Ná kusi̱í-iniyó natúʼunyó xíʼin na̱ yiví táki̱ʼva ke̱ʼé ta̱ Jesús

1. ¿Nda̱chun síín íyo ña̱ kéʼéyó nu̱ú ña̱ kéʼé na̱ káʼa̱n ña̱ ndíku̱nna ta̱ Jesús?

SÍÍNNÍ íyo ña̱ kéʼé na̱ yiví na̱ káʼa̱n ña̱ ndíku̱nna ta̱ Jesús nu̱ú ña̱ kéʼé miíyó na̱ kúú testigo Jehová, saáchi miíyó xíʼin ña̱ kéʼéyó náʼa̱yó ña̱ kúni̱níyó natúʼunyó xíʼin na̱ yiví xa̱ʼa̱ Jehová (Tito 2:14). Soo sava yichi̱, savayó kivi kixáʼayó ndakava-iniyó ta va̱ása kusi̱íka-iniyó ña̱ ku̱ʼu̱nyó natúʼunyó xíʼin na̱ yiví xa̱ʼa̱ Ndióxi̱. Sana kivi kundoʼoyó nda̱a̱ táki̱ʼva ndo̱ʼo iin ta̱ anciano ta̱ chíkaa̱ní ndee̱ ña̱ kachíñura nu̱ú Jehová, ta̱yóʼo káchira: “Sava yichi̱ nda̱a̱ ni loʼo va̱ása kúni̱i̱ ku̱ʼi̱n natúʼi̱n xíʼin na̱ yiví xa̱ʼa̱ Ndióxi̱”.

2. ¿Nda̱chun sava yichi̱ íxayo̱ʼvi̱ña xíʼinyó ña̱ kusi̱í-iniyó tá ku̱a̱ʼa̱nyó natúʼunyó xa̱ʼa̱ Ndióxi̱?

² Sana íyo inkaka chiñu ña̱ kéʼéyó nu̱ú Jehová ña̱ sákusi̱íníka-iniyó nu̱úka ña̱ ku̱ʼu̱nyó natúʼunyó xíʼin na̱ yiví xa̱ʼa̱ra. ¿Nda̱chun? Saáchi tá íxava̱ʼayó salón nu̱ú koo reunión, tá ndásaviíyóña, tá chíndeétáʼanyó xíʼin na̱ hermano na̱ ndóo nu̱ú kúu tu̱ndóʼo á tá chíkaa̱tuyó ndee̱ xíʼin na̱ hermano, ndi̱ku̱n kíʼinyó kuenta ña̱ va̱ʼaní chíndeétáʼan ña̱yóʼo xíʼinna ta xa̱ʼa̱ ña̱yóʼo va̱ʼaní kúniyó. Ta saátu tá inkáchi káchíñuyó xíʼin na̱ hermanoyó, kíʼinyó kuenta ña̱ va̱ʼaní kítáʼanna ta kúʼvi̱ní-inina xínitáʼanna. Ta kúnda̱a̱tu-iniyó ña̱ chíndayáʼviní na̱ hermano ndiʼi chiñu ña̱ kéʼéyó ta táxinína tíxa̱ʼvi ndaʼa̱yó xa̱ʼa̱ña. Soo sana síínva kúniyó tá nátúʼunyó xíʼin na̱ yiví xa̱ʼa̱ Ndióxi̱, saáchi sana xa̱a̱ ku̱a̱ʼáníva ku̱i̱ya̱ nátúʼunyó xíʼinna, soo loʼoníva kúú na̱ xíniso̱ʼo ña̱ nátúʼunyó ta savatuna nda̱a̱ sáa̱na xa̱ʼa̱ ña̱ nátúʼunyó xíʼinna. Saátu kúnda̱a̱-iniyó xa̱ʼa̱ ña̱ kúyatinka ki̱vi̱ so̱ndíʼi sana ixandi̱va̱ʼaníkavana xíʼinyó xa̱ʼa̱ ña̱ nátúʼunyó xa̱ʼa̱ Ndióxi̱ (Mat. 10:22). ¿Ndáaña kivi chindeétáʼan xíʼinyó ña̱ kusi̱íka-iniyó tá ku̱a̱ʼa̱nyó natúʼunyó xa̱ʼa̱ Ndióxi̱?

3. Nda̱a̱ táki̱ʼva káchi Lucas 13:​6-9, ¿ndáaña sákuaʼayó xíʼin ña̱ ke̱ʼé ta̱ Jesús?

³ Iin ña̱ kivi chindeétáʼan xíʼinyó ña̱ kusi̱íka-iniyó tá ku̱a̱ʼa̱nyó natúʼunyó xíʼin na̱ yiví xa̱ʼa̱ Ndióxi̱ kúú ña̱ sakúaʼayó xa̱ʼa̱ ña̱ ke̱ʼé ta̱ Jesús. Ndiʼi tiempo ña̱ ni̱xi̱yo ta̱ Jesús nu̱ú ñuʼú yóʼo, chi̱kaa̱níra ndee̱ ña̱ va̱ʼa kusi̱íka-inira natúʼunra xíʼin na̱ yiví xa̱ʼa̱ Ndióxi̱ (kaʼvi Lucas 13:​6-9). Ta̱ Jesús chi̱táʼanra miíra xíʼin iin ta̱a ta̱ xi̱ndaa tú higo u̱ni̱ ku̱i̱ya̱, soo tú yitu̱n yóʼo kǒo nda̱a̱ ni iin ku̱i̱ʼi nítaxinú. Ki̱ʼva saá ndo̱ʼo ta̱ Jesús saáchi u̱ni̱ ku̱i̱ya̱ na̱túʼunra xíʼin na̱ judío xa̱ʼa̱ Ndióxi̱, soo loʼoníva kúú na̱ ni̱xa̱a̱ ku̱u discípulora. Nda̱a̱ táki̱ʼva ke̱ʼé ta̱ ta̱a ta̱ xi̱ndaa tú higo ña̱ kǒo nísandákoora ña̱ kundaaranú, ki̱ʼva saá ke̱ʼé ta̱ Jesús chi kǒo nísandákoora ña̱ natúʼunra xíʼin na̱ yiví. Chi ña̱ ke̱ʼéra kúú ña̱ chi̱kaa̱níkara ndee̱ ña̱ natúʼunra xíʼin na̱ judío ña̱ va̱ʼa xa̱a̱na kandíxana Ndióxi̱.

4. ¿Ndáa ku̱mí ña̱ʼa ka̱ʼa̱nyó xa̱ʼa̱ nu̱ú artículo yóʼo?

⁴ Nu̱ú artículo yóʼo sakúaʼayó ndáa ki̱ʼva ni̱na̱ʼa̱ ta̱ Jesús ña̱ xi̱kusi̱í-inira xi̱natúʼunra xíʼin na̱ yiví xa̱ʼa̱ Ndióxi̱, ni i̱ñu̱ yo̱o̱ kuití xi̱kuma̱ní ña̱ kuvira (koto nota ña̱ va̱xi nu̱ú Biblia de estudio ña̱ naní “Después de estas cosas”, ña̱ va̱xi nu̱ú Lucas 10:1). Sakúaʼayó xa̱ʼa̱ ku̱mí ña̱ʼa ña̱ ke̱ʼé ta̱ Jesús. Ña̱ nu̱ú, ña̱ ni̱ndi̱ʼi̱níka-inira xa̱ʼa̱ kúú ña̱ keʼéra ña̱ kúni̱ Jehová. Ña̱ u̱vi̱, ki̱ʼin va̱ʼara kuenta xíʼin ña̱ káʼa̱n profecía. Ña̱ u̱ni̱, ka̱ndíxara ña̱ mií Jehová chindeétáʼan xíʼinra. Ña̱ ku̱mí, kǒo níndakava-inira ta ka̱ndíxavara ña̱ xa̱a̱ savana kuniso̱ʼona ña̱ xi̱natúʼunra.

NI̱NDI̱ʼI̱NÍKA-INIRA XA̱ʼA̱ ÑA̱ KEʼÉRA ÑA̱ KÚNI̱ JEHOVÁ

5. ¿Ndáaña ni̱ndi̱ʼi̱níka-ini ta̱ Jesús xa̱ʼa̱?

⁵ Ta̱ Jesús xi̱natúʼunra xíʼin ña̱ si̱í-ini xa̱ʼa̱ Reino Ndióxi̱ saáchi xi̱kunda̱a̱-inira ña̱yóʼo kúú ña̱ kúni̱ Ndióxi̱ ná keʼéra (Luc. 4:43). Ta ña̱ xi̱ndayáʼviníka nu̱ú ta̱ Jesús kúú ña̱ keʼéra ña̱yóʼo, ni tá kúma̱níka loʼo yo̱o̱ ña̱ kuvira “ni̱xa̱ʼa̱nra ñuu tá ñuu ña̱ sanáʼa̱ra na̱ yiví” (Luc. 13:22). Ta saátu sa̱náʼa̱ra ku̱a̱ʼáka na̱ discípulora ña̱ va̱ʼa ku̱ʼu̱nna natúʼunna xíʼin na̱ yiví nda̱a̱ táki̱ʼva ke̱ʼé miíra (Luc. 10:1).

6. ¿Ndáa ki̱ʼva kítáʼan ña̱ predicación xíʼin inkaka chiñu ña̱ kéʼéyó nu̱ú Jehová? (Koto na̱ʼná).

⁶ Tiempo vitin ña̱ ndáyáʼviníka kúú ña̱ ku̱ʼu̱nyó natúʼunyó xíʼin na̱ yiví, saáchi ña̱yóʼo kúú ña̱ kúni̱ Jehová xíʼin ta̱ Jesús ná keʼéyó (Mat. 24:14; 28:​19, 20). Ndiʼi chiñu ña̱ kéʼéyó nu̱ú Jehová kítáʼanvaña xíʼin ña̱ predicación. Tá kúú, íxava̱ʼayó salón ña̱ va̱ʼa ku̱ʼu̱n na̱ yiví na̱ nátúʼunyó xíʼin ña̱ ndasakáʼnuna Jehová, ta saátu ndiʼi chiñu ña̱ kéʼéna Betel xíʼin inkaka lugar chíndeétáʼanña xíʼinyó ña̱ natúʼunyó xíʼin na̱ yiví xa̱ʼa̱ Ndióxi̱. Tá ndeéní kúun sa̱vi̱ á kúu inkaka tu̱ndóʼo ñuu nu̱ú ndóo na̱ hermano, chíkaa̱yó ndee̱ ña̱ taxiyó ña̱ xíniñúʼuna, soo ña̱ ndáyáʼvika kúú ña̱ chíndeétáʼanyó xíʼinna ña̱ va̱ʼa ku̱ʼu̱nna reunión ta saátu predicación. Ná ndakaʼányó chi ña̱ ndáyáʼvika kúú ña̱ ku̱ʼu̱nyó natúʼunyó xíʼin na̱ yiví, saáchi ña̱yóʼo kúú ña̱ kúni̱ Jehová ná keʼéyó. Xa̱ʼa̱ ña̱yóʼo ná chikaa̱níkayó ndee̱ ña̱ ku̱ʼu̱n ni̱ʼiyó natúʼunyó xíʼin na̱ yiví xa̱ʼa̱ Jehová. Iin ta̱ anciano ta̱ íyo chí Hungría ta̱ nani János káchira: “Ndiʼi tiempo sándakaʼíi̱n miíi̱ ña̱ ndáyáʼviníka kúú ña̱ ku̱ʼu̱nyó natúʼunyó xíʼin na̱ yiví nu̱úka inkaka chiñu ña̱ kéʼéyó nu̱ú Jehová, chi ña̱yóʼo kúú míí chiñu ña̱ ndáyáʼviníka xíniñúʼu keʼéyó”.

7. ¿Nda̱chun kúni̱ Jehová ña̱ ná ndakundeéyó natúʼunyó xíʼin na̱ yiví? (1 Timoteo 2:​3, 4).

⁷ Iin ña̱ chindeétáʼan xíʼinyó ña̱ kusi̱íka-iniyó natúʼunyó xíʼin na̱ yiví kúú ña̱ kundáʼvi-iniyó kuniyóna nda̱a̱ táki̱ʼva kéʼé mií Jehová. Jehová kúni̱ra ña̱ ku̱a̱ʼáníka na̱ yiví ná xa̱a̱ kunda̱a̱-ini xa̱ʼa̱ra ta ndasakáʼnunara (kaʼvi 1 Timoteo 2:​3, 4). Ña̱ nátúʼunyó xíʼin na̱ yiví kivi sakǎkuñana, xa̱ʼa̱ ña̱kán kúni̱ Jehová chindeétáʼanra xíʼinyó ña̱ viíka sakúaʼayó natúʼunyó xíʼinna. Tá kúú nu̱ú folleto ña̱ naní Sánáʼa̱yó na̱ yiví chi kúʼvi̱-iniyó xíniyóna, va̱xi ña̱ kivi chindeétáʼan xíʼinyó ña̱ kunda̱a̱-iniyó ndáa ki̱ʼva natúʼunyó xíʼin na̱ yiví tasaá kixáʼayó kaʼviyó xíʼinna ta xa̱a̱na ndakuchina. Ni kǒo xíín na̱ yiví kuniso̱ʼona ña̱ nátúʼunyó xíʼinna tiempo vitin, sana kiviva xa̱a̱na sakúaʼana xa̱ʼa̱ Jehová tá kúma̱níka ndiʼi ña̱ gran tribulación. Sana ña̱ nátúʼunyó xíʼinna tiempo vitin kivi chindeétáʼanña xíʼinna ña̱ xa̱a̱na ndasakáʼnuna Jehová chí nu̱únínu. Xa̱ʼa̱ ña̱kán xíniñúʼu ndakundeéyó natúʼunyó xíʼin ndiʼi na̱ yiví.

KI̱ʼIN VA̱ʼARA KUENTA XÍʼIN ÑA̱ KÁʼA̱N PROFECÍA

8. Xa̱ʼa̱ ña̱ xi̱kunda̱a̱-ini ta̱ Jesús xa̱ʼa̱ profecía, ¿ndáa ki̱ʼva chi̱ndeétáʼanña xíʼinra?

⁸ Ta̱ Jesús xi̱kunda̱a̱va-inira ndáa ki̱ʼva xi̱nu sava profecía ña̱ va̱xi nu̱ú Biblia, xa̱ʼa̱ ña̱kán xi̱kunda̱a̱-inira ña̱ u̱ni̱ ku̱i̱ya̱ sava kuití kúú ña̱ natúʼunra xíʼin na̱ yiví xa̱ʼa̱ Ndióxi̱ (Dan. 9:​26, 27). Ta saátu xi̱kunda̱a̱-inira ndáa ki̱ʼva kuvira ta ama kuvira, saáchi xa̱a̱ xi̱kaʼa̱n profecía xa̱ʼa̱ ña̱yóʼo (Luc. 18:​31-34). Xa̱ʼa̱ ña̱ xi̱kunda̱a̱-ini ta̱ Jesús xa̱ʼa̱ profecía yóʼo, viíníka xi̱niñúʼura tiempora ña̱ va̱ʼa sandíʼira keʼéra chiñu ña̱ ta̱xi Ndióxi̱ ndaʼa̱ra ta xíʼin ña̱ si̱í-ini na̱túʼunra xíʼin na̱ yiví.

9. ¿Ndáa ki̱ʼva chíndeétáʼan profecía xíʼinyó ña̱ ku̱ʼu̱nyó natúʼunyó xíʼin na̱ yiví?

⁹ Tá ná kunda̱a̱-iniyó xa̱ʼa̱ profecía ña̱ va̱xi nu̱ú Biblia, chindeétáʼanña xíʼinyó ña̱ kusi̱íka-iniyó natúʼunyó xíʼin na̱ yiví xa̱ʼa̱ Ndióxi̱. Kúnda̱a̱-iniyó ña̱ si̱lóʼoní tiempo kúma̱ní ta ndiʼi-xa̱ʼa̱ ñuyǐví yóʼo, tá xítoyó ña̱ kúu tiempo vitin ta saátu ki̱ʼva ña̱ kéʼé na̱ yiví kíʼinyó kuenta ña̱ saá kúú ña̱ ni̱ka̱ʼa̱n Biblia koo tiempo so̱ndíʼi ña̱ ndóoyó vitin. Xa̱a̱ kúnda̱a̱-iniyó ndáa ki̱ʼva ku̱a̱ʼa̱n xínu profecía ña̱ káʼa̱n ndáa ki̱ʼva kanitáʼan ta̱ rey ña̱ sur (ña̱yóʼo káʼa̱nña xa̱ʼa̱ na̱ chíñu ñuu Reino Unido xíʼin Estados Unidos) xíʼin ta̱ rey ña̱ norte (ña̱yóʼo káʼa̱nña xa̱ʼa̱ na̱ chíñu ñuu Rusia xíʼin na̱ kítáʼan xíʼinna) (Dan. 11:40). Saátu kúnda̱a̱-iniyó ña̱ estatua ña̱ káʼa̱n profecía ña̱ va̱xi nu̱ú Daniel 2:​43-45 ndánaʼa̱ña na̱ chíñu ñuu Reino Unido xíʼin Estados Unidos. Ña̱ káʼviyó xa̱ʼa̱ profecía yóʼo, chíndeétáʼanña xíʼinyó kunda̱a̱-iniyó ña̱ si̱lóʼoní tiempo kúma̱ní ta sandíʼi-xa̱ʼa̱ Reino Ndióxi̱ ndiʼi na̱ chíñu na̱ íyo nu̱ú ñuʼú yóʼo. Ndiʼi profecía yóʼo náʼa̱ña nu̱úyó ña̱ ndóoyó tiempo so̱ndíʼi, xa̱ʼa̱ ña̱yóʼo viíní xíniñúʼu kuniñúʼuyó tiempoyó ña̱ va̱ʼa ku̱ʼu̱nyó natúʼunyó xíʼin na̱ yiví xa̱ʼa̱ Ndióxi̱.

10. ¿Ndáa inka ki̱ʼva chíndeétáʼan profecía xíʼinyó ña̱ ndakundeéyó natúʼunyó xa̱ʼa̱ Jehová xíʼin ña̱ si̱í-ini?

¹⁰ Xa̱ʼa̱ ña̱ kúnda̱a̱-iniyó xa̱ʼa̱ profecía ña̱ va̱xi nu̱ú Biblia, kúni̱yó natúʼunyó xa̱ʼa̱ ña̱yóʼo xíʼin inka na̱ yiví. Iin ñá hermana ñá káchíñu nu̱ú Jehová chí República Dominicana ñá naní Carrie káchiñá: “Tá ndákanixi̱níi̱ xa̱ʼa̱ ña̱ liviní káʼa̱n Jehová taxira ndaʼa̱yó chí nu̱únínu, túvii̱ ña̱ saátu xíniñúʼu natúʼi̱n xíʼin inkana xa̱ʼa̱ ña̱yóʼo. Tá xítoi̱ ndiʼi tu̱ndóʼo ña̱ yáʼa na̱ yiví nu̱ú, ndákanixi̱níi̱ ña̱ saátu kúni̱ Jehová ña̱ ná kunda̱a̱-ini na̱yóʼo xa̱ʼa̱ ña̱ va̱ʼa ña̱ káʼa̱nra taxira ndaʼa̱yó chí nu̱únínu”. Profecía ña̱ va̱xi nu̱ú Biblia chíkaa̱ña ndee̱ xíʼinyó ña̱ ndakundeéyó natúʼunyó xíʼin na̱ yiví xa̱ʼa̱ Jehová, saáchi sándakaʼánña miíyó ña̱ mií Jehová kúú ta̱ chindeétáʼan xíʼinyó ña̱ keʼéyó chiñu yóʼo. Iin ñá hermana ñá naní Leila ñá íyo chí Hungría káchiñá: “Isaías 11:​6-9 sánáʼa̱ña yi̱ʼi̱, ña̱ mií Jehová kivi chindeétáʼan xíʼin iin na̱ yiví ña̱ nasamana ki̱ʼva ña̱ íyona. Ta ña̱yóʼo chíkaa̱ña ndee̱ xíʼi̱n ña̱ natúʼi̱n xíʼin na̱ yiví ni túvii̱ ña̱ kǒo kandíxana kuniso̱ʼona”. Ta iin ta̱ hermano ta̱ íyo chí Zambia ta̱ naní Christopher káchira: “Nda̱a̱ táki̱ʼva káchi Marcos 13:​10, xa̱a̱ iníísaá nu̱ú ñuyǐví ku̱a̱ʼa̱n kúnda̱a̱-ini na̱ yiví xa̱ʼa̱ tu̱ʼun va̱ʼa ta yi̱ʼi̱ kúsi̱íní-inii̱ xa̱ʼa̱ ña̱ chíkai̱ ndee̱ ña̱ keʼíi̱ ña̱ káʼa̱n profecía yóʼo”. Ta miíún, ¿ndáa profecía kúú ña̱ chíkaa̱ ndee̱ xíʼún ña̱ ndakundeún natúʼun xa̱ʼa̱ Jehová?

KA̱NDÍXARA ÑA̱ MIÍ JEHOVÁ CHINDEÉTÁʼAN XÍʼINRA

11. ¿Nda̱chun xi̱ndaaní-ini ta̱ Jesús Jehová? (Lucas 12:​49, 53).

¹¹ Ta̱ Jesús ka̱ndíxara ña̱ mií Jehová chindeétáʼan xíʼinra ña̱ ndakundeéra kusi̱í-inira natúʼunra xíʼin na̱ yiví. Ni viíníva xi̱natúʼun ta̱ Jesús xíʼin na̱ yiví, xi̱kunda̱a̱-inira ña̱ kixáʼa na̱ yiví taʼví-táʼanna ta ixandi̱va̱ʼana xíʼin táʼanna xa̱ʼa̱ ña̱ nátúʼunra xíʼinna xa̱ʼa̱ Reino Ndióxi̱ (kaʼvi Lucas 12:​49, 53). Ta saátu na̱ xi̱niʼi yichi̱ ti̱xin veʼe-ñu̱ʼu, xi̱saa̱ní-inina xi̱xininara xa̱ʼa̱ ña̱ xi̱natúʼunra xa̱ʼa̱ Ndióxi̱ ta ku̱a̱ʼání yichi̱ xi̱kuni̱na kaʼnínara (Juan 8:59; 10:​31, 39). Soo ni saá, kǒo nísandákoo ta̱ Jesús ña̱ natúʼunra xíʼin na̱ yiví saáchi xi̱kunda̱a̱-inira ña̱ mií Jehová chindeétáʼan xíʼinra. Xa̱ʼa̱ ña̱kán ni̱ka̱ʼa̱nra ña̱yóʼo: “Va̱ása íyo iinlá miíi̱, chi yivái̱ ta̱ chi̱ndaʼá yi̱ʼi̱ íyora xíʼi̱n” (Juan 8:16). Ta saátu ni̱ka̱ʼa̱nra ña̱yóʼo: “Kǒo sándakoo miíra yi̱ʼi̱, saáchi ndiʼi yichi̱ kéʼíi̱ ña̱ kúni̱ra” (Juan 8:29).

12. ¿Ndáa ki̱ʼva chi̱ndeétáʼan ta̱ Jesús xíʼin na̱ discípulora ña̱ ndakundeéna natúʼunna xíʼin na̱ yiví ni íxandi̱va̱ʼana xíʼinna?

¹² Ta̱ Jesús sa̱ndákaʼánra na̱ discípulora ña̱ ná kandíxana ña̱ mií Jehová chindeétáʼan xíʼinna. Xa̱ʼa̱ ña̱ xi̱kunda̱a̱-inira ña̱ kundiku̱nna sa̱tána ta ixandi̱va̱ʼana xíʼinna, ku̱a̱ʼá yichi̱ ni̱ka̱ʼa̱nra xíʼinna ña̱ mií Jehová chindeétáʼan xíʼinna (Mat. 10:​18-20; Luc. 12:​11, 12). Saátu ni̱ka̱ʼa̱nra xíʼinna ña̱ ná kiʼinnína kuenta (Mat. 10:16; Luc. 10:3). Ni̱ka̱ʼa̱ntura xíʼin na̱ discípulora ña̱ tá kǒo xíín na̱ yiví kuniso̱ʼona ña̱ nátúʼunna xíʼinna, ná kǒo ixandúxana xíʼinna (Luc. 10:​10, 11). Ta saátu ni̱ka̱ʼa̱nra xíʼinna ña̱ ná kununa tá kíxáʼa na̱ yiví íxandi̱va̱ʼana xíʼinna (Mat. 10:23). Ta̱ Jesús xi̱ndaa-inira Jehová ta xi̱kusi̱í-inira xi̱natúʼunra xíʼin na̱ yiví, soo tá xi̱kiʼinra kuenta ña̱ kivi kundoʼora iin tu̱ndóʼo va̱ʼaka xi̱ndakiʼinra ku̱a̱ʼa̱nra inka lugar (Juan 11:​53, 54).

13. ¿Nda̱chun kivi kandíxayó ña̱ chindeétáʼanva Jehová xíʼinyó?

¹³ Tiempo vitin saátu íxandi̱va̱ʼana xíʼinyó xa̱ʼa̱ ña̱ nátúʼunyó xíʼin na̱ yiví xa̱ʼa̱ Jehová, xa̱ʼa̱ ña̱kán xíniñúʼuyó ña̱ ná chindeétáʼan Jehová xíʼinyó ña̱ va̱ʼa ndakundeéyó natúʼunyó xíʼin na̱ yiví xíʼin ña̱ si̱í-ini (Apoc. 12:17). ¿Nda̱chun va̱ʼa kándíxayó ña̱ chindeétáʼan Jehová xíʼin iin tá iinyó? Saáchi nu̱ú Juan capítulo 17 kíʼinyó kuenta ña̱ ni̱ka̱ʼa̱n ta̱ Jesús xíʼin yivára ña̱ ná kundaara na̱ apóstolra, ta Jehová xi̱niso̱ʼovara ña̱ ni̱ka̱ʼa̱nra. Ta libro ña̱ Hechos káʼa̱nña ndáa ki̱ʼva chi̱ndeétáʼan Jehová xíʼin na̱ apóstol ña̱ va̱ʼa kusi̱í-inina natúʼunna xíʼin na̱ yiví ni xi̱ ixandi̱va̱ʼana xíʼinna. Tá ke̱ʼé ta̱ Jesús oración yóʼo saátu ni̱ka̱ʼa̱nra xíʼin Jehová ña̱ ná kundaara ndiʼi na̱ xi̱xaa̱ xi̱kandíxa ña̱ xi̱natúʼun na̱ apóstol yóʼo, xíʼin ña̱yóʼo kíʼinyó kuenta ña̱ nda̱a̱ xa̱ʼa̱ miíyó ni̱ka̱ʼa̱nra. Xa̱ʼa̱ ña̱yóʼo kúnda̱a̱-iniyó ña̱ ndakundeéva Jehová keʼéra ña̱ ni̱ka̱ʼa̱n ta̱ Jesús xíʼinra ta chindeétáʼanvara xíʼinyó nda̱a̱ táki̱ʼva ke̱ʼéra xíʼin na̱ apóstol (Juan 17:​11, 15, 20).

14. ¿Nda̱chun kándíxayó ña̱ kiviva kusi̱í-iniyó natúʼunyó xíʼin na̱ yiví? (Koto na̱ʼná).

¹⁴ Tá kúyatinka ki̱xaa̱ ki̱vi̱ ña̱ ndiʼi-xa̱ʼa̱ ñuyǐví yóʼo, sana ixayo̱ʼvi̱níkaña xíʼinyó ña̱ kusi̱í-iniyó natúʼunyó xíʼin na̱ yiví xa̱ʼa̱ Ndióxi̱. Soo ta̱ Jesús ni̱ka̱ʼa̱nra ña̱ koova ña̱ chindeétáʼan xíʼinyó ña̱ va̱ʼa ndakundeéyó natúʼunyó xíʼin na̱ yiví (Luc. 21:​12-15). Nda̱a̱ táki̱ʼva ke̱ʼé mií ta̱ Jesús ta saátu na̱ discípulora, saátu xíniñúʼu keʼé miíyó. Ná taxiyó ña̱ ná ndaka̱xin mií na̱ yiví á kuniso̱ʼona ña̱ nátúʼunyó xíʼinna á va̱ása kuniso̱ʼona ta ná kǒo natúʼunkúáchiyó xíʼinna. Na̱ hermanoyó na̱ ndóo ñuu nu̱ú va̱ása táxi na̱ chíñu ña̱ natúʼunna xa̱ʼa̱ Jehová, ndákundeévana nátúʼunna xa̱ʼa̱ra saáchi kándíxana ña̱ miíra chindeétáʼan xíʼinna. Tá siglo nu̱ú, Jehová ta̱xira espíritu santora ndaʼa̱ na̱ xi̱kachíñu nu̱úra ña̱ va̱ʼa natúʼunna xíʼin ndiʼi na̱ yiví xa̱ʼa̱ra. Ta saátu taxira espíritu santora ndaʼa̱ miíyó tiempo vitin ña̱ va̱ʼa ndakundeéyó natúʼunyó xíʼin na̱ yiví, nda̱a̱ ná ka̱ʼa̱nra ña̱ kǒo keʼékayó chiñu yóʼo (2 Tim. 4:17). Ná kǒo kaka-iniyó saáchi tá ndáa-iniyó Jehová, miíra chindeétáʼan xíʼinyó ña̱ kusi̱í-iniyó natúʼunyó xíʼin na̱ yiví.

KǑO NÍNDAKAVA-INIRA

15. ¿Nda̱chun va̱ʼa kúnda̱a̱-iniyó ña̱ xi̱kandíxava ta̱ Jesús ña̱ kiviva xa̱a̱ na̱ yiví kunda̱a̱-inina xa̱ʼa̱ Ndióxi̱?

¹⁵ Ta̱ Jesús xi̱kandíxavara ña̱ koo sava na̱ yiví na̱ kuniso̱ʼo ña̱ xi̱natúʼunra xa̱ʼa̱ Ndióxi̱, ta ña̱yóʼo chi̱ndeétáʼan xíʼinra ña̱ ndakundeéra kusi̱íka-inira natúʼunra xíʼin na̱ yiví. Tá xa̱a̱ kúni̱ ndiʼi ña̱ ku̱i̱ya̱ 30, ta̱ Jesús ki̱ʼinra kuenta ña̱ ni̱xi̱yo ku̱a̱ʼání na̱ yiví na̱ xi̱kuni̱ kunda̱a̱-ini xa̱ʼa̱ Ndióxi̱. Ta chi̱táʼanra na̱ yiví yóʼo xíʼin ñuʼú nu̱ú chi̱ʼina trigo, ña̱ xa̱a̱ íyo tu̱ʼva ña̱ sakéenaña (Juan 4:35). Tá ni̱ya̱ʼa ki̱ʼva iin ku̱i̱ya̱, ta̱ Jesús ni̱ka̱ʼa̱nra xíʼin na̱ discípulora: “Ku̱a̱ʼání kúú ña̱ sákeeyó” (Mat. 9:​37, 38). Ta tá ni̱ya̱ʼa loʼo tiempo ndi̱kó tukura ni̱ka̱ʼa̱nra ña̱yóʼo: “Ku̱a̱ʼání kúú ña̱ sákeeyó, [...] ka̱ʼa̱nndó xíʼin ta̱ ndísochíñu xíʼin ña̱ sákeendó ña̱ ná chindaʼára ku̱a̱ʼáka na̱ sákee” (Luc. 10:2). Ta̱ Jesús xi̱kunda̱a̱-inira ña̱ kiviva xa̱a̱ ku̱a̱ʼání na̱ yiví kandíxana tu̱ʼun Ndióxi̱. Ña̱kán tá xi̱xaa̱ savana xi̱sakúaʼana xa̱ʼa̱ Jehová, xi̱kusi̱íní-inira (Luc. 10:21).

16. ¿Ndáa ejemplo xi̱niñúʼu ta̱ Jesús ña̱ chi̱ndeétáʼanra xíʼin na̱ discípulora ña̱ kusi̱í-inina natúʼunna xíʼin na̱ yiví? (Lucas 13:​18-21; koto na̱ʼná).

¹⁶ Ta̱ Jesús ni̱ka̱ʼa̱nra xíʼin na̱ discípulora ña̱ ná kǒo ndakava-inina ta ná ndakundeéna natúʼunna xíʼin na̱ yiví, chi kiviva xa̱a̱na sakúaʼana xa̱ʼa̱ Ndióxi̱ ta ña̱yóʼo chindeétáʼan xíʼinna ña̱ kusi̱í-inina keʼéna chiñu yóʼo. Ná ka̱ʼa̱nyó xa̱ʼa̱ u̱vi̱ ejemplo ña̱ xi̱niñúʼu ta̱ Jesús (kaʼvi Lucas 13:​18-21). Ta̱ Jesús ni̱ka̱ʼa̱nra ña̱ tu̱ʼun Ndióxi̱ kooña nda̱a̱ táki̱ʼva íyo ndikín ña̱ mostaza chi ña̱yóʼo xáʼnuña ta xáa̱ña ndúuña iin yitu̱n káʼnu. Xíʼin ña̱yóʼo xi̱kuni̱ kachira ña̱ ku̱a̱ʼáníva na̱ yiví xa̱a̱ sakúaʼa xa̱ʼa̱ Ndióxi̱ ta kǒo nda̱a̱ ni iin ña̱ kivi kasi nu̱úna ña̱ keʼéna ña̱yóʼo. Ta saátu ni̱ka̱ʼa̱nra ña̱ tu̱ʼun Ndióxi̱ xa̱a̱ña kooña nda̱a̱ táki̱ʼva íyo levadura ña̱ sáku̱i̱ya̱ yuxa̱n. Xíʼin ña̱yóʼo xi̱kuni̱ kachira ña̱ natúʼunyó xa̱ʼa̱ Ndióxi̱ iníísaá nu̱ú ñuʼú ta ña̱yóʼo chindeétáʼanña xíʼin na̱ yiví ña̱ nasamana ña̱ kéʼéna ni su̱ví xa̱a̱ ndi̱ku̱n kamaví kuniyó keʼéna ña̱yóʼo. Xíʼin ña̱ ni̱ka̱ʼa̱n ta̱ Jesús chi̱ndeétáʼanra xíʼin na̱ discípulora ña̱ kunda̱a̱-inina ña̱ tá nátúʼunna xíʼin na̱ yiví xa̱ʼa̱ tu̱ʼun Ndióxi̱, na̱yóʼo kivi xa̱a̱na nasamana ki̱ʼva ña̱ íyona.

17. ¿Ndáa xa̱ʼa̱ kúú ña̱ xíniñúʼu ndakundeéyó kusi̱í-iniyó natúʼunyó xíʼin ndiʼi na̱ yiví?

¹⁷ Tá nátúʼunyó xa̱ʼa̱ Ndióxi̱, kíʼinyó kuenta ña̱ va̱ʼaní chíndeétáʼan ña̱yóʼo xíʼin na̱ yiví na̱ íyo iníísaá nu̱ú ñuʼú, ta ña̱yóʼo chíndeétáʼanña xíʼinyó ña̱ kusi̱íka-iniyó natúʼunyó xíʼin na̱ yiví. Ndiʼi ku̱i̱ya̱, ku̱a̱ʼání na̱ yiví na̱ kúni̱ kunda̱a̱-ini xa̱ʼa̱ Ndióxi̱ xáʼa̱nna Conmemoración ta kíxáʼana káʼvina Biblia xíʼinyó. Ta saátu ku̱a̱ʼání kúú na̱ kíxáʼa kée nátúʼun xíʼin na̱ yiví xa̱ʼa̱ Ndióxi̱ ta ku̱a̱ʼánítu kúú na̱ xáa̱ ndákuchi. ¿Nda̱saaka na̱ yiví kúma̱ní xa̱a̱ kunda̱a̱-ini xa̱ʼa̱ tu̱ʼun Ndióxi̱? Kǒo kúnda̱a̱ví-iniyó. Soo ña̱ kúnda̱a̱-iniyó kúú ña̱ ku̱a̱ʼáníka na̱ yiví ndákaya Jehová ña̱ va̱ʼa ka̱kuna tá ná kixaa̱ ña̱ gran tribulación (Apoc. 7:​9, 14). Jehová kúnda̱a̱-inira ña̱ íyo ku̱a̱ʼáníkava na̱ yiví na̱ kivi xa̱a̱ kunda̱a̱-ini xa̱ʼa̱ra, xa̱ʼa̱ ña̱kán xíniñúʼu ndakundeéyó natúʼunyó xíʼin ndiʼi na̱ yiví xa̱ʼa̱ra.

18. ¿Ndáaña kúni̱yó ña̱ ná kiʼin na̱ yiví kuenta xíʼin?

¹⁸ Miíyó na̱ ndixa ndíku̱n ta̱ Jesús ndiʼi tiempo náʼa̱yó ña̱ kúsi̱í-iniyó tá nátúʼunyó xíʼin na̱ yiví xa̱ʼa̱ Ndióxi̱. Tá xi̱kiʼin na̱ yiví kuenta ña̱ ndakúní ni̱xi̱yo ini na̱ apóstol ta xi̱kusi̱í-inina xi̱natúʼunna xíʼin na̱ yiví xa̱ʼa̱ Jehová, “ki̱ʼinna kuenta ña̱ xi̱kitáʼanna xíʼin ta̱ Jesús” (Hech. 4:13). Saátu miíyó kúni̱yó ña̱ ná kiʼin na̱ yiví kuenta ña̱ kúsi̱í-iniyó nátúʼunyó xa̱ʼa̱ Ndióxi̱ nda̱a̱ táki̱ʼva ke̱ʼé ta̱ Jesús.