Pregunta ña̱ kéʼé na̱ káʼvi tutu yóʼo

¿Nda̱a̱ ama sandíʼiyó ka̱ʼa̱nyó xa̱ʼa̱ tu̱ʼun va̱ʼa?

Ta̱ Jesús ka̱chira: “Ta natúʼunna tu̱ʼun va̱ʼa xa̱ʼa̱ Reino Ndióxi̱ iníísaá nu̱ú ñuʼú yóʼo ña̱ va̱ʼa kunda̱a̱-ini ndiʼi na̱ yiví tasaá ndiʼi-xa̱ʼa̱ ñuyǐví” (Mat. 24:14). Nu̱ú versículo yóʼo xíʼin versículo 6 xíʼin 13, ña̱ tu̱ʼun griego télos, kúni̱ kachina ña̱ ndiʼi-xa̱ʼa̱ ñuyǐví ta̱ Ndi̱va̱ʼa tá ná ki̱xaa̱ Armagedón (Apoc. 16:​14, 16). Ña̱kán tá kúma̱níka ndiʼi-xa̱ʼa̱ ñuyǐví yóʼo natúʼunkavayó xa̱ʼa̱ tu̱ʼun va̱ʼa. Ña̱yóʼo kúú iin ña̱ xa̱á ña̱ kúnda̱a̱-iniyó xíʼin ña̱yóʼo.

Tá ya̱chi̱ xi̱kundaa̱-iniyó ña̱ kǒo natúʼunkayó xa̱ʼa̱ tu̱ʼun va̱ʼa tá ná ndiʼi-xa̱ʼa̱ Babilonia ña̱ káʼnu ta kixáʼa tu̱ndóʼo káʼnu (Apoc. 17:​3, 5, 15, 16). Xi̱kundaa̱-iniyó tá ná kixáʼa ña̱ tu̱ndóʼo káʼnu va̱ása taxikaví Jehová ña̱ ná kunda̱a̱-ini na̱ yiví xa̱ʼa̱ tu̱ʼun va̱ʼa (Is. 61:2). Saátu xi̱ndakanixi̱níyó ña̱ tá kúma̱níka kixáʼa ña̱ tu̱ndóʼo káʼnu, nda̱saa na̱ ka̱ku kuití kúú na̱ nda̱kú íyo ini xíʼin Jehová. Xi̱ndakanixi̱níyó na̱yóʼo koona nda̱a̱ táki̱ʼva ni̱xi̱yo na̱ judío na̱ ni̱ka̱ku tá sa̱ndíʼi-xa̱ʼa̱na ñuu Jerusalén tá ku̱i̱ya̱ 607 tiempo xi̱naʼá, na̱ nda̱kiʼin marca ña̱ ka̱kuna xa̱ʼa̱ ña̱ xi̱ndasakáʼnuna Jehová ta xi̱kundasína ña̱ va̱ása va̱ʼa (Ezeq. 5:11; 9:4). Soo ña̱yóʼo va̱ása kítáʼanña xíʼin ña̱ ni̱ka̱ʼa̱n ta̱ Jesús ña̱ va̱xi nu̱ú Mateo 24:​14, ña̱yóʼo káʼa̱nña ña̱ na̱ yiví kiviva xa̱a̱na kunda̱a̱-inina xa̱ʼa̱ tu̱ʼun va̱ʼa tá si̱lóʼo kúma̱ní kixaa̱ ña̱ Armagedón.

Ña̱ káʼa̱n Mateo 24:14 chíndeétáʼanña xíʼinyó ña̱ kunda̱a̱-iniyó xíʼin ña̱ káʼa̱n Apocalipsis 16:​21, tá káʼa̱nña xa̱ʼa̱ ña̱ ko̱yo ñíí. Tá ná kaʼvi va̱ʼayó xa̱ʼa̱ u̱vi̱ texto yóʼo kiʼinyó kuenta ña̱ kítáʼanvaña, ¿ndáa ki̱ʼva? Xa̱ʼa̱ ki̱ʼva ña̱ ndákuiin na̱ yiví tá nátúʼunyó xíʼinna xa̱ʼa̱ Reino Ndióxi̱. Nda̱a̱ táki̱ʼva ka̱ʼyí ta̱ apóstol Pablo nu̱ú na̱ yiví na̱ ka̱ku, nu̱ú na̱yóʼo iin ña̱ va̱ʼava kúú ña̱ natúʼunyó xíʼinna. Soo nu̱ú na̱ sáa̱ ini xíni Ndióxi̱ su̱ví ña̱ va̱ʼa kúú ña̱ natúʼunyó xíʼinna (2 Cor. 2:​15, 16). Sáa̱nína xa̱ʼa̱ ña̱ nátúʼunyó xíʼinna saáchi kúnda̱a̱-inina nu̱ú ñuyǐví ta̱ Ndi̱va̱ʼa ndóona, ta ta̱yóʼo kúú ta̱ xáʼndachíñu nu̱úña ta si̱lóʼo ndiʼi-xa̱ʼa̱ña (Juan 7:7; 1 Juan 2:17; 5:19).

Saátu káʼa̱n Apocalipsis 16:21 ña̱ ndeéní koo tu̱ndóʼo ña̱ kixi. Ña̱yóʼo náʼa̱ña nu̱úyó ña̱ tá ná koo tu̱ndóʼo káʼnu, ku̱a̱ʼáníka na̱ yiví xa̱a̱ kunda̱a̱-ini xa̱ʼa̱ ki̱vi̱ Jehová (Ezeq. 39:7). ¿Á kúni̱ kachi ña̱yóʼo ña̱ tá ná ndiʼi-xa̱ʼa̱ Babilonia ña̱ káʼnu kooka na̱ yiví na̱ kuni̱ kunda̱a̱-ini xa̱ʼa̱ ki̱vi̱ Jehová? Sana kookavana. Ta nda̱a̱ ndakaʼánna xa̱ʼa̱ na̱ testigo Jehová ña̱ ku̱a̱ʼání ku̱i̱ya̱ ni̱xi̱kana na̱túʼunna ña̱ ndiʼi-xa̱ʼa̱ veʼe-ñu̱ʼu vatá.

Ki̱ʼva saá ndo̱ʼo na̱ ñuu Egipto tá ki̱xi u̱xu̱ tu̱ndóʼo nu̱úna. Tándi̱ʼi ta̱xi Jehová castigo ndaʼa̱ na̱ ndióxi̱ vatá na̱ ñuu Egipto, ku̱a̱ʼání na̱ yiví na̱ kǒo níxi̱kuu israelita ni̱xa̱a̱na nda̱kutáʼanna xíʼin na̱ ñuu Ndióxi̱ (Éx. 12:​12, 37, 38). Sana na̱ yiví yóʼo ni̱xa̱a̱na nda̱kutáʼanna xíʼin Jehová tá xi̱nina ña̱ ni̱xi̱nu u̱xu̱ saá tu̱ndóʼo ña̱ ni̱ka̱ʼa̱n ta̱ Moisés xa̱ʼa̱.

Nda̱a̱ ndáaka na̱ ná ndakutáʼan xíʼin Jehová tá ná ndiʼi sandíʼi-xa̱ʼa̱na Babilonia ña̱ káʼnu, na̱yóʼo chindeétáʼanna xíʼin na̱ ñani ta̱ Cristo na̱ kíndo̱oka nu̱ú ñuʼú yóʼo ta saá xa̱a̱na koona ndikachi válí (Mat. 25:​34-36, 40). Kivi xa̱a̱na ndakutáʼanna xíʼin Jehová tá si̱lóʼo kúma̱ní kixaa̱ ña̱ Armagedón, tá xa̱a̱ ná ku̱ʼu̱n na̱ nda̱kaxin Ndióxi̱ ku̱ʼu̱n chí ndiví na̱ kíndo̱oka nu̱ú ñuʼú yóʼo.

Ña̱ ku̱ndaa̱-iniyó yóʼo náʼa̱ña nu̱úyó ña̱ kúʼvi̱ní-ini Jehová xínira na̱ yiví ta kúndáʼvi-inira xínirana. Saáchi Jehová kǒo kúni̱ra ña̱ ná ndiʼi-xa̱ʼa̱ nda̱a̱ ni iin na̱ yiví, chi ña̱ kúni̱ra kúú ña̱ ná ndikó-inina (2 Ped. 3:9).