Ndióxi̱, ta koora nda̱a̱ táki̱ʼva íyo ta̱yóʼo”. Ta̱ Jesús xi̱kunda̱a̱-inira ña̱ iinlá yivára kúú ta̱ xáʼndachíñu, ña̱kán xi̱ ixato̱ʼóra ña̱yóʼo ta xi̱kandíxarara. w20.08 11 párr. 12, 13

Sava na̱ xínu ku̱a̱ʼa̱n chí yichi̱ nu̱ú ndakiʼinna ña̱ kutakuna, kúúmiína sava tu̱ndóʼo ña̱ va̱ása kívi kuni inkana á ña̱ va̱ása kivi kunda̱a̱-inina xíʼin. Tá sási ña̱ xóʼvi̱yó nu̱úyó ta túviyó ña̱ va̱ása kúnda̱a̱-ini inkana xíʼin ña̱ ndóʼoyó, ña̱ ndo̱ʼo ta̱ Mefibóset kivi chindeétáʼanña xíʼinyó (2 Sam. 4:4). Ni ni̱xo̱ʼvi̱níra xíʼin tu̱ndóʼo ña̱ xi̱kuumiíra, xi̱niñúʼu kundeé-inira xa̱ʼa̱ ña̱ va̱ása va̱ʼa ña̱ ke̱ʼé ta̱ rey David xíʼinra. Soo va̱ása nítaxira ña̱ sandákavaña-inira, chi xi̱chindayáʼvira ndiʼi ña̱ va̱ʼa ña̱ xi̱kuumiíra. Ta xi̱taxira tíxa̱ʼvi ndaʼa̱ ta̱ David xa̱ʼa̱ ña̱ va̱ʼa ni̱xi̱yo inira xíʼinra tá ya̱chi̱ (2 Sam. 9:6-10). Ña̱kán tá ke̱ʼé ta̱ David ña̱ va̱ása va̱ʼa, ta̱ Mefibóset ki̱ʼinra kuenta xa̱ʼa̱ ndiʼi ña̱ va̱ʼa ña̱ ke̱ʼéra xíʼinra tá ya̱chi̱. Ta va̱ása nísa̱a̱ra xa̱ʼa̱ ña̱ ke̱ʼé ta̱ David ta ni va̱ása níchika̱a̱ ku̱a̱chira Jehová xa̱ʼa̱ ña̱yóʼo. Chi chi̱ka̱a̱ra ndee̱ ña̱ chindeétáʼanra xíʼin rey ta̱ nda̱kaxin Ndióxi̱ (2 Sam. 16:1-4; 19:24-30). Jehová ta̱xira ña̱ ná ka̱ʼyi̱ ña̱ va̱ʼa ña̱ ke̱ʼé ta̱ Mefibóset nu̱ú Biblia, ña̱ va̱ʼa chindeétáʼanña xíʼinyó (Rom. 15:4). w20.04 26 párr. 3; 30 párr. 18, 19

Sana ti̱xin congregación nu̱ú ndíka̱a̱yó íyo na̱ kúú misionero, precursor especial á na̱ precursor regular, ta xíkana nátúʼun xíʼin na̱ yiví xa̱ʼa̱ Ndióxi̱ ku̱a̱ʼání tiempo. Ku̱a̱ʼání na̱ hermano yóʼo loʼova ña̱ʼa kúúmiína, soo ku̱a̱ʼání bendición táxi Jehová ndaʼa̱na (Mar. 10:29, 30). ¿Á su̱ví ña̱ nda̱a̱ kúúña, táxiníyó tíxa̱ʼvi xa̱ʼa̱ ña̱ íyo na̱ hermano yóʼo ti̱xin congregación? Tá saá, ¿á na̱ hermano na̱ nda̱kaxin espíritu santo kuití xíʼin na̱ káchíñu ku̱a̱ʼá tiempo nu̱ú Jehová kúú na̱ kúúmií iin chiñu ti̱xin congregación? Va̱ása, chi iin tá iin na̱ publicador ndáyáʼvinína nu̱ú Jehová ta saátu nu̱ú na̱ congregación (Rom. 10:15; 1 Cor. 3:6-8). Saáchi iin chiñu ña̱ ndáyáʼvi va̱ʼaka nu̱ú na̱ congregación kúú ña̱ chindeétáʼanna xíʼin na̱ yiví ña̱ xa̱a̱na koona discípulo ta̱ Cristo (Mat. 28:19, 20; 1 Tim. 2:4). Ndiʼi na̱ publicador na̱ íyo ti̱xin congregación ni xa̱a̱ nda̱kuchina á va̱ása, chíka̱a̱na ndee̱ ña̱ keʼéna chiñu yóʼo ta ndáyáʼviníña nu̱úna (Mat. 24:14). w20.08 21 párr. 7, 8

Nda̱a̱ táki̱ʼva káʼa̱n texto ña̱ káʼviyó ki̱vi̱ vitin, tá yáʼayó nu̱ú tu̱ndóʼo ta̱ Jesús chindeétáʼanra xíʼinyó. Ta tu̱ʼun ña̱ ni̱ka̱ʼa̱n ta̱ Jesús chíka̱a̱níña ndee̱ xíʼinyó, saáchi ndiʼiyó yáʼayó nu̱ú tu̱ndóʼo. Tá kúú, tá xíʼi̱ iin na̱ veʼeyó su̱ví loʼo ki̱vi̱ xóʼvi̱yó xa̱ʼa̱ ña̱yóʼo chi sana ku̱a̱ʼá ku̱i̱ya̱ xóʼvi̱yó. Inkana xóʼvi̱na ki̱vi̱ tá ki̱vi̱ xa̱ʼa̱ ña̱ xa̱a̱ ku̱chéena. Ta inkatuna ndákava-inina xa̱ʼa̱ ña̱ kúúmiína kue̱ʼe̱ ña̱ naní depresión. Ta ni yáʼayó nu̱ú ndiʼi ña̱yóʼo kúúmiíyó ndee̱ ña̱ ndakundeéyó kachíñuyó nu̱ú Jehová, saáchi kúnda̱a̱-iniyó ña̱ íyo ta̱ Jesús xíʼinyó “ndiʼi ki̱vi̱”, ni ndeéní íyo ña̱ yáʼayó nu̱ú (Mat. 11:28-30). Tu̱ʼun Ndióxi̱ káʼa̱nña xíʼinyó ña̱ xíniñúʼu Jehová na̱ ángel ña̱ va̱ʼa chindeétáʼanra xíʼinyó (Heb. 1:7, 14). Tá kúú, chíndeétáʼanna xíʼinyó ta níʼina yichi̱ nu̱úyó tá ku̱a̱ʼa̱nyó natúʼunyó xa̱ʼa̱ Reino Ndióxi̱ xíʼin ndiʼi na̱ yiví, “ni nda̱a̱ ndáaka ñuuna á ni nda̱a̱ ndáaka tu̱ʼun káʼa̱nna” (Mat. 24:13, 14; Apoc. 14:6). w20.11 13, 14 párr. 6, 7

Tá sánáʼa̱yó iin na̱ yiví kúni̱yó ña̱ ná kunda̱a̱-inina ña̱ nu̱ú tu̱ʼun Ndióxi̱ va̱xiña ndiʼi ña̱ sákuaʼana (1 Tes. 2:13). Ña̱kán ná nda̱ka̱tu̱ʼunyóna ndáaña ndákanixi̱nína xa̱ʼa̱ ña̱ sákuaʼana. Su̱ví ndiʼi yichi̱ xíniñúʼu ka̱ʼa̱nyó xíʼinna ndáaña kúni̱ kachi iin texto, va̱ʼaka ná taxiyó ka̱ʼa̱n miína xíʼinyó ndáaña kúni̱ kachiña. Ná chindeétáʼanyó xíʼinna ña̱ kotona ndáa ki̱ʼva keʼéna ña̱ káʼa̱n Biblia. Viíní ná nda̱ka̱tu̱ʼunyóna ña̱ va̱ʼa ka̱ʼa̱nna xíʼinyó ndáaña ndákanixi̱nína á ndáaña ndóʼona tá káʼvina iin texto (Luc. 10:25-28). Kivi nda̱ka̱tu̱ʼunyóna: “¿Ndáa ki̱ʼva chíndeétáʼan texto yóʼo xíʼún ña̱ kunda̱a̱-iniún ndáa ki̱ʼva íyo Jehová?”, “Ña̱ sa̱kuaʼún yóʼo, ¿ndáa ki̱ʼva chíndeétáʼanña xíʼún?”, “¿Á kúsi̱í-iniún xa̱ʼa̱ ña̱ sa̱kán sa̱kuaʼún?”. Va̱ása ndáyáʼviví á ku̱a̱ʼá ña̱ʼa sákuaʼana chi ña̱ ndáyáʼvika kúú ña̱ kuʼvi̱-inina kunina ña̱ sákuaʼana ta keʼénaña. Ná kuniñúʼuyó Biblia tá sánáʼa̱yóna, ta xíniñúʼu vitá koo iniyó tá kúni̱yó viíka sanáʼa̱yó. w20.10 15, 16 párr. 5, 6

Chiñu ña̱ kúúmiíyó ña̱ ku̱ʼu̱nyó natúʼunyó xíʼin na̱ yiví xa̱ʼa̱ Ndióxi̱, ndiʼiña mií tiempo ña̱ xa̱a̱ nda̱kaxinra. Chi Jehová kéʼéra iin ña̱ʼa mií tiempo ña̱ va̱ʼaka. Ná ndakanixi̱níyó xa̱ʼa̱ ña̱ ku̱u tá tiempo ña̱ ni̱xi̱yo ta̱ Noé. Xa̱a̱ 120 ku̱i̱ya̱ chí sa̱tá kúú ña̱ nda̱kaxinra ama kúú ña̱ kixáʼa kuun sa̱vi̱ kini. Tá ni̱ya̱ʼaka ku̱i̱ya̱ ni̱ka̱ʼa̱nra xíʼin ta̱ Noé ña̱ ná ixava̱ʼara iin arca. Ki̱ʼva 40 á 50 ku̱i̱ya̱ ndeéní ka̱chíñu ta̱ Noé. Ni va̱ása níxiin na̱ yiví kuniso̱ʼona, ta̱ Noé nda̱kundeéra na̱túʼunra xíʼinna nda̱a̱ tá ki̱xaa̱ ki̱vi̱ ña̱ ni̱ka̱ʼa̱n Jehová xíʼinra ña̱ ki̱ʼvira ini tú arca. Tasaá nda̱kasi Jehová yéʼé (Gén. 6:3; 7:1, 2, 16). Si̱lóʼo kúma̱ní, ta ka̱ʼa̱n Jehová ña̱ va̱ása natúʼunkayó xíʼin na̱ yiví ta sandíʼi-xa̱ʼa̱ra ñuyǐví ta̱ Ndi̱va̱ʼa, tasaá taxira iin ñuyǐví xa̱á nu̱ú kundoo na̱ yiví na̱ kándíxa ña̱ káʼa̱nra. Nani ndátuyó kuu ña̱yóʼo, ná kundiku̱nyó yichi̱ ta̱ Noé xíʼin inkaka na̱ ndásakáʼnu Ndióxi̱ na̱ ndákundeé káchíñu nu̱úra. Ná kundi̱ʼi̱-iniyó xa̱ʼa̱ chiñu ña̱ kúúmiíyó, kúee ná koo iniyó ta ná kandíxayó Jehová xíʼin ña̱ káʼa̱nra keʼéra chí nu̱únínu. w20.09 13 párr. 18, 19

Tá va̱ása kúnda̱a̱ káxi iniyó ndáana kúú na̱ níʼi yichi̱ nu̱úyó, kooní tu̱ndóʼo nu̱úyó ta va̱ása si̱í kooyó. Tá kúú, nda̱a̱ ni iinyó va̱ása kunda̱a̱-iniyó ndáana kúú na̱ ka̱ʼa̱n ndáa ki̱ʼva keʼéyó iin chiñu, ta ndáana kúú na̱ kuniʼi yichi̱ nu̱úyó ña̱ keʼéyóña. Tá iin ña̱ va̱ʼa kúú ña̱ ta̱xi Jehová ña̱ ná kuniʼi ta̱ ta̱a yichi̱ nu̱ú na̱ veʼera, ¿nda̱chun ku̱a̱ʼání ná ñaʼá íxandi̱va̱ʼa yiíná xíʼinná ta va̱ása si̱í íyoná? Saáchi ku̱a̱ʼání na̱ ta̱a yáʼandosóna ña̱ káʼa̱n Jehová xa̱ʼa̱ ña̱ xíniñúʼu keʼéna xíʼin na̱ veʼena, ta kútóokana kundiku̱nna costumbre ña̱ íyo ñuuna. Ta saátu, íxandi̱va̱ʼana xíʼin ñá síʼina chi saá kúú ña̱ va̱ʼaníka kúni miína. Tá kúú, iin ta̱a sana íxandúxara xíʼin ñá síʼira ña̱ keʼéñá ndiʼi ña̱ káʼa̱nra chi saá kúú ña̱ ndákanixi̱níra ña̱ ndáyáʼvikara á náʼa̱ra ña̱ “ndixa kúúra ta̱a”. Tá kúú, sana ndákanixi̱níra ña̱ va̱ása kivi ixandúxara xíʼin ñá síʼira ña̱ kuʼvi̱-iniñá kuniñára, soo kiviva ixandúxara xíʼinñá ña̱ yi̱ʼvíñá kuniñára. Savana saá kéʼéna xíʼin ñá síʼina, ña̱ va̱ʼa ná kixáʼañá keʼéñá ña̱ kúni̱ miína. Na̱ ta̱a na̱ ndákanixi̱ní saá á kéʼéna ña̱yóʼo, va̱ása íxato̱ʼóna ná ñaʼá. Ta saátu ña̱yóʼo va̱ása kítáʼanña xíʼin ña̱ kúni̱ Jehová (Efes. 5:25, 28). w21.02 3 párr. 6, 7

Tá ndíʼi̱ní-iniún xa̱ʼa̱ tu̱ndóʼo ña̱ yáʼún nu̱ú, va̱ʼaníka kuniún tá ná ka̱ʼún xíʼin Jehová. Tasaá ndakuiinra ña̱ káʼún xíʼinra, chi taxira “ña̱ táxi̱n koo iniún ña̱ kǒo kúnda̱a̱-ini na̱ yiví xíʼin” (Filip. 4:6, 7). Jehová xíniñúʼura espíritu santora ña̱ va̱ʼa sandíkora-iniyó tá ndíʼi̱ní-iniyó (Gál. 5:22). Natúʼun xíʼin Jehová xa̱ʼa̱ ndiʼi ña̱ ndóʼún. Ka̱ʼa̱n xíʼinra xa̱ʼa̱ tu̱ndóʼo ña̱ yáʼún nu̱ú ta ndáaña ndóʼún xa̱ʼa̱ ña̱yóʼo. Ka̱ʼa̱n xíʼin Jehová ná taxira ña̱ ndíchi ndaʼún ña̱ va̱ʼa kunda̱a̱-iniún ndáaña keʼún ña̱ va̱ʼa ndasaviúnña, ta ndukú ndee̱ nu̱úra ña̱ va̱ʼa keʼúnña. Soo tá kǒo ña̱ kívi keʼún ña̱ va̱ʼa ndasaviúnña, ka̱ʼa̱n xíʼin Jehová ná chindeétáʼanra xíʼún ña̱ va̱ása kundi̱ʼi̱ní-iniún xa̱ʼa̱ña. Tá káxi íyo ña̱ káʼún xíʼin Jehová, tá ná ya̱ʼa tiempo va̱ʼaníka kiʼún kuenta ndáa ki̱ʼva nda̱kuiinra oración ña̱ ke̱ʼún nu̱úra. Tá va̱ása kama ndákuiinra ña̱ káʼún xíʼinra kǒo sandákoún ña̱ ka̱ʼún xíʼinra. Jehová kúni̱ra ña̱ káxi ná koo ña̱ ka̱ʼún xíʼinra, ta saátu kúni̱ra ña̱ ná ka̱ʼa̱n ni̱ʼún xíʼinra (Luc. 11:8-10). w21.01 3 párr. 6, 7

Ti̱xin congregación íyo na̱ ti̱ndaʼa̱, na̱ íyo se̱ʼe ta saátu na̱ hermano xíʼin ná hermana na̱ ta̱ʼán tindaʼa̱. ¿Ndáa ki̱ʼva xíniñúʼu kotoyó na̱ ta̱ʼán tindaʼa̱? Ná kotoyó ndáaña xi̱ndakanixi̱ní ta̱ Jesús xa̱ʼa̱ na̱ ta̱ʼán tindaʼa̱. Tá ni̱xi̱yora nu̱ú ñuʼú yóʼo va̱ása nítindaʼa̱ra, xi̱niñúʼura tiempora ña̱ va̱ʼa keʼéra iinlá chiñu Ndióxi̱. Nda̱a̱ ni iin yichi̱ va̱ása nísanáʼa̱ra ña̱ xíniñúʼu tindaʼa̱ na̱ ndíku̱nñaʼá, ta ni kǒo níka̱ʼa̱nra ña̱ va̱ása xíniñúʼu tindaʼa̱na. Soo ni̱ka̱ʼa̱nvara ña̱ savana ndaka̱xinna ña̱ va̱ása tindaʼa̱na (Mat. 19:12). Ta̱yóʼo xi̱ ixato̱ʼóra na̱ va̱ása nítindaʼa̱, ta va̱ása níndakanixi̱níra ña̱ kǒo ndáyáʼvina á ña̱ kúma̱ní iin ña̱ʼa nu̱úna. Nda̱a̱ táki̱ʼva ni̱xi̱yo ta̱ Jesús saá ni̱xi̱yo ta̱ apóstol Pablo, chi va̱ása nítindaʼa̱ra tá xi̱kachíñura nu̱ú Ndióxi̱, nda̱a̱ ni iin yichi̱ kǒo nísanáʼa̱ra ña̱ va̱ása va̱ʼa tindaʼa̱na. Xi̱kunda̱a̱-inira ña̱ iin tá iinna kúú na̱ xíniñúʼu ndaka̱xin ndáaña keʼéna. w20.08 28 párr. 7, 8

Ku̱a̱ʼání ku̱i̱ya̱ xi̱taku ta̱ apóstol Juan ta ku̱a̱ʼání ña̱ ndo̱ʼora. Ni̱ya̱ʼara nu̱ú ku̱a̱ʼání tu̱ndóʼo ña̱ kivi sandákava-inira ta va̱ása kandíxakara Ndióxi̱. Soo chi̱ka̱a̱níra ndee̱ ña̱ ke̱ʼéra ndiʼi ña̱ xa̱ʼnda ta̱ Jesús, tá kúú ña̱ kuʼvi̱-inira kunira na̱ hermano. Ña̱kán, xi̱kandíxaníra ña̱ xi̱kuʼvi̱-ini Jehová xíʼin ta̱ Jesús xi̱xininara, ta xi̱kandíxara ña̱ chindeétáʼanna xíʼinra ña̱ ya̱ʼara nu̱ú nda̱a̱ ndáaka tu̱ndóʼo (Juan 14:15-17; 15:10). Ni ta̱ Ndi̱va̱ʼa ta ni na̱ ñuyǐví yóʼo, va̱ása níkuchiñuna kasina nu̱ú ta̱ Juan ña̱ ka̱ʼa̱nra xíʼin na̱ hermano ña̱ kúʼvi̱-inira xínirana ta saátu ña̱ na̱ʼa̱ra ña̱yóʼo. Nda̱a̱ táki̱ʼva ndo̱ʼo ta̱ Juan, ndóoyó nu̱ú ñuyǐví nu̱ú xáʼndachíñu ta̱ Ndi̱va̱ʼa ta na̱ yiví sáa̱-inina xínitáʼanna (1 Juan 3:1, 10). Ta̱ Ndi̱va̱ʼa kúni̱ra ña̱ ná va̱ása kuʼvi̱ka-iniyó kuniyó na̱ hermanoyó, soo ná va̱ása taxiyó keʼéra ña̱yóʼo. Ña̱kán, ná chika̱a̱-iniyó ña̱ kuʼvi̱-iniyó kuniyó na̱ hermanoyó, ka̱ʼa̱nyóña xíʼinna ta na̱ʼa̱yóña xíʼin ña̱ kéʼéyó. Tasaá kusi̱íní-iniyó xa̱ʼa̱ ña̱ kúúyó táʼan na̱ ñuu Jehová (1 Juan 4:7). w21.01 13 párr. 18, 19

Xa̱ʼa̱ ña̱ ndóoyó nu̱ú ñuyǐví ta̱ Ndi̱va̱ʼa, yo̱ʼvi̱ní íyo ña̱ tákuyó ta sava yichi̱ va̱ása kúnda̱a̱-iniyó ndáaña keʼéyó (2 Tim. 3:1). Soo va̱ása xíniñúʼu ndi̱ʼi̱ní-iniyó á yi̱ʼvíyó, saáchi Jehová kúnda̱a̱va-inira ndáaña yáʼayó nu̱ú. Ña̱kán káʼa̱nra ña̱ miíra chindeétáʼan xíʼinyó (Is. 41:10, 13). Kándíxayó ña̱ chindeétáʼan Jehová xíʼinyó, ta saátu tu̱ʼunra taxiña ndee̱ ndaʼa̱yó ña̱ va̱ʼa ya̱ʼayó nu̱ú nda̱a̱ ndáaka tu̱ndóʼo. Ña̱yóʼo kivi ndani̱ʼíyóña nu̱ú video, audio ña̱ káʼvina nu̱ú Biblia, ta saátu nu̱ú libro ña̱ naní “Ña̱ sákuaʼayó nu̱ú Biblia”. Tá kúma̱níka kotoyó, kuniso̱ʼoyó á kaʼviyó ña̱ viíní na̱ndukúna xa̱ʼa̱ yóʼo, ná ka̱ʼa̱nyó xíʼin Jehová ña̱ chindeétáʼanra xíʼinyó ña̱ ndani̱ʼíyó ña̱ kivi chindeétáʼan xíʼinyó. Ná ndakanixi̱níyó ña̱ miíyó kúú na̱ ndóʼo táʼan ña̱ ndóʼo na̱ káʼviyó xa̱ʼa̱. Ná ndakanixi̱níyó xa̱ʼa̱ ña̱ ke̱ʼéna, ta ndáa ki̱ʼva chi̱ndeétáʼan Jehová xíʼinna ña̱ ni̱ya̱ʼana nu̱ú tu̱ndóʼo. Tándi̱ʼi, ná keʼéyó ña̱ sa̱kúaʼayó. Ta saátu ná taxiyó tíxa̱ʼvi ndaʼa̱ Jehová xa̱ʼa̱ ña̱ chi̱ndeétáʼanra xíʼinyó. Tá ná ndukúyó ki̱ʼva ña̱ chika̱a̱yó ndee̱ xíʼin inkana ta chindeétáʼanyó xíʼinna, náʼa̱yó ña̱ táxiyó tíxa̱ʼvi xa̱ʼa̱ ña̱yóʼo. w21.03 19 párr. 22, 23

Tá kúni̱ na̱ ti̱ndaʼa̱ koo se̱ʼena xíniñúʼu ndakanixi̱nína xa̱ʼa̱ ña̱yóʼo: “¿Á ndaka̱xin Jehová miíyó ña̱ kundaayó iin ña̱ loʼo xa̱ʼa̱ ña̱ kúúyó na̱ yiví na̱ vitá-ini ta kúʼvi̱-iniyó xíniyó miíra xíʼin tu̱ʼunra?” (Sal. 127:4). Soo tá xa̱a̱ íyo se̱ʼendó ndakanixi̱níndó xa̱ʼa̱ ña̱yóʼo: “¿Á sánáʼi̱ se̱ʼi̱ ña̱ chika̱a̱na ndee̱ ña̱ kachíñuna?” (Ecl. 3:12, 13). “¿Á chíka̱i̱ ndee̱ ña̱ kundai̱na nu̱ú ña̱ kivi satúkue̱ʼe̱ miína xíʼin ña̱ kini ña̱ íyo nu̱ú ñuyǐví ta̱ Ndi̱va̱ʼa?” (Prov. 22:3). Ña̱ nda̱a̱ kúúña, va̱ása kívi kundaúnna nu̱ú ndiʼi tu̱ndóʼo ña̱ kivi kixi nu̱úna. ¿Ndáa ki̱ʼva chindeétáʼún xíʼinna ña̱ ya̱ʼana nu̱úña? Sanáʼa̱na ña̱ nandukúna nu̱ú Biblia ña̱ kivi chindeétáʼan xíʼinna (Prov. 2:1-6). Tá kúú, tá iin na̱ veʼún nda̱koona ña̱ ndasakáʼnuna Ndióxi̱, sanáʼa̱ texto nu̱úna ña̱ chindeétáʼan xíʼinna kotona ña̱ ndáyáʼviní nda̱kú koo inina xíʼin Jehová (Sal. 31:23). Á tá ná kuvi iin na̱ veʼún sanáʼa̱ texto nu̱úna ña̱ kivi chindeétáʼan xíʼinna ña̱ kundeé-inina ya̱ʼana nu̱ú ña̱yóʼo ta táxi̱n koo inina (2 Cor. 1:3, 4; 2 Tim. 3:16). w20.10 27 párr. 7