¿Ndáa inkaka na̱ yiví va̱ʼa kanai̱?

Ndiʼi ku̱i̱ya̱ xíyo iin campaña ña̱ ndáyáʼviní nu̱ú kánayó ku̱a̱ʼání na̱ yiví ña̱ ku̱ʼu̱nna Conmemoración xíʼinyó. Ta ku̱a̱ʼání na̱ yiví na̱ va̱ása xíniyó kánayó. Saátu xíniñúʼu kanayó na̱ xa̱a̱ xíni̱yó ná kixina. Sana ku̱ʼunva na̱ yiví Conmemoración tá iin na̱ yiví na̱ xa̱a̱ xíni̱ñaʼá kúú na̱ táxi invitación ndaʼa̱na (yb08-S 11 párr. 3; 14 párr. 1). ¿Ndáa inkaka na̱ yiví xíniñúʼu kanayó?

• Na̱ veʼeyó.

• Na̱ káchíñu xíʼinyó á na̱ káʼvi xíʼinyó ti̱xin escuela.

• Na̱ íyo yatin xíʼinyó.

• Na̱ yiví na̱ xáʼa̱nyó xítoyó, na̱ káʼviyó xíʼin á na̱ xi̱kaʼviyó xíʼin tá ya̱chi.

Na̱ anciano kanana na̱ hermano na̱ va̱ásaka xáʼa̱n reunión ña̱ ku̱ʼu̱nna Conmemoración. Tá xíni̱ún iin na̱ yiví na̱ íyo xíka ¿ndáa ña̱ keʼún ña̱ va̱ʼa kanaúnna ña̱ ku̱ʼu̱nna conmemoración? Va̱ʼa nandukún ndáa hora xíʼin ndáa lugar koo ña̱ Conmemoración ña̱ yatiinka kíndo̱o nu̱ú íyo na̱ yiví kán. Ña̱ va̱ʼa ndani̱ʼún ña̱yóʼo, va̱ʼa ki̱ʼviún nu̱ú sitio ña̱ kúúmiíyó nu̱ú Internet nu̱ú káʼa̱nña ÑA̱ KÁʼA̱N XA̱ʼA̱NDI̱ ña̱ va̱xi nu̱ú jw.org, ta ki̱ʼvi nu̱ú káchiña “Conmemoración”. Nani ndátuyó ná kixa̱a̱ ña̱ ki̱vi̱ ndáyáʼviní kán, ndakanixi̱ní ndáa na̱ yiví kanaún, ta chika̱a̱ ndee̱ ña̱ kanaúnna.