Iin visión ña̱ ndásandakúní-iniyó

9:1-7

Ndakanixi̱ní ña̱ ndo̱ʼo ta̱ Jesús tá xi̱niso̱ʼora ni̱ka̱ʼa̱n yivára nu̱ú iin visión ña̱ kúúra se̱ʼe miíra. Ña̱yóʼo chi̱ka̱a̱níña ndéera ña̱ ndakú koo-inira nu̱ú tu̱ndóʼo ña̱ ki̱xi nu̱úra. Chi̱ndeé táʼannítu visión yóʼo xíʼin ta̱ Pedro, ta̱ Santiago xíʼin ta̱ Juan ña̱ na̱kunda̱a̱-inina ta̱ Jesús kúú ta nda̱ka̱xin Ndióxi̱ ña̱ kuura ta̱ Mesías, ta na̱kunda̱a̱-inina ña̱ va̱ʼaní ke̱ʼéna ña̱ kúúna discípulora. Tá xa̱a̱ ni̱ya̱ʼa 32 ku̱i̱ya̱ ña̱ xi̱ni ta̱ Pedro visión yóʼo xi̱ndakaʼánra xa̱ʼaña ña̱ chi̱ka̱a̱níña ndéera (2Pe 1:16-19).

Miíyó kǒo níxiniyó ña̱ visión yóʼo, soo xa̱a̱ xíniyó xínu nu̱ú ña̱yóʼo. Tiempo vitin, ta̱ Jesús xa̱a̱ xáʼndachíñura ta ndáa si̱lóʼoní kúma̱ní ña̱ ndasaviíra nu̱ú ñuʼú yóʼo (Rev 6:2).

¿Ndáa ki̱ʼva chíndeé táʼanña xíʼún ña̱ xíniún xínu nu̱ú profecía ña̱ va̱xi nu̱ú Biblia?