Ta̱ Jesús kúúra iin su̱tu̱ káʼnu ta va̱ʼaní kúnda̱a̱-inira xíʼinyó

1, 2. a) ¿Nda̱chun chi̱ndaʼá Jehová se̱ʼera ña̱ ki̱xira nu̱ú ñuʼú yóʼo? b) ¿Ndáaña sákuaʼayó nu̱ú artículo yóʼo? (Hebreos 5:​7-9)

XA̱A̱ YÁʼA 2,000 ku̱i̱ya̱ Jehová chi̱ndaʼára se̱ʼera ki̱xira nu̱ú ñuʼú yóʼo. ¿Nda̱chun? Ña̱ va̱ʼa ndatavára na̱ yiví ndaʼa̱ ku̱a̱chi ta va̱ása kuvikana ta saátu ña̱ ndasaviíra ndiʼi ña̱ va̱ása va̱ʼa ña̱ kéʼé ta̱ Ndi̱va̱ʼa (Juan 3:16; 1 Juan 3:8). Jehová xi̱kunda̱a̱-inira ña̱ ni̱xa̱a̱ ta̱ Jesús ni̱xi̱yora nda̱a̱ táki̱ʼva íyo miíyó ña̱yóʼo chi̱ndeétáʼan xíʼinra ña̱ ni̱xa̱a̱ra ndu̱ura su̱tu̱ káʼnu ta kúnda̱a̱-inira xíʼin ña̱ ndóʼoyó. Nda̱kiʼinra chiñu ña̱ koora su̱tu̱ káʼnu tá ku̱i̱ya̱ 29 tá nda̱kuchira.a

² Nu̱ú artículo yóʼo kunda̱a̱-iniyó xa̱ʼa̱ ña̱ ki̱xi ta̱ Jesús nu̱ú ñuʼú yóʼo chi̱ndeétáʼanña xíʼinra ña̱ viíní ke̱ʼéra chiñura, ta saá ni̱xa̱a̱ra ndu̱ura su̱tu̱ káʼnu ta kúnda̱a̱-inira xíʼin ña̱ ndóʼoyó. Ndáyáʼviní kunda̱a̱-iniyó xa̱ʼa̱ ña̱yóʼo saáchi ña̱yóʼo chindeétáʼanña xíʼinyó ña̱ kuyatinyó nu̱ú Jehová ta ka̱ʼa̱nyó xíʼinra, ni tá ndákava-iniyó xa̱ʼa̱ ña̱ ke̱ʼéyó ña̱ va̱ása va̱ʼa á ni̱ki̱ʼviyó ku̱a̱chi (kaʼvi Hebreos 5:​7-9).

SE̱ʼE NDIÓXI̱ KI̱XIRA NU̱Ú ÑUʼÚ YÓʼO

3, 4. ¿Ndáaña ndo̱ʼo ta̱ Jesús tá ki̱xira nu̱ú ñuʼú yóʼo?

³ Ku̱a̱ʼáníyó nása̱ma ña̱ ndóʼoyó sava yichi̱, tá kúú ña̱ ku̱ʼu̱nyó kooyó inka ñuu, sándakooyó na̱ veʼeyó á na̱ migoyó, tá kúu ña̱yóʼo íxayo̱ʼvi̱níña xíʼinyó. Soo ña̱ ke̱ʼé ta̱ Jesús nda̱a̱ ni iin ña̱yóʼo va̱ása kítáʼan xíʼinña. Ta̱ Jesús kúú ta̱ siʼna i̱xava̱ʼa Ndióxi̱ ta xi̱kuumiíra chiñu ña̱ ndáyáʼviní, xi̱kuʼvi̱ní-ini Jehová xi̱xinirara ta xi̱kusi̱í-inira ña̱ xi̱xiyora xíʼin yivára chí ndiví (Sal. 16:11; Prov. 8:30). Filipenses 2:7 náʼa̱ña ña̱ sa̱ndákoora ndiʼi ña̱ xi̱kuumiíra ña̱ va̱ʼa ki̱xira nu̱ú ñuʼú yóʼo ña̱ koora xíʼin na̱ yiví ku̱a̱chi.

⁴ Ná ndakanixi̱níyó xa̱ʼa̱ ña̱ ndo̱ʼo ta̱ Jesús tá sa̱kán ki̱xaa̱ra nu̱ú ñuʼú yóʼo. Ka̱kura ti̱xin iin familia na̱ nda̱ʼví, saáchi tá ta̱xi na̱ yivára sacrificio tá ka̱kura su̱ví ña̱ yaʼviví kúú ña̱ ta̱xina xa̱ʼa̱ra (Lev. 12:8; Luc. 2:24). Inka ña̱ ndo̱ʼora, tá ku̱ndaa̱-ini ta̱ rey Herodes ña̱ ka̱kura xi̱kunira kaʼníra ta̱ Jesús. Xa̱ʼa̱ ña̱kán xi̱nuna ni̱xa̱ʼa̱nna chí ñuu Egipto ña̱ va̱ʼa kǒo kaʼnínara (Mat. 2:​13, 15). Ku̱a̱ʼání ña̱ ndo̱ʼora tá xi̱takura.

5. ¿Ndáaña xi̱ni ta̱ Jesús tá ni̱xi̱yora nu̱ú ñuʼú yóʼo ta ndáa ki̱ʼva chi̱ndeétáʼan ña̱yóʼo xíʼinra ña̱ xa̱a̱ra koora su̱tu̱ káʼnu? (Koto na̱ʼná).

⁵ Tá ni̱xi̱yo ta̱ Jesús nu̱ú ñuʼú yóʼo xi̱xinira ña̱ xi̱xoʼvi̱ ku̱a̱ʼání na̱ yiví. Saátu ni̱xo̱ʼvi̱ miíra tá ni̱xi̱ʼi̱ yivá ndáʼvira ta̱ José. Tá xi̱xikara xi̱natúʼunra xíʼin na̱ yiví xa̱ʼa̱ Ndióxi̱ xi̱ndakutáʼanra xíʼin na̱ yiví na̱ xi̱kuumií lepra, na̱ kǒo tívi nu̱ú, na̱ kǒo kívi ka̱nda xíʼin na̱ xi̱ndakava-ini xa̱ʼa̱ ña̱ ni̱xi̱ʼi̱ se̱ʼena ta ku̱ndáʼvi-inira xi̱nira ndiʼi na̱yóʼo (Mat. 9:​2, 6; 15:30; 20:34; Mar. 1:​40, 41; Luc. 7:13). Tá ni̱xi̱yora chí ndiví xi̱kunda̱a̱va-inira ña̱ xi̱xoʼvi̱ na̱ yiví, soo tá ki̱xira nu̱ú ñuʼú yóʼo va̱ʼaníka ku̱ndaa̱-inira xíʼin ña̱ xi̱ndoʼo na̱yóʼo (Is. 53:4). Xa̱ʼa̱ ña̱ ndo̱ʼora kúú ña̱ ni̱xa̱a̱ra ku̱ndaa̱ va̱ʼa inira xíʼin ña̱ xi̱ndoʼo na̱ yiví, tá kúú ña̱ xi̱ndi̱ʼi̱-inina xíʼin ña̱ xi̱xoʼvi̱na. Nda̱a̱ mií ta̱ Jesús xi̱ndi̱ʼi̱-inira, xi̱kunaara ta xi̱ndakava-inira nda̱a̱ táki̱ʼva ndóʼo ndiʼi miíyó.

VIÍNÍ KÉʼÉ TA̱ JESÚS XÍʼIN NA̱ YIVÍ

6. ¿Ndáaña sákuaʼayó xíʼin ña̱ ni̱ka̱ʼa̱n ta̱ profeta Isaías? (Isaías 42:3).

⁶ Tá xi̱natúʼun ta̱ Jesús xíʼin na̱ yiví, viíní xi̱keʼéra xíʼin na̱ nda̱ʼví ta saá kúú ña̱ ni̱xi̱nu profecía ña̱ ka̱ʼyí ta̱ profeta Isaías. Nu̱ú Escrituras Hebreas sava yichi̱ káʼa̱nña, na̱ yiví na̱ ndakúní ta kǒo ña̱ʼa kúma̱ní nu̱úna íyona nda̱a̱ táki̱ʼva íyo iin jardín ña̱ va̱ʼa kána ña̱ʼa nu̱ú ta saátu íyona nda̱a̱ táki̱ʼva íyo yitu̱n tú ku̱a̱ʼání yu̱ku̱ ndaʼa̱ (Sal. 92:12; Is. 61:3; Jer. 31:12). Na̱ nda̱ʼví xíʼin na̱ ndákava-ini íyona nda̱a̱ táki̱ʼva íyo iin ndo̱o̱ tú xa̱a̱ ni̱ta̱ʼnu ta saátu íyona nda̱a̱ táki̱ʼva íyo ñu̱ʼu ña̱ sa̱kán kixáʼa xíxi, ña̱yóʼo va̱ása níxi̱ndayáʼviña nu̱ú na̱ yiví (kaʼvi Isaías 42:3). Xíʼin ña̱yóʼo, ta̱ Isaías ni̱ka̱ʼa̱nra, ta̱ Jesús kundáʼvi-inira kunira na̱ yiví na̱ va̱ása níxi̱kuni̱na kunina.

7, 8. ¿Ndáa ki̱ʼva sa̱xínu ta̱ Jesús profecía ña̱ ni̱ka̱ʼa̱n ta̱ Isaías?

⁷ Ta̱ Mateo xi̱niñúʼura tu̱ʼun ña̱ ni̱ka̱ʼa̱n ta̱ Isaías xa̱ʼa̱ ña̱ keʼé ta̱ Jesús: “Va̱ása ka̱ʼnu̱kara ndo̱o̱ tú xa̱a̱ ni̱ta̱ʼnu̱ ta ni va̱ása ndaʼvara ñuʼu̱ ña̱ sa̱kán xíxi̱” (Mat. 12:20). Ku̱a̱ʼání milagro ña̱ ke̱ʼé ta̱ Jesús chi̱ndeétáʼanña xíʼin na̱ yiví na̱ xi̱xoʼvi̱ á na̱ va̱ása níxi̱ndatu ña̱ ndaʼana. Ná ndakanixi̱níyó xa̱ʼa̱ ta̱a ta̱ xi̱kuumií lepra. ¿Á nda̱kanixi̱níra ña̱ va̱ása ndaʼakara ta ni va̱ása ndakutáʼankara xíʼin na̱ veʼera á xíʼin na̱ migora? (Luc. 5:​12, 13). Ta saátu ná ndakaʼányó xa̱ʼa̱ ta̱a ta̱ va̱ása níxi̱kivi kuniso̱ʼo ni ña̱ ka̱ʼa̱nra. ¿Ndáaña xi̱ndoʼora tá xi̱xitora ña̱ xi̱natúʼun inkana soo miíra va̱ása níxi̱kivi ka̱ʼa̱nra ni ña̱ kuniso̱ʼora? (Mar. 7:​32, 33). Soo íyokava ña̱ ku̱u.

⁸ Tiempo ña̱ ni̱xi̱yo ta̱ Jesús ku̱a̱ʼání na̱ judío va̱ása va̱ʼa níxindakanixi̱nína xa̱ʼa̱ kue̱ʼe̱ ña̱ xi̱kuumií inka na̱ yiví á xa̱ʼa̱ ña̱ ka̱ku chiʼñana, saáchi xindakanixi̱nína xa̱ʼa̱ ku̱a̱chi ña̱ xi̱kiʼvina á ña̱ xi̱kiʼvi yivána kúú ña̱ xi̱ndoʼona ña̱yóʼo (Juan 9:2). Xa̱ʼa̱ ña̱kán na̱ xi̱kuumií kue̱ʼe̱ á na̱ ndu̱u chiʼña, inkana xi̱kundasína xi̱xinina miína. Soo ta̱ Jesús sa̱ndáʼarana ta na̱yóʼo ki̱xáʼa tukuna kándíxana Ndióxi̱ ta saá ni̱xi̱nu ña̱ ka̱ʼyí ta̱ Isaías. ¿Ndáaña sákuaʼayó xíʼin ña̱yóʼo?

9. ¿Ndáa ki̱ʼva káʼa̱n Hebreos 4:​15, 16 xa̱ʼa̱ ta̱ Jesús ña̱ kúúra su̱tu̱ káʼnu ta kúnda̱a̱-inira xíʼin ña̱ ndóʼo inkana?

⁹ (Kaʼvi Hebreos 4:​15, 16). Kivi kandíxayó ña̱ kúnda̱a̱va-ini ta̱ Jesús xíʼin ña̱ ndóʼoyó. Tu̱ʼun griego ña̱ ni̱ka̱ʼyi̱ ‘kúnda̱a̱va-ininaʼ ña̱yóʼo kúni̱ kachiña ña̱ inka na̱ yiví ndákava-inina á xóʼvi̱na xa̱ʼa̱ ña̱ ndóʼo inkana. Ta nu̱ú Hebreos 10:34 ta̱ Pablo xi̱niñúʼura tu̱ʼun yóʼo ña̱ ná kunda̱a̱-inina xíʼin na̱ ñúʼu veʼeka̱a. Relato ña̱ káʼa̱n xa̱ʼa̱ milagro ña̱ ke̱ʼé ta̱ Jesús náʼa̱ña ña̱ xi̱xoʼvi̱ra tá xi̱xitora ña̱ xi̱ndoʼo inkana. Va̱ása nísandáʼa kuitírana saáchi ndixa xi̱ndi̱ʼi̱-inira xa̱ʼa̱na ta xi̱kuni̱ra chindeétáʼanra xíʼinna. Tá kúú, kiviva xíka kundichira ña̱ va̱ʼa sandáʼara ta̱a ta̱ xi̱kuumií lepra soo kǒo níkeʼéra ña̱yóʼo chi ña̱ ke̱ʼéra kúú ña̱ ti̱inrara ña̱ va̱ʼa sa̱ndáʼarara. Sana ña̱yóʼo kúú yichi̱ nu̱ú ña̱ ku̱yatin iinna nu̱ú ta̱yóʼo. Saátu va̱ʼaní ke̱ʼéra xíʼin ta̱a ta kǒo níxikivi kuniso̱ʼo, saáchi ni̱xa̱ʼa̱nra xíʼinra nu̱ú kǒo ku̱a̱ʼá na̱ yiví ta kán sa̱ndáʼarara. Ta saátu tá kundasí nu̱ú iin ta̱ fariseo xi̱nira iin ñaʼá ñá xi̱keʼé ña̱ va̱ása va̱ʼa ñá nda̱kata xa̱ʼa̱ ta̱ Jesús ta sa̱ndáyañá xa̱ʼa̱ra xíʼin yixí xi̱niñá soo ta̱ Jesús nda̱kiʼinra tu̱ʼunñá (Mat. 8:3; Mar. 7:33; Luc. 7:44). Nda̱a̱ ni iin yichi̱ kǒo níkundasíra kunira na̱ xi̱kuumií kue̱ʼe̱ á na̱ xi̱kiʼvi iin ku̱a̱chi ndeé. Viíní xi̱keʼéra xíʼinna ta xi̱kunda̱a̱-inira xíʼin ña̱ xi̱ndoʼona. Kivi kandíxayó ña̱ saá kéʼéra xíʼin miíyó tiempo vitin.

NÁ KUNDIKUNYÓ YICHI̱ TA̱ SU̱TU̱ KÁʼNU

10. ¿Ndáaña kúúmiíyó ña̱ va̱ʼa chindeétáʼanyó xíʼin na̱ yiví na̱ kǒo kívi koto xíʼin na̱ kǒo kívi kuniso̱ʼo? (Koto na̱ʼná).

¹⁰ Xa̱ʼa̱ ña̱ kúni̱yó kundiku̱nyó yichi̱ ta̱ Jesús, chíkaa̱yó ndee̱ ña̱ na̱ʼa̱yó ña̱ kúʼvi̱-iniyó xíniyó inkana ta saátu ña̱ kúnda̱a̱-iniyó xíʼin ña̱ ndóʼona (1 Ped. 2:21; 3:8). Kǒo kíviví sandáʼayó na̱ yiví na̱ kǒo kívi kuniso̱ʼo á na̱ kǒo kívi koto soo kiviva chindeétáʼanyó xíʼinna ña̱ sakúaʼana xa̱ʼa̱ Ndióxi̱. Tá kúú, xa̱a̱ táváyó tutu ña̱ seña, ta xa̱a̱ yáʼaka 100 nu̱ú tu̱ʼun íyo ña̱yóʼo. Ta saátu xa̱a̱ táváyó tutu ña̱ braille ta yáʼaka 60 nu̱ú tu̱ʼun xa̱a̱ íyo ña̱yóʼo, xíʼin video ña̱ va̱xi audiodescripción xíʼin ta yáʼaka 100 nu̱ú tu̱ʼun xa̱a̱ íyoña. Saá kúú ña̱ kivi xa̱a̱ na̱ yiví na̱ kǒo kívi kuniso̱ʼo xíʼin na̱ kǒo kívi koto ña̱ kunda̱a̱-inina xa̱ʼa̱ Jehová xíʼin xa̱ʼa̱ se̱ʼera.

11. ¿Ndáa ki̱ʼva ndíku̱n na̱ ñuu Ndióxi̱ yichi̱ ta̱ Jesús? (Hechos 2:​5-7, 33; koto na̱ʼná).

¹¹ Tá nda̱taku ta̱ Jesús, ta̱xira espíritu santo ndaʼa̱ na̱ discípulora ña̱ natúʼunna xa̱ʼa̱ tu̱ʼun va̱ʼa xíʼin na̱ ni̱xa̱ʼa̱n vikó ña̱ Pentecostés “tu̱ʼun miína” (kaʼvi Hechos 2:​5-7, 33). Saátu kéʼé na̱ ñuu Jehová tiempo vitin, saáchi kéʼéna ku̱a̱ʼání ña̱ʼa ña̱ va̱ʼa natúʼunna xíʼin na̱ yiví na̱ káʼa̱n inka tu̱ʼun. Távána tutu ña̱ káʼa̱n xa̱ʼa̱ Ndióxi̱ yáʼaka 1,100 nu̱ú tu̱ʼun, ta sava tu̱ʼun yóʼo loʼoníva na̱ yiví káʼa̱nña. Tá kúú, sava tu̱ʼun ña̱ káʼa̱nna iníí continente ña̱ america, yáʼaka 160 tu̱ʼun yóʼo xa̱a̱ kána tutu ña̱ tu̱ʼun miína ña̱ tává na̱ ñuu Ndióxi̱ ña̱ va̱ʼa kunda̱a̱-inina xa̱ʼa̱ tu̱ʼun va̱ʼa. Ta yáʼaka 20 nu̱ú tu̱ʼun romaní á gitano xa̱a̱ kána tutu ña̱ káʼa̱nna tu̱ʼun yóʼo. Xa̱ʼa̱ ña̱kán xa̱a̱ ku̱a̱ʼání na̱ yiví xa̱a̱ kúnda̱a̱-inina xa̱ʼa̱ ña̱ nda̱a̱.

12. ¿Ndáaka ña̱ kéʼé na̱ ñuu Ndióxi̱?

¹² Na̱ ñuu Ndióxi̱ va̱ása nátúʼun kuitína xa̱ʼa̱ tu̱ʼun va̱ʼa, chi saátu chíndeétáʼanna xíʼin na̱ yáʼa nu̱ú tu̱ndóʼo, tá kúun kini sâví á tá kúú inkaka tu̱ndóʼo. Ku̱a̱ʼání na̱ ñaniyó xíʼi ná ku̱ʼvayó xáʼa̱nna chíndeétáʼanna xíʼin na̱ yáʼa nu̱ú tu̱ndóʼo yóʼo. Saátu kéʼéna veʼe nu̱ú kivi ndakutáʼan na̱ yiví ña̱ sakúaʼakana xa̱ʼa̱ Ndióxi̱ ta kunda̱a̱-inina ña̱ kúʼvi̱ní-inira xínirana.

TA̱ SU̱TU̱ KÁʼNU CHÍNDEÉTÁʼANRA XÍʼIN IIN TÁ IINYÓ

13. ¿Ndáa ki̱ʼva chíndeétáʼan ta̱ Jesús xíʼinyó?

¹³ Ta̱ Jesús kúúra iin Pastor ta̱ va̱ʼaní ta táxira ña̱ xíniñúʼu iin tá iinyó ña̱ va̱ʼa kutáʼanyó xíʼin Ndióxi̱ (Juan 10:14; Efes. 4:7). Tá ndóʼoyó tu̱ndóʼo kivi kundoʼoyó nda̱a̱ táki̱ʼva ndóʼo tú ndo̱o̱ tú ni̱ta̱ʼnu̱ á ñu̱ʼu ña̱ sa̱kán kixáʼa xíxi. Sana ndákava-iniyó xa̱ʼa̱ ña̱ kúúmiíyó iin kue̱ʼe̱ á xa̱ʼa̱ iin ña̱ va̱ása va̱ʼa ke̱ʼéyó á sana xa̱ʼa̱ ña̱ kúúmiíyó iin ku̱a̱chi xíʼin iin na̱ hermano. Tá ndóʼoyó ña̱yóʼo xóʼvi̱níyó ta íxayo̱ʼvi̱ña xíʼinyó ña̱ ndakanixi̱níyó xa̱ʼa̱ ña̱ ndátuyó ndakiʼinyó chí nu̱únínu. Soo ná ndakaʼányó ña̱ xítova ta̱ Jesús ndiʼi ña̱ ndóʼoyó, kúnda̱a̱-inira xíʼin ña̱ ndóʼoyó ta chíndeétáʼanra xíʼinyó. Tá kúú, kivi kuniñúʼura espíritu santo ña̱ va̱ʼa taxira ndee̱ ndaʼa̱yó (Juan 16:7; Tito 3:6). Saátu kivi kuniñúʼura na̱ anciano na̱ íyo ti̱xin congregación á inkaka na̱ hermano ña̱ va̱ʼa chindeétáʼanna xíʼinyó ta chikaa̱na ndee̱ xíʼinyó (Efes. 4:8).

14. ¿Ndáaña kivi keʼéyó ña̱ va̱ʼa kǒo ndakava-iniyó?

¹⁴ Tá ndákava-iniyó ta túviyó ña̱ kǒoka ndee̱yó, ná ndakanixi̱níyó xa̱ʼa̱ ta̱ Jesús ta̱ kúú su̱tu̱ káʼnu. Ná ndakaʼányó, Jehová va̱ása níchindaʼá kuitíra ta̱ Jesús ña̱ ki̱xira nu̱ú ñuʼú yóʼo ña̱ kuvira xa̱ʼa̱yó, chi saátu ki̱xira ña̱ va̱ʼa kunda̱a̱-inira xíʼin tu̱ndóʼo ña̱ ndóʼo miíyó na̱ yiví ku̱a̱chi. Tá ndeéní ndákava-iniyó xa̱ʼa̱ ku̱a̱chi ña̱ ni̱ki̱ʼviyó, ta̱ Jesús íyo tu̱ʼvara ña̱ chindeétáʼanra xíʼinyó “mií tiempo ña̱ xíniñúʼuyóña” (Heb. 4:​15, 16).

15. ¿Ndáaña chi̱ndeétáʼan xíʼin iin ta̱ hermano ña̱ ndi̱kó tukura nu̱ú Jehová?

¹⁵ Ta̱ Jesús níʼira yichi̱ nu̱ú na̱ ndíku̱n miíra ña̱ va̱ʼa ndani̱ʼína na̱ ku̱xíká nu̱ú Ndióxi̱ (Mat. 18:​12, 13). Ná kotoyó ña̱ ndo̱ʼo ta̱ Stefano.b Ta̱vána ta̱yóʼo ti̱xin ñuu Ndióxi̱ ta tá ni̱ya̱ʼa 12 ku̱i̱ya̱ ndi̱kó tukura ni̱xa̱ʼa̱nra iin reunión. Ta̱yóʼo káchira: “Va̱ása va̱ʼa níkunii̱ ña̱ ku̱ʼi̱n reunión soo xi̱kuni̱i̱ ndakutáʼan tukui̱ xíʼin na̱ ñuu Jehová. Na̱ anciano na̱ ni̱ka̱ʼa̱n xíʼi̱n viíní nda̱kiʼinna yi̱ʼi̱. Xi̱ndakavaní-inii̱ xa̱ʼa̱ ña̱ ku̱xíkái̱ nu̱ú Jehová ta nda̱a̱ sava yichi̱ xi̱ndakanixi̱níi̱ ña̱ va̱ása ndikókai̱. Soo na̱ hermano sa̱ndákaʼánna miíi̱ ña̱ kúni̱va Jehová xíʼin ta̱ Jesús ná ndikói̱. Tá ndi̱kó tukui̱, na̱ hermano viíní nda̱kiʼinna yi̱ʼi̱ xíʼin na̱ veʼi̱. Tá ni̱ya̱ʼa loʼo tiempo ñá síʼíi̱ ki̱xáʼañá káʼviñá Biblia ta vitin inkáchi káchíñundi̱ nu̱ú Jehová”. Ta̱ Jesús ta̱ kúú su̱tu̱ káʼnu kúsi̱íní-inira tá xítora ña̱ chíndeétáʼanyó xíʼin na̱ ndíkó-ini ña̱ va̱ʼa ndasakáʼnu tukuna Jehová.

16. ¿Nda̱chun táxiyó tíxa̱ʼvi xa̱ʼa̱ ña̱ kúú ta̱ Jesús su̱tu̱ káʼnu?

¹⁶ Tá ki̱xi ta̱ Jesús nu̱ú ñuʼú yóʼo chi̱ndeétáʼanra xíʼin ku̱a̱ʼání na̱ yiví míí tiempo ña̱ xi̱xiniñúʼunara. Saátu tiempo vitin kivi kandíxayó ña̱ chindeétáʼanra xíʼinyó míí tiempo ña̱ xíniñúʼuyóra. Si̱lóʼo tiempo kúma̱ní ta chindeétáʼanra xíʼin na̱ yiví na̱ xíniso̱ʼo ña̱ káʼa̱n Ndióxi̱ ña̱ sa̱ñána ndaʼa̱ ku̱a̱chi. Táxiníyó tíxa̱ʼvi ndaʼa̱ Jehová xa̱ʼa̱ ña̱ nda̱kaxinra se̱ʼera ña̱ kúúra su̱tu̱ káʼnu saáchi va̱ʼaní kúnda̱a̱-inira xíʼin ña̱ ndóʼoyó.