Ña̱ chindeétáʼan xíʼin ta̱ va̱lí ña̱ keʼéra ña̱ kútóo Ndióxi̱

1. ¿Ndáaña xíniñúʼu keʼé ndiʼi ta̱ káchíñu nu̱ú Jehová?

TA̱ REY David ni̱ka̱ʼa̱nra xíʼin ta̱ Salomón: “Ndakú va̱ʼa koún ta ta̱a va̱ʼa koún” (1 Rey. 2:​1-3). Ndiʼi ta̱a ta̱ káchíñu nu̱ú Jehová xíniñúʼu kundiku̱nra consejo yóʼo. Ña̱ va̱ʼa kana ndiʼi ña̱ kéʼéra xíniñúʼu viíní kuniso̱ʼora ndiʼi ña̱ káʼa̱n Jehová, ta ndiʼi tiempo xíniñúʼu keʼéra ña̱yóʼo (Luc. 2:52). ¿Nda̱chun ndáyáʼviní kuxa-ini ta̱ va̱lí xíʼin tu̱ʼun Ndióxi̱?

2, 3. ¿Nda̱chun ndáyáʼviní ña̱ kuxa-ini ta̱ va̱lí xíʼin tu̱ʼun Ndióxi̱?

² Ndiʼi ta̱a ta̱ káchíñu nu̱ú Jehová íyo ku̱a̱ʼání chiñu nu̱úra ti̱xin veʼera ta saátu ti̱xin congregación. Tá ta̱ kúa̱an kúún sana ndákanixi̱níún xa̱ʼa̱ chiñu ña̱ keʼún chí nu̱únínu. Tá kúú, ña̱ koún precursor, siervo ministerial, anciano á ña̱ tindaʼún ta koo se̱ʼún (Efes. 6:4; 1 Tim. 3:1). Ña̱ va̱ʼa xa̱ún keʼún ndiʼi ña̱yóʼo xíniñúʼu kuxa-iniún xíʼin tu̱ʼun Ndióxi̱.b

³ ¿Ndáaña kivi chindeé yóʼó ña̱ va̱ʼa kuxa-iniún xíʼin tu̱ʼun Ndióxi̱? ¿Ndáa chiñu kúú ña̱ xíniñúʼu sakúaʼún keʼún? Ta, ¿ndáaña kivi keʼún vitin ta saá koo tu̱ʼvaún ña̱ vií keʼún chiñu ña̱ taxina ndaʼún chí nu̱únínu?

¿NDÁAÑA CHINDEÉ YÓʼÓ ÑA̱ VA̱ʼA KEʼÚN ÑA̱ KÚTÓO NDIÓXI̱?

4. ¿Mií kivi ndani̱ʼún na̱ kundikún yichi̱? (Koto na̱ʼná).

⁴ Ndaka̱xin na̱ kivi kundikún yichi̱. Biblia káʼa̱nña xa̱ʼa̱ ku̱a̱ʼání na̱ ta̱a na̱ va̱ʼaní xi̱ndasakáʼnu Ndióxi̱ ta xi̱kuʼvi̱ní-inina xi̱xininara ta va̱ʼaní xi̱ndaana na̱ ñuura. Sana ti̱xin veʼún á ti̱xin congregación íyo na̱ hermano na̱ xa̱a̱ ku̱a̱ʼání tiempo ndásakáʼnu Ndióxi̱ na̱ kivi kundikún yichi̱ (Heb. 13:7). Ta saátu kivi kundikún yichi̱ ña̱ va̱ʼaní sa̱ndákoo ta̱ Jesucristo nu̱ún (1 Ped. 2:21). Tá xa̱a̱ ndi̱ʼi nda̱kanixi̱níún xa̱ʼa̱ ndiʼi na̱yóʼo koto ndáaña va̱ʼa kúúmiína ña̱ kivi chindeétáʼan xíʼún (Heb. 12:​1, 2). Tándi̱ʼi, chika̱a̱ ndee̱ ña̱ keʼún táki̱ʼva kéʼéna.

5. ¿Ndáaña xíniñúʼu keʼún tasaá viíní ndakanixi̱níún, ta nda̱chun ndáyáʼviní ña̱yóʼo? (Salmo 119:9).

⁵ Sakúaʼá ña̱ viíní ndakanixi̱níún (Prov. 3:21). Ndiʼi ta̱a xíniñúʼu tavára tiempo ña̱ viíní ndakanixi̱níra tá ndáka̱xinra keʼéra iin ña̱ʼa. Ña̱kán, chika̱ún ndee̱ ña̱ viíní koo ña̱ ndákanixi̱níún ta kǒo sandákoún keʼún ña̱yóʼo. ¿Nda̱chun? Saáchi ñuyǐví yóʼo íyo ku̱a̱ʼání na̱ va̱lí kúa̱an na̱ kéʼé ña̱ kúni̱ mií kuitína (Prov. 7:7; 29:11). Ña̱ va̱xi nu̱ú televisión, película xíʼin ña̱ va̱xi nu̱ú Internet kivi sakáña xi̱níún ta kixáʼún keʼún ña̱ va̱ása va̱ʼa. Ña̱kán, ¿ndáaña kivi chindeétáʼan xíʼún ña̱ viíní ndakanixi̱níún? Ña̱ nu̱ú, kivi sakúaʼún ña̱ va̱xi nu̱ú Biblia ta ndakanixi̱níún nda̱chun káʼa̱n Jehová xíʼún ña̱ keʼúnña. Tándi̱ʼi, kivi kuniñúʼún ña̱ sa̱kuaʼún ña̱ va̱ʼa viíní ndaka̱xiún ña̱ keʼún tasaá sakúsi̱íún-ini Jehová (kaʼvi Salmo 119:9).c Tá ná sakúaʼún ña̱ viíní ndakanixi̱níún, ña̱yóʼo chindeétáʼanña xíʼún ña̱ kuxa-iniún xíʼin tu̱ʼun Ndióxi̱ (Prov. 2:​11, 12; Heb. 5:14). Ña̱kán, tá viíní ndákanixi̱níún ña̱yóʼo chindeétáʼanña xíʼún: ña̱ to̱ʼóní koún xíʼin ná hermana ta saátu ña̱ viíní ndaka̱xiún ndáa ki̱ʼva ndasaviíún miíún.

6. ¿Ndáa ki̱ʼva na̱ʼa iin ta̱ hermano kúa̱an ña̱ vií ndákanixi̱níra ta íxato̱ʼóra ná ñaʼá?

⁶ Tá viíní ndákanixi̱níún ña̱yóʼo chindeétáʼanña xíʼún ña̱ ixato̱ʼún ná ñaʼá. Tá kúú, iin ta̱ hermano kútóora iin ñá hermana ta kúni̱ra kuxini̱ va̱ʼarañá, ña̱ va̱ʼava kúúña. Soo, tá va̱ása ndákanixi̱níra ña̱ tindaʼa̱ra xíʼinñá soo káʼa̱nvara xíʼinñá á chíndaʼára mensaje nu̱úñá, ñáyóʼo kivi ndakanixi̱níñá ña̱ kútóorañá ta xíʼin ña̱yóʼo náʼa̱ra ña̱ va̱ása vií ndákanixi̱níra. Soo, tá xa̱a̱ ndákanixi̱níra tindaʼa̱ra xíʼinñá su̱ví iin ku̱a̱chiví kúú ña̱ keʼéra ña̱yóʼo (1 Tim. 5:​1, 2). Soo, tá xa̱a̱ xíkara xíʼin iin ñá hermana xíniñúʼu kiʼinra kuenta ña̱ va̱ása kaka mitúʼunna, chi ndiʼi tiempo xíniñúʼu ku̱ʼu̱n na̱ hermano xíʼinna tasaá kǒo ka̱ʼa̱nna ña̱ va̱ása va̱ʼa xa̱ʼa̱ ñá hermana kán (1 Cor. 6:18).

7. Tá vií ndákanixi̱níún, ¿ndáa ki̱ʼva ndaka̱xiún ti̱ko̱to̱ ña̱ kundixún?

⁷ Inka ki̱ʼva ña̱ na̱ʼa iin ta̱ loʼo ña̱ ndákanixi̱níra táki̱ʼva ndákanixi̱ní Jehová kúú, ña̱ kiʼinra kuenta xíʼin ti̱ko̱to̱ ña̱ ndíxira ta saátu xíʼin ki̱ʼva ña̱ ndáchuʼunra xi̱níra. Na̱ íxava̱ʼa ti̱ko̱to̱ va̱ása íxato̱ʼóna Jehová ta kéʼéna ña̱ kini, xa̱ʼa̱ ña̱kán ti̱ko̱to̱ ña̱ íxava̱ʼana ni̱ʼiníña ta náʼa̱ña táki̱ʼva íyo ti̱ko̱to̱ ná ñaʼá. Iin ta̱ loʼo ta̱ chíka̱a̱ní ndee̱ ña̱ vií kutáʼanra xíʼin Jehová, kíʼinra kuenta xíʼin ña̱ káʼa̱n Biblia ta saátu ndíku̱nra ejemplo na̱ congregación, ta vií ndáka̱xinra ña̱ kundixira xíʼin ña̱ ndasaviíra miíra. Ta kivi ndakanixi̱níra xa̱ʼa̱ pregunta yóʼó: “¿Á náʼi̱ xíʼin ña̱ ndáka̱xii̱n keʼíi̱ ña̱ íxatoʼíi̱ ña̱ ndákanixi̱ní inkana? ¿Á náʼi̱ xíʼin kiʼva ña̱ ndíxii̱ ña̱ ndásakáʼnui̱ Ndióxi̱?” (1 Cor. 10:​31-33; Tito 2:6). Na̱ hermano káʼa̱n va̱ʼana xa̱ʼa̱ na̱ va̱lí na̱ viíní ndákanixi̱ní, ta saátu sákusi̱ína-ini Jehová.

8. ¿Ndáaña kivi keʼé iin ta̱ loʼo tasaá kivi kundaa-ininara?

⁸ Chika̱a̱ ndee̱ ña̱ kundaa-inina yóʼó. Ña̱yóʼo kúni̱ kachina ña̱ chika̱ún ndee̱ ña̱ keʼún ndiʼi chiñu ña̱ táxina ndaʼún (Luc. 16:10). Ndakanixi̱ní xa̱ʼa̱ ejemplo ta̱ Jesús. Ta̱yóʼo viíní xi̱keʼéra ndiʼi chiñu ña̱ xi̱kuumiíra, ke̱ʼéra ndiʼi ña̱ ni̱ka̱ʼa̱n Jehová xíʼinra ni sava yichi̱ ixayo̱ʼvi̱vaña xíʼinra keʼéraña. Xi̱kuʼviní-inira xi̱xinira na̱ yiví soo na̱ xi̱kuʼvi̱níka-inira xi̱xinira xi̱kuu na̱ discípulora ta nda̱a̱ ni̱xi̱ʼi̱ra xa̱ʼa̱na (Juan 13:1). Táki̱ʼva ke̱ʼé ta̱ Jesús, chika̱a̱ ndee̱ ña̱ keʼún ndiʼi chiñu ña̱ táxina ndaʼún, ta tá va̱ása xíni̱ún keʼúnña vitá koo iniún ta ka̱ʼa̱n xíʼin iin ta̱ hermano ña̱ ná chindeétáʼanra xíʼún (Rom. 12:11). Ta ndiʼi chiñu ña̱ keʼún keʼéñá “xa̱ʼa̱ Jehová ta su̱ví xa̱ʼa̱ na̱ yiví” (Col. 3:23). Xa̱ʼa̱ ña̱ kúún iin ta̱ ku̱a̱chi koo sava ña̱ʼa ña̱ kǒo kuchiñún keʼún, xa̱ʼa̱ ña̱kán xíniñúʼu ndakuniún ña̱ va̱ása va̱ʼa íyo sava ña̱ kéʼún (Prov. 11:2).

SAKÚAʼA KEʼÉ ÑA̱ KIVI CHINDEÉTÁʼAN XÍʼÚN

9. ¿Nda̱chun xíniñúʼu sakúaʼa iin ta̱ loʼo kachíñura?

⁹ Ña̱ va̱ʼa xa̱ún koún iin cristiano ta̱ xa̱a̱ xu̱xa-ini xíniñúʼu sakúaʼún keʼún ku̱a̱ʼá chiñu, chi ña̱yóʼo chindeétáʼanña xíʼún ña̱ taxina ku̱a̱ʼáka chiñu ndaʼún ti̱xin congregación, ta saátu ña̱ ndani̱ʼún iin chiñu nu̱ú kachíñún. Ña̱yóʼo chindeétáʼanña xíʼún ña̱ kuumiíún xu̱ʼún ña̱ va̱ʼa taxiún ña̱ xíniñúʼu na̱ veʼún, ta saátu ña̱ vií kutáʼún xíʼin inkana. Ná kotoyó sava ña̱ kivi keʼún.

10, 11. ¿Ndáaña va̱ʼa ndákiʼin na̱ congregación tá iin ta̱ hermano xínira kaʼvira xíʼin ña̱ taara? (Salmo 1:​1-3; koto na̱ʼná).

¹⁰ Sakúaʼa kaʼvíún ta saátu ña̱ taaún. Biblia káʼa̱nña, ta̱a ta̱ káʼvi tu̱ʼun Ndióxi̱ ndiʼi ki̱vi̱ ta ndákanixi̱níra xa̱ʼa̱ña si̱íní íyora (kaʼvi Salmo 1:​1-3).d Saá xáa̱ra kúnda̱a̱-inira ndáa ki̱ʼva ndákanixi̱ní Jehová ta ña̱yóʼo chindeétáʼanña xíʼinra ña̱ vií koo ña̱ ndakanixi̱níra (Prov. 1:​3, 4). Tá xíni̱ún taaún ta xíni̱ún kaʼviún va̱ʼaní kuniñúʼuna yóʼó ti̱xin congregación. ¿Nda̱chun?

¹¹ Na̱ hermano xíniñúʼuna na̱ chindeétáʼan xíʼinna ta saátu ña̱ taxina consejo ña̱ va̱xi nu̱ú Biblia ndaʼa̱na (Tito 1:9). Tá xíni̱ún kaʼviún ta saátu xíni̱ún taaún, kivi taxiún discurso xíʼin comentario ña̱ kivi chindeétáʼan xíʼin inkana. Saátu tá káʼvíún á tá xíniso̱ʼún discurso ña̱ táxina ti̱xin asamblea kivi kaʼyíún ndiʼi ña̱ sákuaʼún, ta ña̱yóʼo chindeétáʼanña xíʼún ña̱ kandíxakaún Ndióxi̱ xíʼin ña̱ chika̱ún ndee̱ xíʼin inka na̱ hermano.

12. ¿Ndáaña chindeétáʼan xíʼún ña̱ ka̱ʼún xíʼin inkana?

¹² Sakúaʼa ka̱ʼún xíʼin inkana. Ña̱ va̱ʼa keʼún ña̱yóʼo xíniñúʼu viíní kuniso̱ʼún ta kunda̱a̱-iniún xíʼin ña̱ ndákanixi̱ní inkana ta saátu xíʼin ña̱ ndóʼona (Prov. 20:5). Kivi sakúaʼún kunda̱a̱-iniún xíʼin ña̱ ndóʼo inkana, tá xítoún ndáa ki̱ʼva káʼa̱nna ta saátu ndáa ki̱ʼva xítona. Ña̱yóʼo kúni̱ kachiña, ña̱ xíniñúʼu taváún tiempo ña̱ natúʼún xíʼinna. Tá ndiʼi tiempo káʼún xíʼinna xíʼin celular, correo á mensaje ixayo̱ʼvi̱nívaña xíʼún ña̱ natúʼún xíʼinna tá ná kuniúnna. Xa̱ʼa̱ ña̱kán, tavá tiempo ña̱ kitáʼún xíʼinna ta natúʼún xíʼinna (2 Juan 12).

13. ¿Ndáaña xíniñúʼu sakúaʼa iin ta̱ loʼo keʼéra? (1 Timoteo 5:8; koto na̱ʼná).

¹³ Sakúaʼa kachíñún. Iin ta̱ cristiano ta̱ xa̱a̱ xu̱xa-ini xíniñúʼu kundaara na̱ veʼera (kaʼvi 1 Timoteo 5:8). Sava ñuu na̱ va̱lí kivi sakúaʼana chiñu ña̱ kéʼé yivána, na̱ veʼena á ti̱xin escuela. Ni nda̱a̱ ndáaka ña̱ ná keʼéna kivi sakúaʼana kachíñuna tasaá kǒo ixama̱ní ña̱ʼa nu̱úna (Hech. 18:​2, 3; 20:34; Efes. 4:28). Chika̱a̱ ndee̱ ña̱ viíní kachíñún tasaá va̱ʼaní ka̱ʼa̱nna xa̱ʼún ta va̱ása ixayo̱ʼvi̱ña xíʼún ndani̱ʼún chiñu nu̱ú kachíñún. Ña̱ xa̱a̱ sa̱kuaʼayó nu̱ú artículo yóʼo kivi chindeétáʼanña xíʼún ña̱ keʼún inkaka chiñu chí nu̱únínu. Ná kotoyó sava ña̱yóʼo.

ÑA̱ KIVI CHINDEÉTÁʼAN XÍʼÚN CHÍ NU̱ÚNÍNU

14. ¿Ndáaña kivi chindeétáʼan xíʼin iin ta̱ hermano ña̱ kachíñu ku̱a̱ʼákara nu̱ú Jehová?

¹⁴ Kivi kachíñún nu̱ú Jehová ku̱a̱ʼá tiempo. Ku̱a̱ʼání na̱ hermano tá válívína ki̱xáʼana kúúna precursor. Tá ndákanixi̱níún ña̱ koún precursor, ña̱yóʼo kivi chindeétáʼan xíʼún ña̱ kachíñún xíʼin inka na̱ hermano ta saátu ña̱ viíní kuniñúʼún xu̱ʼún (Filip. 4:​11-13). ¿Nda̱chun ndáyáʼviní ña̱ koún precursor auxiliar? Saáchi ña̱yóʼo kivi chindeétáʼanña xíʼún ña̱ xa̱ún koún precursor regular tasaá kivi kachíñún ku̱a̱ʼáka tiempo nu̱ú Jehová. Tá kúú, ña̱ kachíñún nu̱ú íxava̱ʼana veʼe nu̱ú ndásakáʼnuyó Ndióxi̱ á ña̱ kachíñún Betel.

15, 16. ¿Ndáaña xíniñúʼu keʼé iin ta̱ hermano ña̱ va̱ʼa xa̱a̱ra koora siervo ministerial á anciano?

¹⁵ Kivi koún siervo ministerial á anciano. Ndiʼi ta̱ hermano kivi chika̱a̱ra ndee̱ ña̱ xa̱a̱ra koora anciano ti̱xin congregación. Ña̱kán ndiʼi ta̱ hermano ta̱ kúni̱ keʼé chiñu yóʼo iin ña̱ va̱ʼaní kúú ña̱ ndáka̱xinra keʼéra (1 Tim. 3:1). Ña̱ va̱ʼa xa̱ún koún anciano, siʼna xíniñúʼu koún siervo ministerial. Na̱ siervo ministerial va̱ʼaní chíndeétáʼanna xíʼin na̱ anciano ña̱ keʼéna ku̱a̱ʼá chiñu. Na̱ anciano xíʼin na̱ siervo ministerial vitá íyo inina ta kúsi̱í-inina nátúʼunna xíʼin na̱ yiví xa̱ʼa̱ Ndióxi̱. Iin ta̱ loʼo kivi xa̱a̱ra koora siervo ministerial ni kúúmiíra 17 ku̱i̱ya̱ á ku̱a̱ʼákaña. Ta iin ta̱ siervo ministerial ta̱ va̱ʼaní xíni̱ keʼé chiñu kivi xa̱a̱ra koora anciano ni kúúmiíra 20 ku̱i̱ya̱.

¹⁶ Nu̱ú Biblia va̱xi ña̱ káʼa̱n xíʼin na̱ hermano ndáaña xíniñúʼu keʼéna ña̱ va̱ʼa xa̱a̱na koona siervo ministerial á anciano. Ña̱ va̱ʼa xa̱a̱na keʼéna chiñu yóʼo xíniñúʼu kuʼvi̱-inina kunina Jehová, na̱ veʼena xíʼin na̱ congregación (1 Tim. 3:​1-13; Tito 1:​6-9; 1 Ped. 5:​2, 3). Ka̱ʼa̱n xíʼin Jehová ña̱ ná chindeétáʼanra xíʼún ña̱ kunda̱a̱-iniún ndáaña xíniñúʼu keʼún ña̱ va̱ʼa koún siervo ministerial á anciano.e

17. ¿Ndáa ki̱ʼva kundaún na̱ veʼún tá xa̱a̱ ná ti̱ndaʼún? (Koto na̱ʼná).

¹⁷ Tá ná tinda̱ʼún viíní kuniʼún yichi̱ nu̱ú na̱ veʼún. Nda̱a̱ táki̱ʼva ni̱ka̱ʼa̱n ta̱ Jesús, íyo sava ta̱ hermano ta̱ ndáka̱xin koo kúa̱an (Mat. 19:12). Soo, tá miíún kúni̱ún tinda̱ʼún xíniñúʼu viíní kuniʼún yichi̱ nu̱ú na̱ veʼún ta saátu kundaún ñá síʼún (1 Cor. 11:3). Jehová káʼa̱nra xíʼin ta̱ ti̱ndaʼa̱ ña̱ ná kuʼvi̱-inira kunira ñá síʼira, ña̱ kundaarañá ta saátu kundi̱ʼi̱-inira xa̱ʼa̱ñá ña̱ sakúaʼakañá xa̱ʼa̱ Ndióxi̱, ta taxira ña̱ xíniñúʼuñá (Efes. 5:​28, 29). Tá chíka̱ún ndee̱ ña̱ kundaa-ini inkana yóʼó, ta viíní ndákanixi̱níún, ta íxato̱ʼún ná ñaʼá, saá kúú ña̱ koo tu̱ʼvaún ña̱ tindaʼún ta viíní kuniʼún yichi̱ nu̱ú na̱ veʼún.

18. ¿Ndáaña kivi keʼé iin ta̱ hermano ña̱ va̱ʼa kundaara se̱ʼera?

¹⁸ Tá xa̱a̱ ná koo se̱ʼún. Tá ná tindaʼún sana kivi koo se̱ʼún. Xa̱ʼa̱ ña̱kán, ejemplo Jehová va̱ʼaní chindeétáʼanña xíʼún ña̱ viíní kundaún se̱ʼún (Efes. 6:4). Jehová ni̱ka̱ʼa̱nra xíʼin ta̱ Jesús ña̱ kúʼvi̱ní-inira xínirara ta saátu ña̱ ku̱si̱í-inira xíʼin chiñu ña̱ ke̱ʼéra (Mat. 3:17). Tá xa̱a̱ ñá koo se̱ʼún, ka̱ʼa̱n xíʼinna ña̱ kúʼvi̱-iniún xíniúnna ta kúsi̱íní-iniún xíʼin chiñu ña̱ kéʼéna. Na̱ íyo se̱ʼe, na̱ ndíku̱n yichi̱ Jehová chíndeétáʼanna xíʼin se̱ʼena ña̱ va̱ʼaní kutáʼanna xíʼinra. Soo, ¿ndáaña xíniñúʼu kixáʼún keʼún vitin tasaá viíní kundaún na̱ va̱lí se̱ʼún? Xíniñúʼu kuʼvi̱-iniún kuniún na̱ veʼún, xíʼin na̱ hermano, ta saátu xíniñúʼu sakúaʼún ka̱ʼún xíʼinna ña̱ kúʼvi̱-iniún xíniúnna ta ndáyáʼvinína nu̱ún (Juan 15:9). Ña̱yóʼo chindeétáʼanña xíʼún ña̱ kundayaʼviníún nu̱ú Jehová, nu̱ú na̱ veʼún xíʼin nu̱ú na̱ congregación.

¿Á KEʼÚN ÑA̱ XA̱A̱ SA̱KUAʼÚN?

19, 20. ¿Ndáaña xíniñúʼu keʼé iin ta̱ loʼo ña̱ va̱ʼa keʼéra ña̱ kútóo Jehová? (Koto na̱ʼná ña̱ va̱xi chí nu̱ú kíxáʼa tutu yóʼo).

¹⁹ Tá iin ta̱ loʼo kúa̱an kúún, chika̱a̱ ndee̱ chi kuchiñuvaún keʼún ña̱ káʼa̱n Jehová xíʼún. Soo, xíniñúʼu ndaka̱xiún na̱ kundikún yichi̱, viíní ndakanixi̱níún, ná kundaa-ini inkana yóʼó ta saátu sakúaʼún keʼún inkaka chiñu, saáchi ña̱yóʼo chindeétáʼan xíʼún tá ná taxina chiñu ndaʼún chí nu̱únínu.

²⁰ Sana kivi ndakanixi̱níún ña̱ va̱ása kuchiñún keʼún ndiʼi ña̱ xa̱a̱ ni̱ka̱ʼa̱nyó xa̱ʼa̱ yóʼo. Soo, kǒo ndakava-iniún saáchi kuchiñuvaún keʼúnña, chi Jehová kúni̱vara chindeétáʼanra xíʼún (Is. 41:​10, 13). Ta saátu na̱ hermano kivi chindeétáʼanna xíʼún. Tá ná keʼún ña̱ kúni̱ Jehová, saá kúú ña̱ si̱íní koún. Kúʼvi̱ní-inindi̱ xínindi̱ yóʼó, ta kúni̱ndi̱ ña̱ ná taxi Jehová ku̱a̱ʼání ña̱ va̱ʼa ndaʼún xa̱ʼa̱ ña̱ chíka̱a̱níún ndee̱ ña̱ viíní kutáʼún xíʼinra (Prov. 22:4).