ARTÍCULO ÑA̱ KAʼVIYÓ 21
Ná kǒo taxiyó sandáʼvi ña̱ ndíchi ña̱ íyo ñuyǐví yóʼo miíyó
“Saáchi ña̱ ndíchi ña̱ íyo ñuyǐví va̱ása ndáyáʼviña nu̱ú Ndióxi̱” (1 COR. 3:19).
YAA 98 Tu̱ʼun Ndióxi̱ kúú Biblia
ÑA̱ KA̱ʼA̱NYÓ XA̱ʼA̱a
1. ¿Ndáaña sánáʼa̱ tu̱ʼun Ndióxi̱ miíyó?
JEHOVÁ kúú ta̱ va̱ʼaní sánáʼa̱ miíyó. Ta kivi chindeétáʼanra xíʼinyó tá ná ya̱ʼayó nda̱a̱ ndáaka nu̱ú tu̱ndóʼo (Is. 30:20, 21). Tu̱ʼunra va̱ʼaní sánáʼa̱ña miíyó ña̱ kuxini va̱ʼayó ta koo tu̱ʼvayó ña̱ keʼéyó ndiʼi ña̱ʼa (2 Tim. 3:17). Tá ndíku̱nyó ña̱ káʼa̱n Biblia, ndíchika íyoyó nu̱ú na̱ ndíku̱n ña̱ ndíchi ñuyǐví yóʼo (1 Cor. 3:19; Sal. 119:97-100).
2. ¿Ndáaña ka̱ʼa̱nyó xa̱ʼa̱ nu̱ú artículo yóʼo?
2 Táki̱ʼva ka̱ʼa̱nyó vitin, ña̱ ndíchi ñuyǐví yóʼo kivi chindaʼáña miíyó ña̱ keʼéyó ña̱ kúni̱ miíyó. Ña̱kán sana kuni̱yó ndakanixi̱níyó ta kundiku̱nyó ña̱ kéʼé na̱ ñuyǐví yóʼo. Xa̱ʼa̱ ña̱yóʼo ña̱ Biblia káʼa̱nña: “Kiʼinníndó kuenta: saáchi sana íyo iin na̱ kúni̱ sandáʼvi ndóʼó xíʼin tu̱ʼun ndíchi ña̱ ndákanixi̱nína” (Col. 2:8). Nu̱ú artículo yóʼo ka̱ʼa̱nyó xa̱ʼa̱ u̱vi̱ ña̱ʼa ña̱ íyo ñuyǐví yóʼo ta nda̱saa ki̱xáʼa na̱ yiví ndíku̱nnaña. Nu̱ú iin iinña kotoyó nda̱chun ña̱ ndíchi ñuyǐví yóʼo va̱ása va̱ʼaña, ta nda̱chun ña̱ ndíchi ña̱ táxi Biblia kúú ña̱ va̱ʼaníka nu̱ú ndiʼi ña̱ʼa ña̱ íyo ñuyǐví yóʼo.
NA̱SAMA ÑA̱ NDÁKANIXI̱NÍ NA̱ YIVÍ XA̱ʼA̱ ÑA̱ KÍSI̱NA XÍʼIN TÁʼANNA
3, 4. ¿Ndáaña na̱sama tá ki̱xáʼa ku̱i̱ya̱ 1900 nda̱a̱ 1930?
3 Tá ki̱xáʼa ku̱i̱ya̱ 1900 ta nda̱a̱ 1930, na̱sama ña̱ ndákanixi̱ní na̱ yiví xa̱ʼa̱ ña̱ kísi̱na xíʼin táʼanna. Tiempo saá ku̱a̱ʼání na̱ yiví xi̱ndakanixi̱nína ña̱ nda̱saa na̱ xa̱a̱ ti̱ndaʼa̱ xíniñúʼu ku̱su̱n xíʼin táʼanna, ta va̱ása ni̱xika̱ʼa̱nna xa̱ʼa̱ ña̱yóʼo nu̱ú ku̱a̱ʼá na̱ yiví. Soo na̱samava ña̱yóʼo ta ki̱xáʼana kéʼéna ña̱ kúni̱ miína.
4 Tá ku̱i̱ya̱ 1920 nda̱a̱ 1929, na̱ yiví kininíka ki̱xáʼana kéʼéna ta saátu ku̱a̱ʼá ña̱ na̱sama tá ku̱i̱ya̱ yóʼo. Iin ñá na̱ndukú va̱ʼa xa̱ʼa̱ ña̱yóʼo ni̱ka̱ʼa̱nñá: “Película, yaa, novela xíʼin inkaka ña̱ʼa, ndeéníka ki̱xáʼa kána ña̱ kísi̱ xíʼin táʼan na̱ yiví nu̱úña”. Ku̱i̱ya̱ saá ki̱xáʼa kininíka tíxáʼa na̱ yiví ta kininí ki̱xáʼa ndíxina. Nda̱a̱ táki̱ʼva ni̱ka̱ʼa̱n Biblia, koo na̱ yiví na̱ keʼé ña̱ kúni̱ miína (2 Tim. 3:4).
Na̱ ndásakáʼnu Ndióxi̱ va̱ása ndíku̱nna ña̱ ndákanixi̱ní na̱ yiví xa̱ʼa̱ ña̱ kísi̱na xíʼin táʼanna. (Koto párrafo 5).f
5. ¿Ndáaña ki̱xáʼa na̱ yiví kéʼéna tá ku̱i̱ya̱ 1960 ta nda̱a̱ vitin?
5 Tá ku̱i̱ya̱ 1960, ki̱xáʼa na̱ yiví ndákanixi̱nína ña̱ va̱ʼa kúú ña̱ kutóo iin ta̱a inka ta̱a á ña̱ kutóo iin ñaʼá inka ñaʼá, saátu ña̱ sandákootáʼan na̱ xa̱a̱ ti̱ndaʼa̱ á ña̱ kivitu koo iin ta̱a xíʼin iin ñaʼá ni tá ta̱ʼán ti̱ndaʼa̱na. Saátu nu̱ú película á televisión ki̱xáʼa kána ña̱ kísi̱ xíʼin táʼanna. ¿Ndáaña kúu xa̱ʼa̱ ña̱yóʼo? Iin ñá xíni va̱ʼa xa̱ʼa̱ ña̱yóʼo ni̱ka̱ʼa̱nñá chi xa̱ʼa̱ ña̱ va̱ása kíʼinna kuenta xíʼin ña̱ kéʼéna ña̱ kúni̱ miína ña̱kán ku̱a̱ʼání ña̱ ndóʼona, sándákootáʼanna, ta siín na̱yóʼo sákuaʼnu miína se̱ʼena, xóʼvi̱na ta kúsuchí-inina, ta saátu íyo na̱ kútóoní kotonde̱ʼé ña̱ pornografía. Ta saátu ndiʼi kue̱ʼe̱ xíkun ña̱ kíʼinna tá kísi̱ xíʼin táʼanna tá kúú ña̱ sida, náʼa̱ña nu̱úyó ña̱ va̱ása va̱ʼa ña̱ ndíchi ña̱ íyo ñuyǐví yóʼo (2 Ped. 2:19).
6. ¿Nda̱chun kúni̱ ta̱ Ndi̱va̱ʼa ña̱ ná va̱ása kiʼin na̱ yiví kuenta xíʼin ña̱ kéʼéna?
6 Ta̱ Ndi̱va̱ʼa kúni̱ra ña̱ ná keʼé na̱ ñuyǐví ña̱ kúni̱ miína. Kúsi̱íní-inira tá xítora ña̱ va̱ása íxato̱ʼóna ña̱ káʼa̱n Ndióxi̱ xa̱ʼa̱ ña̱ tíndaʼa̱ na̱ yiví xíʼin ña̱ kísi̱ xíʼin táʼanna (Efes. 2:2). Na̱ xíka xíʼin ku̱a̱ʼá ñaʼá á ku̱a̱ʼá ta̱a va̱ása íxato̱ʼóna regalo ña̱ ta̱xi Ndióxi̱ ndaʼa̱na ña̱ kivi koo se̱ʼena, xa̱ʼa̱ ña̱yóʼo sana va̱ása taxira kutakuna ndiʼi tiempo (1 Cor. 6:9, 10).
ÑA̱ KÁʼA̱N BIBLIA XA̱ʼA̱ ÑA̱ KÍSI̱ XÍʼIN TÁʼAN NA̱ YIVÍ
7, 8. ¿Nda̱chun va̱ʼaníka ña̱ káʼa̱n Biblia xa̱ʼa̱ ña̱ ku̱su̱n xíʼin táʼan na̱ yiví nu̱ú ña̱ káʼa̱n na̱ ñuyǐví?
7 Na̱ ndíku̱n ña̱ ndíchi ña̱ íyo ñuyǐví yóʼo xákundaana ña̱ káʼa̱n Biblia xa̱ʼa̱ ña̱ kísi̱ xíʼin táʼan na̱ yiví, ta káchina ña̱ va̱ása va̱ʼaña chi va̱ása kítáʼanña xíʼin ña̱ kúni̱ miína. Sana ndáka̱tu̱ʼun xíʼin miína nda̱chun i̱xava̱ʼa Ndióxi̱ na̱ yiví ña̱ kuni̱na ku̱su̱nna xíʼin iin ta̱a á iin ñaʼá, ta tándíʼi káʼa̱ntura xíʼinna ña̱ ná kiʼinna kuenta xíʼin ña̱yóʼo. Saá káʼa̱nna chi ndákanixi̱nína ña̱ xíniñúʼu keʼéna ndiʼi ña̱ kúni̱ miína. Soo síínva káʼa̱n Biblia. Jehová náʼa̱ra ña̱ íxato̱ʼóra miíyó chi ta̱xira ña̱ kiviva kaʼnu-iniyó ta kiʼinyó kuenta xíʼin ña̱ kúni̱yó keʼéyó (Col. 3:5). Saátu Jehová chi̱ndúʼú xa̱ʼa̱ ña̱ ti̱ndaʼa̱ ta̱a xíʼin ñaʼá ta kivi ku̱su̱nna xíʼin táʼanna soo xíʼin ña̱ to̱ʼó keʼéna ña̱yóʼo (1 Cor. 7:8, 9). Saá kúú ña̱ vií koona nu̱ú Ndióxi̱ chi kíʼinna kuenta xíʼin ña̱ kéʼéna, ta va̱ása kundoʼona táki̱ʼva ndóʼo na̱ ñuyǐví.
8 Síínva íyo ña̱ káʼa̱n Biblia xa̱ʼa̱ ña̱ ku̱su̱n xíʼin táʼan na̱ yiví, chi va̱ása inkáchi íyoña xíʼin ña̱ ndíchi ña̱ íyo ñuyǐví yóʼo. Káʼa̱nva Biblia ña̱ va̱ʼava ku̱su̱n xíʼin táʼan na̱ xa̱a̱ ti̱ndaʼa̱ (Prov. 5:18, 19). Soo táxituña consejo yóʼo: “Iin iin ndóʼó xíniñúʼu vií keʼéndó xíʼin ku̱ñundó ña̱ va̱ʼa yéʼé ná kooña ta ixato̱ʼóndóña, ta va̱ása kuni̱níndó ku̱su̱nndó xíʼin inkana nda̱a̱ táki̱ʼva kéʼé na̱ yiví na̱ kǒo kúnda̱a̱-ini xa̱ʼa̱ Ndióxi̱” (1 Tes. 4:4, 5).
9. a) ¿Nda̱saa chi̱ndeétáʼan Ndióxi̱ xíʼin na̱ ñuura tá ki̱xáʼa ku̱i̱ya̱ 1900 ña̱ kundiku̱nna ña̱ ndíchi ña̱ táxi Biblia? b) ¿Ndáa consejo ña̱ va̱ʼaní va̱xi nu̱ú 1 Juan 2:15, 16? c) Nda̱a̱ táki̱ʼva káchi Romanos 1:24-27, ¿ndáaña kini xíniñúʼu kundasí nu̱úyó kuniyó?
9 Tá ki̱xáʼa ku̱i̱ya̱ 1900 nda̱a̱ 1930, na̱ ndásakáʼnu Ndióxi̱ tiempo saá, va̱ása nítaxina sandáʼvi na̱ ñuyǐví miína xíʼin ña̱ kini ña̱ ki̱xáʼana kéʼéna (Efes. 4:19). Chi̱ka̱a̱na ndee̱ ña̱ saxínuna ña̱ kúni̱ Ndióxi̱. Tutu táʼan revista yóʼo ña̱ ka̱na 15 tí mayo ña̱ 1926 ña̱ tu̱ʼun inglés ni̱ka̱ʼa̱nña ña̱ xíniñúʼu nina ña̱ va̱ʼa ndakanixi̱ní na̱ ta̱a xíʼin ná ñaʼá ta to̱ʼó koona xíʼin táʼanna. Ni síínva xi̱keʼé na̱ yiví tiempo saá, na̱ ndásakáʼnu Ndióxi̱ nda̱kundeéna xi̱ndiku̱nna ña̱ ndíchi ña̱ va̱xi nu̱ú Biblia (kaʼvi 1 Juan 2:15, 16).b Táxiníyó tíxa̱ʼvi ndaʼa̱ Jehová ña̱ táxira tu̱ʼunra ndaʼa̱yó xíʼin inkaka tutu ña̱ va̱ʼa sánáʼa̱ra miíyó ña̱ kuxíkayó nu̱ú ña̱ ndíchi ña̱ va̱ása va̱ʼa ña̱ íyo ñuyǐví yóʼoc (kaʼvi Romanos 1:24-27).d
NA̱SAMA ÑA̱ NDÁKANIXI̱NÍ NA̱ YIVÍ XA̱ʼA̱ MIÍNA
10, 11. ¿Ndáaña ni̱ka̱ʼa̱n Biblia koo tiempo nu̱ú ndíʼi?
10 Tá ya̱chi̱ ni̱ka̱ʼa̱n Biblia ña̱ “koo na̱ yiví na̱ kuʼvi̱ka-ini kuni mií” (2 Tim. 3:1, 2). Ña̱kán kǒo ndákanda̱-iniyó tá xíniyó ña̱ káʼa̱n na̱ ñuyǐví ña̱ xíniñúʼu kotona miína nda̱a̱ tá íyo iin na̱ ndáyáʼviní. Iin enciclopedia ni̱ka̱ʼa̱n xa̱ʼa̱ ña̱ ku̱u tá ki̱xáʼa ku̱i̱ya̱ 1970, tiempo saá ki̱xáʼa kána ku̱a̱ʼá libro ña̱ chíndeétáʼan xíʼin na̱ yiví. Savaña xi̱ka̱ʼa̱nña xíʼin na̱ xi̱kaʼviña ña̱ xíniñúʼu kunda̱a̱-inina xíʼin miína, ta kusi̱í-inina xa̱ʼa̱ ki̱ʼva ña̱ íyona. Tá kúú iin táʼan ña̱ libro yóʼo xi̱ka̱ʼa̱nña xíʼin na̱ yiví ña̱ xíniñúʼu kuʼvi̱ní-inina kunina miína chi liviní náʼa̱na ta kǒo inkana káa saá. Libro yóʼo káʼa̱nña ña̱ xíniñúʼu ndasakáʼnuna miína ta ndaka̱xinna ña̱ kúni̱na kundiku̱nna xíʼin ña̱ kútóona.
11 ¿Á íyo inka nu̱ú xa̱a̱ xi̱niso̱ʼoyó táʼan tu̱ʼun yóʼo? Ta̱ Ndi̱va̱ʼa kúú ta̱ ni̱ka̱ʼa̱n táʼan tu̱ʼun yóʼo xíʼin ñá Eva. Ni̱ka̱ʼa̱nra xíʼinñá ña̱ kivi kooñá táki̱ʼva íyo Ndióxi̱ ña̱ kunda̱a̱-iniñá xa̱ʼa̱ ña̱ va̱ʼa xíʼin xa̱ʼa̱ ña̱ va̱ása va̱ʼa (Gén. 3:5). Tiempo vitin íyo ku̱a̱ʼání na̱ yiví na̱ ndákanixi̱ní ña̱ kǒo nda̱a̱ ni iin na̱ kivi ka̱ʼa̱n xíʼinna ndáaña kúú ña̱ va̱ʼa xíʼin ña̱ va̱ása va̱ʼa, ni Ndióxi̱, chi kéʼéna ña̱ kúni̱ miína. Ña̱yóʼo chíndaʼá na̱ yiví ña̱ sandákoona na̱ ti̱ndaʼa̱ xíʼinna.
Na̱ ndásakáʼnu Ndióxi̱ ndíʼi̱-inina xa̱ʼa̱ inkana, soo ndeéka ndíʼi-inina xa̱ʼa̱ na̱ ti̱ndaʼa̱ xíʼinna. (Koto párrafo 12).g
12. ¿Ndáaña káʼa̱n na̱ ñuyǐví xa̱ʼa̱ na̱ tíndaʼa̱?
12 Ña̱ Biblia káʼa̱nña xíʼin na̱ ta̱a xíʼin ná ñaʼá na̱ xa̱a̱ ti̱ndaʼa̱ ña̱ xíniñúʼu ixato̱ʼó-táʼanna ta saxínuna tu̱ʼun ña̱ ni̱ka̱ʼa̱nna xíʼin táʼanna tá ti̱ndaʼa̱na. Tu̱ʼun Ndióxi̱ káʼa̱nña: “Xa̱ʼa̱ ña̱yóʼo ta̱a sandákoora yivára xíʼin siʼíra, ta ndakutáʼanra xíʼin ñá síʼíra, ta u̱vi̱ saána iinlá xa̱a̱na nduuna” (Gén. 2:24). Soo na̱ ndíku̱n ña̱ ndíchi ña̱ íyo ñuyǐví yóʼo ndákanixi̱nína ña̱ xa̱ʼa̱ mií kuitína xíniñúʼu ndi̱ʼi̱-inina. Iin libro ña̱ káʼa̱n xa̱ʼa̱ ña̱ sándákootáʼanna káchiña ña̱ sava na̱ tíndaʼa̱ na̱samana ña̱ tu̱ʼun ña̱ kíndo̱ona xíʼin táʼanna, ña̱ káʼa̱n “nda̱a̱ ná kuviyó saá sandákootáʼanyó”, xíʼin ña̱ tu̱ʼun “nda̱a̱ tá va̱ásaka kúʼvi̱-iniyó xínitáʼanyó kivi sandákootáʼanyó”. Xa̱ʼa̱ ña̱ ndákanixi̱nína saá kúú ña̱ táʼvi táʼanna ta sáxo̱ʼvi̱ xíʼin miína. Ña̱ ndíchi ña̱ káʼa̱n na̱ ñuyǐví xa̱ʼa̱ na̱ tíndaʼa̱ va̱ása va̱ʼaña.
13. ¿Nda̱chun kúndasí nu̱ú Jehová xínira na̱ ni̱nuní kúni?
13 Ña̱ Biblia káchiña: “Ndiʼi na̱ ni̱nu kúni Jehová kúndasí nu̱ú xínirana” (Prov. 16:5). ¿Nda̱chun kúndasí nu̱ú Jehová xínira na̱ ni̱nuní kúni? Saáchi kúni̱na kundayáʼvikana, ta saátu sánáʼa̱na inkana ña̱ keʼéna ña̱yóʼo, saá náʼa̱na ña̱ kúúmií ta̱ Ndi̱va̱ʼa. Ta̱yóʼo nda̱kanixi̱níra ña̱ kuchiñura sandáʼvira ta̱ Jesús, ta̱ ka̱chíñu xíʼin Ndióxi̱ ña̱ ku̱va̱ʼa ndiʼi ña̱ʼa, ña̱ kuxítíra nu̱úra ta ndasakáʼnurara (Mat. 4:8, 9; Col. 1:15, 16). Ña̱ ni̱nuní kúni na̱ yiví náʼa̱ña nu̱úyó nda̱chun ni va̱ása va̱ʼa ña̱ ndíchi ña̱ kúúmií na̱ ñuyǐví yóʼo nu̱ú Ndióxi̱.
ÑA̱ KÁʼA̱N BIBLIA XA̱ʼA̱ NA̱ NI̱NUNÍ KÚNI
14. ¿Nda̱saa chíndeétáʼan Romanos 12:3 xíʼinyó ña̱ va̱ása ndakanixi̱níyó ña̱ ndáyáʼviníyó?
14 Ña̱ Biblia chíndeétáʼanña xíʼinyó ña̱ va̱ása ndakanixi̱níyó ña̱ ndáyáʼviníyó. Káʼa̱nña xíʼinyó ña̱ va̱ʼava kuʼvi̱-iniyó kuniyó miíyó. Tá kúú ta̱ Jesús ni̱ka̱ʼa̱nra: “Xíniñúʼu kuʼvi̱-iniún kuniún inkana nda̱a̱ táki̱ʼva kúʼvi̱-iniún xíniún miíún” (Mat. 19:19). Ña̱yóʼo kuni kachiña ña̱ xíniñúʼu ndi̱ʼi̱-iniyó xa̱ʼa̱yó soo xíʼin ki̱ʼva keʼéyóña. Ña̱ Biblia va̱ása káʼa̱nña ña̱ kundayáʼvikayó nu̱ú inkana. Ña̱ káʼa̱nña xíʼinyó kúú ña̱ viíní ná ndakanixi̱níyó nda̱a̱ táki̱ʼva kúni̱ Ndióxi̱ ta ná kotoyó inkana nda̱a̱ táki̱ʼva íyo na̱ ndáyáʼvika (Filip. 2:3; kaʼvi Romanos 12:3).e
15. ¿Nda̱chun ndákanixi̱níún ña̱ chíndeétáʼan ña̱ káʼa̱n Biblia xíʼinyó xa̱ʼa̱ na̱ ni̱nuní kúni?
15 Ku̱a̱ʼání na̱ yiví na̱ ndíchi na̱ íyo ñuyǐví, xákundaana ña̱ káʼa̱n Biblia xa̱ʼa̱ na̱ ni̱nuní kúni. Káchina chi tá ná ndakanixi̱níyó ña̱ ndáyáʼvika inkana nu̱úyó, keʼéna ña̱ kúni̱ miína xíʼinyó. Soo ña̱ nda̱a̱, ¿ndáaña ndákiʼin na̱ yiví xa̱ʼa̱ ña̱ ni̱nuní kúnina? ¿Á si̱í íyo na̱ ni̱nuní kúni? ¿Á si̱í íyo na̱ veʼena? ¿Á íyo na̱ ndixa kúú migona? ¿Á kítáʼan va̱ʼana xíʼin Ndióxi̱? ¿Ndáaña va̱ʼaka túvi yóʼó: ña̱ ndíchi ña̱ íyo ñuyǐví yóʼo á ña̱ ndíchi ña̱ táxi tu̱ʼun Ndióxi̱?
16, 17. ¿Ndáa xa̱ʼa̱ kúú ña̱ táxiníyó tíxa̱ʼvi, ta nda̱chun?
16 Na̱ ndíku̱n ña̱ ndíchi ña̱ íyo ñuyǐví yóʼo íyona táki̱ʼva íyo iin na̱ ke̱e xíka ta nda̱ñúʼuna ta ndáka̱tu̱ʼunna inka na̱ ke̱e xíka na̱ nda̱ñúʼu ta va̱ása xíni̱na. Ta̱ Jesús ni̱ka̱ʼa̱nra xa̱ʼa̱ na̱ ndíchi na̱ ni̱xi̱yo tiempora: “Na̱ kǒo túvi nu̱ú kúúna. Xa̱ʼa̱ ña̱yóʼo tá iin na̱ kǒo túvi nu̱ú chíndeétáʼanna xíʼin inka na̱ kǒo túvi nu̱ú, u̱vi̱ saána ko̱oyo ya̱vi̱” (Mat. 15:14). Ña̱ nda̱a̱ kúúña, ña̱ ndíchi ña̱ íyo ñuyǐví yóʼo, ni va̱ása va̱ʼaña nu̱ú Ndióxi̱.
Na̱ ndásakáʼnu Ndióxi̱ si̱íní kúnina tá ndákáʼanna xa̱ʼa̱ ndiʼi tiempo ña̱ ka̱chíñuna nu̱ú Ndióxi̱. (Koto párrafo 17).h
17 Consejo ña̱ táxi Biblia ndiʼi tiempo “va̱ʼaní sánáʼa̱ña, ta chíka̱a̱ña miíyó yichi̱ nda̱kú tasaá násamaña miíyó xíʼin ña̱ kéʼéyó” (2 Tim. 3:16). Táxiníyó tíxa̱ʼvi ndaʼa̱ Ndióxi̱ xa̱ʼa̱ ña̱ xíniñúʼura na̱ ñuura ña̱ sáka̱kura miíyó nu̱ú ña̱ ndíchi ña̱ íyo ñuyǐví yóʼo (Efes. 4:14). Saáchi tíxa̱ʼvíní ña̱ sánáʼa̱ra miíyó íyo ndee̱yó ña̱ va̱ʼa ndíku̱nyó consejo ña̱ táxira ndaʼa̱yó. Iin ña̱ ndáyáʼviní kúú ña̱ kúúmiíyó ña̱ ndíchi ña̱ táxi tu̱ʼun Ndióxi̱.
YAA 54 “Ña̱yóʼo kúú ña̱ nda̱a̱”
a Ña̱ artículo yóʼo chindeétáʼanña xíʼinyó ña̱ kandíxayó ña̱ mií Jehová kúú ta̱ kivi taxi yichi̱ va̱ʼa nu̱úyó. Saátu kotoyó nda̱chun ña̱ ndíchi ñuyǐví yóʼo va̱ása va̱ʼaña ta táxiña tu̱ndóʼo ndaʼa̱ na̱ ndíku̱nña, ta nda̱saa chíndeétáʼan ña̱ ndíchi ña̱ va̱xi nu̱ú Biblia xíʼinyó.
b 1 Juan 2:15, 16: “Kǒo kutóondó ñuyǐví yóʼo ni ña̱ʼa ña̱ kúúmiíña. Tá iinndó kútóondó ñuyǐví yóʼo, va̱ása kúʼvi̱-inindó xínindó yiváyó; saáchi ndiʼi ña̱ íyo ñuyǐví, tá kúú ña̱ kútóo ku̱ñuyó xíʼin ña̱ xítoyó xíʼin ña̱ kúta̱a-iniyó xa̱ʼa̱ ña̱ kúúmiíyó, su̱ví yiváyó táxiña, chi kuenta ñuyǐví yóʼo kúúña”.
c Koto capítulo 24 nda̱a̱ 26 ña̱ volumen 1 ña̱ libro Lo que los jóvenes preguntan. Respuestas prácticas, saátu capítulo 4 xíʼin 5 ña̱ volumen 2.
d Romanos 1:24-27: “Xa̱ʼa̱ ña̱kán Ndióxi̱ sa̱ndákoorana ña̱ ná keʼéna ndiʼi ña̱ kini ña̱ íyo níma̱na, ta i̱xaa yaku̱a̱na ku̱ñuna. Na̱samana ña̱ nda̱a̱ ña̱ xíni̱na xa̱ʼa̱ Ndióxi̱ xíʼin ña̱ vatá ta nda̱sakáʼnuna inka ña̱ʼa nu̱úka ña̱ ndasakáʼnuna Ndióxi̱ ta̱ nda̱a̱ ta̱ ke̱ʼé ndiʼi ña̱ʼa, ta̱ yi̱i̱ ndiʼi tiempo. Saá ná koo. Xa̱ʼa̱ ña̱yóʼo, Ndióxi̱ sa̱ndákoora miína ña̱ ná keʼéna ndiʼi ña̱ kini ña̱ kúni̱ miína, nda̱a̱ ná ñaʼá na̱samaná miíná ta kísi̱ná xíʼin táʼan miíná, ta kǒo kísi̱kaná xíʼin ta̱a; ta saátu sava ta̱a kǒo kísi̱kana xíʼin ná ñaʼá chi ki̱xáʼana kísi̱na xíʼin ta̱a táʼan miívana, tasaá ndákiʼinna castigo xa̱ʼa̱ ña̱ kini kéʼéna”.
e Romanos 12:3: “Xa̱ʼa̱ ña̱ va̱ʼaní ni̱xi̱yo ini Ndióxi̱ xíʼi̱n, káʼi̱n xíʼinndó ña̱ kǒo ndakanixi̱níndó ña̱ ndáyáʼvikandó nu̱ú inkana; viíní ndakanixi̱níndó nda̱a̱ táki̱ʼva kúni̱ Ndióxi̱, táki̱ʼva íyo ña̱ ta̱xira ndaʼa̱ iin iinndó xa̱ʼa̱ ña̱ kándíxaníndóra”.
f ÑA̱ KÁʼA̱N XA̱ʼA̱ NA̱ʼNÁ: Ña̱ náʼa̱ nu̱úyó xa̱ʼa̱ ña̱ ndo̱ʼo iin na̱ matrimonio.
g ÑA̱ KÁʼA̱N XA̱ʼA̱ NA̱ʼNÁ: Nátúʼunna xa̱ʼa̱ Ndióxi̱ tá xa̱a̱ kúyatin ku̱i̱ya̱ 1970.
h ÑA̱ KÁʼA̱N XA̱ʼA̱ NA̱ʼNÁ: Tá ku̱i̱ya̱ 1980 ta̱ hermano yóʼo ndáara ñá síʼíra chi ndeé ndóʼoñá ta xíto se̱ʼe loʼona. Tiempo vitin, na̱ matrimonio yóʼo ndákaʼánna xa̱ʼa̱ ña̱ si̱í ni̱xi̱yona tá ka̱chíñuna nu̱ú Jehová tá ya̱chi̱. Ñá se̱ʼena xíʼin ka̱sána xíʼin se̱ʼeñánina kúsi̱í-inina xíʼinna.