Tutu ña̱ káʼa̱n xíʼinyó nda̱saa koo reunión Ña̱ Kéʼé na̱ Ndásakáʼnu Ndióxi̱

Ña̱ va̱xi nu̱ú tutu yóʼo

1. Nu̱ú tutu yóʼo va̱xi ña̱ xíniñúʼu keʼé ndiʼi na̱ yáʼa ti̱xin reunión Ña̱ Kéʼé na̱ Ndásakáʼnu Ndióxi̱. Tá sa̱kán sákuaʼa kúee ndiʼi na̱ ya̱ʼa reunión saátu xíniñúʼu kundiku̱nna ña̱ káʼa̱n Tutu nu̱ú Va̱xi ña̱ Keʼéyó Reunión. Xíniñúʼu ka̱ʼa̱nna xíʼin ndiʼi na̱ publicador ña̱ ná chikaa̱na ndee̱ ña̱ ya̱ʼana nu̱ú plataforma ña̱ taxina discurso á demostración. Saátu na̱ ndákutáʼan ni̱ʼi xíʼin congregación kivi ya̱ʼana tá kándíxa ndinuʼu-inina ña̱ sánáʼa̱ Biblia ta kéʼéna ña̱ káʼa̱nña. Tá iinna va̱ása kúúna publicador soo kúni̱na ya̱ʼana ti̱xin reunión, ta̱ superintendente ña̱ reunión Ña̱ Kéʼé na̱ Ndásakáʼnu Ndióxi̱ ka̱ʼa̱nra xíʼinna ndáaña xíniñúʼu keʼéna ña̱ va̱ʼa ya̱ʼana, ta saátu ka̱ʼa̱nra xíʼinna á xa̱a̱ kivi ya̱ʼana. Tá xa̱a̱ káʼa̱nna xíʼin na̱yóʼo, xíniñúʼu koo na̱ káʼvi xíʼinna á iin na̱ yivána na̱ kúú testigo. Ta saátu xíniñúʼu keʼé na̱ publicador na̱ ta̱ʼán ndakuchi (od-S cap. 8 párr. 8).

ÑA̱ KA̱ʼA̱NNA TÁ NÁ KIXÁʼA REUNIÓN

2. Iin minuto ka̱ʼa̱nna. Tá ná ndiʼi katana yaa ta keʼéna oración, ta̱ kúú presidente ña̱ reunión Ña̱ Kéʼé na̱ Ndásakáʼnu Ndióxi̱ ka̱ʼa̱nra xa̱ʼa̱ ña̱ sakúaʼana ki̱vi̱ saá. Ta ka̱ʼa̱nra xa̱ʼa̱ ña̱ chindeétáʼan xíʼin na̱ congregación.

ÑA̱ NDÁYÁʼVINÍ KÁʼA̱N TU̱ʼUN NDIÓXI̱

3. Discurso (10 minuto). Nu̱ú Tutu nu̱ú Va̱xi ña̱ Keʼéyó Reunión va̱xi ki̱vi̱ discurso ta va̱xi̱tu u̱vi̱ á u̱ni̱ punto xíʼinña. Iin anciano á iin siervo ministerial ta̱ va̱ʼa káʼa̱nndosó taxiña. Tá iin libro xa̱á kíxáʼayó káʼviyó nu̱ú Biblia, discurso yóʼo kixáʼaña xíʼin iin video ña̱ káʼa̱n xa̱ʼa̱ libro yóʼo. Ta̱ ka̱ʼa̱nndosó, kivi ka̱ʼa̱nra nda̱saa kítáʼan ña̱ ni̱ka̱ʼa̱nna nu̱ú video xíʼin discurso miíra. Soo ña̱ ndáyáʼvika kúú ña̱ ka̱ʼa̱nra xa̱ʼa̱ ndiʼi ña̱ va̱xi nu̱ú Tutu nu̱ú Va̱xi ña̱ Keʼéyó Reunión. Saátu kivi kuniñúʼura na̱ʼná ña̱ va̱xi xíʼin discurso ña̱ va̱ʼa ka̱ʼa̱nkara xa̱ʼa̱ ña̱ ndáyáʼvika ta kivitu kuniñúʼura inkaka ña̱ kítáʼan xíʼin ña̱ káʼa̱nra xa̱ʼa̱.

4. Ná ka̱ʼa̱nyó xa̱ʼa̱ ña̱ chindeétáʼan xíʼinyó (10 minuto). Ña̱ ndáka̱tu̱ʼún kuitína koo táʼví yóʼo, ta va̱ása ka̱ʼa̱nna xa̱ʼa̱ inkaka ña̱ʼa tá ná kixáʼana ni tá ná sandíʼina. Iin ta̱ anciano á iin siervo ministerial ta̱ va̱ʼa káʼa̱nndosó taxiña. Ta̱ taxiña xíniñúʼu keʼéra u̱vi̱ pregunta ta saátu ndaka̱xinra á kaʼvina texto ña̱ va̱xi kán. 30 segundo á loʼoka xíniñúʼu ka̱ʼa̱n na̱ ndakuiin.

5. Ña̱ kaʼviyó nu̱ú tu̱ʼun Ndióxi̱ (4 minuto). Iin ta̱a kúú na̱ xíniñúʼu taxi ña̱yóʼo. Xíniñúʼu kaʼvi kuitíra ña̱ ni̱ka̱ʼyi̱ nu̱ú tutu ña̱ nda̱kiʼinra ta va̱ása ka̱ʼa̱nra xa̱ʼa̱ inka ña̱ʼa tá ná kixáʼara ni tá ná sandíʼira. Ta̱ presidente kiʼinra kuenta ndáa ki̱ʼva chindeétáʼanra xíʼin na̱yóʼo ña̱ vií ná kaʼvina, ña̱ kunda̱a̱-inina xíʼin ña̱ káʼvina ta ná va̱ása ti̱ví yuʼúna tá káʼvina. Saátu kiʼinra kuenta ndáa mií xíniñúʼu sándaana ta̱chína ta ndáa mií sanúunaña, ta saátu ndáa mií keʼéna pausa. Tá ku̱a̱ʼáka versículo ña̱ Biblia xíniñúʼu kaʼvina, sava yichi̱ ta̱ superintendente ña̱ reunión Ña̱ Kéʼé na̱ Ndásakáʼnu Ndióxi̱, kiʼinra kuenta xíʼin ña̱yóʼo tá ndáka̱xinra ndáana kúú na̱ kaʼvi ña̱yóʼo.

NÁ SANÁʼA̱ VIÍYÓ

6. Xa̱ʼu̱n minuto ka̱ʼa̱nna. Táʼví yóʼo chindeétáʼan xíʼinna ña̱ koo tu̱ʼvana tá sánáʼa̱na na̱ yiví xa̱ʼa̱ Ndióxi̱. Ta saátu viíní kixáʼana natúʼunna xíʼin na̱ yiví, ka̱ʼa̱nna xíʼinna xa̱ʼa̱ tu̱ʼun Ndióxi̱ ta sanáʼa̱nana. Ta nda̱a̱ na̱ kúú anciano va̱ʼa ya̱ʼa taxi ña̱yóʼo. Na̱ ya̱ʼa taxi ña̱yóʼo xíniñúʼu kiʼinna kuenta xíʼin lección ña̱ va̱xi nu̱ú folleto Sákuaʼaka ña̱ vií kaʼviún ta sanáʼún saátu ña̱ va̱xi nu̱ú folleto Sánáʼa̱yó na̱ yiví chi kúʼvi̱-iniyó xíniyóna ña̱ va̱xi ti̱xin paréntesis táki̱ʼva káʼa̱n Tutu nu̱ú Va̱xi ña̱ Keʼéyó Reunión. Sava semana koo iin táʼví nu̱ú kivi nda̱ka̱tu̱ʼúnna na̱ hermano. Ta iin anciano á iin siervo ministerial ta̱ va̱ʼa káʼa̱nndosó taxi ña̱yóʼo (nu̱ú párrafo 15 káʼa̱nña ndáa ki̱ʼva keʼún ña̱yóʼo).

7. Kixáʼa natúʼun xíʼin na̱ yiví. Iin ta̱a á iin ñaʼá taxi ña̱yóʼo. Tá ta̱a kúú ta̱ ya̱ʼa, iin ta̱a ya̱ʼa xíʼinra, tá ñaʼá kúú ñá ya̱ʼa, iin ñaʼá ya̱ʼa xíʼinñá. Kivitu ya̱ʼa iin na̱ veʼena xíʼinna. Kivi koona á kundichina tá ná ya̱ʼana. (Ña̱ va̱ʼa kunda̱a̱ka-iniún xa̱ʼa̱ ña̱yóʼo ta saátu ndáa ki̱ʼva natúʼún, koto ña̱ káʼa̱n párrafo 12 xíʼin 13).

8. Ndikó nu̱úna. Iin ta̱a á iin ñaʼá taxi ña̱yóʼo. Tá ta̱a kúú ta̱ ya̱ʼa, iin ta̱a ya̱ʼa xíʼinra, tá ñaʼá kúú ñá ya̱ʼa, iin ñaʼá ya̱ʼa xíʼinñá (km-S 5/97 pág. 2). Kivi koona á kundichina tá ná ya̱ʼana. Na̱ ya̱ʼa yóʼo xíniñúʼu na̱ʼa̱na ndáaña ka̱ʼa̱nna xíʼin na̱ xa̱a̱ na̱túʼunna xíʼin tá ya̱chi̱. (Ña̱ va̱ʼa kunda̱a̱ka-iniún xa̱ʼa̱ ña̱yóʼo ta saátu ndáa ki̱ʼva natúʼún, koto ña̱ káʼa̱n párrafo 12 xíʼin 13).

9. Ná xa̱a̱na ndasakáʼnuna Ndióxi̱: Iin ta̱a á iin ñaʼá taxi ña̱yóʼo. Tá ta̱a kúú ta̱ ya̱ʼa, iin ta̱a ya̱ʼa xíʼinra, tá ñaʼá kúú ñá ya̱ʼa, iin ñaʼá ya̱ʼa xíʼinñá (km-S 5/97 pág. 2). Kivi koona á kundichina tá ná ya̱ʼana. Tá ná na̱ʼa̱na ndáa ki̱ʼva káʼvina xíʼin na̱ yiví, va̱ása xíniñúʼu na̱ʼa̱na ndiʼi ña̱ kéʼéna tá kíxáʼana sákuaʼana á tá sándiʼina sákuaʼana xíʼin iin na̱ yiví tá va̱ása káʼa̱n ña̱ káchíñuna xíʼin xa̱ʼa̱ña. Va̱ása xíniñúʼu kaʼvina iníísaá párrafo ña̱ sakúaʼana soo kiviva kaʼvinaña tá kúni̱na.

10. Ndakani xa̱ʼa̱ ña̱ kándíxaún. Tá iin discurso kúúña, iin ta̱a xíniñúʼu taxiña. Tá iin escenificación kúúña, iin ta̱a á iin ñaʼá kivi ya̱ʼa. Tá ta̱a kúú ta̱ ya̱ʼa, iin ta̱a ya̱ʼa xíʼinra, tá ñaʼá kúú ñá ya̱ʼa, iin ñaʼá ya̱ʼa xíʼinñá á kivitu ya̱ʼa iin na̱ veʼena xíʼinna. Na̱ taxi ña̱yóʼo xíniñúʼu viíní ka̱ʼa̱nna xa̱ʼa̱ pregunta ña̱ káʼa̱n título xa̱ʼa̱, ta kivi kuniñúʼuna ña̱ va̱xi nu̱ú tutu yóʼo. Na̱ ya̱ʼa yóʼo kivi ka̱ʼa̱nna xa̱ʼa̱ ña̱yóʼo tá kúni̱na.

11. Discurso. Iin ta̱ hermano taxi ña̱yóʼo, táki̱ʼva íyo iin discurso ña̱ táxina nu̱ú na̱ congregación saá kooña. Tá ña̱ ka̱ʼa̱nra xa̱ʼa̱ va̱xiña nu̱ú apéndice 1 ña̱ folleto Sánáʼa̱yó na̱ yiví chi kúʼvi̱-iniyó xíniyóna, ta̱yóʼo xíniñúʼu na̱ʼa̱ra ndáa ki̱ʼva kuniñúʼuna versículo yóʼo ña̱ natúʼunna xíʼin na̱ yiví. Kivi ka̱ʼa̱nra ndáaña kúni̱ kachi iin versículo, ama kuniñúʼunaña ta ndáa ki̱ʼva kuniñúʼunaña ña̱ sanáʼa̱na iin na̱ yiví. Soo tá káʼa̱nra xa̱ʼa̱ iin lección ña̱ va̱xi nu̱ú folleto, xíniñúʼu ka̱ʼa̱nra ndáa ki̱ʼva kuniñúʼuna ña̱yóʼo tá xa̱a̱ nátúʼunna xíʼin na̱ yiví. Soo tá túvi miíra, va̱ʼa ka̱ʼa̱nra xa̱ʼa̱ ejemplo ña̱ va̱xi nu̱ú punto 1 ña̱ lección yóʼo á kuniñúʼura inkaka versículo ña̱ va̱xi nu̱ú ña̱yóʼo.

12. Contenido. Párrafo yóʼo xíʼin párrafo 13, káʼa̱nña xa̱ʼa̱ ki̱ʼva ña̱ keʼéna táʼví ña̱ naní “Kixáʼa natúʼun xíʼin na̱ yiví” xíʼin ña̱ naní “Ndikó nu̱úna”. Tá kǒo káʼa̱nna xíʼinna keʼéna inkaka ña̱ʼa, na̱ taxi táʼví yóʼo xíniñúʼu na̱ʼa̱na ndáa ki̱ʼva sanáʼa̱na na̱ yiví xa̱ʼa̱ iin ña̱ nda̱a̱ ña̱ va̱xi nu̱ú Biblia ta ndikó tukuna natúʼunna xíʼinna inka yichi̱. Na̱ ya̱ʼa yóʼo xíniñúʼu ka̱ʼa̱nna xa̱ʼa̱ ña̱ kútóo na̱ yiví kunda̱a̱-inina xa̱ʼa̱. Tá kúni̱na, kivi taxina iin tutu á na̱ʼa̱na iin video ña̱ va̱xi nu̱ú ña̱ kit ña̱ enseñanza. Nu̱ú táʼví yóʼo xíniñúʼu na̱ʼa̱na ndáa ki̱ʼva natúʼun viína xíʼin na̱ yiví ta na̱ʼa̱na ña̱ ndíʼi-inina xa̱ʼa̱na nu̱úka ña̱ sakúaʼa xíʼin xi̱nína ña̱ ka̱ʼa̱nna xíʼinna,

13. Ndáa míí natúʼunna xíʼin na̱ yiví. Na̱ ya̱ʼa taxi ña̱yóʼo, xíniñúʼu keʼéna nda̱a̱ táki̱ʼva káa nu̱ú íyona. Tá kúú ña̱yóʼo:

1) Veʼe tá veʼe. Ña̱yóʼo kúú ña̱ nátúʼunna xíʼin na̱ yiví veʼena, tá nátúʼunna xíʼinna xíʼin teléfono á tá káʼyina iin carta nu̱úna, nda̱a̱ táki̱ʼva nátúʼunna xíʼin na̱ yiví na̱ xa̱a̱ nda̱ni̱ʼína tá ya̱chi̱.
2) Natúʼún xa̱ʼa̱ Ndióxi̱ nu̱ú xíkaún. Ña̱yóʼo kúú ña̱ nátúʼunna xíʼin na̱ yiví xa̱ʼa̱ Ndióxi̱ nda̱a̱ ndáaka nu̱ú xíkana á nda̱a̱ ndáaka ña̱ʼa kéʼéna, tá kúú ta sánáʼa̱na iin texto nu̱ú iin na̱ káchíñu xíʼinna, nu̱ú na̱ káʼvi xíʼinna, nu̱ú na̱ ndóo yatin xíʼinna á tá xa̱a̱ ku̱a̱ʼa̱nna xíʼin carro.
3) Natúʼun xa̱ʼa̱ Ndióxi̱ nu̱ú xíka ku̱a̱ʼá na̱ yiví. Tá ndítana xíʼin carro válí, tá xa̱a̱ nátúʼunna xíʼin na̱ yiví nu̱ú káchíñuna, chí calle, chí nu̱ú íyo parque, chí estacionamiento á inkaka lugar nu̱ú íyo na̱ yiví.

14. Tá xíniñúʼuna video á inkaka tutu. Na̱ ya̱ʼa yóʼo kivi kuniñúʼuna iin video á taxina iin tutu. Soo tá xíniñúʼu kuniñúʼuna iin video á tá kúni̱na kuniñúʼunaña, kǒo xíniñúʼu chikaa̱naña soo ka̱ʼa̱nvana xa̱ʼa̱ña.

ÑA̱ KÉʼÉYÓ NA̱ TESTIGO

15. Siʼna iin yaa xítana tasaá kíxáʼa táʼví yóʼo. Ti̱xin ña̱ 15 minuto yóʼo, ya̱ʼa iin á u̱vi̱ asignación ña̱ chindeétáʼan xíʼin na̱ hermano ña̱ keʼéna ña̱ sánáʼa̱ Biblia. Iin ta̱ anciano á iin ta̱ siervo ministerial ta̱ xíni̱va̱ʼa kivi taxi asignación yóʼo. Soo iin ta̱ anciano xíniñúʼu taxi táʼví ña̱ naní Ña̱ xíniñúʼu na̱ congregación. Tá xa̱a̱ ti̱xin sava táʼví yóʼo va̱xi pregunta, kivikava keʼéna inkaka pregunta. Loʼo xíniñúʼu ka̱ʼa̱n ta̱ taxi ña̱yóʼo tá ná kixáʼara, ña̱ va̱ʼa koo tiempo nu̱úra ña̱ ka̱ʼa̱nra xa̱ʼa̱ ña̱ ndáyáʼvika ta saátu ndakoora tiempo ña̱ ka̱ʼa̱n na̱ hermano. Tá íyo iin entrevista ti̱xin táʼví yóʼo, xíniñúʼu ya̱ʼana nu̱ú plataforma, tá kivi keʼénaña.

16. Estudio ña̱ congregación (30 minuto). Iin ta̱ anciano ta̱ va̱ʼa káʼa̱nndosó taxiña, soo tá kǒo ku̱a̱ʼá na̱ anciano ti̱xin congregación, kivi kuniñúʼuna na̱ siervo ministerial na̱ va̱ʼa káʼa̱nndosó soo ndiʼi na̱ anciano ndaka̱xin ndáana kúú na̱ kivi taxi ña̱yóʼo. Na̱ ndaka̱xinna, va̱ása xíniñúʼu ya̱ʼana ku̱a̱ʼáka tiempo. Kuniñúʼutuna texto ña̱ ndáyáʼvika ta chindeéna na̱ hermano ña̱ kundiku̱nna consejo ña̱ sakúaʼana. Ña̱ va̱ʼa keʼéna ña̱yóʼo, kivi kundiku̱nna recuadro ña̱ naní: Na̱ hermano na̱ kéʼé pregunta ti̱xin reunión, ¿ndáaña xíniñúʼu kiʼinna kuenta xíʼin? (w23.04 página 24, recuadro). Tá xa̱a̱ ni̱ka̱ʼún xa̱ʼa̱ ndiʼi ña̱ xíniñúʼu kaʼvina semana saá, soo kíndo̱oka tiempo, va̱ása xíniñúʼu ka̱ʼún xa̱ʼa̱ inkaka ña̱ʼa nda̱a̱ ná xi̱nu 30 minuto. Tá kivi, xa̱a̱ síín síín na̱ kivi taxiña xíʼin na̱ kaʼviña semana tá semana. Tá ná ka̱ʼa̱n ta̱ presidente xíʼin ta̱ ya̱ʼa táʼví yóʼó ña̱ loʼoka minuto ná taxiraña, mií ta̱yóʼo ndaka̱xin ndáa ki̱ʼva keʼéraña. Iin ña̱ kivi keʼéra kúú ña̱ va̱ása kaʼvina sava párrafo.

ÑA̱ KA̱ʼA̱NNA TÁ XA̱A̱ NDI̱ʼI REUNIÓN

17. U̱ni̱ minuto ka̱ʼa̱nna. Ta̱ presidente ka̱ʼa̱n loʼora xa̱ʼa̱ ña̱ ndáyáʼvika ña̱ ni̱ka̱ʼa̱nna xa̱ʼa̱ ti̱xin reunión. Kivi ka̱ʼa̱nra xíʼin na̱ hermano ña̱ kivi ka̱ʼa̱nna ndáaña ku̱tóona. Ka̱ʼa̱ntura xa̱ʼa̱ ña̱ sakúaʼayó inka semana. Tá íyoka tiempo, kivi ka̱ʼa̱nra ki̱vi̱ na̱ ya̱ʼa taxi iin discurso á iin demostración inka semana. Saátu kivi kuniñúʼura tiempo yóʼo ña̱ taxira anuncio á ña̱ kaʼvira iin carta. Sava anuncio yóʼo, tá kúú hora ña̱ keena sanáʼa̱na na̱ yiví á grupo na̱ keʼé limpieza, va̱ása taxinaña ti̱xin tiempo yóʼo, nu̱ú tablero ña̱ anuncio chinúuñana. Tá va̱ása nani tiempo yóʼo ña̱ taxina anuncio ña̱ ndáyáʼvi á ña̱ kaʼvina carta, ta̱ presidente ka̱ʼa̱nra xíʼin na̱ taxi táʼví ña̱ naní Ña̱ kéʼéyó na̱ testigo, ña̱ loʼoka minuto ná taxinaña (koto párrafo 16 xíʼin 19). Reunión yóʼo ndiʼiña xíʼin iin yaa ta saátu xíʼin iin oración.

CONSEJO XÍʼIN TU̱ʼUN VA̱ʼA

18. Tá xa̱a̱ ndi̱ʼi ni̱ya̱ʼa iin na̱ ka̱ʼvi, na̱ ta̱xi demostración á discurso, ta̱ presidente kuniñúʼura iin minuto ña̱ taxira consejo ña̱ va̱xi nu̱ú lección ña̱ káchíñuna xíʼin. Tá ná ka̱ʼa̱nra ki̱vi̱ iin na̱ ya̱ʼa, va̱ása ka̱ʼa̱nra ndáa lección kúú ña̱ káchíñuna xíʼin. Tá xa̱a̱ ni̱ya̱ʼana, ta̱ presidente siʼna ka̱ʼa̱nra xíʼinna ña̱ va̱ʼaní ni̱ya̱ʼana, saáví ka̱ʼa̱nra xíʼinna xa̱ʼa̱ lección ña̱ ka̱chíñuna xíʼin ta ka̱ʼa̱ntura xíʼinna nda̱chun va̱ʼaní xi̱niñúʼuna ña̱kán, ta kivitu vií ka̱ʼa̱nra xíʼinna ndáaña xíniñúʼuka keʼéna ta ndáa ki̱ʼva keʼénaña ña̱ va̱ʼa kundiku̱nna ña̱ káʼa̱n lección kán. Kivi ka̱ʼa̱ntura xa̱ʼa̱ inka ña̱ kivi chindeétáʼan xíʼin mií na̱ ni̱ya̱ʼa á xíʼin na̱ hermano. Tá ná ndiʼi reunión á inkaka yichi̱, kivi taxina consejo ndaʼa̱ na̱ ni̱ya̱ʼa xíʼin tutu ña̱ naní Sánáʼa̱yó na̱ yiví chi kúʼvi̱-iniyó xíniyóna, ta saátu tutu ña̱ nani Na̱ sánáʼa̱ á libro Beneficiese. (Koto párrafo 19, 24 xíʼin 25, ña̱ va̱ʼa kunda̱a̱-iniún xa̱ʼa̱ chiñu ña̱ kúúmií ta̱ presidente ña̱ reunión Ña̱ kéʼé na̱ ndásakáʼnu Ndióxi̱ ta saátu xa̱ʼa̱ inkaka ta̱ táxi consejo).

TIEMPO

19. Nda̱a̱ ni iin na̱ táxi iin táʼví ti̱xin reunión, va̱ása xíniñúʼu ya̱ʼana ku̱a̱ʼáka minuto nu̱ú ña̱ xíniñúʼu ya̱ʼana (ni ta̱ presidente va̱ása xíniñúʼu ya̱ʼara ku̱a̱ʼáka minuto). Nu̱ú Tutu nu̱ú Va̱xi ña̱ Keʼéyó Reunión xa̱a̱ va̱xi tiempo ña̱ taxina iin tá iin asignación, soo tá xa̱a̱ ni̱ka̱ʼa̱nna ndiʼi ña̱ va̱xi nu̱ú ña̱yóʼo, kǒo xíniñúʼu ndukúkana ña̱ ka̱ʼa̱nna ña̱ va̱ʼa saxínuna tiempona. Tá ni̱ya̱ʼana xíʼin tiempo ta̱ presidente á ta̱ consejero auxiliar xíniñúʼu taxi consejo ndaʼa̱ na̱ ni̱ya̱ʼa xíʼin tiempo (koto párrafo 24 xíʼin 25). Iníísaá reunión iin hora xíʼin 45 minuto kooña, ta tiempo ña̱ xítana xíʼin ña̱ kéʼéna oración ndíkaa̱ña ti̱xin tiempo yóʼo.

VISITA TA̱ SUPERINTENDENTE ÑA̱ CIRCUITO

20. Tá va̱xi ta̱ superintendente ña̱ circuito kotora ña̱ congregación, reunión yóʼo kooña nda̱a̱ táki̱ʼva káʼa̱n Tutu nu̱ú Va̱xi ña̱ Keʼéyó Reunión. Soo va̱ása koo estudio ña̱ congregación, chi discurso ña̱ 30 minuto ña̱ taxi ta̱ superintendente ña̱ circuito koo nu̱úña. Tá kúma̱níka kixáʼa discurso ña̱ servicio, ta̱ presidente ka̱ʼa̱n xa̱ʼa̱ ña̱ sa̱kúaʼana semana kán ta saátu xa̱ʼa̱ ña̱ sakúaʼana inka semana, taxira anuncio á kaʼvira carta ña̱ ki̱xaa̱ ta saáví ka̱ʼa̱nra ña̱ ya̱ʼa ta̱ superintendente ña̱ circuito taxira discurso. Tá ná ndiʼi discurso, mií ta̱ hermano ta̱ superintendente ña̱ circuito ka̱ʼa̱n ki̱vi̱ yaa ña̱ katana tasaá ndiʼi reunión. Kivitu ndaka̱xinra iin ta̱ hermano ta̱ keʼé oración. Va̱ása koo inka sala nu̱ú ya̱ʼa na̱ kaʼvi, na̱ taxi discurso á demostración semana yóʼo. Grupo na̱ káʼa̱n inka tu̱ʼun kiviva koo reuniónna táki̱ʼva xíyoña ni ná koo visita ña̱ congregación nu̱ú ñúʼuna. Soo na̱ ñúʼu ti̱xin grupo yóʼo kuniso̱ʼona discurso ña̱ servicio ña̱ taxi ta̱ superintendente ña̱ circuito xíʼin na̱ congregación na̱ kíʼin kuenta xíʼinna.

SEMANA ÑA̱ KOO ASAMBLEA

21. Va̱ása koo ni iin reunión ti̱xin semana ña̱ xíyo iin asamblea. Soo sandákaʼánna na̱ congregación ña̱ iin tá iinna á xíʼin na̱ veʼena kaʼvina ña̱ koo semana kán veʼena.

SEMANA ÑA̱ KOO CONMEMORACIÓN

22. Tá ná ndakava ki̱vi̱ ña̱ koo conmemoración ma̱ʼñú semana va̱ása koo reunión Ña̱ Kéʼé na̱ Ndásakáʼnu Ndióxi̱.

TA̱ SUPERINTENDENTE ÑA̱ REUNIÓN ÑA̱ KÉʼÉ NA̱ NDÁSAKÁʼNU NDIÓXI̱

23. Ndiʼi na̱ anciano kúú na̱ ndáka̱xin na̱ koo superintendente ña̱ reunión yóʼo. Ta̱yóʼo kiʼin kuenta xíʼin reunión yóʼo ña̱ vií ná kanaña, ta ná kundiku̱n na̱ ya̱ʼa ña̱ káʼa̱n tutu yóʼo. Ta̱yóʼo xíniñúʼu natúʼunra xíʼin inka ta̱ táxi consejo xa̱ʼa̱ ndiʼi ña̱ yáʼa ti̱xin reunión yóʼo. Tá xa̱a̱ ka̱na Tutu nu̱ú Va̱xi ña̱ Keʼéyó Reunión ña̱ u̱vi̱ yo̱o̱, saá ndaka̱xinra ndáana ya̱ʼa taxi táʼví reunión yóʼo. Ndaka̱xinra ndáana kaʼvi Biblia, na̱ taxi demostración á discurso, saátu nda̱kaxinra ndáana koo presidente ti̱xin reunión ña̱ ma̱ʼñú semana. Na̱ anciano kúú na̱ xíniñúʼu ndaka̱xin na̱ ya̱ʼa u̱vi̱ ña̱ so̱ndíʼi yóʼo (koto párrafo 3 nda̱a̱ 16 xíʼin 24). Tá ná ndaka̱xinra na̱ kaʼvi Biblia á na̱ ya̱ʼa demostración, xíniñúʼu kiʼinníra kuenta xíʼin ku̱i̱ya̱ na̱ hermano yóʼo, xa̱ʼa̱ ña̱ xíni̱na ta á kuchiñuna ka̱ʼa̱nna ta ndakanina xa̱ʼa̱ tema ña̱ va̱xi nu̱ú tutu yóʼo. Xíniñúʼu natúʼunra xíʼin na̱ ya̱ʼa tá kúma̱níka ya̱ʼa u̱ni̱ semana á ku̱a̱ʼá semana ña̱ ya̱ʼana. Kuniñúʼura Tutu ña̱ asignación ña̱ keʼé na̱ ndásakáʼnu Ndióxi̱ (S-89). Saátu kiʼinra kuenta ña̱ ná chinúuna programa ña̱ káʼa̱n xa̱ʼa̱ ndiʼi ña̱ koo ti̱xin reunión nu̱ú tablero. Ndiʼi na̱ anciano kivi ndaka̱xinna iin na̱ siervo ministerial á iin na̱ anciano na̱ kivi chindeétáʼan xíʼin ta̱ kúú presidente ña̱ reunión, soo nda̱saa na̱ anciano kúú na̱ kivi ndaka̱xin na̱ taxi inkaka asignación.

TA̱ PRESIDENTE ÑA̱ REUNIÓN ÑA̱ KÉʼÉ NA̱ NDÁSAKÁʼNU NDIÓXI̱

24. Iin tá iin semana, iin na̱ anciano kúú ta̱ xíniñúʼu koo presidente ña̱ reunión yóʼo (tá kǒo ku̱a̱ʼá na̱ anciano, kivi kuniñúʼuna na̱ siervo ministerial na̱ va̱ʼa káʼa̱nndosó). Mií ta̱ presidente kúú ta̱ ndaka̱xin ndáaña ka̱ʼa̱nra nu̱ú kíxáʼa reunión xíʼin nu̱ú ndíʼiña. Ka̱ʼa̱nra ki̱vi̱ iin tá iin na̱ ya̱ʼa ti̱xin reunión yóʼo. Soo tá loʼo kúú na̱ anciano, sana nda̱a̱ miíra taxi iin táʼví reunión yóʼo, tá kúú ña̱ na̱ʼa̱ kuitíra iin video. Loʼova xíniñúʼu ka̱ʼa̱nra tá yáʼa iin iinna. Ndiʼi na̱ anciano ndaka̱xin ndáana anciano kivi koo presidente. Koo iin programa ña̱ ka̱ʼa̱n xíʼin na̱ ndaka̱xinna ama koona presidente, sana ta̱ superintendente ña̱ reunión Ña̱ Kéʼé na̱ Ndásakáʼnu Ndióxi̱ kivi ku̱a̱ʼáka yichi̱ koora presidente nu̱ú na̱ inkaka anciano. Tá iin ta̱ anciano va̱ʼava táxira “Estudio ña̱ congregación”, kiviva koora presidente ña̱ reunión yóʼo. Ta̱ kúú presidente xíniñúʼu vií ka̱ʼa̱nra xíʼin na̱ ya̱ʼa kaʼvi á na̱ táxi demostración xíʼin discurso, vií va̱ʼa ná taxira consejo ndaʼa̱na tá xíniñúʼunaña, va̱ása xíniñúʼu nda̱ʼyi̱ra nu̱úna. Saátu kiʼinra kuenta xíʼin reunión ña̱ ná ndiʼiña mií hora ña̱ xíniñúʼu ndiʼiña (koto párrafo 17 xíʼin 19). Kivi kundichi inka micrófono nu̱ú plataforma nu̱ú kundichi ta̱ presidente ta ka̱ʼa̱nra xa̱ʼa̱ na̱ ya̱ʼa, tasaá na̱yóʼo kivi kama ndaana nu̱ú plataforma. Saátu kivi koora síi̱n tú mesa loʼo nu̱ú plataforma tá xa̱a̱ ná ya̱ʼa na̱ kaʼvi Biblia xíʼin na̱ ya̱ʼa ti̱xin táʼví ña̱ naní “Ná sanáʼa̱ viíyó”.

INKA TA̱ TÁXI CONSEJO

25. Chiñu nu̱ú ta̱ consejero auxiliar kúú ña̱ taxira consejo tá xíniñúʼunaña. Tá xa̱a̱ ná ndi̱ʼi reunión, taxira consejo ndaʼa̱ na̱ anciano xíʼin na̱ siervo ministerial na̱ yáʼa reunión Ña̱ Kéʼé na̱ Ndásakáʼnu Ndióxi̱, na̱ táxi discurso público, na̱ yáʼa xíʼin Tutu Ña̱ Nátúʼun xíʼinyó xíʼin na̱ káʼviña, á na̱ yáʼa xíʼin estudio ña̱ congregación ta saátu na̱ káʼvi ti̱xin ña̱yóʼo (koto párrafo 19).

NA̱ YA̱ʼA INKA SALA

26. Tá ku̱a̱ʼá kúú na̱ yáʼa, kivi koo inka lugar nu̱ú ya̱ʼana. Iin tá iin clase yóʼo koo inka ta̱ taxi consejo ta kiʼinra kuenta xíʼinna. Tá íyo ku̱a̱ʼá na̱ anciano, iin ta̱ anciano kúú ta̱ taxi consejo á iin siervo ministerial ta̱ va̱ʼa káʼa̱nndosó. Ndiʼi na̱ anciano kivi ndaka̱xin ndáana taxi consejo ta kivi ka̱ʼa̱nna á nasa̱ma na̱yóʼo ta ama nasa̱ma na̱yóʼo. Ta̱ táxi consejo xíniñúʼu kundiku̱nra ña̱ va̱xi nu̱ú párrafo 18. Tá ná ndiʼi táʼví ña̱ naní “Ná ka̱ʼa̱nyó xa̱ʼa̱ ña̱ chindeétáʼan xíʼinyó”, ña̱ va̱xi ti̱xin táʼví ña̱ naní “Ña̱ ndáyáʼviní káʼa̱n tu̱ʼun Ndióxi̱”, saá ka̱ʼa̱nna xíʼin na̱ ya̱ʼa inka sala ná ya̱ʼana chí kán. Xíniñúʼu ndikó tukuna chí sala nu̱ú ndóo na̱ ku̱a̱ʼá tá ná sandíʼina táʼví yóʼo.

VIDEO

27. Ti̱xin reunión ña̱ xíyo ma̱ʼñú semana koo sava video, ta ña̱yóʼo kivi kotonaña nu̱ú JW Library^®.

S-38-MXG 9/25