“Xa̱a̱ ku̱yatinní kixaa̱ ki̱vi̱ Jehová: chika̱a̱ ndee̱ ña̱ xu̱xa koo iniún”
“Ná chika̱a̱yó ndee̱ ña̱ xa̱a̱yó kooyó na̱ yiví xu̱xa.” (HEB. 6:1)
1, 2. ¿Ndáaña chi̱ndeétáʼan xíʼin na̱ cristiano na̱ ñuu Jerusalén xíʼin Judea ña̱ “kununa ku̱ʼu̱nna chí yuku̱”?
IIN YICHI̱, na̱ discípulo ta̱ Jesús ku̱yatinna nu̱úra ta ni̱nda̱ka̱tu̱ʼunnara: “¿Ndáa señal na̱ʼa̱ nu̱úndi̱ ña̱ xa̱a̱ íyoún xíʼinndi̱ ta saátu ña̱ xa̱a̱ ku̱yatin ndiʼi-xa̱ʼa̱ ñuyǐví yóʼo?”. Ta̱ Jesús ni̱ka̱ʼa̱nra xíʼinna xa̱ʼa̱ iin profecía ña̱ ni̱xi̱nu tá siglo nu̱ú. Ni̱ka̱ʼa̱nra xíʼinna xa̱ʼa̱ iin ña̱ʼa ña̱ nda̱kanda̱ní-inina xíʼin, ta ña̱yóʼo na̱ʼa̱ ña̱ xa̱a̱ ku̱yatinní ndiʼi-xa̱ʼa̱ ñuyǐví yóʼo. Ta ni̱ka̱ʼa̱nra tá ná kuu ña̱yóʼo, “na̱ íyo chí Judea ná kununa ku̱ʼu̱nna chí yuku̱” (Mat. 24:1-3, 15-22). ¿Á nda̱kuni na̱ discípulo señal kán ta kuniso̱ʼona ña̱ ni̱ka̱ʼa̱n ta̱ Jesús xíʼinna?
2 Tá ku̱i̱ya̱ 61, ta̱ apóstol Pablo ka̱ʼyira iin carta nu̱ú na̱ cristiano na̱ xi̱ndoo chí Jerusalén xíʼin inkaka ñuu ña̱ íyo yatin kán. ¿Nda̱chun ke̱ʼéra ña̱yóʼo? Ña̱ va̱ʼa kunda̱a̱-inira ndáa ki̱ʼva íyona. Ta̱ Pablo xíʼin na̱ cristiano kǒo níndakanixi̱nína ña̱ ti̱xin u̱ʼu̱n ku̱i̱ya̱ xi̱nu señal kán ta kixáʼa “tu̱ndóʼo ña̱ káʼnu” (Mat. 24:21). Tá ku̱i̱ya̱ 66, na̱ chíñu ñuu Roma, xíʼin ta̱ Cestio Galo, nda̱kasina Jerusalén. Soo, tá xa̱a̱ ku̱nu̱mí sandiʼi-xa̱ʼa̱na Jerusalén, ta̱ Cestio Galo ni̱ka̱ʼa̱nra xíʼin na̱ chíñu ñuu Roma ña̱ ná ndakiʼinna ku̱ʼu̱nna, ña̱yóʼo chi̱ndeétáʼan xíʼin na̱ xi̱ndoo ñuu Jerusalén ña̱ ná kununa ku̱ʼu̱nna.
3. ¿Ndáa consejo ta̱xi ta̱ Pablo ndaʼa̱ na̱ cristiano, ta nda̱chun ke̱ʼéraña?
3 Na̱ cristiano xi̱niñúʼu viíní nda̱kanixi̱nína ta ña̱yóʼo chi̱ndeétáʼan xíʼinna ña̱ nda̱kunina ndáaña xi̱kuni kachi ndiʼi ña̱ʼa kán tasaá kununa ku̱ʼu̱nna. Sava na̱yóʼo, kúeení ku̱ndaa̱-inina. Nda̱a̱ táki̱ʼva íyo na̱ lée na̱ xíʼi “leche” saá ni̱xi̱yona (kaʼvi Hebreos 5:11-13). Ta sava na̱yóʼo ni xa̱a̱ ku̱a̱ʼání ku̱i̱ya̱ xi̱ndasakáʼnuna Ndióxi̱ ki̱xáʼana kúxíkána nu̱úra (Heb. 3:12). Ni “xa̱a̱ ku̱yatinní kixaa̱ ki̱vi̱ Ndióxi̱”, savana va̱ása níxi̱xa̱ʼankana reunión (Heb. 10:24, 25). Ña̱kán, ta̱xi ta̱ Pablo consejo yóʼo ndaʼa̱na: “Vitin ña̱ xa̱a̱ kándíxayó ña̱ nu̱ú va̱ʼa sa̱kuaʼayó xa̱ʼa̱ ta̱ Cristo, ná chika̱a̱yó ndee̱ ña̱ xa̱a̱yó kooyó na̱ yiví xu̱xa” (Heb. 6:1).
4. ¿Nda̱chun ndáyáʼviní kuenta kooyó, ta ndáaña chindeétáʼan xíʼinyó?
4 Miíyó ndóoyó tiempo nu̱ú xi̱nu nu̱ú táʼví so̱ndíʼi profecía ña̱ ni̱ka̱ʼa̱n ta̱ Jesús xa̱ʼa̱. “Ki̱vi̱ káʼnu Jehová”, ña̱ sandíʼi-xa̱ʼa̱ra ñuyǐví ta̱ Ndi̱va̱ʼa, “xa̱a̱ yatin va̱xiña” (Sof. 1:14). Xa̱ʼa̱ ña̱kán, xíniñúʼu kunditoníyó ta ná ndakundeéyó kuaʼnuyó xíʼin tu̱ʼun Ndióxi̱ (1 Ped. 5:8). Soo ¿á ndixa kéʼéyó ña̱yóʼo? Ña̱ chikaa̱yó ndee̱ ña̱ xu̱xa koo iniyó chindeétáʼanña xíʼinyó ña̱ ndakaʼányó ndáa tiempo kúú ña̱ ndóoyó.
¿Ndáaña kúni̱ kachi ña̱ xu̱xa koo iniyó?
5, 6. a) ¿Ndáaña kúni̱ kachi ña̱ xu̱xa koo iniyó? b) ¿Ndáaña xíniñúʼu keʼéyó ña̱ va̱ʼa xa̱a̱yó xu̱xa koo iniyó?
5 Ta̱ Pablo ni̱ka̱ʼa̱nra xíʼin na̱ cristiano ña̱ ná chikaa̱na ndee̱ ña̱ koona na̱ yiví xu̱xa, soo saátu ni̱ka̱ʼa̱nra xíʼinna ndáaña chindeétáʼan xíʼinna (kaʼvi Hebreos 5:14). Na̱ yiví na̱ xu̱xa-ini va̱ása xíʼi kuitína “leche”; saáchi ña̱ʼa “ña̱ téʼé” kúú ña̱ xíxina. Xa̱ʼa̱ ña̱kán va̱ʼa kúnda̱a̱-inina xíʼin ña̱ sákuaʼana nu̱ú Biblia, nda̱a̱ ña̱ ndíchi va̱ʼa (1 Cor. 2:10). Ta saátu, kéʼéna ña̱ sákuaʼana, xa̱ʼa̱ ña̱kán viíní íyo ña̱ ndákanixi̱nína, ta kúnda̱a̱-inina ndáaña kúú ña̱ va̱ʼa ta ndáaña kúú ña̱ va̱ása va̱ʼa. Xa̱ʼa̱ ña̱kán, tá xíniñúʼu ndaka̱xinna ndáaña keʼéna, ndákanixi̱nína xa̱ʼa̱ ña̱ káʼa̱n Biblia ta ndáa ki̱ʼva chindeétáʼanña xíʼinna.
6 Ta̱ Pablo ni̱ka̱ʼa̱nra: “Xa̱ʼa̱ ña̱kán, va̱ʼaníka ná kuniso̱ʼoyó vitin nu̱úka ña̱ xi̱keʼéyó tá ya̱chi̱ ña̱ va̱ʼa ná kǒo sandákooyó ña̱ kandíxayó Ndióxi̱” (Heb. 2:1). Tá va̱ása kíʼinyó kuenta, kivi kixáʼayó kuxíkayó nu̱ú Ndióxi̱. Ña̱ va̱ʼa ná kǒo kundoʼoyó ña̱yóʼo, xíniñúʼu viíní kuniso̱ʼoyó ta ndakanixi̱níyó xa̱ʼa̱ ña̱ va̱xi nu̱ú Biblia. Ná nda̱ka̱tu̱ʼunyó miíyó: “¿Á ña̱ sa̱kuaʼi̱ tá xa̱ʼa̱ kuití kúnda̱a̱-ini xa̱ʼa̱? ¿Á xa̱ʼa̱ ña̱ kúni̱ kuití sáxi̱nui̱ ña̱ kindo̱i̱ xíʼin Ndióxi̱ kúú ña̱ kéʼíi̱ ña̱yóʼo? ¿Ndáaña kivi keʼíi̱ ña̱ va̱ʼa xa̱a̱ ña̱ nda̱a̱ níma̱i̱ ta ndakundeíi̱ kuaʼnukai̱ xíʼin tu̱ʼun Ndióxi̱?”. Ña̱ va̱ʼa xa̱a̱yó kooyó na̱ yiví xu̱xa-ini xíniñúʼu keʼéyó u̱vi̱ ña̱ʼa: xíniñúʼu viíní kuxini̱yó tu̱ʼun Ndióxi̱ ta saátu kandíxayó ña̱ káʼa̱nra.
Ná kuxini̱ va̱ʼayó tu̱ʼun Ndióxi̱
7. Ña̱ kuxini̱ va̱ʼayó tu̱ʼun Ndióxi̱ ¿Ndáa ki̱ʼva chíndeétáʼanña xíʼinyó?
7 Ta̱ Pablo ka̱ʼyira: “Ta na̱ xíʼika leche va̱ása xíni̱na xa̱ʼa̱ tu̱ʼun Ndióxi̱ chi ña̱yóʼo kúú ña̱ sánáʼa̱ ndáaña kúú ña̱ va̱ʼa, saáchi na̱ válíva kúúna” (Heb. 5:13; Nuevo Testamento Interlineal Griego-Español ). Ña̱ va̱ʼa xa̱a̱yó xu̱xa koo iniyó, xíniñúʼu vií kunda̱a̱-iniyó ndáaña káʼa̱n Ndióxi̱ xíʼinyó. Ta ña̱yóʼo va̱xiña nu̱ú Biblia, ña̱kán, tá káʼviyóña xíniñúʼu viíní ndakanixi̱níyó xa̱ʼa̱ ña̱ káʼa̱nña ta kuniñúʼuyó tutu ña̱ tává “ta̱ nda̱kúní-ini ta̱ ndíchiní” (Mat. 24:45-47). Tásaá ná keʼéyó, kunda̱a̱-iniyó ndáaña ndákanixi̱ní Ndióxi̱ ta saátu miíyó viíníka xa̱a̱yó ndakanixi̱níyó. Ná kotoyó ña̱ ndo̱ʼo ñá Rosa.a Ña̱yóʼo káchiñá: “Iin ña̱ va̱ʼaní chíndeétáʼan xíʼi̱n kúú ña̱ káʼvii̱ Biblia ndiʼi ki̱vi̱. U̱vi̱ ku̱i̱ya̱ sa̱ndíʼi̱ ka̱ʼviña, soo chi̱ndeétáʼanña xíʼi̱n ña̱ ku̱ndaa̱-inii̱ ndáa ki̱ʼva íyo ta̱ i̱xava̱ʼa yi̱ʼi̱: ña̱ʼa ña̱ kútóora xíʼin ña̱ va̱ása kútóora, ndee̱ ña̱ kúúmiíra ta saátu ña̱ ndíchiníra. Ña̱ káʼvii̱ Biblia ndiʼi ki̱vi̱ xa̱a̱ chíndeétáʼanña xíʼi̱n tá ya̱ʼi̱ nu̱ú tu̱ndóʼo ña̱ yo̱ʼvi̱ní”.
8. ¿Ndáa ki̱ʼva chíndeétáʼan Biblia xíʼinyó tá káʼviyóña?
8 Tá ná kaʼviyó tu̱ʼun Ndióxi̱ ndiʼi ki̱vi̱, ña̱ va̱xi nu̱úña va̱ʼaní chindeétáʼanña xíʼinyó (kaʼvi Hebreos 4:12). Loʼo tá loʼo kixáʼaña násamaña miíyó ta viíní xa̱a̱yó kooyó nu̱ú Jehová. ¿Á xíniñúʼu tavá loʼo kaún tiempo ña̱ kaʼviún Biblia ta ndakanixi̱níún xa̱ʼa̱ ña̱ káʼa̱nña?
9, 10. ¿Ndáaña kúni̱ kachi ña̱ kuxini̱ va̱ʼayó Tu̱ʼun Ndióxi̱? Ka̱ʼa̱n xa̱ʼa̱ iin ejemplo.
9 Xa̱ʼa̱ ña̱kán, ndáyáʼviní, kuxini̱yó ña̱ va̱xi nu̱ú Biblia. Na̱ “va̱lí” na̱ ni̱ka̱ʼa̱n ta̱ Pablo xa̱ʼa̱ sana xi̱xinina loʼova ña̱ va̱xi nu̱ú tu̱ún Ndióxi̱. Soo va̱ása níxi̱kunda̱a̱-inina xa̱ʼa̱ mií ña̱ ndáyáʼvika chi va̱ása níxikeʼéna ña̱ xi̱sakúaʼana. Va̱ása ndíchi níxi̱yona saáchi kǒo níxiniñúʼuna consejo ña̱ va̱xi nu̱ú Biblia ña̱ va̱ʼa ndaka̱xinna ndáaña keʼéna.
10 Xa̱ʼa̱ ña̱kán, va̱ása kivi ka̱ʼa̱nyó ña̱ viíní xíniyó tu̱ʼun Ndióxi̱ tá va̱ása kéʼéyó ña̱ xa̱a̱ sa̱kuaʼayó. Ña̱yóʼo kúú ña̱ ndo̱ʼo iin ñá hermana ñá naní Kyle. Ñáyóʼo na̱túʼun kúáchiñá xíʼin ñá xi̱kachíñu xíʼinñá. Soo, ñáyóʼo xi̱kuni̱vañá ndasaviíñá ku̱a̱chi yóʼo. ¿Ndáaña ke̱ʼéñá? Ñáyóʼo káchiñá: “Texto ña̱ siʼna nda̱kanixi̱níi̱ xa̱ʼa̱ kúú Romanos 12:18, yóʼo káʼa̱nña: ‘Tá kivika, chika̱a̱níkandó ndee̱ ña̱ vií kutáʼanndó xíʼin ndiʼi na̱ yivíʼ. Xa̱ʼa̱ ña̱kán ni̱ka̱ʼi̱n xíʼin ñá káchíñu xíʼi̱n ña̱ xi̱kuni̱i̱ ka̱ʼi̱n xíʼinñá tá ná ndiʼi kachíñundi̱”. U̱vi̱ saáná va̱ʼaní na̱túʼunna, ta ñá xi̱kachíñu xíʼin ñá Kyle nda̱kanda̱ní-iniñá xa̱ʼa̱ ña̱ ke̱ʼéñá ña̱yóʼo. Ñáyóʼo káchikañá “Sa̱kuaʼi̱ ña̱ tá ndíku̱nyó ña̱ káʼa̱n Biblia, ndiʼi ña̱ kéʼéyó va̱ʼaní kanaña”.
Ná sákuaʼayó kandíxayó
11. ¿Ndáa ejemplo náʼa̱ nu̱úyó ña̱ tá yáʼayó nu̱ú tu̱ndóʼo kivi ixayo̱ʼvi̱ña xíʼinyó kandíxayó ña̱ káʼa̱n Ndióxi̱?
11 Tá yáʼayó nu̱ú tu̱ndóʼo ña̱ yo̱ʼvi̱ní kivi ixayo̱ʼvi̱ña xíʼinyó keʼéyó ña̱ káʼa̱n Tu̱ʼun Ndióxi̱. Ná ka̱ʼa̱nyó xa̱ʼa̱ ña̱ ndo̱ʼo na̱ israelita. Tá ni̱ya̱ʼa loʼo tiempo ña̱ ta̱vá Jehová na̱yóʼo ñuu Egipto, ki̱xáʼana “nátúʼun kúáchina xíʼin ta̱ Moisés” ta ki̱xáʼana “xítondosóna Jehová”. ¿Nda̱chun ke̱ʼéna ña̱yóʼo? Xa̱ʼa̱ ña̱ kǒo ti̱kui̱í níxi̱yo (Éxo. 17:1-4). Tándi̱ʼi ni̱ka̱ʼa̱nna xíʼin Jehová ña̱ kuniso̱ʼona ndiʼi ña̱ káʼa̱nra xíʼinna, soo tá ni̱ya̱ʼa u̱vi̱ yo̱o̱ ni̱ya̱ʼa ndosóna Ley ña̱ xi̱kaʼa̱n ña̱ va̱ása xíniñúʼu ndasakáʼnuna ndióxi̱ vatá (Éxo. 24:3, 12-18; 32:1, 2, 7-9). ¿Nda̱chun va̱ása níkandíxana? ¿Á xa̱ʼa̱ ña̱ ni̱ku̱a̱chi ta̱ Moisés chí yukú Horeb nani káʼa̱n Ndióxi̱ xíʼinra ndáaña keʼéra ta xa̱ʼa̱ ña̱kán ni̱yi̱ʼvína ña̱ keʼéna ña̱ va̱ása va̱ʼa xíʼinna? Xa̱a̱ iin yichi̱ na̱ amalequita ka̱nitáʼanna xíʼinna soo ta̱ Moisés chi̱ndeétáʼanra xíʼinna tá na̱ndisora ndaʼa̱ra ta ku̱chiñuvana xíʼinna. Soo vitin kǒora íyo xíʼinna. ¿Ndáaña keʼéna tá ná kúni̱ tukuna kanitáʼanna xíʼinna? (Éxo. 17:8-16.) Ni nda̱a̱ ndáaka ña̱ ku̱u, na̱ ñuu Israel “kǒo níxiinna kuniso̱ʼonara” (Hech. 7:39-41). Tá ni̱ya̱ʼa loʼo, xa̱ʼa̱ ña̱ ni̱yi̱ʼvína kǒo níkandíxana Jehová ta va̱ása níki̱ʼvina ñuʼú ña̱ ni̱ka̱ʼa̱nra taxira ndaʼa̱na. Xa̱ʼa̱ ña̱kán, ta̱ Pablo ni̱ka̱ʼa̱nra xíʼin na̱ cristiano ña̱ ná va̱ása keʼéna táki̱ʼva ke̱ʼé na̱ ñuu Israel (Heb. 4:3, 11).
12. ¿Nda̱saa chi̱ndeétáʼan ña̱ xi̱niso̱ʼo ta̱ Jesús xíʼinra ta ndáa ki̱ʼva chi̱ndeétáʼanña xíʼinra?
12 Ña̱ va̱ʼa kooyó na̱ yiví na̱ xu̱xa-ini xíʼin tu̱ʼun Ndióxi̱, xíniñúʼu kuniso̱ʼoyó ndiʼi ña̱ káʼa̱n Jehová. Ña̱ kuniso̱ʼoyó ña̱ káʼa̱nna xíʼinyó sava yichi̱ íxaxuxaña xíʼinyó, nda̱a̱ táki̱ʼva ndo̱ʼo ta̱ Jesús (kaʼvi Hebreos 5:8, 9). Tá ni̱xi̱yo ta̱ Jesús chí ndiví ka̱ndíxara ndiʼi ña̱ ni̱ka̱ʼa̱n yivára xíʼinra. Soo tá ki̱xira nu̱ú ñuʼú yóʼo, sana i̱xayo̱ʼvi̱ña xíʼinra keʼéra ña̱ xi̱kuni Jehová; saáchi ni̱xo̱ʼvi̱níra, soo ni ku̱a̱ʼá tu̱ndóʼo ni̱ya̱ʼara nu̱ú, ña̱ va̱ʼaní ka̱ndíxara chi̱ndeétáʼanña xíʼinra ña̱ ku̱chiñura ke̱ʼéra chiñu ña̱ ta̱xi Ndióxi̱ ndaʼa̱ra: ña̱ koora Rey xíʼin Su̱tu̱ Káʼnu.
13. ¿Ndáa ki̱ʼva na̱ʼa̱yó ña̱ xíniso̱ʼoyó ña̱ káʼa̱n Ndióxi̱?
13 Ta miíyó, ¿á kandíxayó ña̱ káʼa̱n Jehová tá ná ya̱ʼayó nu̱ú tu̱ndóʼo ña̱ yo̱ʼvi̱ní? (Kaʼvi 1 Pedro 1:6, 7.) Káxiní káʼa̱n Ndióxi̱ xíʼinyó ndáaña xíniñúʼu keʼéyó, nu̱ú ku̱a̱chi kini, ña̱ ka̱ʼa̱nyó ña̱ nda̱a̱, ndáa ki̱ʼva káʼa̱nyó xíʼin inkana, ña̱ ka̱ʼviyó tu̱ʼun Ndióxi̱, ña̱ ku̱ʼu̱nyó reunión á kitayó natúʼunyó xíʼin na̱ yiví (Jos. 1:8; Mat. 28:19, 20; Efe. 4:25, 28, 29; 5:3-5; Heb. 10:24, 25). ¿Á kuniso̱ʼoyó Ndióxi̱ ni ná ya̱ʼayó nu̱ú tu̱ndóʼo? Tá ná keʼéyó saá, na̱ʼa̱yó ña̱ xa̱a̱ kúúyó na̱ yiví na̱ xa̱a̱ xu̱xa-ini xíʼin tu̱ʼun Ndióxi̱.
Ña̱ kooyó na̱ yiví xu̱xa-ini xíʼin tu̱ʼun Ndióxi̱ ¿ndáa ki̱ʼva chíndeétáʼanña xíʼinyó?
14. ¿Ndáa ki̱ʼva chi̱ndeétáʼan ña̱ xu̱xa-ini iin ta̱ hermano xíʼinra?
14 Ña̱ vií koo ña̱ ndákanixi̱níyó ndáaña miíyó na̱ cristiano, saáchi chíndeétáʼanña xíʼinyó ña̱ ndakuniyó ndáaña kúú ña̱ va̱ʼa ta ndáaña kúú ña̱ va̱ása va̱ʼa nu̱ú ñuyǐví yóʼo nu̱ú kéʼéna nina ña̱ kini (Efe. 4:19). Tá kúú, ta̱ Jorge, ta̱ cristiano yóʼo káʼvira tutu ña̱ tává na̱ ñuu Ndióxi̱ ta chíndayáʼviníraña, tá ki̱xáʼara káchíñura iin lugar, soo nina na̱ ñaʼá xi̱kachíñu kán. Ta̱yóʼo káchira: “Ku̱a̱ʼání ná xi̱kachíñu xíʼi̱n xi̱keʼéna ña̱ kini, ta va̱ása níxi̱kukaʼan nu̱úna; soo ni̱xi̱yo iin ñá to̱ʼó xi̱kuu-ini ta xi̱kuniñá kunda̱a̱-iniñá xa̱ʼa̱ Biblia. Soo iin yichi̱, tá íyo u̱vi̱ miíndi̱ kixáʼañá káʼa̱nñá tu̱ʼun vi̱xin á yaku̱a̱ xíʼi̱n. Tá xa̱ʼa̱ ndakanixi̱níi̱ ña̱ si̱kiva náʼa̱ñá, soo loʼo tá loʼo ki̱xáʼañá kúyatinkañá nu̱úi̱, ta va̱ása níxi̱kunda̱a̱-inii̱ ndáaña keʼíi̱. Soo, saá nda̱kaʼíi̱n iin ña̱ ka̱na nu̱ú La Atalaya ña̱ káʼa̱n xa̱ʼa̱ iin ta̱ hermano nu̱ú káchíñura. Artículo yóʼo xi̱ka̱ʼa̱nña xa̱ʼa̱ ta̱ José xíʼin ñá síʼi ta̱ Potifar.b Xa̱ʼa̱ ña̱kán i̱xandakú-inii̱ ta sa̱kuxíkái̱ñá nu̱úi̱, ta ñákán ndakiʼinñá ku̱a̱ʼa̱nñá ta kǒoka ña̱ níkeʼéñá xíʼi̱n” (Gén. 39:7-12). Ta̱ Jorge va̱ʼaní ku̱nira saáchi kǒo níkeʼéra ña̱ kini ta ña̱ xínitúni̱ra va̱ʼa íyoña (1 Tim. 1:5).
15. ¿Ndáa ki̱ʼva chikaa̱yó ndee̱ ña̱ xu̱xa-iniyó xíʼin tu̱ʼun Ndióxi̱?
15 Inka ña̱ va̱ʼa ña̱ ndákiʼinyó xa̱ʼa̱ ña̱ xu̱xa-iniyó xíʼin tu̱ʼun Ndióxi̱ kúú ña̱ ndúu ndakú ña̱ íyo níma̱yó, ta ña̱yóʼo chíndeétáʼanña xíʼinyó ña̱ va̱ása kandíxayó “ña̱ʼa ña̱ xa̱a̱ síín íyo” (kaʼvi Hebreos 13:9). Nani chíkaa̱yó ndee̱ ña̱ kuaʼnukayó xíʼin tu̱ʼun Ndióxi̱, ña̱ kundi̱ʼi̱ka-iniyó xa̱ʼa̱ kúú “ña̱ʼa ña̱ ndáyáʼvika” (Fili. 1:9, 10). Ta ña̱yóʼo chindeétáʼanña xíʼinyó ña̱ chindayáʼvikayó Jehová ta saátu taxiyó tíxa̱ʼvi ndaʼa̱ra xa̱ʼa̱ ndiʼi ña̱ xa̱a̱ táxira ndaʼa̱yó (Fili. 1:9, 10). Na̱ cristiano na̱ ndákanixi̱ní táki̱ʼva ndákanixi̱ní na̱ xa̱a̱ xu̱xa-ini xíʼin tu̱ʼun Ndióxi̱ táxinína tíxa̱ʼvi ndaʼa̱ Jehová ta va̱ʼaní kítáʼanna xíʼinra (1 Cor. 14:20).
16. ¿Ndáaña chi̱ndeétáʼan xíʼin iin ñá hermana ña̱ ndakú koo iniñá?
16 Iin ñá hermana ñá naní Luisa ni̱ka̱ʼa̱nñá ña̱ tá xa̱ʼa̱ xi̱keʼéñá ña̱ xi̱kutóo Ndióxi̱ ña̱ ná ka̱ʼa̱n va̱ʼa na̱ hermano xa̱ʼa̱ñá. Ñáyóʼo káchiña: “Kǒo ña̱ va̱ása va̱ʼa níxi̱keʼíi̱, soo su̱ví xíʼin ndinuʼu-inii̱ níxi̱kachíñui̱ nu̱ú Jehová. Tá ni̱ya̱ʼa tiempo ki̱ʼin kuenta ña̱ tá xi̱kuni̱i̱ taxii̱ mií ña̱ va̱ʼaka ndaʼa̱ Jehová xi̱niñúʼu nasamai̱ ña̱ xi̱keʼíi̱; ta ña̱ ndáyáʼvi ña̱ keʼíi̱ kúú ña̱ ni̱ka̱ʼi̱n xíʼin Jehová ña̱ xíʼin ndinuʼu-inii̱ kachíñui̱ nu̱úra.” Xa̱ʼa̱ ña̱ chi̱kaa̱ní ñá Luisa ña̱ ndakú koo iniñá, ña̱yóʼo chi̱ndeétáʼanña xíʼinñá tá ni̱ya̱ʼañá nu̱ú iin kue̱ʼe̱ ña̱ ndeéní (Sant. 5:8). Ñáyóʼo káchikañá: “Ni̱xo̱ʼvi̱níi̱, soo ña̱yóʼo chi̱ndeétáʼanña xíʼi̱n ña̱ yatinka koi̱ xíʼin Jehová”.
Xíʼin ndiʼi níma̱yó ná kuniso̱ʼoyó
17. ¿Nda̱chun ndáyáʼviní ña̱ ka̱ndíxa na̱ cristiano na̱ ni̱xi̱yo tá siglo nu̱ú?
17 Consejo ña̱ ni̱ka̱ʼa̱n ta̱ Pablo ña̱ xíniñúʼu xu̱xa-inina sa̱kǎkuña na̱ cristiano na̱ ni̱xi̱yo ñuu Jerusalén xíʼin Judea. Na̱ xi̱niso̱ʼo ña̱ ni̱ka̱ʼa̱n ta̱ Pablo viíní ni̱xi̱yo ña̱ xi̱ndakanixi̱nína, xa̱ʼa̱ ña̱kán xi̱kunda̱a̱-inina ndáaña kúú señal ña̱ kunina ña̱ kununa ku̱ʼu̱nna chí yukú. Ña̱kán tá xi̱nina “ña̱ʼa ña̱ kininí káa ña̱ sandíʼi-xa̱ʼa̱, kixaa̱ña kundichiña chí nu̱ú ñuʼú yi̱i̱”, á ña̱ kúni̱ kachi, na̱ chíñu ñuu Roma nda̱kasina ñuu Jerusalén ta kixáʼana kíʼvina ñuu kán, ta saá ku̱ndaa̱-inina ña̱ xa̱a̱ ki̱xaa̱ ki̱vi̱ kán (Mat. 24:15, 16). Nda̱kaʼánna xa̱ʼa̱ profecía ña̱ ni̱ka̱ʼa̱n ta̱ Jesús, tá ki̱tana ñuu kán tá kúma̱níka sandíʼi-xa̱ʼa̱na ña̱kán, ta nda̱a̱ táki̱ʼva ka̱ʼyí ta̱ historiador eclesiástico Eusebio, ni̱xi̱yona chí Pela (á Pella), nu̱ú ndíkaa̱ yukú ña̱ Galaad. Ta saá na̱ cristiano ni̱ka̱kuna nu̱ú tu̱ndóʼo ña̱ káʼnuní ña̱ ni̱xi̱yo chí Jerusalén.
18, 19. a) ¿Nda̱chun ndáyáʼviní kuniso̱ʼoyó tiempo vitin? b) ¿Ndáaña ka̱ʼa̱nyó xa̱ʼa̱ inka artículo?
18 Na̱ cristiano na̱ xu̱xa-ini xíniso̱ʼona, ta ña̱yóʼo kúú ña̱ chindeétáʼan xíʼinna ña̱ sakáku miína tá ná xi̱nu ña̱ ni̱ka̱ʼa̱n ta̱ Jesús, kixaa̱ tu̱ndóʼo ña̱ káʼnu ña̱ nda̱a̱ ni yichi̱ ta̱ʼán koo (Mat. 24:21). ¿Á kuniso̱ʼoyó ndiʼi ña̱ ka̱ʼa̱n ta̱ “mayordomo ta̱ nda̱kú-ini xíʼinyó” (Luc. 12:42.) Ndáyáʼviní ña̱ xíʼin ndiʼi níma̱yó ná kandíxayó (Rom. 6:17.)
19 Ña̱ va̱ʼa xa̱a̱yó kooyó na̱ yiví na̱ xu̱xa-ini, xíniñúʼu viíní koo ña̱ ndákanixi̱níyó, ta ña̱ chindeétáʼan xíʼinyó kúú ña̱ viíní kuxini̱yó tu̱ʼun Ndióxi̱ ta saátu ña̱ sakúaʼayó kuniso̱ʼoyó. Na̱ va̱lí kúa̱an kivi ixayo̱ʼvi̱ña xíʼinna ña̱ xa̱a̱ xu̱xa-inina xíʼin tu̱ʼun Ndióxi̱. Nu̱ú inka artículo kotoyó ndáaña chindeétáʼan xíʼinna ña̱ keʼéna ña̱yóʼo.
[Nota]
a Na̱sama sava ki̱vi̱na.
b Koto iin artículo ña̱ naní “Fortalecidos para rechazar el mal”, La Atalaya 1 tí octubre ku̱i̱ya̱ 1999.
¿Ndáaña sa̱kúaʼún?
• ¿Ndáa ki̱ʼva xa̱a̱yó kooyó na̱ yiví na̱ xu̱xa-ini xíʼin tu̱ʼun Ndióxi̱?
• ¿Nda̱chun ndáyáʼviní kuxini̱ va̱ʼayó Biblia tá kúni̱yó xa̱a̱yó xu̱xa-iniyó xíʼin tu̱ʼun Ndióxi̱?
• ¿Ndáaña chindeétáʼan xíʼinyó ña̱ sakúaʼayó kuniso̱ʼoyó?
• ¿Ndáaña va̱ʼa ndakiʼinyó ña̱ kooyó na̱ cristiano xu̱xa-ini xíʼin tu̱ʼun Ndióxi̱?
[Na̱ʼná]
Tá ndíku̱nyó consejo ña̱ va̱xi nu̱ú Biblia chindeétáʼanña xíʼinyó ña̱ ya̱ʼayó nu̱ú tu̱ndóʼo
[Na̱ʼná]
Na̱ xi̱niso̱ʼo ña̱ ni̱ka̱ʼa̱n ta̱ Jesús sa̱kákuna miína