Sakuaʼaka ña̱ va̱ʼa sanáʼa̱kaún: kindo̱o xíʼinna ña̱ ndikóún nu̱úna

¿NDA̱CHUN NDÁYÁʼVI ÑA̱ KINDO̱ÚN XÍʼINNA?

Saáchi kúni̱yó sanáʼa̱kayó na̱ xa̱na̱túʼunyó xíʼin xa̱ʼa Ndióxi̱ (1Co 3:6). Tá ndáni̱ʼíyó iin na̱ kúni̱ sakuaʼa xa̱ʼa Ndióxi̱, va̱ʼa keʼéyó iin pregunta xíʼinna ta ka̱ʼa̱nyó xíʼinna ña̱ ndakuiinyóña inka yichi̱. Tásaá ná keʼéyó na̱yóʼo xa̱kundatun kúeena miíyó. Soo tá ná ndikóyó va̱ʼa ka̱ʼa̱nyó xíʼinna ña̱ ndi̱kóyó ña̱ ndakuiinyó pregunta ña̱ ke̱ʼéyó xíʼinna.

¿NDÁA KI̱ʼVA KEʼÉYÓÑA?

• Tá sákuaʼún iin presentación ña̱ kuniñúʼún tá ná ku̱ʼún veʼe tá veʼe ndakanixi̱ní xa̱ʼa iin pregunta ña̱ ndakoún. Va̱ʼatu ndaka̱xiún iin pregunta ña̱ va̱xi nu̱ú tutu ña̱ ndakoún ndaʼa̱na. Saátu va̱ʼa ndaka̱xiún iin pregunta ña̱ va̱xi nu̱ú tutu ña̱ xíniñúʼuyó tá káʼviyó xíʼinna ta na̱ʼún tutu yóʼo nu̱úna tá ná ndikóún inka yichi̱.

• Tá xa̱ndi̱ʼi na̱túʼún xíʼinna ta xítoún ña̱ ndixa kúni̱kana sakuaʼana, kivi ka̱ʼún xíʼinna ña̱ ndikóún inka yichi̱ nu̱úna ta keʼé iin pregunta xíʼinna ña̱ ndakuiiún inka yichi̱. Ka̱ʼa̱n xíʼinna ná taxina dirección nu̱ú íyona ndaʼún.

• Tá kíndo̱ún xíʼinna ña̱ hora ndikóún, xíniñúʼu saxínún tu̱ʼun ña̱ ni̱ka̱ʼún (Mt 5:37).