Diciembre

¿Á kúúmií Jehová ndee̱ ña̱ sandátakura na̱ ni̱xi̱ʼi̱? Kúúmiívaraña. Miíra kúú ta̱ kúúmií ndiʼi ndee̱ (Apoc. 1:8). Jehová kúúmiíra ndee̱ ña̱ sandíʼi-xa̱ʼa̱ra ndiʼi na̱ sáa̱-ini xíni miíra, ta nda̱a̱ ña̱ xíʼi̱yó kuchiñura sandíʼi-xa̱ʼa̱ra (1 Cor. 15:26). Saátu kándíxayó ña̱ sandátaku Jehová na̱ ni̱xi̱ʼi̱, chi ta̱kán va̱ʼaní ndákaʼánra xa̱ʼa̱ ndiʼi ña̱ʼa. Ña̱ Biblia káʼa̱nña xa̱ʼa̱ Jehová ña̱ káʼa̱nra ki̱vi̱ iin tá iin ki̱mi (Is. 40:26). Jehová ndákaʼánra ndáa ki̱ʼva ni̱xi̱yo ndiʼi na̱ ni̱xi̱ʼi̱ (Job 14:13; Luc. 20:38). Tá ná sandátakurana, kivi ndakaʼánra ndáa ki̱ʼva ni̱xi̱yona, ndáaña va̱ʼa xi̱kuumiína ta ndáaña xi̱keʼéna. Nda̱a̱ táki̱ʼva xa̱a̱ sa̱kúaʼayó, kiviva kandíxayó ña̱ ndataku na̱ ni̱xi̱ʼi̱, chi kúnda̱a̱-iniyó ña̱ kúni̱va Jehová sandátakurana ta kúúmiítura ndee̱ ña̱ keʼéraña. Inka ña̱ chindeétáʼan xíʼinyó ña̱ kandíxayó ña̱ sandátakura na̱ ni̱xi̱ʼi̱ kúú ña̱ xa̱a̱ sa̱ndátakura sava na̱ yiví. Tiempo xi̱naʼá Jehová ta̱xira ndee̱ ndaʼa̱ sava na̱ ta̱a ña̱ sandátakuna na̱ ni̱xi̱ʼi̱. Tá kúú, ta̱xira ndee̱ ndaʼa̱ ta̱ Jesús ña̱ keʼéra ña̱yóʼo. w23.04 9 párr. 7-9

Tá to̱ʼó káʼa̱nyó xíʼin na̱ yiví sana kuni̱na kuniso̱ʼona ña̱ káʼa̱nyó. Soo tá iin na̱ yiví káʼa̱n ndi̱va̱ʼana xíʼinyó á kúni̱na kusikindaana miíyó, va̱ʼaka ná ku̱ʼu̱nyó ta kǒo natúʼunkayó xíʼinna (Prov. 26:4). Soo, ku̱a̱ʼá na̱ yiví va̱ʼava xíniso̱ʼona ña̱ káʼa̱nyó xíʼinna. Nda̱a̱ táki̱ʼva xa̱a̱ sa̱kuaʼayó, ku̱a̱ʼání ña̱ va̱ʼa ndakiʼinyó tá vií ná ka̱ʼa̱nyó xíʼin na̱ yiví. Ka̱ʼa̱n xíʼin Jehová ña̱ taxira ndee̱ ndaʼún ña̱ va̱ʼa to̱ʼó ka̱ʼún xíʼin na̱ yiví tá ndáka̱tu̱ʼunna yóʼó xa̱ʼa̱ ña̱ kándíxaún. Ña̱ to̱ʼó ka̱ʼún xíʼin iin na̱ yiví chindeétáʼanña xíʼún ña̱ kǒo sa̱ún xíʼinna, tá kéʼún ña̱yóʼo saá chindeétáʼún xíʼinna ña̱ nasamana ña̱ ndákanixi̱nína xa̱ʼa̱ miíyó na̱ testigo Jehová ta saátu xa̱ʼa̱ ña̱ sána̱ʼa̱ Biblia. Ña̱kán, koo tu̱ʼvaún ña̱ ndakuiún yuʼú na̱ ndáka̱tu̱ʼun yóʼó xa̱ʼa̱ ña̱ kándíxaún, soo vitání koo iniún ta xíʼin ña̱ to̱ʼó ndakuiún yuʼúna (1 Ped. 3:15). Na̱ʼa̱ ña̱ ndakú-iniún ta saátu na̱ʼa̱ ña̱ vitá-iniún. w23.09 19 párr. 18, 19

Ná ka̱ʼa̱nyó xa̱ʼa̱ ku̱mí ña̱ va̱ʼa ña̱ kúúmií na̱ yiví na̱ kúee íyo ini. Ña̱ nu̱ú, va̱ása kama sáa̱na. Tá inka na̱ yiví ni̱ka̱ʼa̱nna ña̱ va̱ása va̱ʼa xíʼinna chíkaa̱nína ndee̱ ña̱ kúee koo inina, kǒo kéʼéna nda̱a̱ táki̱ʼva ke̱ʼéna xíʼinna (Éx. 34:6). Ña̱ u̱vi̱, na̱ yiví na̱ kúee íyo ini xíni̱na kundatuna. Va̱ása ndíʼi̱-inina ta va̱ása sáa̱na tá xíniñúʼu kundatuna (Mat. 18:​26, 27). Ña̱ u̱ni̱, na̱ yiví na̱ kúee íyo ini viíní ndákanixi̱nína. Tá iin chiñu ña̱ ndáyáʼviní kúúña, iin na̱ yiví na̱ kúee íyo ini va̱ása kamaní kíxáʼana kéʼéna iin chiñu á ña̱ sándiʼinaña, saáchi viíní ndákanixi̱nína ndáa ki̱ʼva keʼénaña tasaá távána tiempo ña̱ kotona ndáa ki̱ʼva kooña. Ña̱ ku̱mí, na̱ yiví na̱ kúee íyo ini kúndeé-inina tá yáʼana nu̱ú tu̱ndóʼo ta va̱ása káʼa̱n kúáchina. Na̱ yiví na̱ kúee ini chíkaa̱na ndee̱ ña̱ kusi̱í-inina ni yáʼana nu̱ú tu̱ndóʼo (Col. 1:11). Miíyó na̱ ndásakáʼnu Ndióxi̱ xíniñúʼu kúee koo iniyó. w23.08 21 párr. 3-6

¿Nda̱chun xíniñúʼu kundaaníyó níma̱yó? Saáchi Jehová xíni̱ra ndáaña ndíkaa̱ níma̱yó, ¿ndáaña kúni̱ kachi ña̱yóʼo? Miíyó na̱ yiví kǒo xíniyó ndáaña kúú ña̱ ñúʼu níma̱ inka na̱ yiví, soo Jehová kúnda̱a̱va-inira xíʼin ña̱yóʼo. Tá xíto Jehová ña̱ xíniso̱ʼoyó ndiʼi ña̱ káʼa̱nra xíʼinyó kúʼvi̱ní-inira xínira miíyó (Juan 4:14). Tá xíniso̱ʼoyó ndiʼi ña̱ káʼa̱nra xíʼinyó saá kúú ña̱ kǒo kuniso̱ʼoyó ña̱ vatá ña̱ sánáʼa̱ ta̱ Ndi̱va̱ʼa (1 Juan 5:​18, 19). Tá viíka ná kutáʼanyó xíʼin Ndióxi̱ saá kúú ña̱ kuʼvi̱níka iniyó kuniyóra ta ixato̱ʼókayóra, ta saátu kǒo keʼéyó ni iin ña̱ʼa ña̱ sákusuchí-inira ta ni iin yichi̱ kǒo keʼéyó ña̱ kini. Iin ñá hermana ñá íyo chí ñuu Croacia ñá naní Marta xi̱kuni̱ñá keʼéñá ña̱ kini. Ñáyóʼo káchiñá: “Kǒo níxikunda̱a̱-inii̱ ndáaña keʼíi̱, saáchi xi̱kuni̱níi̱ keʼíi̱ ña̱ kini, soo ña̱ chi̱ndeé yi̱ʼi̱ kúú ña̱ yíʼvii̱ xínii̱ Jehová”. Soo, ¿ndáa ki̱ʼva chi̱ndeétáʼan ña̱yóʼo xíʼinñá? Chi̱ndeétáʼanña xíʼinñá ña̱ ndakanixi̱níñá ndáaña kundoʼoñá tá ná keʼéñá ña̱yóʼo, ta saátu kivi keʼé miíyó tá yáʼayó nu̱ú iin ña̱ kivi sandákava miíyó ña̱ keʼéyó iin ña̱ kini. w23.06 20, 21 párr. 3, 4

Ta̱ Jesús xi̱kunda̱a̱-inira ña̱ xi̱kuni̱ Jehová kúú ña̱ nduyi̱i̱ ki̱vi̱ra, saáchi ku̱a̱ʼání ña̱ vatá káʼa̱nna xa̱ʼa̱ra. Ña̱kán, sa̱náʼa̱ra na̱ discípulora ndáa ki̱ʼva ka̱ʼa̱nna xíʼin Ndióxi̱: “Yivándi̱ ta̱ íyo chí ndiví, ná nduyi̱i̱ ki̱vi̱ún” (Mat. 6:9). Ta̱ Jesús xi̱kunda̱a̱-inira ña̱ ndáyáʼviní nduyi̱i̱ ki̱vi̱ Jehová. Iinlá ta̱ Jesús kúú ta̱ chi̱kaa̱ní ndee̱ ña̱ ndasayi̱i̱ra ki̱vi̱ Jehová. Ni saá tá ti̱innara, ¿ndáaña vatá ni̱ka̱ʼa̱nna xa̱ʼa̱ra? Ni̱ka̱ʼa̱nna ña̱ i̱xayaku̱a̱ra ki̱vi̱ yivára. Ta̱ Jesús xi̱ndakanixi̱níra ña̱ iin ku̱a̱chi ndeéní xi̱kuu ña̱yóʼo. Ña̱kán tá kúma̱níka tiinnara ni̱kusuchíní-inira, saáchi xi̱kunda̱a̱-inira ña̱ chikaa̱na ku̱a̱chi síkira ña̱ káʼa̱nra ña̱ va̱ása va̱ʼa xa̱ʼa̱ Ndióxi̱ ta kaʼnínara. Xa̱ʼa̱ ña̱yóʼo ki̱xáʼara ndíʼi̱ní-inira (Luc. 22:​41-44). w24.02 11 párr. 11

Jehová xíʼin ta̱ Jesús kúú na̱ xíniñúʼuníka kuʼvi̱-iniyó kuniyó nu̱úka na̱ veʼeyó (Mat. 10:37). Soo ña̱yóʼo kǒo kúni̱ kachiña ña̱ kǒo xíniñúʼu kundi̱ʼi-iniyó xa̱ʼa̱ na̱ veʼeyó ta iinlá chiñu Jehová kuití keʼéyó, saáchi tá kúni̱yó sákusi̱íyó-ini Jehová xíʼin ta̱ Jesús, saátu xíniñúʼu taxiyó ña̱ xíniñúʼu na̱ veʼeyó (1 Tim. 5:​4, 8). Tá ná keʼéyó ña̱yóʼo saá kúú ña̱ si̱íní kooyó saáchi mií Jehová kúú ta̱ ni̱ka̱ʼa̱n ña̱ saá xíniñúʼu keʼé na̱ yiví. Tá kúú, na̱ xa̱a̱ ti̱ndaʼa̱ xíniñúʼu ixato̱ʼóna na̱ ti̱ndaʼa̱ xíʼinna ta kuʼvi̱-inina kunitáʼanna, na̱ íyo se̱ʼe xíniñúʼu kuʼvi̱-inina kunina se̱ʼena ta sanáʼa̱nana xa̱ʼa̱ Jehová, ta na̱ va̱lí xíniñúʼu kuniso̱ʼona ña̱ káʼa̱n na̱ yivána (Efes. 5:33; 6:​1, 4). Iin tá iin na̱ familia xíniñúʼu chikaa̱na ndee̱ ña̱ kundiku̱nna consejo ña̱ va̱xi nu̱ú Biblia. Kǒo keʼún ña̱ kúni̱ miíún ta ni kǒo kundiku̱ún costumbre ña̱ íyo ñuún, saátu kǒo kandíxaún ña̱ káʼa̱n na̱ ndíchi na̱ kǒo ndásakáʼnu Ndióxi̱. w23.08 28 párr. 6, 7

Iin ña̱ va̱ʼaní kúú ña̱ sakúaʼa ná hermana válí keʼéna ku̱a̱ʼá ña̱ʼa, chi ña̱yóʼo va̱ʼaní chindeétáʼan xíʼinná tá xa̱a̱ ná kuchéená. Tá kúú, xíniñúʼu sakúaʼaná kaʼviná ta saátu ña̱ taaná. Sava lugar kǒo ndáyáʼvi ña̱ sakúaʼa ná ñaʼá kaʼviná ni ña̱ taaná. Soo ña̱yóʼo ndáyáʼviníña nu̱ú miíyó na̱ ndásakáʼnu Ndióxi̱ (1 Tim. 4:13). Ña̱kán, va̱ása taxiún kasi nda̱a̱ ni iin ña̱ʼa nu̱ún ña̱ sákuaʼún kaʼviún xíʼin ña̱ taaún. ¿Ndáaña va̱ʼa ndakiʼún tá ná keʼún ña̱yóʼo? Va̱ása ixayo̱ʼvi̱ña xíʼún ña̱ ndani̱ʼún iin chiñu ña̱ kachíñún, saátu va̱ʼaní kaʼviún tu̱ʼun Ndióxi̱ ta sánáʼún inkana. Soo iin ña̱ va̱ʼaníka kúú ña̱ kaʼviún Biblia ta ndakanixi̱níún xa̱ʼa̱ña, chi saá kúú ña̱ va̱ʼaníka kutáʼún xíʼin Jehová (1 Tim. 4:15). w23.12 20 párr. 10, 11

Ná ka̱ʼa̱nyó xíʼin Jehová ña̱ ná chindeétáʼanra xíʼinyó ña̱ kǒo keʼéyó ña̱ kini. Xa̱ʼa̱ ña̱ kúúyó na̱ yiví ku̱a̱chi xíniñúʼu chikaa̱níyó ndee̱ ña̱ kǒo keʼéyó ña̱ʼa ña̱ va̱ása va̱ʼa. Ta̱ Ndi̱va̱ʼa ku̱a̱ʼání ña̱ʼa xíniñúʼura xa̱ʼa̱ ña̱ kúni̱ra sandákavara miíyó. Tá kúú xíniñúʼura ña̱ʼa ña̱ sákusi̱í-iniyó chi kúni̱ra ná ndakanixi̱níyó xa̱ʼa̱ ña̱ʼa ña̱ va̱ása va̱ʼa tasaá kuyaku̱a̱ ña̱ ndákanixi̱níyó, ta ña̱yóʼo kivi chindaʼáña miíyó ki̱ʼviyó ku̱a̱chi kini (Mar. 7:​21-23; Sant. 1:​14, 15). Va̱ása kuchiñu iinlá miíyó nu̱ú ña̱ va̱ása va̱ʼa chi xíniñúʼuyó ña̱ chindeétáʼan Jehová xíʼinyó. Ña̱yóʼo ni̱ka̱ʼa̱n ta̱ Jesús tá ke̱ʼéra iin oración: “Kǒo taxiún ndakavandi̱ ndaʼa̱ ku̱a̱chi ta sakǎku ndi̱ʼi̱ ndaʼa̱ ta̱ Ndi̱va̱ʼa” (Mat. 6:13). Jehová kúni̱vara chindeétáʼanra xíʼinyó, soo xíniñúʼu ndukúyóña nu̱úra. Ña̱kán va̱ása xíniñúʼu ka̱ʼa̱n kuitíyó xíʼinra ta xa̱a̱ va̱ʼa. w23.05 6, 7 párr. 15-17

Tá na̱ xa̱a̱ ti̱ndaʼa̱ ndákanixi̱nína ña̱ ndáyáʼviní ña̱ kítáʼanna xíʼin Jehová, va̱ása ixayo̱ʼvi̱víña xíʼinna ña̱ kandíxana consejo ña̱ táxira ndaʼa̱na. Tá saá ná keʼéna, ña̱yóʼo chindeétáʼan xíʼinna ña̱ kundeé-inina nu̱ú nda̱a̱ ndáaka tu̱ndóʼo ña̱ kixi nu̱úna. Tasaá ndakundeéna kuʼvi̱-inina kunitáʼanna. Na̱ kúú migo Jehová chíkaa̱na ndee̱ ña̱ koona táki̱ʼva íyora, ta saátu chíkaa̱na ndee̱ ña̱ kuumiína ña̱ va̱ʼa ña̱ kúúmiíra. Tá kúú va̱ʼaní-inina, va̱ása kama sáa̱na ta íxakáʼnu-inina xa̱ʼa̱ inkana (Efes. 4:32–5:1). Tá ná keʼé na̱ xa̱a̱ ti̱ndaʼa̱ ña̱yóʼo, saá kúú ña̱ xa̱a̱na kuʼvi̱níka-inina kunitáʼanna. Ñá hermana Lena xa̱a̱ 25 ku̱i̱ya̱ ku̱a̱ʼa̱n ña̱ ti̱ndaʼa̱ñá, ñáyóʼo káchiñá: “Va̱ása íxayo̱ʼvi̱ña xíʼinyó ixato̱ʼóyó ta kuʼvi̱-iniyó kuniyó iin na̱ yiví na̱ kúʼvi̱ní-ini xíni Jehová ta ndíʼi̱ní-inina xa̱ʼa̱ chiñura”. Ná ka̱ʼa̱nyó xa̱ʼa̱ iin ejemplo ña̱ va̱xi nu̱ú Biblia. Jehová nda̱kaxinra ta̱ José xíʼin ñá María na̱ ke̱e ti̱xin na̱ veʼe ta̱ David ña̱ va̱ʼa xa̱a̱na koona yivá ta̱ Mesías. ¿Nda̱chun nda̱kaxin Jehová na̱yóʼo? Saáchi va̱ʼaní xi̱kitáʼan u̱vi̱ saána xíʼinra. Ta saátu xi̱kunda̱a̱-inira ña̱ siʼnaka chiñu miíra kúú ña̱ kundi̱ʼi̱ka-inina xa̱ʼa̱. w23.05 21 párr. 3, 4

Ta̱ Jesús ta̱ níʼi yichi̱ nu̱úyó su̱ví ta̱ ku̱a̱chi kúúra, soo na̱ yiví na̱ nda̱kaxinra kuniʼi yichi̱ nu̱úyó na̱ ku̱a̱chiva kúúna. Ña̱kán, sana ixayo̱ʼvi̱ña xíʼinyó kuniso̱ʼoyó ña̱ káʼa̱nna. Tá kúú, tá káʼa̱nna xíʼinyó keʼéyó iin ña̱ʼa ña̱ kǒo kúni̱yó keʼéyó. Saá kúú ña̱ ndo̱ʼo ta̱ apóstol Pedro. Iin ángel ni̱ka̱ʼa̱n xíʼinra ña̱ ná kuxura kití tí xi̱ka̱ʼa̱n ley ta̱ Moisés ña̱ kǒo xíniñúʼu kuxuna. Soo ta̱ Pedro u̱ni̱ví yichi̱ ni̱ka̱ʼa̱nra ña̱ kǒo níxi̱kuni̱ra keʼéra ña̱yóʼo (Hech. 10:​9-16). Nda̱kanixi̱níra ña̱ su̱ví ña̱ va̱ʼa kúú ña̱ ni̱ka̱ʼa̱n ta̱ ángel xíʼinra keʼéra. Vitin ná ka̱ʼa̱nyó xa̱ʼa̱ inka ejemplo. Na̱ anciano ñuu Jerusalén ni̱ka̱ʼa̱nna xíʼin ta̱ Pablo ña̱ ná na̱ʼa̱ra nu̱ú ndiʼi na̱ cristiano ña̱ kándíxara ley. Xa̱ʼa̱ ña̱kán xi̱niñúʼu ku̱ʼu̱nra xíʼin ku̱mí ta̱a ti̱xin templo ta kán ndaya̱kúnra miíra nda̱a̱ táki̱ʼva xi̱ka̱ʼa̱n ley ta̱ Moisés. Soo ta̱ Pablo kǒo nda̱a̱ ni iin ku̱a̱chi níki̱ʼvira. Ta saátu xi̱kunda̱a̱-inira ña̱ na̱ cristiano kán va̱ása níxiniñúʼuka kundiku̱nna ley ta̱ Moisés. Soo ni saá ke̱ʼéra ña̱ ni̱ka̱ʼa̱n na̱ anciano xíʼinra. Biblia káʼa̱nña: “Tá inka ki̱vi̱ ta̱ Pablo nda̱kiʼinra na̱yóʼo ku̱a̱ʼa̱n xíʼinra ta nda̱yakúnna miína nda̱a̱ táki̱ʼva káʼa̱n Ley ta̱ Moisés” (Hech. 21:​23, 24, 26). Ta xa̱ʼa̱ ña̱ va̱ʼaní xi̱niso̱ʼora, ña̱yóʼo chi̱ndeétáʼan xíʼin na̱ cristiano ña̱ va̱ʼaní kutáʼanna (Rom. 14:​19, 21). w23.10 10 párr. 15, 16

Tá íyo iin na̱ migoyó sana va̱ása ka̱ʼa̱nvíyó ña̱ yi̱ʼvíyó xíniyóna saáchi kúʼvi̱-iniyó xíniyóna ta chíndeétáʼanyó xíʼinna. Soo na̱ kúni̱ kitáʼan va̱ʼa xíʼin Jehová xíniñúʼu yi̱ʼvína kuninara. Ni loʼo á ku̱a̱ʼá tiempo ñúʼuyó ti̱xin ñuu Jehová, ndiʼiyó xíniñúʼu yi̱ʼvíyó kuniyóra. Soo, ¿ndáaña kúni̱ kachi ña̱ yi̱ʼvíyó kuniyóra? Ta, ¿ndáaña kivi chindeétáʼan xíʼinyó ña̱ keʼéyó ña̱yóʼo? Na̱ yíʼvi xíni Jehová á na̱ íxato̱ʼóñaʼá, kúú na̱ kǒo kúni̱ kuxíka nu̱úra saáchi kúʼvi̱ní-inina xíninara. Iin ta̱ va̱ʼaní ke̱ʼé ña̱yóʼo kúú ta̱ Jesús (Heb. 5:7). Ta̱ Jesús ni loʼo kǒo níyi̱ʼvíra ña̱ ixandi̱va̱ʼa Jehová xíʼinra (Is. 11:​2, 3). Ta̱yóʼo xi̱kuʼvi̱ní-inira xi̱xinira yivára ta ndiʼi tiempo xi̱xiniso̱ʼora ña̱ xi̱ka̱ʼa̱nra xíʼinra (Juan 14:​21, 31). Saátu miíyó íxato̱ʼóníyó Jehová ta ndásakáʼnuyóra xa̱ʼa̱ ña̱ kúʼvi̱-inira xínira miíyó, xa̱ʼa̱ ña̱ ndíchiníra, xa̱ʼa̱ ña̱ nda̱kúní íyo ña̱ kéʼéra ta saátu xa̱ʼa̱ ña̱ kúúmiíníra ndee̱. Jehová xítora ndiʼi ña̱ kéʼéyó, tá ña̱ va̱ʼa kúú ña̱ kéʼéyó sákusi̱íníyó-inira, soo tá ña̱ va̱ása va̱ʼa kúú ña̱ kéʼéyó sákusuchíníyó-inira (Sal. 78:41; Prov. 27:11). w23.06 14 párr. 1, 2; 15 párr. 5

Tá ni̱xa̱a̱ ta̱ rey Uzías ndu̱ura iin rey ta̱ ndakúní, na̱ndósó-inira ña̱ mií Jehová kúú ta̱ chi̱ndeétáʼan xíʼinra. ¿Ndáaña sákuaʼayó xíʼin ña̱yóʼo? Ña̱ ndiʼi ña̱ va̱ʼa ña̱ ndákiʼinyó tá ndásakáʼnuyó Jehová miíra táxiña ndaʼa̱yó. Ña̱kán, ná kǒo ka̱ʼa̱nyó ña̱ miíyó kúú na̱ xíni̱ní, va̱ʼaka ná ka̱ʼa̱nyó ña̱ mií Jehová kúú ta̱ chíndeétáʼan xíʼinyó (1 Cor. 4:7). Vitá ná koo iniyó ta ná ndakuniyó ña̱ kúúyó na̱ yiví ku̱a̱chi, ña̱kán ná taxiyó ña̱ chindeétáʼan inkana xíʼinyó. Iin ta̱ hermano ta̱ yáʼaka 60 ku̱i̱ya̱ ni̱ka̱ʼa̱nra ña̱yóʼo: “Chíka̱i̱ ndee̱ ña̱ kǒo sa̱íi̱ tá táxina consejo ndaʼíi̱ chi ña̱yóʼo chíndeétáʼanña xíʼi̱n ña̱ viíka keʼíi̱ iin ña̱ʼa”. Tá ndiʼi tiempo vitá íyo iniyó ta kéʼéyó ña̱ kúni̱ Jehová va̱ʼaní kooyó (Prov. 22:4). w23.09 10 párr. 11

Na̱ cristiano na̱ ni̱xi̱yo tá siglo nu̱ú xi̱niñúʼu chika̱a̱na ndee̱ ña̱ kundeé-inina. Su̱ví loʼo tu̱ndóʼo níxi̱yo nu̱úna saáchi xi̱ ixandi̱va̱ʼa na̱ judío na̱ xi̱niʼi yichi̱ ti̱xin veʼe-ñu̱ʼu xíʼinna, ta saátu xi̱ ixandi̱va̱ʼa na̱ chíñu romano xíʼinna xa̱ʼa̱ ña̱ xi̱ndasakáʼnuna Ndióxi̱, xi̱ ixandi̱va̱ʼatu na̱ veʼena xíʼinna (Mat. 10:21). Ta xi̱xiniñúʼu chikaa̱na ndee̱ ña̱ va̱ása kuniso̱ʼona ña̱ vatá ña̱ xi̱sanáʼa̱ na̱ apóstata, chi na̱yóʼo xi̱kuni̱na ndataʼvína na̱ congregación xíʼin ña̱ xi̱sanáʼa̱na (Hech. 20:​29, 30). Soo nisaá na̱ cristiano yóʼo chi̱kaa̱na ndee̱ ña̱ kundeé-inina ya̱ʼana nu̱ú tu̱ndóʼo (Apoc. 2:3). ¿Ndáaña chi̱ndeétáʼan xíʼinna? Ña̱ nda̱kanixi̱nína xa̱ʼa̱ na̱ ni̱xi̱yo tiempo xi̱naʼá, tá kúú xa̱ʼa̱ ta̱ Job (Sant. 5:​10, 11). Ni̱ka̱ʼa̱nna xíʼin Jehová ña̱ taxira ndee̱ ndaʼa̱na ña̱ ndakú koo inina (Hech. 4:​29-31). Ta saátu xi̱kandíxana ña̱ ku̱a̱ʼání ña̱ va̱ʼa taxi Jehová ndaʼa̱na xa̱ʼa̱ ña̱ kúndeé-inina (Hech. 5:41). Iin ña̱ chindeétáʼan xíʼinyó ña̱ kundeé-iniyó kúú, ña̱ kaʼviyó Biblia ta ndakanixi̱níyó xa̱ʼa̱ na̱ ni̱xi̱yo tiempo xi̱naʼá xíʼin na̱ va̱xi nu̱ú tutu ña̱ tává na̱ ñuu Ndióxi̱. w23.07 3 párr. 5, 6

Nda̱a̱ ni iin yichi̱ va̱ása sandákoo ndaʼa̱ Jehová xíʼin ta̱ Jesús miíyó. ¿Ndáaña ke̱ʼé ta̱ apóstol Pedro tá ni̱ka̱ʼa̱nra ña̱ kǒo xínira ta̱ Cristo? ¿Á nda̱kava-inira? ¿Á nda̱kundeéra ni̱xi̱yora discípulo ta̱ Cristo? Ta̱ Jesús ni̱ka̱ʼa̱nra xíʼin Jehová ña̱ chindeétáʼanra xíʼin ta̱ Pedro ña̱ kǒo sandákoora ña̱ kandíxarara. Tándi̱ʼi ni̱ka̱ʼa̱n ta̱ Jesús xíʼin ta̱ Pedro ña̱ xa̱a̱ ni̱kaʼa̱nra xíʼin Ndióxi̱ ña̱ chindeétáʼanra xíʼinra, ta kǒo níxika-inira ña̱ chikaa̱ ta̱ Pedro ndee̱ xíʼin inka na̱ hermano (Luc. 22:​31, 32). Va̱ʼaní chi̱ndeétáʼan ña̱yóʼo xíʼin ta̱ Pedro. Saátu miíyó, íyo sava ña̱ ndáyáʼviní ña̱ xíniñúʼu ndaka̱xinyó. Tá ná kuu ña̱yóʼo, Jehová kivi kuniñúʼura na̱ anciano ña̱ chindeétáʼanna xíʼinyó ña̱ ndaka̱xin viíyó ña̱ keʼéyó tasaá nda̱kú koo iniyó xíʼinra (Efes. 4:​8, 11). Sa̱kuaʼayó ña̱ mií Jehová ta̱xi ña̱ xi̱xiniñúʼu ta̱ Pedro xíʼin na̱ inka apóstol, ta saátu keʼéra xíʼin miíyó tá siʼna chiñura ndíʼi̱-iniyó xa̱ʼa̱. w23.09 24, 25 párr. 14, 15

Tá xíto Jehová ña̱ chíndeétáʼanyó xíʼin inkana, nda̱a̱ táki̱ʼva íyo ña̱ níkára nu̱úyó saá íyoña ta kúni̱ra chaʼviraña nu̱úyó. Tá ni̱xi̱yoún anciano á siervo ministerial tá ya̱chi̱, Jehová va̱ása nándósó-inira xa̱ʼa̱ chiñu ña̱ ke̱ʼún xa̱ʼa̱ra xíʼin ña̱ ni̱ku̱ʼvi̱-iniún xi̱niúnra (1 Cor. 15:58). Jehová kúni̱ra ña̱ ná kuʼvi̱ní-iniyó kuniyóra ta saátu ña̱ kuʼvi̱-iniyó kuniyó inka na̱ yiví. Ña̱ va̱ʼa xa̱a̱yó kuʼvi̱-iniyó kuniyó Jehová, xíniñúʼu kaʼviyó tu̱ʼunra, ndakanixi̱níyó xa̱ʼa̱ña ta saátu ndiʼi ki̱vi̱ ka̱ʼa̱nyó xíʼinra. Ta ña̱ va̱ʼa na̱ʼa̱yó ña̱ kúʼvi̱-iniyó xíniyó na̱ hermanoyó xíniñúʼu chindeétáʼanyó xíʼinna. Tá ná kuʼvi̱ka-iniyó kuniyó Jehová xíʼin na̱ hermanoyó, saá kúú ña̱ va̱ʼaníka kutáʼanyó xíʼinna ndiʼi tiempo. w23.07 10 párr. 11; 11 párr. 13; 13 párr. 18

Iin tá iinyó kivi ndaka̱xinyó ndáaña keʼéyó tá kíʼin kue̱ʼe̱ miíyó. Tá ndáka̱xinyó ndáa ta̱tán kúú ña̱ kuniñúʼuyó, xíniñúʼu kiʼinyó kuenta xíʼin ña̱ káʼa̱n Biblia ña̱ va̱ása nde̱e ni̱i̱ miíyó, ni ña̱ ku̱ʼu̱nyó nu̱ú na̱ tási á ña̱ kuniñúʼuyó ña̱ʼa ña̱ kítáʼan xíʼin ña̱yóʼo (Hech. 15:20; Gál. 5:​19, 20). Ña̱kán, tá ndáka̱xin na̱ hermano ta̱tán ña̱ kuniñúʼuna, ná va̱ása ixandúxayó xíʼinna ña̱ kuniñúʼuna ta̱tán ña̱ kúni̱ miíyó, saáchi iin tá iinyó xíniñúʼu ndaka̱xin ndáa ta̱tán kúú ña̱ kuniñúʼuyó. Ña̱kán ndáyáʼviní ña̱ ndakanixi̱níyó xa̱ʼa̱ ña̱yóʼo. Ña̱ nu̱ú, iinlá Reino Ndióxi̱ kúú ña̱ sándiʼi-xa̱ʼa̱ ndiʼi kue̱ʼe̱ ña̱ kúúmiíyó (Is. 33:24). Ña̱ u̱vi̱, iin tá iinyó xíniñúʼu ndaka̱xin ndáa ta̱tán kúú ña̱ kivi kuniñúʼuyó (Rom. 14:5). Ña̱ u̱ni̱, kǒo káʼa̱nyó ña̱ va̱ása va̱ʼa xa̱ʼa̱ na̱ hermanoyó ta kǒo sásiyó nu̱úna ña̱ keʼéna ña̱ kúni̱na (Rom. 14:13). Ta ña̱ ku̱mí, miíyó na̱ ndásakáʼnu Jehová kúʼvi̱ní-iniyó xínitáʼanyó ta ña̱ ndáyáʼvika nu̱úyó kúú ña̱ kitáʼan viíyó ti̱xin congregación nu̱úka ña̱ keʼéyó ña̱ kúni̱ miíyó (Rom. 14:​15, 19, 20). w23.07 24 párr. 15

Nu̱ú miíún, ¿á ndáyáʼvi ña̱ kítáʼún xíʼin Jehová? Sana ndáyáʼvivaña nu̱ún. Saáchi ku̱a̱ʼání na̱ yiví náʼa̱na ña̱ ndáyáʼviní ña̱ kítáʼanna xíʼin Jehová (Sal. 104:​33, 34). Ku̱a̱ʼánína xa̱a̱ ke̱ʼéna sacrificio xa̱ʼa̱ Jehová, tá kúú na̱ nazareo na̱ ni̱xi̱yo ñuu Israel nda̱taxina miína ndaʼa̱ Ndióxi̱. Tu̱ʼun yóʼo va̱ʼaní kítáʼanña xíʼin ña̱ xi̱keʼé sava na̱ ñuu Israel, na̱ xi̱ndaka̱xin koo nazareo. Ley ña̱ ka̱ʼyí ta̱ Moisés xi̱kaʼa̱nña ña̱ iin ta̱a á iin ñaʼá va̱ʼa ndaka̱xinna koona nazareo loʼo tiempo, ta saxínuna ña̱ ki̱ndoona keʼéna nu̱ú Jehová (Núm. 6:​1, 2). Na̱ xi̱ndaka̱xin koo nazareo, ni̱xi̱yo sava ña̱ kivi keʼéna ta ni̱xi̱yotu ña̱ va̱ása níxi̱kivi keʼéna. Tá saá, ¿nda̱chun xi̱ndaka̱xinna ña̱ koona nazareo? Xa̱ʼa̱ ña̱ xi̱kuʼvi̱-inina xi̱xinina Jehová kúú ña̱ xi̱keʼénaña, chi xi̱kuni̱na taxina tíxa̱ʼvi ndaʼa̱ra xa̱ʼa̱ ndiʼi ña̱ va̱ʼa ña̱ xi̱taxira ndaʼa̱na (Deut. 6:5; 16:17). w24.02 14 párr. 1, 2

Tá káʼa̱n Biblia xa̱ʼa̱ tu̱ʼun ña̱ “nda̱kú-ini” á ña̱ “ndixaní kúʼvi̱-iniyó xíniyó inkana”, ña̱yóʼo kúni̱ kachiña ña̱ kǒo kuxíkáyó nu̱úna chi kúni̱níyó xíniyóna. Ku̱a̱ʼání yichi̱ xíniñúʼuna tu̱ʼun yóʼo ña̱ ka̱ʼa̱nna ña̱ kúʼvi̱ní-ini Ndióxi̱ xínira na̱ ndásakáʼnu miíra, ta saátu xíniñúʼuna tu̱ʼun yóʼo ña̱ ka̱ʼa̱nna xa̱ʼa̱ miíyó na̱ ndásakáʼnu Jehová ña̱ ndixaní kúʼvi̱-iniyó xínitáʼanyó (2 Sam. 9:​6, 7). Jehová kúni̱ra ña̱ nda̱kú koo iniyó xíʼinra soo tá yáʼa tiempo saá kúú ña̱ sákuaʼayó ña̱ nda̱kúka koo iniyó xíʼinra. Ña̱yóʼo kúú ña̱ ndo̱ʼo ta̱ profeta Daniel. Ku̱a̱ʼání yichi̱ ni̱na̱ʼa̱ ta̱ Daniel ña̱ nda̱kú ni̱xi̱yo-inira xíʼin Jehová. Soo tá kúúmiíra 90 ku̱i̱ya̱ saá ni̱ya̱ʼara nu̱ú iin tu̱ndóʼo ña̱ yo̱ʼvi̱ní. Sava na̱ xi̱kachíñu nu̱ú ta̱ rey yóʼo xi̱sa̱a̱ní-inina xi̱xinina ta̱ Daniel ta kǒo ní xi̱ ixato̱ʼóna Jehová. Ña̱kán nda̱kutáʼanna ña̱ va̱ʼa kotona ndáa ki̱ʼva kaʼnína ta̱ Daniel. Sa̱xínuna ini ta̱ Darío ña̱ chikaa̱ra firmara nu̱ú iin tutu ta xa̱ʼa̱ ña̱yóʼo xi̱niñúʼu na̱ʼa̱ ta̱ Daniel á nda̱kú íyo inira xíʼin ta̱ rey á xíʼin Jehová. Tá xi̱kuni̱ra nda̱kú koo inira xíʼin ta̱ Darío kǒo níxi̱niñúʼu ka̱ʼa̱nra xíʼin Jehová 30 ki̱vi̱. Soo, ta̱ Daniel kǒo nísándakoora ña̱ ka̱ʼa̱nra xíʼin Jehová (Dan. 6:​12-15, 20-22). w23.08 4 párr. 10; 5 párr. 11

Jehová kúni̱ra ña̱ ná chikaa̱yó ndee̱ ña̱ na̱ʼa̱yó ña̱ kúʼvi̱-iniyó xíniyó na̱ hermanoyó. Tá iin na̱ hermano na̱ ñúʼu xíʼinyó ti̱xin congregación va̱ása vií níkeʼéna xíʼinyó, ná kǒo ndakanixi̱níyó ña̱ va̱ása va̱ʼa xa̱ʼa̱na. Va̱ʼaka ná chikaa̱yó ndee̱ ña̱ ndakanixi̱níyó ña̱ sana kǒo níkuni̱vína sándakavana-iniyó ta chíkaa̱na ndee̱ ña̱ keʼéna ña̱ va̱ʼa (Prov. 12:18). Ni kúúyó na̱ yiví ku̱a̱chi soo kúʼvi̱níva-ini Jehová xínira miíyó. Ta kǒo sándakoo ndaʼa̱ra miíyó tá kíʼviyó iin ku̱a̱chi ni kǒo ndákaʼánkara xa̱ʼa̱ña (Sal. 103:9). Xíniñúʼu chikaa̱yó ndee̱ ña̱ keʼéyó nda̱a̱ táki̱ʼva kéʼé yiváyó Jehová ta ixakáʼnu-iniyó xa̱ʼa̱ na̱ hermanoyó (Efes. 4:32–5:1). Saátu ná ndakaʼányó ña̱ si̱lóʼoní kúma̱ní ta kixaa̱ ki̱vi̱ káʼnu Jehová ña̱kán xíniñúʼu viíníka kutáʼanyó xíʼin na̱ hermanoyó. Sana kixáʼa na̱ yiví ixandi̱va̱ʼana xíʼinyó ta nda̱a̱ kivi taánna miíyó veʼeka̱a. Tá ná kuu ña̱yóʼo, saá kuni̱níyó ña̱ chindeétáʼan na̱ hermano xíʼinyó (Prov. 17:17). w24.03 15, 16 párr. 6, 7

Biblia káʼa̱nkaña xa̱ʼa̱ na̱ va̱lí na̱ xi̱kuni̱ ndasakáʼnu Jehová, ni̱kusi̱íní-ini Jehová xíʼinna ta xa̱ʼa̱ ña̱kán va̱ʼaní ni̱xi̱yona. Iin ta̱yóʼo xi̱kuu ta̱ David. Tá ni̱xi̱yo loʼora chi̱kaa̱ra ndee̱ ña̱ ndasakáʼnura Jehová, ta tá ni̱ya̱ʼa tiempo ndu̱ura iin rey ta̱ nda̱kúní ni̱xi̱yo ini xíʼin Jehová (1 Rey. 3:6; 9:​4, 5; 14:8). Tá ná kaʼviún xa̱ʼa̱ ña̱ ndo̱ʼo ta̱ David, ña̱yóʼo chindeétáʼanña xíʼún ña̱ va̱ʼaní ndasakáʼnún Jehová ta nda̱kúní koo iniún xíʼinra. Inka ña̱ kivi keʼún kúú, ña̱ sákuaʼún xa̱ʼa̱ ta̱ Marcos xíʼin ta̱ Timoteo. U̱vi̱ saá na̱yóʼo tá válívína ki̱xáʼana ndásakáʼnuna Jehová ta nda̱kúní ni̱xi̱yo inina xíʼinra. Xa̱ʼa̱ ña̱ va̱ʼaní nda̱kaxinna ña̱ ke̱ʼéna sa̱kúsi̱ína-ini Jehová. ¿Ndáa ki̱ʼva kúni̱ún koún chí nu̱únínu? Ña̱ ndáka̱xiún keʼún vitin kúú ña̱ na̱ʼa̱ ndáa ki̱ʼva koún chí nu̱únínu. Tá káʼún xíʼin Jehová ña̱ chindeétáʼanra xíʼún ta ndáa-iniúnra ta kǒo kéʼún ña̱ kúni̱ miíún, saá kúú ña̱ chindeétáʼanra xíʼún ña̱ vií kana ña̱ kúni̱ún keʼún. Kiviva kusi̱í-iniún ndiʼi ki̱vi̱, ta ndakaʼán chi ndáyáʼviníva ña̱ kéʼún nu̱ú Jehová. Ña̱kán ná chikaa̱yó ndee̱ ña̱ ndasakáʼnuyó Jehová chi kúʼvi̱ní-inira xínira miíyó, ta ña̱yóʼo kúú ña̱ va̱ʼaníka nu̱ú ndiʼika ña̱ʼa. w23.09 13 párr. 18, 19

Ta̱ apóstol Pablo xi̱kunda̱a̱-inira ña̱ na̱ yiví ku̱a̱chi xi̱kuu ndiʼi na̱ ñanira. Tá kúú, tá ki̱xáʼara xáʼa̱nra congregación ña̱ ni̱xi̱yo Jerusalén, va̱ása vií níxi̱ndakanixi̱nína xa̱ʼa̱ra ta xi̱yi̱ʼvína xi̱xininara (Hech. 9:26). Ta savana nda̱a̱ xi̱kaʼa̱nna ña̱ va̱ása va̱ʼa xa̱ʼa̱ra (2 Cor. 10:10). Saátu ta̱ Pablo xi̱nira iin ta̱ apóstol ta̱ xa̱a̱ ku̱a̱ʼá tiempo ndásakáʼnu Jehová ña̱ kéʼéra iin ña̱ va̱ása va̱ʼa, ta xa̱ʼa̱ ña̱yóʼo kivi ndakava-ini inka na̱ cristiano (Gál. 2:​11, 12). Ta saátu nda̱kavaní-inira xíʼin ña̱ ke̱ʼé ta̱ Marcos, saáchi ta̱yóʼo va̱ʼaní xi̱kitáʼanra xíʼinra (Hech. 15:​37, 38). Ta̱ Pablo kivi sandákoora ña̱ va̱ása kitáʼankara xíʼinna xa̱ʼa̱ ña̱ va̱ása va̱ʼa kéʼéna. Soo kǒo nítaxira kasi ña̱yóʼo nu̱úra ña̱ kutáʼanra xíʼin Jehová, ta chi̱kaa̱ra ndee̱ ña̱ vií kutáʼanra xíʼinna tasaá va̱ʼa kachíñura nu̱ú Jehová. ¿Ndáaña chi̱ndeétáʼan xíʼinra? Ta̱ Pablo xi̱kuʼvi̱ní-inira xi̱xinira na̱ hermano ta kǒo níkiʼinra kuenta xíʼin ña̱ va̱ása va̱ʼa xi̱keʼéna chi ña̱ va̱ʼa xi̱keʼéna xi̱kiʼinra kuenta xíʼin. Ta saátu xa̱ʼa̱ ña̱ xi̱kuʼvi̱-inira xi̱xinirana i̱xakáʼnu-inira xa̱ʼa̱na, nda̱a̱ táki̱ʼva ni̱ka̱ʼa̱nra nu̱ú texto ña̱ ka̱ʼviyó ki̱vi̱ vitin. w24.03 15 párr. 4, 5

Ku̱a̱ʼání relato ña̱ va̱xi nu̱ú Biblia káʼa̱nña xa̱ʼa̱ na̱ yiví na̱ viíní ke̱ʼé xíʼin inkana. Tá kúú, na̱ filisteo chí ñuu Guerar ni̱xi̱yona ta mií kán ni̱xi̱yo ta̱ Isaac, soo na̱yóʼo ki̱xáʼa sáa̱na xíʼinra ta nda̱kasina pozo ña̱ ke̱ʼé yivára ta̱ Abrahán. Soo, nu̱úka ña̱ kanitáʼan ta̱ Isaac xíʼin na̱ filisteo xa̱ʼa̱ pozo kán, va̱ʼaka nda̱kiʼinra ku̱a̱ʼa̱nra inka ñuu, ta kán ka̱anra inka pozo (Gén. 26:​12-18). Soo, na̱ filisteo ki̱xáʼa tukuna káʼa̱nna ña̱ ti̱kui̱í tá xi̱ñuʼu ini pozo ña̱ ka̱an ta̱ Isaac kuenta miína xi̱kuura, nisaá ta̱ Isaac kǒo nísa̱a̱ra (Gén. 26:​19-25). ¿Ndáaña chi̱ndeétáʼan xíʼin ta̱ Isaac ña̱ vitá koo inira ni xi̱sasáa̱nara? Sana ku̱a̱ʼání ña̱ va̱ʼa sa̱kuaʼara xíʼin ña̱ xi̱keʼé na̱ yivára. Tá kúú, ta̱ Abrahán vitání ni̱xi̱yo inira, ta ñá Sara va̱ʼaní ni̱xi̱yo iniñá (1 Ped. 3:​4-6; Gén. 21:​22-34). w23.09 15 párr. 4

Tá ni̱ya̱ʼa tiempo Jehová ni̱na̱ʼa̱ra ña̱ kúʼvi̱ní-inira xínira miíyó, saáchi chi̱ndaʼára se̱ʼera ta̱ nu̱ú ña̱ kixira nu̱ú ñuʼú yóʼo ña̱ na̱túʼunra xa̱ʼa̱ Reino Ndióxi̱ ta kuvira xa̱ʼa̱yó ña̱ va̱ʼa ndatavára miíyó nu̱ú ku̱a̱chi. Tándi̱ʼi, nda̱takura ña̱ va̱ʼa kaʼndachíñura chí ndiví. Ña̱yóʼo kúúmií ña̱ ndáyáʼvika káʼa̱n Biblia xa̱ʼa̱: Jehová ndasayi̱i̱ra ki̱vi̱ra tá ná sáxi̱nura ña̱ kúni̱ra, ta ta̱ Jesús kúú ta̱ chindeétáʼan xíʼinra ña̱ va̱ʼa keʼéra ña̱yóʼo. Nda̱a̱ ni iin ña̱ʼa va̱ása kivi kasiña nu̱ú Jehová ña̱ sáxi̱nura ña̱ kúni̱ra. Saáchi miíra káʼa̱n ña̱ keʼévaraña (Is. 46:​10, nota; Heb. 6:​17, 18). Tá ná ya̱ʼa tiempo, ñuʼú yóʼo xa̱a̱ña nduuña iin ñuʼú livi ta ndiʼi na̱ se̱ʼe ta̱ Adán xíʼin ñá Eva kǒoka ku̱a̱chi kuumiína ta kutakuna ndiʼi tiempo (Sal. 22:26). Ta inka ña̱ kúni̱ Jehová keʼéra kúú ña̱ ndiʼi na̱ ángel na̱ íyo chí ndiví xíʼin na̱ yiví na̱ íyo nu̱ú ñuʼú yóʼo iin familia xa̱a̱na kuuna ta inkáchi ndasakáʼnunara (Efes. 1:​8-11). Ndákanda̱ní-iniyó xíʼin ki̱ʼva ña̱ sáxi̱nu Jehová ña̱ kúni̱ra keʼéra. w23.10 20 párr. 7, 8

Na̱ judío na̱ xi̱ndoo ñuu Babilonia nda̱kiʼinna ku̱a̱ʼa̱nna ñuu Jerusalén, soo tá xa̱a̱ ni̱ya̱ʼa loʼo tiempo ña̱ ni̱xa̱a̱na ñuu Jerusalén ni̱ya̱ʼana nu̱ú tu̱ndóʼo, saáchi kǒoví xu̱ʼún níxi̱yo ñuu kán. Ta saátu xi̱xoʼvi̱nína xa̱ʼa̱ ña̱ va̱ása vií níxi̱keʼé na̱ chíñu, ta na̱ xi̱saa̱-ini xi̱xini miína kǒo níxiinna taxina ña̱ ndasaviína templo Jehová. Ña̱kán Jehová chi̱ndaʼára ta̱ profeta Ageo xíʼin ta̱ Zacarías ña̱ va̱ʼa chikaa̱ra ndee̱ xíʼin na̱ ñuura (Ageo 1:1; Zac. 1:1). Ta na̱ profeta yóʼo, va̱ʼaníva chi̱ndeétáʼanna xíʼinna. Soo tá xa̱a̱ ni̱ya̱ʼa 50 ku̱i̱ya̱ na̱ judío tuku nda̱kavaní-inina. Tiempo saá ta̱ Esdras, iin ta̱ va̱ʼaní xi̱kaʼyi Ley, ke̱era ñuu Babilonia ta ni̱xa̱a̱ra Jerusalén ña̱ va̱ʼa chikaa̱ra ndee̱ xíʼinna ta chindeétáʼanra xíʼinna ña̱ ndasakáʼnuna iinlá mií Jehová (Esd. 7:​1, 6). Profecía ña̱ ka̱ʼyi ta̱ Ageo xíʼin ta̱ Zacarías chi̱ndeétáʼanña xíʼin na̱ xi̱ndasakáʼnu Ndióxi̱ tiempo xi̱naʼá ña̱ kandíxakana ña̱ mií Jehová chindeétáʼan xíʼinna ni xi̱yaʼana nu̱ú tu̱ndóʼo. Ta saátu kivi chindeétáʼanña xíʼin miíyó ña̱ kandíxayó ña̱ mií Jehová kivi chindeétáʼan xíʼinyó ña̱ ya̱ʼayó nu̱ú tu̱ndóʼo (Prov. 22:19). w23.11 14, 15 párr. 2, 3

¿Ndáa ki̱ʼva na̱ʼa̱yó ña̱ kúʼvi̱-iniyó xíniyó na̱ hermano? Iin ki̱ʼva ña̱ keʼéyó ña̱yóʼo kúú ña̱ sandíkoyó-inina. Ta ña̱ va̱ʼa keʼéyó ña̱yóʼo xíniñúʼu kundáʼvi-iniyó kuniyóna (1 Tes. 4:18). Soo, ¿ndáaña keʼéyó ña̱ va̱ʼa kuʼvi̱ka-iniyó kuniyóna ndiʼi tiempo? Xíniñúʼu ixakáʼnu-iniyó xa̱ʼa̱na tá kéʼéna ña̱ va̱ása va̱ʼa xíʼinyó. ¿Nda̱chun ndáyáʼviní ña̱ kuʼvi̱-iniyó kunitáʼanyó tiempo vitin? Ná kotoyó ña̱ ni̱ka̱ʼa̱n ta̱ apóstol Pedro: “Xa̱a̱ ku̱yatinní ndiʼi-xa̱ʼa̱ ndiʼi ña̱ʼa, xa̱ʼa̱ ña̱kán, [...] ña̱ ndáyáʼvika kúú ña̱ kuʼvi̱ní-inindó kunitáʼanndó” (1 Ped. 4:​7, 8). ¿Ndáaña kundoʼoyó tiempo ña̱ so̱ndíʼi vitin? Ta̱ Jesús ni̱ka̱ʼa̱nra xa̱ʼa̱ ña̱ kundoʼo na̱ discípulora: “Ndiʼi na̱ ñuu sa̱a̱-inina kunina ndóʼó xa̱ʼa̱ ña̱ kándíxandó yi̱ʼi̱” (Mat. 24:9). Ni kúni̱ ta̱ Ndi̱va̱ʼa ndataʼvíra miíyó, soo kǒo kuchiñura keʼéra ña̱yóʼo. Saáchi iin ña̱ chindeétáʼan xíʼinyó ña̱ inkáchi ndasakáʼnuyó Jehová kúú ña̱ kuʼvi̱ní-iniyó kunitáʼanyó (Filip. 2:​1, 2). w23.11 13 párr. 18, 19

Ku̱a̱ʼání ndee̱ kúúmií Biblia, saáchi tá sánáʼa̱yó na̱ yiví ndáa ki̱ʼva íyo Jehová, kivi nasamana ki̱ʼva ña̱ íyona. Tá kíxáʼana kúnda̱a̱-inina ña̱ nda̱a̱ xa̱ʼa̱ Jehová táki̱ʼva íyo na̱ nda̱kuná nu̱ú saá íyona, ta kúnda̱a̱-inina ña̱ vatá kúú ña̱ káʼa̱n ta̱ Ndi̱va̱ʼa. Tasaá kíxáʼana kúyatinkana nu̱ú Jehová ta kúʼvi̱ka-inina xíninara táki̱ʼva kéʼé miíyó. Ndákanda̱ní-inina chi ku̱a̱ʼání ndee̱ kúúmiíra (Is. 40:26). Xa̱ʼa̱ ña̱ nda̱kúní ndátiin Jehová ku̱a̱chi, va̱ʼaní kúni na̱ yiví (Deut. 32:4). Kúsi̱íní-inina xa̱ʼa̱ ña̱ kúnda̱a̱-inina ña̱ ku̱a̱ʼání ña̱ ndíchi kúúmií Jehová (Is. 55:9; Rom. 11:33). Ta va̱ʼaní kúnina tá kúnda̱a̱-inina ña̱ kúʼvi̱ní-inira xínirana (1 Juan 4:8). Tá kíxáʼana sákuaʼana xa̱ʼa̱ra xáa̱na kándíxana ña̱ kivi taxira ña̱ kutakuna ndiʼi tiempo ta saátu ña̱ xa̱a̱na koona na̱ se̱ʼera. Kúsi̱íní-iniyó ña̱ chíndeétáʼanyó xíʼin na̱ yiví ña̱ kuyatinna nu̱ú Ndióxi̱. Ña̱kán, tá kéʼéyó chiñu yóʼo saá chíndeétáʼanyó xíʼin Jehová (1 Cor. 3:5). w24.02 12 párr. 15

¿Á táxina estudio nda’ún? ¿Á testigo Jehová kúú na̱ yiváún ta sánáʼa̱na yóʼó xa̱ʼa̱ ña̱ nda̱a̱? Tá saá, sana xa̱a̱ ndákanixi̱níún ña̱ ndakuchiún ta va̱ʼaníva tá ndákanixi̱níún ña̱yóʼo, soo íyo iin ña̱ʼa ña̱ xíniñúʼu keʼún tá kúma̱níka ndakuchiún ta ña̱yóʼo kúú ña̱ ndataxiún miíún ndaʼa̱ Jehová. ¿Ndáaña kéʼé iin na̱ yiví tá xa̱a̱ ndátaxina miína ndaʼa̱ Jehová? Kéʼéna iin oración nu̱úra ta kíndo̱ona xíʼinra ña̱ iinlá miíra ndasakáʼnuna ta saátu ña̱ kachíñuna nu̱úra. Tá ndátaxina miína ndaʼa̱ Jehová káʼa̱nna xíʼinra ña̱ kuʼvi̱-inina kuninara xíʼin ndiʼi níma̱na xíʼin ndiʼi ndee̱na xíʼin ndiʼi ña̱ ndákanixi̱nína ta saátu xíʼin ndiʼi ña̱ tákuna (Mar. 12:30). Tá kúni̱ún ndataxiún miíún ndaʼa̱ Jehová, iinlá miíún xíniñúʼu ka̱ʼa̱n xíʼinra. Soo, tá xa̱a̱ ná ndakuchiún ndiʼi na̱ yiví koto yóʼó, saá kunda̱a̱-inina ña̱ nda̱taxiún miíún ndaʼa̱ Jehová. Iin ña̱ʼa ña̱ ndáyáʼviní kúú ña̱ ndataxiyó miíyó ndaʼa̱ Jehová, ta xíniñúʼu sáxi̱nuyóña. Ña̱kán tá xa̱a̱ ke̱ʼún ña̱yóʼo chikaa̱ ndee̱ ña̱ saxínúnña chi ña̱yóʼo kúú ña̱ kúni̱ Jehová keʼún (Ecl. 5:4). w24.03 2 párr. 2; 4 párr. 5

Ndiʼi na̱ xa̱a̱ ti̱ndaʼa̱ koo tu̱ndóʼo nu̱úna nda̱a̱ táki̱ʼva káchi Biblia (1 Cor. 7:28). ¿Nda̱chun? Saáchi u̱vi̱ saá na̱yóʼo na̱ yiví ku̱a̱chi kúúna. Ta saátu xa̱a̱ síín íyona ta xa̱a̱ síín ña̱ kútóona, sana xa̱a̱ síín xa̱ʼnuna á xa̱a̱ síín ñuuna. Tá yáʼa tiempo sana kíxáʼana kéʼéna sava ña̱ʼa ña̱ kǒo níxi̱kiʼinna kuenta xíʼin tá xi̱xikana xíʼin táʼanna ta xa̱ʼa̱ ña̱yóʼo va̱ása viíka kítáʼanna ta káku ku̱a̱chi ti̱xin veʼena. Nu̱úka ña̱ ndakunina ña̱ u̱vi̱ saána kúúmií ku̱a̱chi ta chikaa̱na ndee̱ ña̱ ndasaviína ña̱yóʼo, sana chikaa̱ ku̱a̱chi táʼanna á sana kivi ndakanixi̱nína ña̱ va̱ʼaka sandákoo táʼanna á ña̱ kaʼndana tutu ña̱ ti̱ndaʼa̱na. Soo, ¿á va̱ʼa keʼéna ña̱yóʼo? Va̱ása. Jehová kúni̱ra ña̱ na̱ ti̱ndaʼa̱ ná ixato̱ʼóna na̱ ti̱ndaʼa̱ xíʼinna ni íxayo̱ʼvi̱ña xíʼinna ña̱ koo xíʼin táʼanna. w24.03 16 párr. 8; 17 párr. 11

Ni xa̱a̱ nda̱kuchiún, soo chíkaa̱kavaún ndee̱ ña̱ sakúaʼún xa̱ʼa̱ Jehová ta xa̱ʼa̱ ña̱kán kándíxaníkaún ña̱ keʼéra chí nu̱únínu, ña̱ taxira ña̱ kutakún ndiʼi tiempo ta va̱ása xo̱ʼvi̱kaún (Heb. 5:13–6:1). Sana xa̱a̱ ndóʼún ña̱ káʼa̱n Romanos 5:​2-4, saáchi sana xa̱a̱ yáʼavaún nu̱ú tu̱ndóʼo soo xa̱a̱ kíʼún kuenta ña̱ kíndo̱ova-ini Jehová xíʼin ña̱ kéʼún. Xa̱ʼa̱ ña̱ kúnda̱a̱-iniún ña̱ kúsi̱í-ini Jehová xíʼin ña̱ kéʼún kǒo xíka-iniún ña̱ sáxi̱nuvara ndiʼi ña̱ ni̱ka̱ʼa̱nra xíʼún. Ña̱kán, vitin kándíxaníkavaún ña̱ káʼa̱n Ndióxi̱ nu̱úka ña̱ xi̱kandíxaúnra tá ya̱chi̱, saáchi va̱ʼaní kítáʼún xíʼinra vitin ta kándíxaún ña̱ káʼa̱nra. Ta ña̱yóʼo chindeétáʼanña xíʼún ña̱ kotoún ndáa ki̱ʼva íyoún xíʼin na̱ veʼún, ndáa ki̱ʼva íyo ña̱ ndáka̱xiún keʼún ta saátu ndáa ki̱ʼva xíniñúʼún tiempo ña̱ kúúmiíún. Ña̱ chíndeétáʼan xíʼinyó ña̱ kindo̱o va̱ʼayó nu̱ú Ndióxi̱ kúú ña̱ kandíxayó ña̱ xi̱nuva ña̱ ndátuyó koo chí nu̱únínu. Soo, saátu ta̱ Pablo ni̱ka̱ʼa̱nra xa̱ʼa̱ inka ña̱ʼa ña̱ ndáyáʼviní, ña̱ kǒo xíniñúʼu kaka-iniyó ña̱ ndixava xi̱nu ña̱ koo chí nu̱únínu (Rom. 15:13). w23.12 12 párr. 17; 13 párr. 18

Tá yáʼayó nu̱ú iin tu̱ndóʼo ña̱ yo̱ʼvi̱ní, sana kǒo xíni̱yó ndáaña keʼéyó ta kǒo ndáka̱xin viíyó ña̱ keʼéyó. Túviyó ña̱ kǒo kúndeéka-iniyó xíʼin iin tu̱ndóʼo ña̱ yáʼayó nu̱ú, chi tuku ta tukuña va̱xi nu̱úyó. Xa̱ʼa̱ ña̱kán, ¿ndáa ki̱ʼva chíndeétáʼan Jehová xíʼinyó tá túvi̱yó ña̱ kǒo kúndeéka-iniyó xíʼin tu̱ndóʼo ña̱ yáʼayó nu̱ú? Jehová káʼa̱nra xíʼinyó ña̱ ndakú koo iniyó. Ndakanixi̱ní xa̱ʼa̱ iin barco tú ndíkaa̱-ini mar tasaá kíxáʼa ndeéní kúun sa̱vi̱ ta túyóʼo ndeéní kíxáʼa kánda̱nú. Tú barco yóʼo kúúmiínú ka̱a chí síi̱nnú ta ña̱yóʼo kíʼviña ini ti̱kui̱í tasaá chíndeétáʼanña xíʼinnú ña̱ kǒo ka̱nda̱nínú, tasaá kǒo ña̱ʼa ndóʼo na̱ ñúʼu ininú. Soo va̱ʼaníka chíndeétáʼan ka̱a yóʼo xíʼin tú barco tá kánda̱nú, saátu miíyó tá kúni̱yó ña̱ chindeétáʼan Jehová xíʼinyó tá yáʼayó nu̱ú iin tu̱ndóʼo, kǒo xíniñúʼu sandákooyó ña̱ ndasakáʼnuyóra chi ña̱ xíniñúʼu keʼéyó kúú ña̱ chikaa̱yó ndee̱ ña̱ nda̱kú koo iniyó xíʼinra. w24.01 22 párr. 7, 8

Tá kíxáʼa yíʼviún, ndakanixi̱ní ndáaña xa̱a̱ ke̱ʼé Jehová tá ya̱chi̱, saátu ndakanixi̱ní xa̱ʼa̱ ña̱ʼa ña̱ i̱xava̱ʼara. Tá kúú tá xítoyó ña̱ viíní ndáa Jehová saa válí xíʼin yita ni kǒo ndásakáʼnuñara, saá va̱ʼaníka kándíxayó ña̱ kundaara miíyó (Mat. 6:​25-32). Saátu ndakanixi̱ní xa̱ʼa̱ ña̱ kéʼé Jehová xa̱ʼa̱ na̱ ndásakáʼnu miíra. Sana kivi kaʼviún xa̱ʼa̱ na̱ xi̱ndasakáʼnu Jehová tiempo tá ya̱chi̱ á na̱ ndásakáʼnu miíra tiempo vitin. Saátu ndakanixi̱ní ndáa ki̱ʼva xa̱a̱ ndáa Jehová yóʼó, ndáa ki̱ʼva chi̱ndeétáʼanra xíʼún ña̱ ku̱nda̱a̱-iniún xa̱ʼa̱ ña̱ nda̱a̱ (Juan 6:44). ¿Ndáa ki̱ʼva xa̱a̱ ndákuiinra oración ña̱ káʼún xíʼinra? (1 Juan 5:14). ¿Ndáaña va̱ʼa ndákiʼún xa̱ʼa̱ ña̱ ta̱xira se̱ʼera ña̱ ni̱xi̱ʼi̱ra xa̱ʼún? (Efes. 1:7; Heb. 4:​14-16). w24.01 4 párr. 6